Nai' Yohanis Asranit nanoni' tuaf amfaun
3
Oras Nai' Yesus na'nae nrair on naan ate, nai' Yohanis Asranit anmurai nanoni' tuaf amfaun anbi baer ruman na'roo na'ko kuan anbi propinsi Yudea. 2 In natoon am nak, “Aok-bian manekat aar ki! Hi ro he mmanaku' ma misaitan hi sanat ma penu sin, he mtebi mfain meu Uisneno nai. Fin oras ia, ansuun tuaf bisa mtaam amjair Uisneno Iin Na.”a3 Afi unu' Uisneno In mafefa kninu' tuaf es, kaann ee nai' Yesaya, antui nmatoom nok nai' Yohanis am nak,
“Of anmui' tuaf re' annao neu bare re' ka matua' fa, anhunun ma nkoa' am nak,
‘Hi ar-arki ro he mibarab ma miroitan ranan,
he mseun ma mtoup Uisneno In amneman!
Mineo ma minoon ranan he mseun Gwe!’”b
4 Nai' Yohanis in a'moin ii, on re' Uisneno In mafefa kniun' ein afi unu' sin. In paek ein, anmoe' sin na'kon paus unta. In pasu 'futu', anmoo' je na'ko pasu. In amnaaht ein, aknamat ma oin hau.c
5 Oras naan too mfaun ein neman he niit ma nateef nok nai' Yohanis. Sin neman na'kon kota Yerusalem, ma propinsi Yudea in afan nanan sin ok-oke'. Sin neman na'kon kuan ein re' anpaumakan noe Yarden amsa'. 6 Sin nfei sin neek ein, ma nmanaku' kuuk sin sanat ma penu sin ok-oke'. Rarit nai' Yohanis nasrain sin anbin noe Yarden.
7 Oras naan, tuaf na'kon partei pirsait Farisi ma partei pirsait Saduki msa' neman ma ntoit nai' Yohanis he nasrain sin. Mes oras in niit sin on naan ate, in naskarak sin im nak, “Hoe! Hi aar ki on re' kaun aputa-kriut! Uisneno of anhukun ki natuin hi 'mo'em maufinu sin. Hi kais mitenab am mak, hi of maen ampoi ma ka mipein fa In hukun.d 8 Onaim reko nneis hi misaitan hi sanat ma penu sin ok-oke', ma mtebi mfain nai meu Uisneno. Rarit ammoe' reko, nahuum on re' hau roet re' nafua fua reko. 9 Kais mitenab am mak, hi reko ki gwen, natuin hi aar ki re' ia, ka'o Abraham in sufan. Ampirsai kau! Fin Uisneno bisa nmoe' fatun re' ia njarin ka'o Abraham in sufan amsa'.e 10 Ampaant om! Fin anmui' Tuaf re' annaa' fani, nabarab anrair he nnoo' are' kanan roet re' sin fuak ein ka reko fa. Anno'o nrair sin on naan ate, In nait inporin sin neun ai.f
11 Oras ia, au usrain ki 'paek oe, he njair tanar nak, hi mkoit ma misaitan hi sanat ma penu sin. Mes of anmui' Tuaf es he neem. In re' naan, ma'tani nneis na'ko kau. Maski au 'jari haa in aan renu'-aan reka' msa', au ka umnees 'ok Ne fa. In of naheun hi neekm ein nok Uisneno In Asmaan Akninu'. In nakninu' ki msa', nahuum on re' tuaf anpaek ai he nout makrafu'.g 12 Fin In nnaa' a'tupa' re' matua' maak a'taum he nakrai ma nakpesa' nain maak apa' anbi naan. Rarit In nasaeb maak akniun' ein neun po'of. Mes maak aap ein naan, In nait inporin nataam sin neun ai mapina' abar-barat.”
Nai' Yohanis nasrain Usif Yesus
13 Oras naan, Nai' Yesus ansaun neem na'ko Galilea neu noe Yarden. In neem antoit nai' Yohanis he nasrain Je, 14 mes nai' Yohanis ka nroim fa. In nprotees am nak, “On mee m'es au usrain Ko, Usi'? Ka nsaan fa, oo? Usi', Ho es re' he musrain kau, tua. Naan, es re' au 'perluu!”
15 Mes Nai' Yesus nataah am nak, “Reko, ba'e. Mes oras ia, ho es re' he musrain Kau. Nok ranan naan, hit tatuin Uisneno In romin.”
Anneen on naan ate, nai' Yohanis nataah am nak, “Reko, tua.” Onaim in nasrain Nai' Yesus.
16 Nasrani nrair Je on naan ate, Nai' Yesus anpoi na'ko noe. Mes nok askeken ate, neon gwe tnanan natfe'i. Rarit In niit Uisneno In Asmanan ansaun neem neu Na, nahuum on re' kor-kefi, ma antoko nbi Na. 17 Rarit sin nnenan Uisneno In hanan na'ko neon gwe tnanan naan am nak,h
“In re' ia, Au Aan neka'.
In nmoe' Au neek ii nmariin piut-piut.”