Mage pamud'e dènge mèdha pae'a nidhu
10
A'ari pasue aa'i-aa'i! Mage miu bhèlu eele lii lolo dhu uru èèna, lod'o bèi-baki èdhi ètu era dhu dhèu pea boe. Ama Lamatua paj'uj'u j'ara hia rèngu aa'i-aa'i ra, pake ra'i-liru dhu kako uuru nèti rèngu. Aa Ama Lamatua hag'e eele èi dhasi, hèia ra kako d'ai cabèka dhasi dènge sod'a.a 2 Dhasi dènge ra'i-liru se, nuka sèmi lii pakasame sa. Te bèi-baki èdhi sèra lèka Musa nuka sèmi ama ho lere si, ka ra madhutu ra'i-liru, aa maso asa d'ara dhasi palere-lere dènge ne. Èèna sama sèmi èdhi dhu parcaya Kristus hèia abhu sarani, dhu peka na, èdhi j'aj'i dhèu unu Na, aa ti nanene Ne. 3 Bèi-baki èdhi aa'i-aa'i ra, ra'a nganga'a dhu Roh Lamatua sadia tèke hia ra.b 4 Aa rinu nèti èi dhu Roh Lamatua sadia hia ra kahèi. Èi dhu rinu èèna kalua nèti hadhu aae dhu Roh Lamatua paj'uj'u tèke. Rèngu lasi asa mia-mia èèna ka, hadhu èèna dhu ètu èèna le. Madhutu iia-iia na, hadhu èèna, nuka Kristus.c 5 Te ngaa Ama Lamatua d'èi boe dènge tatao dhèu ae sèra. Ka ropa ra kako palème era mamoo dhu taleo èèna, dhèu ae madhe. Ka ra padhane si palème era.d6 J'ara aa'i-aa'i se ho j'aj'i mi conto, sèna ka èdhi baku d'èi tao j'ara bhelu sama sèmi rèngu.e 7 Baku pae'a nidhu sèmi rèngu cahag'e. Ètu d'ara Sasuri Mola-Mèci, dhu suri, peka na, “Dhèu Isra'el madhèdi ra'a-rinu pesta ètu madha patung sapi iiki ci'u. Ka ra sogo-tagu ne.”f 8 Èdhi baku tao j'ara makae dènge dhèu dhu dhèu èmu-kamali boe èdhi. Te uru-uru sèra, rèngu tao j'ara makae sèmi sèra ka, hèia dua nguru tèlu riho dhèu madhe ètu d'ara ca lod'o doko èèna ka.g 9 Èdhi baku ad'u-ue bhabhelu rupa-rupa, ho neo te'a, Kristus huku èdhi, do aad'o. Te dhèu Isra'el cahag'e neo sèku Ama Lamatua sèmi èèna ka, ka Na hia mege ae-ae dhu dènge raco sèna ka kadhi pamadhe si.h 10 Èdhi baku ka'uu-kamuki kahèi. Te dhèu Isra'el cahag'e re'a dhoka ka'uu-kamuki di, ka Ama Lamatua pua ana pajuu Na èci nèti sorga mai pamadhe si.i
11 J'ara ne lèke mi dhèu Isra'el, sèna ka j'aj'i tadha hia mi èdhi. Ra suri se'e se, ho èdhi bisa te'a, sèna ka baku tao madhutu sasala rèngu. Te lod'o èle rai-haha ne dètu ae le.
12 Sanèd'e paie! Limuri ne èu ngee, na, èu èra le. Te ngaa baku pamud'e, sèna ka baku manahu. 13 Lod'o-lod'o ngee mèdhi neo tao bhabhelu, te ngaa sanèd'e, te dhèu leo dhu paraga rèdhi le kahèi, dadugu-rariu sèmi sèra. Te ngaa èu bisa parcaya Ama Lamatua, sèna ka Na tao madhutu ngaa dhu Nèngu peka. Te Lamatua soro tèke boe èu ho abhu dadugu-rariu risi nèti a'èra èu. Ropa èu paraga dènge dadugu-rariu, Nèngu pad'elo j'ara kalua hia èu. Nèngu neo pa'èra èu, ho baku manahu.
14 De a'ari pasue aa'i-aa'i! Ladhe dhèu neo laka-seti miu sèna ka sogo-tagu nidhu, na, pakeso nèti era èèna! Baku pamata!
15 Ja'a padhai lii dènge miu dhu me'a ngee madhera. Hud'i laa miu mesa mi dadoo unu mi, ngaa dhu ja'a neo peka-padhai èèna, lèke tare'a. 16 Pangee sèku j'ara ne: ladhe èdhi pakaboko sèna ka ta'a-tinu ètu mei Ama Lamatua, hèia tare galaa ho manèngi makasi mi Lamatua, ka tinu nèti galaa èèna, sasoa na, èdhi dhu pa'èki dènge Kristus. Ropa Na pasuti raa Na ka Na madhe, èèna sama sèmi èdhi madhutu madhe kahèi. Ladhe èdhi pamae roti èèna, hèia ta'e, sasoa na, èdhi dhu pa'èki dènge Kristus. De ropa Kristus madhe, èèna sama sèmi èdhi kahèi madhe sama-sama dènge Ne.j 17 Èdhi aa'i-aa'i ti ta'e nèti roti cue. De aa'i-aa'i dhu rare pala nèti roti cue ne, nuka sèmi èdhi dhu pa'èki j'aj'i mi ngi'u èci, masi ka èdhi dhèu ae-ae. 18 Pangee sèku dhèu Isra'el uru sèra. Ropa rèngu roro badha ètu dedha mei korban sèna ka pahaha iisi mi Ama Lamatua, ama agama dhu roro ne ka dhu bisa na'e sisi èèna. Sasoa na, rèngu pa'èki dènge Lamatua, aa pa'èki kahèi dènge dhèu dhu rèti badha ho j'aj'i mi korban.k
19-20 Madhutu a'abhu ja'a, tasamia? Lod'o dhèu dhu tadhe boe Lamatua neo hia mèdha-panyau rèngu j'aj'i mi mèdha sogo-tagu ra, èèna dènge boe kab'ua, do? Te mèdha sogo-tagu sèra, dhoka patung dhu madhe di! Aad'o! A'abhu ja'a sèmi ne'e ka: lod'o dhèu roro badha ho j'aj'i badha sogo-tagu, rèngu sogo-tagu nidhu bhelu. Te ngaa rèngu pahaha boe iisi mi Ama Lamatua dhu lèke. De ja'a ko'o boe ho miu pa'èki dènge nidhu bhelu sèmi sèra.l 21 Ladhe miu pa'èki dènge Lamatua, ka minu nèti galaa ètu mei Lamatua, na, miu bisa boe pa'èci dènge nidhu bhelu sèra, aa baku minu nèti galaa dhu ra pake pae'a nidhu. Te ladhe miu minu sèmi èèna, sasoa na, miu pa'èki dènge nidhu bhelu. Sèmi èèna kahèi, ladhe mi'a ètu mei Lamatua, miu bisa boe mi'a ètu mei nidhu. Goa, ee! Te sasoa na, miu pa'èki dènge nidhu bhelu sèra! 22 Madhutu a'abhu miu sèmi ngaa? Neo papèd'a d'ara Lamatua èdhi, do? Èèna bahaya! Ele boe miu ngee, na, miu èra risi Lamatua, do?m
Tao aa'i mèu-mèu, sèna ka ded'e padedha-dedha kolongara Lamatua
23 Ele boe miu pangee, na, “Ja'a neo tao ngaa èèna ka, bisa. Te èèna hak ja'a.” Tare'a. Te ngaa sanèd'e, tatu boe j'ara aa'i-aa'i sèra nèti babe'a hia èu. Aa tatu boe j'ara aa'i-aa'i sèra, bisa soru-bara èu ho pa'èra d'ara mu.n 24 Baku tenge dhoka leto pala ngi'u èu di. Be'a risi tenge oto hia dhèu leo kahèi.
25 De ja'a manèngi sèmi ne'e: ladhe hèli sisi ètu d'ara pasa, na, mu'a laa. Baku pakarèi ia ka, peka na, “Sisi pae'a nidhu, do?” Do pangee, na, “Ja'a bisa ku'a sisi ne, do aad'o?” 26 Lula ètu d'ara Sasuri Lamatua dhu suri tèke, peka na, “Rai-haha dènge isi na aa'i-aa'i, unu Lamatua èdhi.”o
27 Ladhe abhu dhèu dhu parcaya mèka Kristus nèru miu, peka na, “Mai lati ta'a asa èmu ja'a!” Ladhe miu lami, na, mi'a ngaa dhu na hia miu. Baku pakarèi ia ka, na, “Ja'a bisa ku'a nganga'a ne'e, do aad'o?” 28 (Te ngaa ladhe abhu dhu mai paka'uu, peka na, “Baku mu'a ne'e ne, te sisi ne sisi sogo-tagu nidhu,” be'a risi èu baku mu'a. Èu hud'i taru kira ku mi dhèu dhu mai peka lii deo na, ho baku pabia ne. 29 A'abhu ja'a, na, pangee paie-iie, madhutu ngangee dhèu deo na, bisa ku'e do aad'o. Baku ngee dhoka dhu be'a madhutu ngangee èu mesa mu.)
Aa te ngaa, ja'a bisa tao madhutu d'èi d'ara ja'a. Te ngaa ladhe dhèu leo pangee, na, be'a boe ladhe nèngu ad'u-ue ca madha j'ara, nga tao ka ja'a bebas boe sa hèi tao madhutu dad'èi d'ara ja'a, lula be'a boe bagi mi dhèu leo? 30 Ladhe ja'a manèngi makasi mi Ama Lamatua, hèia ja'a ku'a, na, nga tao ka dhèu padhai pamanahu ja'a?
31 De miu neo mi'a do, minu do, tao ngaa èèna ka, na, tao aa'i-aa'i sèna ka pakapai kolongara Ama Lamatua. 32 Baku pasusa dhèu Yahudi, do dhèu Yahudi boe, do dhèu unu Lamatua dhu parcaya sèra. 33 Tao nuka sèmi ja'a tao. Te ja'a neo cob'a pakarej'e si ètu madha j'ara aa'i-aa'i ra. Ja'a mesa boe tao dhu be'a hia ja'a di, te ngaa neo tao dhu be'a bagi rèngu aa'i-aa'i, sèna ka rèngu abhu sod'a kahèi.