2-3 Uru èèna, Ama Lamatua dhu ator tèke le, ho dhèu rèti lii padhai Na suri j'ara-j'ara nèti Lii Lolo Be'a èèna ètu Sasuri Mola-Mèci Na. Te, ètu d'ara Sasuri ne, Lamatua pajaji neo hia mai Ana Na Yesus, ho j'aj'i dhèu rai-haha. De limuri ne, lii moa Na èèna j'aj'i le, lula Yesus dhu mai le nèti ana-èpu dhèu aae Daud. 4 Te ngaa re èci hari, Ama Lamatua pad'elo tadha, peka na, Yesus Kristus èèna, Ana Nèngu kahèi. Te Roh Yesus èèna, mola-mèci tare'a-re'a, sama sèmi Ama Lamatua. Aa Lamatua pake koasa Na, sèna ka pamamuri hari Yesus nèti mamadhe Na. Nèti èèna ka, èdhi te'a, na, Ana Ama Lamatua èèna, nuka Kètu èdhi, Yesus Kristus.

5 Yesus pad'elo d'ara hua iia Na mi ja'a, te Na pili nare le ja'a j'aj'i dhèu pajuu-paleha Na, ho lole lii aj'a-nori Na buli mia-mia. Dad'èi Na, dhèu dhu Yahudi boe parcaya Ne kahèi, aa mamuri madhutu dad'èi Ama Lamatua. Ja'a neo kahèi, sèna ka dhèu nèti suku aa'i-aa'i lèka Kristus, aa mamuri madhutu dad'èi Na.

6 Sèmi èèna kahèi dènge miu ètu kota Roma. Miu j'aj'i nèti suku ae-ae nèti mia-mia, Yesus Kristus dhu hag'e nare le miu, peka na, “Mai ka! Mai j'aj'i dhèu unu Ja'a!” 7 Nèti èèna ka, ja'a pa'adhu sasuri ne hia miu ètu Roma, dènge pasanèd'e, peka na, Ama Lamatua sue miu. Nèngu manèngi kahèi ho miu j'aj'i dhèu unu Na dhu mamuri mola-mèci.

Ja'a sabaj'a sèna ka Ama èdhi, Ama Lamatua, dènge Kètu èdhi, Yesus Kristus, pad'elo d'ara hua iia Ra, aa hia miu mamuri dènge mera-milu.

8 Ja'a bhoke sasuri ja'a ne, dènge manèngi makasi ae-ae mi Ama Lamatua, lula Yesus Kristus sab'a ètu d'ara miu. Ja'a manèngi makasi kahèi, lula dhèu dhu pea ètu rae-rae d'ara paredha Roma, ra palolo lula-nèti parcaya miu mi Yesus.

9 Ja'a loe boe sabaj'a hia miu. Tare'a! Lamatua mesa Na ne'a, na, ngaa dhu ja'a padhai ne, lèke. Nèngu ne'a kahèi, na, ja'a ne sab'a dènge d'ara kateme ho lole dènge dhèu Lii Lolo Be'a nèti Ana Na. 10 Lod'o-lod'o ja'a manèngi-mangaj'i, ja'a peka sèmi ne'e ka: “Lamatua, ja'a mesa ku ke'a boe j'ara na tasamia. Te ngaa, ladhe madhutu dad'èi Lamatua, na, bhoke la j'ara, sèna ka ja'a bisa laku pangad'o dènge angalai ja'a sèra ètu Roma.”

11 Ja'a sabaj'a sèmi èèna, te ja'a neo titu kèna kèdhi miu, sèna ka ja'a bisa bagi hia miu koasa nèti Roh Lamatua, ho hud'i laa miu j'aj'i dhèu unu Lamatua dhu taha pa'èra-èra. 12 Madhutu a'abhu ja'a sèmi ne'e ka: ladhe ja'a j'aj'i dhiu pea dènge miu, ja'a neo pa'èra d'ara miu, ho sèna ka parcaya miu asa èra. Aa ja'a neo kahèi ho miu pa'èra d'ara ja'a.

13 A'ari pasue aa'i-aa'i! Ja'a d'èi ladhe miu me'a, na, ja'a neo ae le ho dhiu pangad'o dènge miu ètu Roma. Te ngaa toke sange ne'e, dhodhoka tao nelu di. De ladhe ja'a j'aj'i dhiu, ja'a sanao sèna ka abhu dhèu ae era dhu lèka èra Kristus, sama sèmi dhu ja'a abhu ètu era-era leo. Ladhe sèmi èèna, na, rui-j'aj'èra ja'a abhu hua-hela dhu be'a.^a

14-15 Masi ka, tasamia èèna ka, ja'a hud'i lole ku Lii Lolo Be'a Lamatua mi dhèu aa'i-aa'i. Mi dhèu dhu pake lii Yunani do, dhèu dintiu dhu pake lii leo, dhèu kapai do, dhèu haha do, dhèu sakola do, dhèu sakola boe. Nèti èèna ka, ja'a pa'èra neo dhiu sa Roma, sèna ka paraga dènge miu.

16 Ja'a makae boe ciki sa, dènge Lii Lolo Be'a Lamatua Yesus. Te ladhe abhu dhèu dhu parcaya Ama Lamatua, Lii Lolo Be'a ne dènge koasa nèti Lamatua, ho patabuli dhèu ne'e nèti koasa sasala-sasigo na. Dhèu Yahudi ka dhu re'a uuru j'ara ne'e ne, heka dhèu suku leo sèra kèna.^b 17 Lii Lolo Be'a ne pad'elo kahèi j'ara Lamatua ho pamola dhèu nèti sasala ra. Aa'i-aa'i sèra sa bisa j'aj'i, sad'i dhèu parcaya Ne. Te dhu suri le ètu d'ara Sasuri Mola-Mèci Lamatua, peka na,

18 Te ngaa Ama Lamatua peka le, na, abhu dhèu dhu pusi-pahae boe Nèngu. Aa abhu dhu ad'u-ue rupa-rupa j'ara bhelu-katub'a. Te ngaa Lamatua sèmi nare boe tatao rèngu sèra. Lula ètu d'ara iiki rèngu, dhu re'a le, mia ka dhu lèke. Masi ka sèmi èèna, te ngaa rèngu loe boe tao j'ara-j'ara dhu lèke boe sèra. Ra kakèj'i dhèu, toke dhèu re'a heka mia ka dhu lèke. Nèti èèna ka, Ama Lamatua papuru hahuku nèti dedha-liru, sèna ka paj'èra si. 19-20 Dhèu se'e se, abhu boe alasan ho siri iisi ra, lula j'ara-j'ara dhu pahuni boe dhu dhèu bisa re'a mèu nèti Lamatua. Te Ama Lamatua mesa Na ka dhu pad'elo! A'abhu Ja'a sèmi ne'e ka: mulai nèti Na paj'aj'i dedha-liru dènge rai-haha, toke d'ai sange ne'e ne, ladhe dhèu neo re'a mèu nèti ngi'u Lamatua, aa dènge koasa Na dhu dènge boe too-lane èèna, bisa kahèi! Masi ka ladhe tèdhi boe Ama Lamatua, te ngaa dhèu bisa tadhe Ne nèti ngaa-ngaa dhu Na ad'u-ue. Nèti èèna ka, ja'a peka, na, dhèu bhelu sèra abhu boe alasan ho siri iisi ra, peka na, “Ja'a ke'a boe ngaa-ngaa nèti Ama Lamatua.”

21 De masi ka rèngu re'a j'ara-j'ara Lamatua, te ngaa ro'o boe mangaku, na, “Lamatua èèna, Ama Lamatua èdhi!” Rèngu se ro'o boe, manèngi makasi mi Lamatua kahèi. Ka ngangee ra j'aj'i kahèlu, toke ra re'a heka ngaa dhu lèke. Rèngu j'aj'i bingu aa padhai lii rupa-rupa dhu kolo-kapua aad'o lula-nèti Ama Lamatua. Aa d'ara ra maroga aatu-aatu.^d

22 Rèngu èci-èci padedha iisi ra, peka na, “Ja'a ke'a mèu madha j'ara ae-ae!” Masi ka ngangee ra sèmi èèna, te ngaa madhutu mola-mola na, rèngu goa titu kèna. 23 Ka dhèu se pahaha boe iisi ra mi Ama Lamatua dhu kapai risi eele èèna, te rèngu peka na, “Ji'i pusi boe Lamatua sèmi èèna!” Te ngaa ra sogo-tagu mi rupa-rupa patung, raropa sèmi dhèu rai-haha, sèmi manu-bhui sa, do sèmi badha leo sèra, toke d'ai patung dhu rupa sèmi mege sa. Dènge ra sogo-tagu sèmi èèna, rèngu tule eele Ama Lamatua dhu mamuri taa-taa, ho ra gati eele dènge mèdha-panyau dhu bisa madhe!^e

24 Nèti èèna ka, Lamatua soro tèke si, sèna ka ra ad'u-ue madhutu dad'èi rèngu. Na soro tèke si, ho ra tao j'ara bhelu-katub'a rupa-rupa, dhu amo le ètu d'ara rèngu. Toke rèngu se re'a heka makae sa hèi. Hèia dènge ngi'u aae ra, rèngu ad'u-ue madha j'ara kaj'alu rupa-rupa, aa ra tao sèmi èèna kahèi dènge dhèu leo. 25 Ètu d'ara iiki ra dhu re'a le j'ara-j'ara dhu lèke nèti Ama Lamatua, te ngaa ro'o boe madhutu. Ngangee rèngu dhu moca le, hèia ra pangee, na, “Be'a risi èdhi tao rupa-rupa. Masi ka pakarehe aa'i-aa'i, ngaa-ngaa tao boe!” Ra koa-kad'iri mèdha dhu Lamatua paj'aj'i, te ngaa rèngu pahaha boe iisi mi Lamatua dhu paj'aj'i mèdha se. Ra tao iisi sèmi dhèu dhu mola-mèci, te ngaa dhu mola-mèu lao di!

Dhu lèke ka, ladhe èdhi dhèu rai-haha ne koa-kio taruu Ama Lamatua! Èèna ka dhu mèci!

26 Nèti bhabhelu-katub'a rèngu sèra ka, Lamatua soro tèke si, ho rèngu tao karehe sèmi èèna madhutu dad'èi ra. Hèia ra tao rupa-rupa j'ara makae, dhu dènge heka d'ara makae. Bhèni ra, ro'o heka pa'èci dènge mone dhèu èmu ra, te ngaa d'èi tao dhu lèke boe. Te bhèni j'unu tao j'ara makae dènge bhèni. 27 Dhèu mone sèmi èèna kahèi! Ra d'èi heka j'unu pa'èci dènge dhèu èmu ra, te ngaa d'èi j'unu dènge dhèu mone leo! Rèngu se, dhu dènge heka d'ara makae! Nèti èèna ka, pe rèngu dui rare j'aj'èra pamèci dènge tatao rèngu sèra! Te rèngu se dhu sigo eele kaj'èu le, nèti j'ara dhu lèke.

28 Ra pangee, na, “Be'a risi baku patai-patapa dènge Lamatua.” Nèti èèna ka, Lamatua soro tèke si, sèna ka ra tao madhutu dad'èi ra! De rèngu ngee dhoka dhu karehe di! Ka ra tao j'ara-j'ara dhu lèke boe!

29 Mamuri ra pènu dènge rupa-rupa bhabhelu-katub'a. Ka re'a heka tao dhu be'a, te ngaa dhoka dhu bhelu di. Rèngu manga'a. Èci tèke d'ara dènge èci. Èci d'èi boe karisi èci. Èci pamadhe èci. Ra d'èi patao-palaha. Ra kapod'e-kabèli. Ra leko-monya. Ra d'èi padhai-kakoli dhèu. 30 Rèngu d'èi pa'ele iie kolongara dhèu. Ra palab'a dènge Ama Lamatua. Ra kurang ajar, d'èi pahahe dhèu, d'èi padedha iisi, d'èi tenge j'ara-j'ara karehe, aa d'èi palab'a dènge ina-ama ra. 31 Ro'o boe re'a dènge j'ara dhu mola. Ro'o boe re'a dènge lii pamoa unu ra, ka dhèu lèka heka rèngu. Re'a boe sue dhèu. Dènge boe d'ara kasia ciki sa mi dedha dhèu.

32 Rèngu re'a le atora Ama Lamatua dhu peka na, “Dhèu dhu tao rupa-rupa bhabhelu, hud'i abhu huku madhe.” Masi ka re'a le atora ne, te ngaa loe boe tao rupa-rupa bhabhelu. Mesa boe se'e se di, te ngaa ra dadugu-rariu dhèu leo, sèna ka tao bhelu kahèi. Ne'e ne seli-kolane!