Roh Lamatua pangèd'u koasa mi èdhi sèna ka tao rupa-rupa sasab'a-la'a
12
A'ari pasue aa'i-aa'i! Dad'èi ja'a ka ladhe miu me'a mèu nèti koasa dènge karunya dhu Roh Lamatua pangèd'u mi èdhi, sèna ka èdhi pake. 2 Miu dhu me'a, na, lod'o miu dhae j'aj'i mèka dhèu unu Lamatua, miu sogo-tagu mèdha dhu lii aad'o sèra. Miu madhutu rèngu iia-iia d'ara. 3 Nèti èèna ka, ja'a neo ho miu me'a, na, tatu boe abhu dhèu dhu pa'èki dènge Roh Mola-Mèci Ama Lamatua, peka na, “Dhoo-saseo Yesus èèna!” Aa tatu dhèu dhu pa'èki boe dènge Roh Mola-Mèci Ama Lamatua peka na, “Yesus èèna, Lamatua ja'a!”4 Roh Lamatua hia mi dhèu èci-èci ka dènge karunya na, sèna ka èci-èci dènge sasab'a-la'a ra. Te ngaa karunya sèra mai nèti Roh èci di. 5 Dhèu abhu karunya rupa-rupa ho lalau-lalo'o dhèu leo, te ngaa rèngu nanene dhoka Lamatua èci di. 6 Dhèu unu rupa-rupa sasab'a sèna ka pakako sasab'a Lamatua, èèna j'aj'i lula Ama Lamatua di dhu soru-bara rèngu ho ra pakako sasab'a-la'a sèra aa'i-aa'i ra. 7 Ama Lamatua pad'elo Roh Na mi mamuri dhèu dènge j'ara dhu baka-leo hua, te ngaa dad'èi Na sèna ka aa'i-aa'i ra sama-sama abhu babe'a. 8 Lamatua pangèd'u koasa Roh Na mi dhèu unu Na. Ka cahag'e abhu koasa, sèna ka ngangee madhera ho nori dhu lèke. Cahag'e abhu koasa ho peka paled'a ngaa dhu rèngu re'a dènge be'a. 9 Cahag'e hari abhu koasa sèna ka parcaya pa'èra mi Ama Lamatua, lula rèngu dhu pa'èki pa'èra dènge Roh Na. Cahag'e hari abhu koasa ho puri-pa'èle dhèu pèd'a. 10 Cahag'e hari abhu koasa sèna ka tao tadha-tadha malaa dhu pad'elo dadedha Ama Lamatua. Cahag'e hari lole lii moa Lamatua mi dhèu unu Na. Cahag'e abhu koasa sèna ka re'a, roh mia ka mai nèti Ama Lamatua, aa mia ka dhu aad'o. Cahag'e hari, abhu koasa ho bisa padhai lii pake lii leo. Aa cahag'e hari, bisa peka sasoa nèti lii sèra. 11 Te ngaa dhodhoka Roh èci di dhu bisa tao rèngu, sèna ka bisa pakako sasab'a-la'a ra. Nèngu ne'e ka dhu pangèd'u mi dhèu èci-èci, ka rèngu bisa sab'a madhutu dad'èi Roh Lamatua èèna.a
Ngi'u èci, te ngaa bagian na ae-ae
12 Ja'a neo pasoro karunya sèra dènge ngi'u dhèu. Ngi'u èci, te ngaa bagian na ae-ae. Te ngaa bagian se, pa'èki j'aj'i ngi'u èci di.b
Ne'e nuka sèmi dhèu unu Kristus sèra. 13 Èdhi aa'i-aa'i ti pa'èki dènge Roh èci di. Nèti èèna ka, lod'o èdhi abhu sarani, èdhi nuka sèmi ca suku. Masi ka èdhi dhèu Yahudi, do dhèu Yahudi boe, ènu do dhèu bebas, Ama Lamatua pala hia èdhi Roh èci di. Èèna nuka sèmi tinu èi dhu hia mamuri nèti madha èi èci di.
14 Tare'a, ngi'u ne nèti boe ca bagian di. Te na j'aj'i nèti bagian ae-ae. 15 Ladhe sèmi haga èu, peka na, “Ja'a ne, kacui-aai boe. De ja'a j'aj'i boe bagian nèti ngi'u èu.” Masi ka nèngu peka sèmi èèna, te ngaa nèngu j'aj'i bagian nèti ngi'u èu era. Tare'a, si? 16 Aa ladhe dhilu èu peka na, “Ja'a ne, musi madha boe. De ja'a ne j'aj'i boe bagian nèti ngi'u èu.” Masi ka na peka sèmi èèna, te ngaa nèngu bagian nèti ngi'u èu kahèi. 17 Pangee sèku! Ladhe ngi'u èu dhoka musi madha di, tasamia èu bisa tadèngi? Aa ladhe ngi'u èu dhoka rèu dhilu di, tasamia ho èu bisa sangèd'u?
18 Te ngaa miu me'a le, Ama Lamatua tao èdhi j'aj'i mi èci sama sèmi ngi'u èci, ka Nèngu ator bagian se madhutu dad'èi Na. 19 Ladhe ngi'u ne dhoka ca bagian di, ngara na ‘ngi'u’ boe, sina ma? 20 Te dhu lèke ka, ngi'u èdhi ne, dènge bagian ae-ae. Se'e ka tao ne j'aj'i ngi'u kateme aae.
21 Musi madha bisa boe pahahe kacui-aai, dhu peka na, “Ja'a parluu boe èu!” Aa kètu bisa boe peka dènge haga na, “Ja'a dale boe èu!” 22 Dhu lèke mola-mola ka, nuka, abhu bagian nèti ngi'u dhu roe, aa dhu dènge kab'ua ae boe, te ngaa èdhi parluu rèngu kahèi. 23 Abhu bagian dhu èdhi pangee, na, rèngu se gaguna ra ae boe, te ngaa èdhi haduli si paie-iie. Aa abhu bagian dhu èdhi makae pacèu, ka pahutu pabe'a-be'a. 24 Te ngaa bagian dhu pamakae boe èdhi, èdhi tao boe si ngaa-ngaa.
Te ngaa Ama Lamatua oru nare bagian aa'i-aa'i se ho j'aj'i mi ngi'u èci. Ka Nèngu ator sèna ka bagian dhu èdhi pangee, na, dhu dènge boe kab'ua, èdhi ladhe-leru si be'a-be'a, 25 te Lamatua d'èi boe ngi'u èdhi pahag'a. Dad'èi Na sèna ka bagian se èci soru-bara èci. 26 Te ladhe bagian èci paraga dènge susa, na, aa'i-aa'i ra susa kahèi. Aa ladhe ra pakab'ua èci, na, aa'i-aa'i karej'e kahèi.
27 Èci èèna ka dènge miu. Te miu sama sèmi ngi'u Kristus dhu kateme. Dhèu parcaya èci-èci nuka sèmi ca bagian nèti ngi'u Kristus. 28 Te ètu talora miu dhèu parcaya, Ama Lamatua hia koasa sèna ka pakako rupa-rupa sasab'a, nuka:
Partama, Lamatua pua-paleha dhèu cahag'e ho lasi lole lii moa Na.
Ka dua, Na pake dhèu cahag'e, j'aj'i dhèu rèti lii padhai Nèngu.
Ka tèlu, Na hia dhèu cahag'e d'èlu-mèu ho aj'a-nori dhèu leo lula-nèti Nèngu.
Aa Na hia koasa mi dhèu cahag'e, sèna ka bisa tao tadha-tadha malaa ho pad'elo dadedha Na.
Cahag'e hari abhu koasa ho puri-pa'èle dhèu pèd'a.
Cahag'e hari abhu karunya ho soru-bara dhèu.
Cahag'e hari abhu karunya sèna ka uri dhèu ho sab'a sama-sama dènge be'a.
Aa Lamatua pangèd'u koasa mi dhèu cahag'e hari, ho bisa padhai pake rupa-rupa lii.c
29 De ngangee miu tasamia? Ama Lamatua pua dhèu aa'i-aa'i ho lasi peka-padhai lii moa Na, do? Aad'o. Na hia dhèu aa'i-aa'i j'aj'i mi dhèu rèti lii padhai Na, do? Aad'o. Na hia dhèu aa'i-aa'i d'èlu-mèu ho aj'a-nori, do? Aad'o. Na hia koasa mi dhèu aa'i-aa'i, sèna ka tao tadha-tadha malaa, do? Aad'o. 30 Na hia koasa mi dhèu aa'i-aa'i sèna ka puri-pa'èle dhèu pèd'a, do? Aad'o. Na hia dhèu aa'i-aa'i ho bisa padhai pake rupa-rupa lii, do? Aad'o. Na hia dhèu aa'i-aa'i, ho bisa bhoke paled'a sasoa nèti lii se'e, do? Aad'o.
31 De miu hud'i bori mema-mema ho sèmi mere aa pake karunya dènge be'a dhu hia gaguna mi dhèu ae.
Masi ka sèmi èèna, te ngaa ja'a neo pad'elo j'ara dhu hua iia risi hia miu.