Sasuri Paulus ka dua
hia dhèu parcaya ètu kota Korintus
2 Korintus
Lii Maho'o
1
Sasuri ne nèti ja'a, Paulus. Ama Lamatua pua-paleha ja'a sèna ka laku lole lula-nèti Yesus Kristus dènge dhèu asa mia-mia. Yesus Kristus èèna, dhu Ama Lamatua paj'uj'u karèi nèti uru-uru ka. Ari èdhi Timotius ètu ne'e kahèi. Na hia lii maho'o.Ja'a pa'adhu sasuri ne'e mi dhèu parcaya aa'i-aa'i dhu biasa pakaboko ètu kota Korintus dènge propensi Akaya.a 2 Ja'a sabaj'a mi Ama èdhi, nuka Ama Lamatua, dènge Kètu èdhi, Yesus Kristus. Ja'a manèngi ho Rèngu pad'elo d'ara hua iia Ra dènge miu, sèna ka miu mamuri dame dènge mera-milu.
Paulus manèngi makasi mi Ama Lamatua
3 Dad'èi ji'i ka ladhe dhèu aa'i-aa'i ded'e padedha-dedha kolongara Ama Lamatua. Te Nèngu èèna, Ama nèti Kètu èdhi, Yesus Kristus. Rasa kasia aa'i-aa'i kapua nèti Nèngu, aa Nèngu ka dhu pa'èra d'ara èdhi. 4 Nèngu ka pamaho'o d'ara èdhi ladhe èdhi ètu d'ara sasusa. Nèti èèna ka, èdhi kahèi bisa pamaho'o dhèu leo dhu paraga dènge sasusa. Te èdhi bisa pa'èra d'ara rèngu, sama sèmi Lamatua pa'èra le d'ara èdhi. 5 Kristus abhu le susa ae-ae hia èdhi. De, lula Kristus rasa le susa sèmi èèna, nèti èèna ka Ama Na pa'èra d'ara èdhi taruu, ladhe èdhi paraga dènge susa. 6 Ladhe ji'i ètu ne'e abhu susa, Ama Lamatua pa'èra d'ara ji'i. Aa ladhe ji'i paraga dènge j'aj'èra, hèia taha dènge d'ara taleo, na, miu hud'i me'a kahèi, Lamatua pake j'ara sèmi ne'e sèna ka pa'èra d'ara miu, ho patalale miu nèti koasa bhabhelu-katub'a. Te ladhe miu abhu sasusa sama sèmi ji'i, Lamatua pa'èra d'ara miu, sèna ka miu bisa taha mere dènge d'ara taleo kahèi. 7 Nèti èèna ka, ji'i nge'a mèu, na, miu bisa taha mere dènge èra. Te ji'i nge'a, na, ladhe miu abhu j'aj'èra sama sèmi ji'i, Lamatua pa'èra d'ara miu, aa Nèngu pa'èra d'ara ji'i kahèi.
8 A'ari aa'i-aa'i! Dad'èi ji'i sèna ka miu me'a mèu sasusa dhu ji'i abhu ètu propensi Asia. Ji'i rasa bia, risi nèti dhu ji'i bisa pasae, toke ji'i oe ele ngangee, lula ji'i pangee, na, ji'i madhe kèna.b 9 Ji'i rasa bia, nuka sèmi dhèu èci ropa tadèngi hakim pama'ète hahuku pamadhe ne. Te ngaa aa'i-aa'i se j'aj'i, sèna ka ji'i parcaya Ama Lamatua, aa baku parcaya ngi'u ji'i unu mi. Te Lamatua èèna ka dhu unu koasa ho pamamuri hari dhèu madhe. 10 Nèngu ka dhu pakaj'èu le ji'i nèti bhabhelu, lod'o ji'i oe madhe. Bèli-camèd'a Nèngu neo pakaj'èu ji'i nèti bhabhelu-katub'a kahèi. Aa ji'i ma'ète boe sanao, sèna ka Na pakaj'èu taruu ji'i nèti bhabhelu-katub'a. 11 Ladhe miu loe boe sabaj'a hia ji'i, èèna ka soru-bara ji'i kahèi, te Ama Lamatua neo tao j'ara dhu be'a ae-ae hia mi ji'i. Nèngu tao j'ara èèna, lula dhèu ae dhu sabaj'a hia ji'i. Hèia lod'o dhèu ae sanèd'e ji'i, rèngu manèngi makasi ae-ae mi Ama Lamatua kahèi.
Paulus nelu tao dhu hiu
12 Ji'i bisa koa-kad'iri iisi ji'i, lula ji'i nge'a ètu d'ara iiki ji'i, ngaa dhu ji'i ad'u-ue ètu rai-haha ne, madhutu dad'èi Lamatua dhu Na pangèd'u mi ji'i. Ji'i rai boe nèti sasab'a-la'a ne, sèna ka dhèu aa'i-aa'i bisa rèdhi ji'i sab'a dènge d'ara mola. Ji'i pakako sasab'a ji'i, pake boe mamèuc dhu mai nèti rai-haha ne, te ngaa mamèu dhu kapua na nèti Ama Lamatua. Te Lamatua pad'elo d'ara hua iia Na mi ji'i. Nèti èèna ka, ji'i bisa asa tabha èra ètu d'ara sasab'a-la'a lod'o ji'i bera-bera dènge miu. 13 Ja'a suri hia miu dhodhoka j'ara-j'ara dhu miu bisa baca aa bisa me'a mèu. Limuri ne miu me'a le naneo ja'a cahag'e. Te ngaa ja'a sanao, sèna ka bèli-camèd'a miu bisa me'a mèu risi hari. 14 Ne'e ne, miu me'a ciki era lula-nèti ji'i se. Te ngaa èèna na, lod'o Kètu èdhi, Yesus Kristus mai hari ka, ja'a ke'a, na, miu me'a j'ara ae-ae. Dènge j'ara ne'e, miu bisa koa-kad'iri ji'i, sama sèmi ji'i koa-kad'iri miu kahèi.
15 Lula ja'a ke'a, na, miu me'a j'ara aa'i-aa'i se, nèti èèna ka ca hari na, ja'a pama'ète kore le, ho dhiu ngad'o hari miu, sèna ka miu bisa abhu mèngi-nale dua hari. 16 De uru èèna ja'a dhu pangee, ladhe j'aj'i laku asa propensi Makedonia, na, ja'a bisa dhuli ngad'o miu. Ho ladhe ja'a lèpa nèti Makedonia, ja'a bisa dhuli hari pa'asu-pareo dènge miu. Dènge sèmi èèna, miu bisa soru-bara ja'a, ho bisa laku taruu asa propensi Yudea.d
17 Te ngaa tasamia? Lod'o-lod'o ja'a peka, neo dhiu pangad'o dènge miu, ele boe mi pangee, na, ja'a uri kore mèka, si? Do, miu pangee, na, ja'a dhodhoka pama'ète madhutu dad'èi d'ara ja'a di, sama sèmi dhèu leo ètu rai-haha ne, si? Do, miu pangee, na, ja'a ne dhèu dhu peka leo, tao leo, ho d'èi, peka na, “Oo.” Aa te ngaa ja'a ngee ètu d'ara ja'a, na, “Aad'o!” Ele boe miu pangee, na, ja'a sèmi èèna ka, si? 18 Èdhi bisa parcaya Ama Lamatua, lula Nèngu peka ca j'ara, tatu Na tao madhutu. Nèti èèna ka, ji'i sama sèmi èèna kahèi. Ladhe ji'i dhaa, peka na, “Oo,” na ji'i pangee boe, na, “Aad'o.”
19 Ja'a, Silas dènge Timotius dhu aj'a le miu lula-nèti Yesus Kristus, Ana Ama Lamatua. Nèngu dhu kapod'e-kabèli boe, peka na, “oo”, te ngaa a'abhu na, “aad'o”. Nèngu ne ub'a boe, te ladhe Na peka na, “oo”, a'abhu Na tare'a-re'a, “oo”.e 20 Madha j'ara aa'i-aa'i dhu Ama Lamatua pajaji tèke, èèna na Na paj'aj'i si. Nèti èèna ka, ladhe Yesus pamoa ca j'ara, peka na, “oo”, èdhi bisa dhaa, na, “Tare'a! Lèke sèmi èèna!” Lula ji'i nge'a le ngaa dhu Yesus neo tao. Ji'i peka j'ara ne, sèna ka pad'elo dadedha Ama Lamatua. 21 Lamatua ne'e ka dhu hag'e nare miu dènge ji'i. Nèngu ka dhu ded'e nare èdhi, sèna ka j'aj'i dhèu unu Na. Nèngu kahèi dhu tao èdhi taha taruu. 22 Nèngu ka dhu hia Roh Na, ho uri èdhi, aa pad'elo hia èdhi ngaa dhu Nèngu neo tao. Èèna nuka sèmi dhèu èci dhu tao tadha mi mèdha èci, sèna ka peka na, mèdha èèna unu nèngu.
23 Ja'a manèngi, sèna ka Lamatua mesa Na j'aj'i sakasii mi lii padhai ja'a ne. Te Lamatua ne'a d'ara ja'a. Nèngu ne'a, nga tao ka ja'a lake kore mèka dhiu asa Korintus. Ja'a ko'o boe pamakae miu, nèti èèna ka ja'a dhae dhiu mèka. 24 Ji'i ngo'o boe pakapai ngi'u j'aj'i dhèu kapai, ho laka-seti miu, peka na, miu hud'i parcaya mi cee. Te ngaa ji'i sab'a sama-sama dènge miu, sèna ka d'ara miu bisa karej'e-karae. Te miu bisa taha pa'èra, lula miu lèka Ama Lamatua.