Lamatua Yesus mamuri hari!
24
Lod'o hari Migu oe mèu sa, ina se rèti bunga dènge èi hèu mèngi, ho lasi ro'a Yesus. 2 Ropa rèngu d'ai nèi, ladhe rèdhi hadhu aae dhu Yusuf pake katange ro'a Yesus, dhu bhaloli le sa karasa na. 3 Hèia lasi dènge ka asa d'ara, te ngaa abhu boe ngi'u aae Yesus. 4 Ka rèngu ele ngangee. Cag'ag'a laa dhèu dua dhu pake mèdha kale'e, mai titu ka ètu sebhe rèngu. 5 Ina se madha'u bia, ka ra pacud'u d'ai rai. Ka dhèu se karèi si, peka na, “Nga tao ka miu mai tenge dhèu mamuri ètu era dhèu madhe? 6 Yesus aad'o heka ètu era ne'e! Te Na mamuri hari le. Ele boe miu bhèlu eele le, ngaa dhu peka nare, lod'o Na ètu Galilea era, sina ma? 7 Te Nèngu peka mema le, na, bèli-camèd'a ra pahie eele Dhèu Rai-haha Tare'a-re'a ne, asa d'ara adhe-aai dhèu bhelu-katub'a. Hèia ra paku pamadhe Ne ètu aj'u palolo-palèbha. Te ngaa asa camèd'a èèna, Nèngu mamuri hari.”a8 Ropa tadèngi rare, heka rèngu sanèd'e lii padhai Yesus uru èèna. 9 Hèia ra lèpa dènge ka, lasi peka dènge ana madhutu Yesus dhèu canguru èci sèra, dènge dhèu-dhèu leo dhu madhutu Ne. 10 (Ina-ina dhu ètu ro'a èèna, nuka Maria ina Yakobis, dènge Maria nèti rae Magdala. Abhu kahèi Yohana dènge ina-ina dhèu pèri dhu leo. Rèngu se'e ka dhu lasi peka aa'i-aa'i dènge ana-ana pajuu-paleha Yesus sèra.)
11 Te ngaa ropa ana madhutu sèra tadèngi lii lolo ne, ra pangee na ina se monya.
12 Hèia Petrus kèd'i dènge ka, rai la'e asa ro'a. D'ai nèi, na patigi sa d'ara ro'a, te ngaa nèdhi dhoka bèla hutu di. Hèia na lèpa, ka na pangee, “Sa mia ka ne?”b
Ana madhutu dhèu dua paraga dènge Lamatua Yesus ètu j'ara la'e asa Emaus
13 Lod'o èèna kahèi, ana madhutu Yesus dhèu dua lasi asa rae cue, ngara na Emaus. Kaj'èu na pe d'ai canguru ca kilo nèti kota Yerusalem.c 14 Ètu j'ara, ra palolo nèti mamadhe Yesus. 15 Kabèdhi laa, Yesus padètu-dètu le dènge rèngu dua ra, ka kako palere-lere dènge ra. 16 Te ngaa dua ra tadhe boe, Dhèu ne, Yesus, te Lamatua ka dhu tao si, sèna ka baku ra tadhe. 17 Hèia Yesus karèi si, aku Nèngu na, “Miu dua mi se, padhue-padhai ngaa?”
Ropa ra tadèngi sèmi èèna, ka ra titu. Rèhu ra sèmi dhèu susa titu kèna. 18 Ka dhu ngara na Kleopas, karèi Ne, “Ama ne sèmi dhèu hiu sa, dhu me'a boe ngaa-ngaa dhu lai-lai ne j'aj'i ètu Yerusalem, do?”
19 Hèia Yesus karèi si, peka na, “Tasamia?”
Ka ra b'ala, peka na, “Yesus nèti Nasaret èèna! Nèngu na tare'a dhèu nèti lii padhai Ama Lamatua. Aa Lamatua pangèd'u Na koasa, ka Na tao tadha malaa rupa-rupa. Nèngu d'èlu-mèu kahèi aj'a-nori dhèu. Dhèu aa'i-aa'i ra karej'e dènge Ne. Aa Lamatua karej'e dènge Ne kahèi.
20 Te ngaa te'a boe, na, kètu agama èdhi dènge dhèu heka ad'a sèra, kèpe rare Ne. Ka ra hia Ne asa gubernur sèna ka huku pamadhe Ne. De ra paku Ne ètu aj'u palolo-palèbha toke madhe. 21 Uru èèna, ji'i sanao Nèngu ne'e ka Kristus, dhu mai patabuli dhèu-dhèu èdhi nèti paredha Roma, dhu paj'èra èdhi. Te ngaa ètu d'ara hari Jumat lai-lai ne, ra pamadhe Ne.
22 Limuri ne, ji'i asa ele ngangee. Te deo na, ina-ina ji'i mai peka, na, mad'ae aae era rèngu lasi asa ro'a. 23 Te ngaa ra palolo, peka na, ngi'u aae Yesus ele le. Hèia ladhe rèdhi ana pajuu Ama Lamatua nèti sorga dhu peka dènge rèngu, na, Yesus mamuri hari le! 24 Ropa tadèngi ngare, hèia angalai ji'i dhèu pèri-pèri, rai lasi asa ro'a. Ka rèdhi sèmi dhu ina-ina sa peka. Rèngu rèdhi boe ngi'u aae Yesus hèi.”
25 Ropa lolo rare, Yesus lii dènge si, peka na, “Gagoa miu se! Nga tao ka miu mo'o boe parcaya ngaa dhu uru èèna dhèu rèti lii padhai Ama Lamatua sèra peka tèke! 26 Te rèngu suri le, na, Kristus ne hud'i pasae ku j'aj'èra rupa-rupa, heka Na abhu pakab'ua dènge dadedha kèna.” 27 Ka Yesus aj'a si, aa'i-aa'i dhu dhèu rèti lii padhai Lamatua suri tèke lula-nèti Kristus ne. Karèi nèti sasuri baki Musa toke dhèu rèti lii padhai dhu leo sèra.
28 Ropa rèngu oe d'ai Emaus, ka Yesus pasabhe eele neo kako taruu. 29 Te ngaa ra manèngi, peka na, “Ama! J'unu taha ku dènge ji'i mèda ne'e, te lod'o oe cèna kèna.” Ka Yesus maso palere-lere dènge rèngu asa d'ara èmu.
30 Ropa rèngu madhèdi neo ra'a, hèia Yesus nare roti ca balok. Ka Na sabaj'a manèngi makasi mi Ama Lamatua, hèia Na pamae roti ne. Ropa Na j'ole roti ne sa rèngu dua ra, 31 heka ra tadhe, na, Nèngu ne Yesus. Te ngaa kabèdhi laa, Na ele nèti madha rèngu dua ra! 32 Hèia dua ra padhue, peka na, “Waa! Deo na ropa Na peka paled'a lii padhai nèti dhèu rèti lii padhai Lamatua, d'ara èdhi taleo moro-moro sange rai-haha.”
33 Lod'o èèna kahèi, dua ra kèd'i dènge ka, lèpa asa Yerusalem. Lasi paraga dènge canguru ca dhèu ana madhutu Yesus sèra, dènge dhèu leo dhu pakaboko ètu era èèna. 34 Hèia ana madhutu se peka dènge rèngu dua ra, na, “Mema tare'a! Lamatua Yesus mamuri hari le! Deo na pad'elo iisi Na dènge Petrus.”d
35 Èle ka dhèu dua se lole aa'i-aa'i dhu j'aj'i ètu j'ara, toke rèngu dua ra tadhe Yesus ropa Na pamae roti.
Lamatua Yesus pad'elo iisi Na mi ana-ana madhutu Na
36 Lod'o rèngu palolo era, kaca'a laa, Yesus titu ètu talora aae rèngu. Na hia maho'o mi rèngu, peka na, “Saloom!”
37 Ka ra cag'ag'a aa madha'u, lula ra ngee na nidhu.
38 Te ngaa Yesus lii, peka na, “Nga tao ka miu madha'u? Miu parcaya boe, na, Ja'a ne mamuri hari le, do? 39 Miu ladhe sèku ai dènge haga Ja'a ne. Ja'a ka ne'e ne. J'ole ai miu ho g'ag'e unu mi! Sèna ka mi lèka, na, Ja'a ka ne'e ne, nidhu boe. Te nidhu dènge boe ngi'u, te ngaa miu mèdhi ngi'u Ja'a ne, si?!”
40 Ropa Na padhai lii era, Na pad'elo dènge si era nu'a dhu ètu adhe-aai dènge haga Na. 41 Rèngu karej'e titu kèna, lula Yesus mamuri hari le. Dhoka ra bingu, te re'a boe tasamia ka bisa j'aj'i sèmi èèna. Hèia Yesus karèi si, “Miu mi'a ngaa?” 42 Ka ra j'ole hia Ne i'a paga ca kadhèli. 43 Yesus sèmi nare i'a ne, hèia na'e dènge ka ètu madha rèngu.
44 Èle ka, Na lii dènge rèngu, peka na, “Tasamia? Miu sanèd'e era lod'o Ja'a uru èèna dhu bera-bera dènge miu? Ja'a peka dènge miu ca hari ni, hud'i j'aj'i ku aa'i-aa'i dhu dhèu rèti lii padhai Ama Lamatua sèra suri tèke lula-nèti Ja'a ne. Nuka nèti baki Musa, aa nèti dhèu rèti lii padhai Ama Lamatua dhu leo sèra, aa nèti sasuri Lii Sod'a Koa-Kio.”
45 Èle ka, Na bhoke paled'a, sèna ka re'a mèu sasoa nèti isi Sasuri Lamatua. 46 Na peka tabha hari, na, “Dhèu rèti lii padhai Lamatua se dhu suri le, na, Kristus dhu Lamatua hia mai èèna, hud'i abhu ku rupa-rupa j'aj'èra, heka Na madhe kèna. Te ngaa ladhe d'ai camèd'a, Na mamuri hari. Te dhu suri aa'i le j'ara se'e! 47 Nèti deo ne'e, Ja'a hia miu koasa, ho lami mèti Lii Lolo Be'a mi suku aa'i-aa'i, mulai nèti Yerusalem ne. Peka dènge rèngu, na, dhèu dhu mangaku sasala ra, aa lèpa hari asa Lamatua, pe Lamatua saku pamèu sasala ra aa'i-aa'i. 48 Miu hud'i j'aj'i ku sakasii, sèna ka miu lolo, peka na, Ja'a dui j'aj'èra, ka madhe, hèia mamuri hari. 49 Èèna na, Ja'a hia Roh dhu Mola-Mèci, dhu Ama Ku pajaji nare le. Te ngaa miu hud'i tatae ku Nèngu ètu kota Yerusalem ne, toke abhu koasa nèti sorga.”e
Lamatua Yesus ca'e asa sorga
50 Ca lod'o, Yesus nèti si asa li'u kota. Ropa rèngu dètu dènge rae Betania, Na baa ai sèna ka hia ra berkat.f 51 Yesus padhai lii hia berkat era, hèia ded'e Ne ca'e la'e asa sorga. 52 Ladhe rèdhi sèmi èèna, hèia rèngu aa'i-aa'i ra patitu kètu urutuu ho pahaha iisi mi Yesus. Ka ra lèpa asa Yerusalem dènge d'ara dhu karej'e-karae. 53 Bèli-bèli èèna, rèngu pakaboko ètu d'ara Èmu Kapua Manèngi-Mangaj'i ho koa-kio kolongara Ama Lamatua.
Ama Teofilus! Lii lolo ja'a ne, d'ai sange ne'e ka.
Salam,
Lukas