Lamatua Yesus mamuri hari!
16
Bèli èèna, lèke hari Sabtu, nuka lod'o sabaj'a dhèu Yahudi. Ropa lod'o cèna la'e, Maria nèti rae Magdala, Maria dhu leo hari (ina Yakobis), dènge Salome, lasi hèli èi hèu mèngi, sèna ka bèli rèngu bisa lasi pasuti mi ngi'u aae Yesus madhutu ad'a dhèu Yahudi.
Markus 16:1-21
2 Ropa hari Migu mad'ae aae èèna, tèlu ra lasi asa ro'a Yesus. 3-4 Ètu talora j'ara, tèlu ra padhue, aku rèngu na, “Waa! D'ai nèi, na, cee ka dhu bisa loli eele hadhu aae èèna nèti hèb'a ro'a? Èdhi tèlu ti bisa boe, lula hadhu èèna kapai bia!”
Te ngaa ropa rèngu d'ai ro'a èèna, rèdhi hadhu èèna dhu hari eele le nèti hèb'a ro'a. 5 Hèia bhèni se maso asa d'ara. Rèngu cag'ag'a titu kèna, lula ètu d'ara ro'a èèna, rèdhi ana mone ngèru èci madhèdi ètu sebhe g'ana rèngu, dhu pake mèdha pudhi lao-lao. 6 Hèia mone ngèru èèna, peka dènge rèngu, “Baku madha'u! Ja'a ke'a, na, miu mai tenge Yesus dhèu Nasaret, dhu ra paku pamadhe ètu aj'u palolo-palèbha. Na aad'o heka ètu ne'e, lula Na mamuri hari le! Mai ho ladhe unu mi, te ngi'u Yesus aad'o heka ètu era dhu ra paj'unu Na. 7 De lami ka lai-lai, ho lole dènge Petrus si, peka na, Yesus mamuri hari le! Na la'e uuru le asa Galilea. Èèna na rèngu paraga dènge Yesus ètu nèi, sèmi dhu uru èèna Na peka mema le dènge rèngu. De lami ka!”a
8 Ropa bhèni se rèdhi heka ngi'u Yesus ètu era dhu ra paj'unu Na, rèngu cag'ag'a. Ka rai asa li'u lasi. Hèia rèngu lèpa dènge ka, ra peka boe dènge dhèu èci sa ètu j'ara, lula rèngu madha'u titu kèna.
Yesus paraga dènge Maria nèti rae Magdala
9 Hari Migu mad'ae aae era, Yesus pad'elo uuru ngi'u Na mi Maria nèti Magdala, dhu uru èèna, Yesus babège eele nidhu pidhu nèti nèngu.b 10 Ropa na nèdhi nare Yesus, hèia la'e dènge ka, peka dènge dhèu-dhèu dhu uru èèna madhutu Yesus. Dhèu sèra pakaboko taruu ètu era èci. Rèngu ètu d'ara susa era, taga ra ngee mamadhe Yesus. 11 Ka Maria peka dènge rèngu, aku nèngu na, “Nga tao ka miu susa era? Susa ia ka, te Yesus mamuri hari le! Deo na, ja'a heka paraga dènge Ne kèna!”
Te ngaa rèngu aa'i-aa'i dhaa, aku rèngu na, “Èu ne, monya! Ji'i lèka boe.”
Lamatua Yesus pad'elo ngi'u Na mi dhèu dua
12 Èle èèna ka, dhèu madhutu Yesus dhèu dua lasi asa rae èci. Ropa d'ai talora j'ara, Yesus pad'elo ngi'u dènge si. Te ngaa Nèngu ub'a le. Nèbhu boe, heka ra tadhe Ne. 13 Hèia dua ra lèpa hari, lasi peka dènge angalai ra sèra, aku rèngu na, “Wee! Miu nanene ku laa! Lai-lai deo na, ji'i paraga le dènge Yesus ètu j'ara!”
Te ngaa angalai ra aa'i-aa'i dhaa, aku rèngu na, “Eeh! Miu baku monya sèmi èèna!”
Lamatua Yesus pad'elo ngi'u mi ana madhutu Na aa'i-aa'i
14 Èle èèna ka, Yesus paraga dènge ana madhutu Na sèra, dhèu canguru èci, ropa ra madhèdi ra'a-rinu. Ka Na jèke si, aku Nèngu na, “Wee! Miu kètu hadhu pa'ae sa mia ne! Dhèu peka le dènge miu, rèngu rèdhi le Ja'a dènge musi madha rèngu, te ngaa miu parcaya boe! Aku miu na, dhèu sèra monya! De ne'e ne, Ja'a unu ku mai. Mema tare'a Ja'a madhe, te ngaa Ja'a mamuri hari le! De mèdhi le, sina ma!
15 De lami ka asa mia-mia palème rai-haha ne. Peka dènge dhèu aa'i-aa'i ra Lii Lolo Be'a Ja'a ne.c 16 Dhèu cee dhu parcaya Ja'a aa abhu sarani, èèna na Ama Lamatua hia ne mamuri sèna ka na bisa pea taruu dènge Ne ètu sorga. Te ngaa cee dhu parcaya boe Ja'a, èèna na nèngu abhu huku nèti Lamatua, ka Lamatua core eele ne asa li'u la'e, ho na pea taruu ètu nèi. 17 Aa dhèu dhu parcaya Ja'a sèra, rèngu tao rupa-rupa tadha malaa, sèna ka dhèu aa'i-aa'i sèra re'a, peka na, “Koasa ra mema mai nèti Ama Lamatua!” Conto sèmi, èèna na rèngu bisa babège eele nidhu pake kolongara Ja'a. Ladhe èèna na, Ama Lamatua hia si padhai lii pake lii leo dhu rèngu mesa ra dhane rare boe. 18 Ladhe rèngu kèpe mege dhu dènge raco, do, rinu lèke raco, ngaa-ngaa tao boe. Ladhe ra tao kacui-aai asa dhèu pèd'a, dhèu èèna èle nèti papèd'a-tarègu na.”
Lamatua Yesus ca'e asa sorga
19 Ropa padhai lii èle dènge ana madhutu Na sèra, hèia Ama Lamatua paca'e Yesus asa sorga. Ètu nèi, Nèngu j'aj'i ai g'ana Ama Na, ka rèd'u paredha sama-sama.d
20 Èle èèna, hèia ana madhutu Na sèra madhutu paredha Na. Rèngu lasi asa mia-mia, ho lole mi dhèu aa'i-aa'i Lii Lolo Be'a Yesus. Hèia Ama Lamatua hia si koasa ho ra tao tadha-tadha malaa dhu Yesus peka le dènge rèngu. Nèti èèna ka, dhèu ae parcaya Yesus, taga rèngu re'a le Lii Lolo Be'a èèna, lèke tare'a-re'a.
Markus 16:21-21
[Ra pa'èle lii lolo Markus madhutu sasuri leo dhu uru-uru sèra
9 Ropa bhèni dhèu tèlu se d'ai era Petrus si, ka ra peka mi dhèu aa'i-aa'i, lii lole dhu ana ngèru deo na peka dènge rèngu ètu ro'a.e 10 Èle ka, Yesus unu Na hia paredha mi ana madhutu Na, ho lasi peka-padhai Lii Lolo Be'a Na asa mia-mia palème rai-haha ne. Lii Lolo Be'a pad'elo j'ara, sèna ka Ama Lamatua saku eele sasala-sasigo dhèu, ho ra mamuri taruu dènge Ne.
Lii Lolo Be'a mema lèke mola-mola! Nèti èèna ka, na taha taruu toke d'ai mia-mia la'e.]