Lii lolo nèti bhèni balu èci, dènge hakim dhu karehe
18
Ca tèka, Yesus padhai lii dènge ana madhutu Na, pake lii pakasame ho rèngu loe boe manèngi-mangaj'i, aa baku ma'ète sanao-maena. Rèngu hud'i parcaya taa-taa Lamatua. 2 Lii lolo na sèmi ne'e ka: “Ètu d'ara kota cue, abhu ca dhèu ama pama'ète lii langu, dhu pusi-pahae boe Ama Lamatua. Na pahae boe ca dhèu sa hèi. 3 Ètu era èèna, abhu kahèi bhèni balu èci, dhu loe boe mai sa dhèu pama'ète lii ne, ho manèngi, peka na, ‘Ama hakim! J'ue ku lii langu ja'a dènge mola!’4 Hiu-hiu èèna, dhèu pama'ète lii ne pusi boe dènge bhèni balu ne. Te ngaa nèbhu-nèbhu ka, na roca nanene ne. Hèia na madhèdi pangee ka, ‘Mema ja'a ne pusi boe dènge Ama Lamatua, risi-risi dènge dhèu rai-haha. 5 Te ngaa bhèni ne pakabo'o kètu ja'a. De be'a risi ja'a pama'ète lii na dènge mola. Te ladhe ja'a panena, na mai taruu paj'èra ja'a.’
6 De miu pangee ku lii padhai dhèu pama'ète lii dhu bhelu ne. 7 Ladhe nèbhu-nèbhu dhèu pama'ète lii ne tao ai-hèb'a mi bhèni balu ne, tatu Ama Lamatua kahèi neo tao ai-hèb'a mi dhèu unu Na dhu sabaj'a mèu-mèda mi Nèngu ho manèngi sasue Na. Te ngaa Lamatua mate heka panèbhu. 8 Te Nèngu uri lii langu rèngu dènge boe pamata. De Ja'a neo karèi sèmi ne'e: ladhe Ja'a, Dhèu Rai-haha Tare'a-re'a ne mai hari, Ja'a bisa paraga dènge dhèu parcaya ètu rai-haha ne era, do aad'o?”
Dhèu Parisi èci, dènge dhèu roro bea èci lasi manèngi-mangaj'i
9 Ka Yesus lolo tabha hari pake lii pakasame lula-nèti dhèu dhu pangee na ne'a aa'i mèu-mèu, aa dhu d'èi pahaha dhèu leo. Na peka na, 10 “Abhu ama dhèu dua dhu lasi sabaj'a asa d'ara Èmu Kapua Manèngi-Mangaj'i. Ca dhèu nèti partei agama Parisi, aa èci hari dhèu roro bea. [Dhèu Yahudi peka na dhèu Parisi sèra, dhèu dhu mola. Te ngaa ra pangee, na, dhèu roro bea, dhèu karehe.] 11 D'ai èmu sabaj'a dhèu Parisi ne titu mesa-mesa na, ka na manèngi-mangaj'i, peka na, ‘Makasi Lamatua, te ja'a ne dhèu be'a. Ja'a ne bhelu boe nuka sèmi dhèu leo sèra. Ja'a mana'u boe. Ja'a manga'a boe. Ja'a dhèu dhu bersina boe. Makasi Lamatua, te ja'a ne bhelu boe nuka sèmi dhèu roro bea ne. 12 Ja'a ne maj'èni puasa ca migu dua hari. Aa ja'a d'èi hia ca pala nèti canguru pala nèti aa'i-aa'i dhu ja'a abhu.’ Dhèu Parisi ne, sabaj'a sèmi èèna ka.
13 Te ngaa dhèu roro bea ne titu pakaj'èu ètu kabodho nèi. Na bani boe boti kètu ho ladhe sa dedha. Nèngu dhoka pacud'u di, dhu dènge d'ara ma'ète mae-mae. Na sabaj'a, peka na, ‘Ama Lamatua! Sue ku ja'a, dhèu dhu pènu dènge sasala-sasigo ne! Abho eele ku sasala ja'a!’
14 Lod'o dhèu dua se lèpa lasi asa èmu ra, cee ka dhu pabe'a dènge Ama Lamatua? Dhèu Parisi dhu pamone, do dhèu roro bea ne? Tatu Na sèmi dènge be'a, dhèu roro bea dhu pahaha iisi ne. Te ngaa Na pusi boe dènge dhèu Parisi ne. Te Ama Lamatua pahaha dhèu dhu pamone-pabhèni, te ngaa Na padedha dhèu dhu re'a pahaha iisi.”a
Lamatua Yesus padhai lii hia mamèngi mi ana-ana
15 Ca tèka, dhèu sa'u rèti ana ra dhu rara iisi hiu asa Yesus, sèna ka Na tao ai Na mi ana iiki se, aa padhai lii hia si mamèngi. Ropa rèdhi sèmi èèna, ana-ana madhutu Yesus kai dhèu se'e. 16-17 Te ngaa Yesus soru mamai ra dènge be'a. Hèia Na kai ana-ana madhutu Na, aku Nèngu na, “Hud'i laa ana iiki sèra mai asa Ja'a. Miu baku bhabhae si. Sanèd'e paie! Dhèu dhu neo j'aj'i dhèu unu Ama Lamatua, nèngu hud'i sanao-maena dhoka mi Ama Lamatua, nuka sèmi ana iiki dhu sanao-maena dhoka mi ina-ama na.”
Dhèu kaja dhu neo maso sorga
18 Ca lod'o, dhèu kapai Yahudi èci, mai karèi Yesus, aku nèngu na, “Ama Mese dhu hua iia! Ja'a ne hud'i tao ku tasamia, sèna ka ja'a ke'a tare'a, na, ja'a maso sorga, aa mamuri taruu dènge Ama Lamatua?”
19 Ka Yesus dhaa, “Tasamia ka èu ne peka na, Ja'a ‘dhu hua iia’? Dhodhoka èci di dhu hua iia, nuka Ama Lamatua. 20 Èu me'a le atora Ama Lamatua karèi nèti uru ka, dhu peka na:
Baku j'unu pa'èci dènge dhèu dhu dhèu èmu boe èu;
baku pamadhe dhèu;
baku mana'u;
baku j'aj'i sakasii dhu leko-monya;
aa pakab'ua ina dènge ama mu.”b
21 Ka dhèu ne dhaa, na, “Tare'a, Ama! Ja'a dhu madhutu le atora sèra, karèi nèti ja'a ana iiki era.”
22 Tadèngi sèmi èèna, ka Yesus peka, na, “Be'a! Te ngaa èu kura ca madha j'ara era. Nuka, lamu ho pahie mèdha-panyau èu aa'i-aa'i. Kab'ua ra, lamu pabagi hia dhèu dhu dènge boe ngaa-ngaa sèra. Èle na, èu lèpa hari mai sèna ka madhutu Ja'a. Te èèna na, Ama Lamatua b'ala hari mèdha-panyau èu ètu sorga.” 23 Ropa tadèngi nare sèmi èèna, hèia dhèu ne d'ara na susa, te nèngu kaja d'ai seli.
24 Ropa Yesus nèdhi dhèu ne lèpa dènge d'ara na laho mae-mae, hèia Na padhai lii dènge ana madhutu Na, peka na, “Dhèu kaja mema carui titu kèna maso sorga. 25 Èdhi pasèku ku dènge j'ara leo. Mema bisa boe badha unta dhu kapai bisa maso asa d'ara oka na re ro'a j'aj'au. Nuka sèmi èèna kahèi, dhèu dhu maena dhoka mèdha-panyau na, te ngaa maena boe Lamatua, tatu nèngu bisa boe maso sorga.”
26 Dhèu dhu tadèngi Yesus padhai lii sèmi sèra, karèi Ne, aku rèngu na, “Ladhe dhèu kaja carui maso sorga, dhèu sèmi mia ka dhu bisa abhu mamuri taa-taa?”
27 Ka Yesus b'ala si, “Mi dhèu rai-haha, j'ara ae-ae mema carui. Te ngaa bagi Ama Lamatua, aa'i-aa'i bisa j'aj'i.”
28 Hèia Petrus tuhu lii, peka na, “Ama! Ji'i tèke eele aa'i mèdha-panyau ji'i, ka mai madhutu Ama. Bèli-camèd'a ji'i abhu ngaa?”
29 Ka Yesus dhaa, na, “Petrus! Nanene paie-iie. Dhèu dhu tèke eele èmu na, dhèu èmu-kamali na, a'ari na, ina-ama na, do ana-ana na, lula nèngu pakako sasab'a Ama Lamatua, 30 tatu na abhu hari ae risi ètu rai-haha ne. Aa ladhe èle rai-haha ne, nèngu abhu mamuri taa-taa dènge Ama Lamatua kahèi.”
Lamatua Yesus peka mamadhe Na tèlu hari kèna
31 Ka Yesus gale nèti ana madhutu Na canguru dua dhèu sèra, ho lasi padhue-padhai mesa ra. Hèia Yesus peka dènge ra, “Miu se aa'i-aa'i mi me'a, na, èdhi kako ne, lati asa kota Yerusalem. D'ai nèi, j'ara aa'i-aa'i nèti dhèu rèti lii padhai Lamatua sèra dhu suri tèke le, lula-nèti Dhèu Rai-haha Tare'a-re'a, pe j'aj'i nuka sèmi dhu ra suri. 32 Èèna na, ra soro Ja'a asa dhèu leo dhu tadhe boe Ama Lamatua. Aa ra padhai lii pamakae Ja'a, pahahe Ja'a rupa-rupa, paru'e ilu ra mi Ja'a, 33 ra hake kalabhe Ja'a. Èle èèna ka, ra pamadhe Ja'a. Te ngaa asa camèd'a èèna, Ja'a mamuri hari.”
34 Ropa tadèngi Yesus peka sèmi èèna, ana madhutu Na bingu, lula rèngu dhane rare mèka sasoa nèti lii padhai Yesus.
Lamatua Yesus pa'èle dhèu bèdhu ca dhèu
35 Lod'o Yesus si oe maso kota Jeriko, abhu dhèu bèdhu ca dhèu dhu madhèdi kanata ai ètu sebhe j'ara. 36 Ropa na tadèngi dhèu ae kako re èèna, ka na karèi, aku nèngu na, “Ngaa ne?”
37 Ka dhèu peka dènge ne, na, “Yesus nèti Nasaret dhu kako re ne'e.”
38 Hèia dhèu bèdhu ne rodhe pamèdhu-mèdhu, peka na, “Yesus! Ana-èpu dhèu aae Daud, ee! Sue ku ja'a!”c
39 Hèia dhèu dhu kako uuru nèti Yesus kai ne, sèna ka na mau-mau. Te ngaa asa na hino dènge lii rodhe, peka na, “Ana-èpu dhèu aae Daud, ee! Sue ku ja'a laa!”
40 Ropa Yesus tadèngi, ka Na titu. Hèia Na pua dhèu lasi pakako rèti dhèu bèdhu ne. D'ai madha Na, ka Yesus karèi ne, 41 “Èu neo Ja'a tao ngaa hia èu?”
Ka na dhaa, “Ama! Ja'a manèngi sèna ka ja'a bisa kèdhi.”