2
Dènge j'ara sèmi èèna ka, Ama Lamatua paj'aj'i dedha-liru, rai-haha, dènge isi ra aa'i-aa'i.2 Ropa Na sab'a èle, asa bèli èèna, lèke dènge lod'o ka pidhu. Hèia Na ae nèti sasab'a-la'a Na. 3 Dènge j'ara ne'e, Na tao lod'o ka pidhu ne, lod'o dhu kapai risi nèti lod'o dhu leo sèra. Na tao sèmi èèna, lula Na pa'èle aa'i le sasab'a Na, ka ètu d'ara lod'o ka pidhu na, Na ae. 4a D'ai sange ne'e ka, lii lolo Ama Lamatua paj'aj'i dedha-liru dènge rai-haha ne.
Ama Lamatua paj'aj'i dhèu mone dènge dhèu bhèni
4b Lod'o Ama LAMATUA heka paj'aj'i dedha-liru dènge rai-haha èèna, 5-6 dhae abhu mèka ana aaj'u, lula Na papuru mèka èj'i. Taa èèna, dhoka sèb'u èi di, mai nèti d'ara rai ho pabasa rai re dedha. Aa abhu mèka dhèu rai-haha dhu tao oka-tedhe. 7 Èle èèna ka, Ama LAMATUA nare rai ciki, ka Na paj'aj'i dhèu rai-haha. Hèia Na tiu a'ae Na asa d'ara sahènga dhèu na, ka na mamuri dènge ka.
8 Hèia Ama LAMATUA bhoke oka cue ètu rai Eden, re bèka dhimu. Hèia Na hia dhèu ne pea ètu d'ara oka na. 9 Ètu d'ara oka èèna, Na pamamuri rupa-rupa aj'u dhu be'a, dhu dhèu bisa ra'a. Aa Na pamamuri kahèi aj'u dua kapua ètu talora aae oka èèna. Ladhe dhèu ra'e hua nèti aj'u èci, na mamuri taa-taa. Aa ladhe dhèu ra'e hua nèti aj'u èci hari, ne'a hag'e mia dhu be'a, aa mia dhu karehe.
10 Ètu era èèna, abhu loko èci dhu hae nèti d'ara oka èèna. Loko èèna, èpa kacanga. 11 Kacanga ka èci na, ngara na Pison. Nèngu ka dhu hae pale-lème rai Hawila dhu abhu hualaa ae-ae. 12 Ètu era èèna ka, abhu poe-pai, aj'u dhu raa na hèu mèngi, dènge hadhu kale'e. 13 Kacanga ka dua, ngara na Gihon. Kacanga ne, hae pale-lème rai Kus.a 14 Kacanga ka tèlu, ngara na Tigris. Kacanga ne'e ka, j'aj'i mi too rai Asyurb re ca bèka dhimu. Kacanga ka èpa, ngara na Efrat.
15 Ka Ama LAMATUA hia dhèu pea ètu d'ara Eden, ho na ladhe-leru oka èèna. 16 Hèia Na hia paredha mi dhèu ne, aku Nèngu na, “Hua aaj'u aa'i-aa'i ètu d'ara oka ne, èu bisa mu'a. 17 Te ngaa èci dhu èu bisa boe mu'a. Nuka hua nèti aj'u dhu ne'a hag'e mia dhu be'a, aa mia dhu karehe. Ladhe mu'a, èu madhe dènge.”
18 Ka Ama LAMATUA tuhu haru lii Na, aku Nèngu na, “Babe'a na aad'o, ladhe dhèu ne mamuri mesa na. De Ja'a neo paj'aj'i hia ne, anga ca dhèu dhu pamèci dènge ne.”
19-20 Lod'o èèna, Ama LAMATUA nare rai ciki, ka Na tao rupa-rupa badha dènge manu-bhui. Hèia Na pangèd'u si asa dhèu ne, sèna ka na pangare si. Ka dhèu ne pangare badha se dènge manu-bhui aa'i-aa'i ra, èci-èci ka dènge ngara ra. Te ngaa dhèu ne abhu mèka anga dhu pamèci dènge nèngu.
21 Hèia Ama LAMATUA pabhèj'i luu dhèu ne'e. Ropa na bhèj'i, Ama Lamatua nare rui karasa na calaa, ka Na pakateme hari nu'a deo na. 22 Nèti rui ne, Na paj'aj'i bhèni ca dhèu. Hèia Na pangèd'u bhèni ne mi dhèu èèna. 23 Ropa ladhe nèdhi bhèni ne, ka dhèu na peka, aku nèngu na,
“Waaa! Ne'e ne ku! Sèmi ne'e ku, heka pamèci dènge ja'a kèna!
Rui na, sama èci èèna ka dènge rui ja'a.
Aa isi na, sama kahèi dènge isi ja'a.
Lula nèngu ne, j'aj'i nèti dhèu mone, nèti èèna ka ja'a pangare ne, ‘dhèu bhèni’.”c
24 Nèti èèna ka, dhèu mone hud'i tèke eele ku ina-ama na,
ho la'e mamuri d'ara èci dènge dhèu èmu-kamali na,
lula dua ra, j'aj'i le èci.
25 Lod'o èèna, dua ra dhu dènge boe mèdha-papake, te ngaa ra makae boe.