3 Miu dhèu mola-mèci unu Ama Lamatua kahèi. De baku mamuri dènge d'ara kaj'alu! Baku ngee madha j'ara kaj'alu kahèi! De baku tao j'ara karehe dènge dhèu dhu j'aj'i boe dhèu èmu-kamali èu! Baku manga'a dèu ngara! 4 Baku padhai lii kaj'alu! Aa baku padhai lii leli! Te dhèu unu Ama Lamatua, ladhe padhai lii sèmi sèra, lèke boe. Hua iia risi miu padhai lii be'a aa manèngi makasi mi Lamatua. 5 Sanèd'e paie-iie! Te Ama Lamatua nare boe dhèu dhu mamuri kaj'alu, aa dhèu dhu tao j'ara karehe dènge dhèu dhu j'aj'i boe dhèu èmu-kamali nèngu! Rèngu bisa boe j'aj'i dhèu unu Kristus, aa Ama Lamatua j'aj'i boe Dhèu Aae rèngu. Ama Lamatua sèmi nare boe kahèi dhèu dhu manga'a dèu ngara, lula rèngu seti eele Ne, ka ra pakab'ua risi j'ara dhu leo sèra.

6 Mage dhèu pagoa miu dènge padhai lii hèb'a hua, peka na, “Mamuri kaj'alu ciki di, ngaa-ngaa tao boe, we!” Te tatu Ama Lamatua nasa mi dhèu dhu mamuri madhutu boe dad'èi Na. 7 Nèti èèna ka, baku pa'èki ngi'u dènge dhèu sèmi sèra. 8 Uru èèna, miu nuka sèmi dhèu dhu mamuri ètu d'ara maroga, lula miu tadhe mèka Ama Lamatua. Te ngaa limuri ne, Na hia le saraa, sèna ka tao miu j'aj'i ana-ana Na. Nèti èèna ka, miu hud'i mamuri ètu d'ara saraa Na. 9 Te dhèu dhu mamuri taruu ètu d'ara saraa, dhèu ne tao j'ara dhu be'a, mamuri mola, aa leko-monya boe. 10 Tenge taruu j'ara ho pakarej'e d'ara Ama Lamatua, lula Nèngu ne Dhèu Aae èdhi. 11 Baku pa'èki ngi'u dènge dhèu dhu mamuri ètu d'ara maroga. Te tatao ra, gaguna aad'o. De mi pasanèd'e si, aa bhoke paled'a sasala-sasigo ra. 12 Te, ngaa dhu ra ad'u-ue pahuni-pacub'i, kaj'alu titu kèna, toke èdhi makae, ladhe neo padhai lii j'ara-j'ara sèra. 13 Ja'a pakasame sèmi ne'e: ladhe dhèu d'elo mèdha èci ètu d'ara maroga, tatu dhèu bisa rèdhi mèu. 14 Sèmi èèna kahèi, ladhe èdhi peka paled'a j'ara bhelu dhu dhèu ad'u-ue, nèngu bisa ne'a, na, j'ara dhu na ad'u-ue ne, karehe. Abhu lii sod'a èci, peka na,

15 Nèti èèna ka, miu èci-èci parisa paie mamuri mi, sèna ka baku sèmi dhèu goa. Be'a risi pake ngangee dhu be'a nèti Ama Lamatua. 16 Limuri ne dhèu loe boe tao j'ara-j'ara bhabhelu. De ladhe abhu lod'o tao j'ara dhu be'a, na baku pamata!^b 17 Pangee paie-iie, ho me'a mèu dad'èi Lamatua èdhi, sèna ka baku mi goa.

18 Baku mahu, te, ngaa dhu miu minu èèna ka dhu uli miu, sèna ka tao j'ara dhu karehe. Te ngaa bhoke d'ara miu, sèna ka Roh Ama Lamatua dhu Mola-Mèci èèna ka dhu uli miu. 19 De padhai lii èci dènge èci pake Lii Holo-Nori Ama Lamatua, mèti lii koa-kio mi Nèngu, aa mèti lii sod'a dhu miu abhu nèti Roh Mola-Mèci Na. Aa ladhe sod'a, baku dhoka ètu hèb'a di, te ngaa koa-kio Ama Lamatua dènge d'ara kateme. 20 Te Yesus Kristus j'aj'i le Kètu èdhi, aa Ama Lamatua dhu tao le j'ara-j'ara ae titu kèna hia èdhi. Nèti èèna ka, èdhi baku loe manèngi makasi mi Lamatua.^c

21 Miu aa'i-aa'i mi, hud'i mamuri èci nanene èci. Dènge j'ara ne'e, miu pakab'ua Yesus Kristus.

22 Bhèni dhu dènge dhèu èmu! Miu hud'i mamuri nanene dhèu èmu mi, sama sèmi miu nanene Yesus Kristus, Kètu miu. 23 Te dhèu èmu miu èèna, nuka sèmi kètu nèti miu bhèni se. Aa Yesus Kristus kahèi j'aj'i Kètu nèti dhèu unu Na. Te Nèngu ka dhu bhoke j'ara ho dhèu abhu mamuri.^d 24 Nèti èèna ka, dhèu unu Kristus hud'i mamuri nanene paie-iie Nèngu. De sèmi èèna kahèi, bhèni dhu dènge dhèu èmu, hud'i nanene pabe'a-be'a ku dhèu èmu na, ètu madha j'ara aa'i-aa'i ra.

25 Mone dhu dènge le dhèu èmu, sèmi èèna kahèi! Miu hud'i sue dhèu èmu miu, èci èèna ka dènge Kristus sue dhèu unu Na, toke Na soro ngi'u Na, sèna ka madhe gati rèngu.^e 26 Nèngu tao sèmi èèna ka, ho rèngu j'aj'i mola-mèci ètu madha Ama Lamatua, lula rèngu madhutu le Lii Holo-Nori Na, aa sarani le. 27 Dhèu unu Yesus Kristus èci èèna ka dènge bhèni dhu neo kab'i dhu pagaa iisi na, te dhèu mone dhu neo kab'i èèna neo mai nare ne. Sama sèmi èèna kahèi, Kristus neo mai nare dhèu unu Na sèra. Nèti èèna ka, rèngu hud'i mamuri dènge be'a aa mola-mèci, toke abhu boe sasala ciki sa.

28 Èci èèna kahèi dènge mone dhu dènge dhèu èmu! Miu hud'i sue ku dhèu èmu mi, nuka sèmi miu sue ngi'u miu mesa mi. Te ladhe dhèu mone sue dhèu èmu na, sasoa na, nèngu sue ngi'u nèngu unu na. 29 Abhu boe dhèu dhu sue boe ngi'u na. Te ngaa na lalau-lalo'o ngi'u na pabe'a-be'a, sèmi Yesus ladhe-leru dhèu unu Na paie-iie, 30 lula èdhi nuka sèmi ngi'u Nèngu. 31 Ètu d'ara Sasuri Mola-Mèci suri, peka na, “Nèti èèna ka, dhèu mone hud'i tèke eele ku ina-ama na, ho la'e mamuri d'ara èci dènge dhèu èmu-kamali na, te dua ra j'aj'i le èci.”^f 32 Te mamuri pasue dhèu èmu-kamali ne, Lamatua bhoke le ètu d'ara Lii Holo-Nori Na nèti uru ka mai. J'ara ne'e ne, ka dhu kapai. Te ngaa limuri ne, èdhi te'a kahèi, na, Lii Holo-Nori ne pad'elo sasue Kristus mi dhèu unu Na sèra. 33 De dhèu mone hud'i sue ku dhèu èmu na, nuka sèmi sue ngi'u nèngu unu na. Aa dhèu bhèni hud'i pakab'ua ku dhèu èmu na.