Dhèu parcaya baku pagalaa èci dènge èci ètu madha hakim
6
Ladhe ca dhèu sarani pagalaa dènge a'ari na dhèu sarani, nga tao ka lami asa pengadilan ètu madha hakim dhu tadhe boe Ama Lamatua? Tasamia ka j'aj'i sèmi èèna? Be'a risi lami asa madha dhèu-dhèu parcaya, sèna ka rèngu uri lii langu miu! 2 Nuka sèmi dhu dhae me'a mèka, peka na, dhèu-dhèu parcaya, bèli-camèd'a rèngu ka dhu pama'ète lii langu dhèu aa'i-aa'i ètu rai-haha ne. De tasamia ka miu mesa mi bisa boe uri lii langu dhu ana iiki-iiki? 3 Dhu mola-mola ka, ladhe bèli-camèd'a èdhi ka dhu uri lii langu ana pajuu Lamatua nèti sorga. De tatu hud'i miu ku dhu uri lii langu dhu bèli-bèli j'aj'i ètu talora aae miu. 4 Risi-risi hari, ladhe miu dhèu parcaya pagalaa lula-nèti j'ara dhu ana iiki-iiki sèra, nga tao ka miu pake dhèu pama'ète lii dhu dhèu-dhèu sarani pakab'ua boe si?5 De ja'a neo peka ca j'ara dhu pamakae miu. Sèmi ngaa? Nuka sèmi ètu talora aae miu abhu boe ca dhèu sa dhu d'èlu-mèu uri lii langu dhu ana iiki-iiki sèra, sèmi lii langu dhu cèu nèti a'ari èdhi. 6 Te ngaa nèti talora miu abhu dhèu parcaya dhu ère nèti a'ari na dhèu parcaya asa madha dhèu pama'ète lii langu! Aa te ngaa dhèu pama'ète lii langu ne dhu parcaya boe Lamatua!
7 Lèke boe, sina ma? Miu dhu segi boe le èèna, ladhe miu èci dènge èci lami pagalaa asa era pama'ète lii langu. Be'a risi, a'ari èu èèna soro tèke ne, ladhe na tao sala mi dedha èu. Aa ladhe a'ari èu dhèu parcaya mana'u nare mèdha-panyau èu, be'a risi hud'i laa nare! 8 Te ngaa miu dhèu parcaya èci tao sala mi a'ari miu. Aa èci mana'u èci. Aa te ngaa miu sama-sama dhèu parcaya!
9 Miu nuka sèmi me'a boe j'ara se'e aa'i-aa'i! Te dhèu dhu ro'o boe tao dhu lèke, tatu bisa boe j'aj'i dhèu unu Ama Lamatua. Mage soro tèke dhèu tipu miu, sèna ka miu ad'u-ue sasala! Dhèu dhu tao j'ara makae dènge dhèu dhu dhèu èmu nèngu boe, dhu sogo-tagu nidhu, dhu bersina, mone dhèu dua dhu pa'èci nuka sèmi dhèu èmu-kamali, 10 dhèu mana'u, dhèu manga'a, dhèu rinu mahu, dhu padhai lii pakarehe kolongara dhèu, dhu pakapod'e ho rare mèdha-panyau dhèu, te dhèu aa'i-aa'i sèmi se'e se, tatu bisa boe j'aj'i dhèu unu Ama Lamatua!
11 Mema, uru èèna miu cahag'e sèmi èèna kahèi! Te ngaa Ama Lamatua saku eele sasala-sasigo miu, hèia pamèu miu. Aa Nèngu bhoke le j'ara kahèi, sèna ka miu bisa pabe'a hari dènge Ne. Na tao j'ara se'e, lula miu pa'èki dènge Kètu èdhi, Yesus Kristus, aa lula miu pa'èki dènge Roh Lamatua kahèi.
Ladhe èu j'aga paie ngi'u èu, èu pakab'ua Lamatua
12 Ja'a dènge hak sèna ka tao aa'i mèu-mèu. Te ngaa aa'i-aa'i dhu ja'a neo tao sèra, tatu boe be'a hia ja'a. De masi ka ja'a dènge hak sèna ka tao aa'i mèu-mèu, te ngaa ja'a ko'o boe j'ara dhu karehe koasa nare ja'a.a 13 Conto sèmi, dhèu peka na, “Nganga'a parluu kabake, aa kabake parluu nganga'a.” Te ngaa sanèd'e, te bèli-camèd'a Lamatua palaho aa'i dua-dua ra. Conto dhu leo hari, èdhi bisa boe soro ngi'u èdhi sèna ka bisa tao j'ara makae dènge dhèu dhu dhèu èmu-kamali èdhi boe. Èdhi unu ngi'u ne, sèna ka sab'a hia Lamatua èdhi. Aa Lamatua èdhi ladhe-leru ngi'u èdhi. 14 Ropa Kètu èdhi, Yesus Kristus madhe, Ama Lamatua ka pamamuri hari Ne. De ladhe èdhi madhe, Nèngu dènge koasa kahèi ho pamamuri hari èdhi.
15 Ngi'u miu j'aj'i mi unu Kristus, nuka sèmi miu bagian nèti ngi'u Kristus. Tatu j'ara ne, miu me'a le! De ladhe ja'a pake bagian nèti ngi'u Kristus, ho laku pa'èci dènge ngi'u nèti bhèni kajeo, na tasamia? Baku sèmi èèna! Te èèna na lèke boe! 16 Tatu miu me'a le, ladhe dhèu tao j'ara makae ho j'unu pa'èci dènge bhèni kajeo, na, dua-dua pakihu kee j'aj'i mi èci. Te dhu suri tèke ètu d'ara Sasuri Mola-Mèci, peka na, “Rèngu dua ra pa'èki le j'aj'i mi èci.”b 17 Te ngaa dhèu dhu mamuri d'ara èci dènge Kètu èdhi, Yesus Kristus, j'aj'i le èci dènge Nèngu, sama sèmi dua ra dhu pa'èki ètu d'ara roh èci.
18 Ladhe èu abhu tebho tao j'ara makae dènge dhèu dhu dhèu èmu èu boe, na, rai pakaj'èu! Dhèu ad'u-ue sasala rupa-rupa dhu pa'ele iie rèngu unu ra, aa pa'ele iie dhèu leo kahèi. Te dhèu dhu karihu kaj'alu pa'ele iie ngi'u nèngu unu na. 19 Ngi'u èu èèna, nuka sèmi èmu sabaj'a Roh Lamatua dhu Mola-Mèci. Roh Nèngu èèna ka, dhu pea ètu d'ara miu, te Ama Lamatua mesa Na ka hia Roh Na mi dedha miu. Nèti èèna ka, miu dènge boe hak ciki sa hèi, ho j'aj'i lamatua dhu ator ngi'u miu unu mi. Te ngaa, nga tao ka miu mamuri sèmi pame'a boe sa dènge j'ara se'e?c 20 Kristus sui nare le miu dènge kab'ua titu kèna. De miu hud'i mamuri ku dènge pakab'ua ngi'u miu unu mi, ho pad'elo, na, miu pakab'ua Ama Lamatua kahèi.