3 Ja'a aj'a le miu j'ara-j'ara dhu kapai risi eele, dhu uru èèna dhèu aj'a-nori ja'a. Nuka: Kristus, dhu Ama Lamatua pua mai èèna, madhe le sèna ka patabuli èdhi nèti koasa sasala-sasigo èdhi. J'ara ne'e j'aj'i madhutu Sasuri Mola-Mèci Lamatua dhu suri tèke karèi nèti uru ka.^a 4 Ra padhane Ne. Ka d'ai camèd'a èèna, Lamatua pamamuri hari Ne, lèke mola-mola sèmi dhu suri tèke ètu Sasuri Mola-Mèci Lamatua.^b 5 Èle èèna ka, Kristus pad'elo iisi Na mi Petrus.^c Nèngu pad'elo iisi Na mi ana madhutu Na dhèu canguru dua sèra kahèi.^d 6 Aa ca tèka, Na pad'elo iisi Na mi lèmi ngasu risi dhèu parcaya. Dhèu aa'i-aa'i se ladhe rèdhi Ne dènge musi madha rèngu. Nèti rèngu se, ae dhu mamuri era, aa ciki di dhu madhe le. 7 Ka Na pad'elo iisi mi Yakobis. Hèia Nèngu pad'elo iisi kahèi, mi dhèu pajuu-paleha Na aa'i-aa'i.

8 Ja'a dhèu limuri tèka dhu ladhe kèdhi Ne. Te ja'a ne nuka sèmi ana dhu rara iisi limuri tèka.^e 9 Dhèu pajuu-paleha Lamatua dhu leo sèra kapai risi nèti ja'a ne. Madhutu mola-mola, na, ja'a nia boe j'aj'i dhèu pajuu-paleha Na. Te uru èèna, ja'a ka dhu paj'èra dhèu unu Lamatua ètu mia-mia.^f 10 Te ngaa Ama Lamatua pad'elo d'ara hua iia Na mi ja'a. Hèia Na tao ja'a j'aj'i sèmi ne'e ne. Ropa Nèngu tao j'ara be'a hia ja'a, Na core eele boe lod'o iia d'ara. Nèti èèna ka, ne'e ne ja'a sab'a bia risi nèti rèngu aa'i-aa'i ra! Ja'a mesa ku boe dhu sab'a, te ngaa d'ara hua iia Lamatua ka dhu sab'a ètu mamuri ja'a.

11 De ladhe ja'a, do, dhèu pajuu-paleha dhu leo dhu aj'a-nori èèna ka, ngaa-ngaa tao boe. Te a'aj'a ji'i aa'i-aa'i mi èèna dhoka ca j'ara di. Ji'i peka-padhai taruu Lii Lolo Be'a Lamatua mi dhèu. Nèti èèna ka, miu j'aj'i parcaya Lii Lolo Be'a dhu sama èèna.

12 Ji'i tema aj'a-nori, peka na, Kristus dhu Ama Lamatua pua mai èèna, mamuri hari le nèti mamadhe Na. De, nga tao ka miu cahag'e peka na, “Dhèu madhe sèra, mamuri hari boe?” Ngangee èèna mai nèti mia? 13 Te ladhe dhèu madhe mamuri hari boe, sasoa na, Kristus mamuri hari boe kahèi! 14 Aa ladhe Kristus mamuri hari boe, na, aa'i-aa'i dhu ji'i peka-padhai dènge dhèu, gaguna aad'o. Aa lalèka miu mi Kristus, parcuma kahèi! 15-16 Aa ladhe tare'a dhèu madhe mamuri hari boe, ji'i j'aj'i sakasii kapod'e-kabèli mi Ama Lamatua. Te ji'i tema aj'a-nori, peka na, “Ama Lamatua ka dhu pamamuri hari Kristus!” Mema tare'a dhu ji'i lole sèmi èèna ka. Te ngaa ladhe sèmi dhèu madhe mamuri hari boe, sasoa na, Ama Lamatua pamamuri hari boe Kristus kahèi. 17 Pangee sèku j'ara ne: ladhe Kristus mamuri hari boe, lalèka miu mi Ama Lamatua parcuma! Aa miu pasae taruu sasala-sasigo miu! 18 Mesa boe èèna di, te dhèu aa'i-aa'i dhu uru èèna pa'èki dènge Kristus, dhu madhe le, ladhe Kristus kèd'i boe nèti mamadhe Na, rèngu madhe pacèri nèti Ama Lamatua kahèi. 19 Kristus j'aj'i era sarai èdhi, lula te'a, na, Nèngu neo tao j'ara hua iia hia èdhi. Te ngaa ladhe èdhi sanao-maena ho Nèngu neo tao sèmi èèna dhoka ètu rai-haha di, na parcuma! Aa èdhi j'aj'i dhèu kasia risi eele nèti dhèu aa'i-aa'i ra!

20 Aa te ngaa aad'o sèmi èèna, si? Te dhu lèke mola-mola ka: Kristus dhu Ama Lamatua pua mai èèna, mamuri le nèti mamadhe Na! Aa mesa boe Nèngu di, te èèna na dhèu-dhèu parcaya dhu madhe sèra, bèli-camèd'a mamuri hari kahèi. Kristus ne, nuka sèmi hua uru dhu pad'elo, na, rèngu dhu madhe sèra, bèli-camèd'a mamuri hari madhutu Nèngu. 21 Uru-uru èèna, dhoka dhèu èci di, nuka Adam dhu sisu paredha Ama Lamatua. De hahuku na, nuka mamadhe. Hahuku ne noto mi èdhi dhèu rai-haha kahèi. Te ngaa limuri ne, abhu ca dhèu hari, nuka Kristus, dhu mamuri madhutu paredha Ama Lamatua. De, lula babe'a Nèngu ka dhèu madhe bisa mamuri hari! 22 Dhèu aa'i-aa'i dhu sisu paredha Lamatua, lèke huku madhe sama sèmi Adam kahèi. Te ngaa dhèu aa'i-aa'i dhu pa'èki dènge Kristus, èèna na Ama Lamatua pamamuri hari si.

23 Te ngaa èci-èci ka dènge lod'o na. Kristus dhèu partama dhu mamuri hari, nuka sèmi hua uru deo na. Aa pe Na lèpa hari mai asa rai-haha ne, dhèu unu Na sèra heka mamuri hari kèna. 24 Èle ku, heka rai-haha ne èle kèna. Lod'o èèna, Kristus j'aj'i Dhèu Aae dhu pa'ele iie koasa aa'i-aa'i, paredha aa'i-aa'i, aa mamèu aa'i-aa'i dhu pamusu dènge Lamatua. Nèngu j'aj'i kahèi Dhèu Aae dhu pangèd'u hari hak paredha Na mi Ama Na, nuka Ama Lamatua.

25 Te Ama Lamatua hud'i nèd'u paredha taruu, toke Na segi aa'i dhu lab'a Kristus, sèna ka ra pahaha iisi mi Nèngu.^g 26 Abhu ca j'ara dhu pamusu dènge èdhi era, nuka mamadhe. Te ngaa d'ai limuri, ka Lamatua segi kahèi koasa mamadhe. De lèpa lod'o limuri, dhèu madhe heka. 27 Ètu Sasuri Mola-Mèci Lamatua suri, peka na, “Lamatua tao dhu Na segi aa'i-aa'i sèra, sèna ka ra pahaha iisi mi Dhèu dhu Lamatua pua mai èèna.” De dhu suri, peka na, “dhu Na segi aa'i-aa'i sèra, sèna ka ra pahaha iisi mi Dhèu Nèngu”, de lèke, ladhe peka na, Ama Lamatua pahaha boe iisi mi Dhèu unu Nèngu èèna. Lula Ama Lamatua ka dhu ded'e Ne, sèna ka j'aj'i Kètu mi ngaa aa'i-aa'i ra.^h 28 Bèli-camèd'a ladhe aa'i-aa'i nanene tare'a-re'a Ana Ama Lamatua, èèna na Ana ne pangèd'u aa'i-aa'i hari mi Ama Na, dhu ded'e Ne j'aj'i Kètu nèti aa'i-aa'i sèra. Èle èèna, Ama Lamatua paredha taruu ètu madha j'ara aa'i-aa'i, bagi mi dhèu aa'i-aa'i ra.

29 Abhu dhèu dhu neo sarani ho gati dhèu dhu madhe le dhu dhae sarani mèka. Te ngaa ladhe dhèu madhe mamuri hari boe, nga tao ka rèngu neo sarani hia dhèu madhe?ⁱ 30 Aa nga tao ka ji'i oe madhe pahari-pahari ètu d'ara sasab'a ji'i, ladhe dhèu madhe mamuri hari boe? 31 Te bèli-bèli ja'a oe madhe! Te ngaa a'ari pasue! Ja'a subha, te ja'a pangee, na, ngaa-ngaa tao boe ladhe ja'a madhe. Te ja'a bisa boti kètu, lula miu pa'èki taruu dènge Kètu èdhi, Yesus Kristus, dhu Ama Lamatua pua le mai. 32 Ca hari ni, lod'o ja'a ètu kota Epesus era, ja'a patao-palaha dènge dhèu sèra nuka sèmi badha hui dhu bhelu. Te ngaa ladhe ja'a dhoka patao-palaha, ho bisa segi mesa ku, aa hia boe Lamatua, èèna parcuma. Guna boe ngaa-ngaa! Te ladhe tare'a dhèu madhe mamuri hari boe, hua iia èdhi madhutu dhu dhèu peka, na,

33 Miu baku lèke tipu, ho pangee sèmi èèna! Te abhu dhu peka na,

34 Ad'u-ue ia ka bhabhelu-katub'a! Rèno ka! Ator ngi'u mu! Tao dhu lèke di! Dhu lèke ka, miu hud'i me'a ku makae, te ètu talora aae miu, abhu era dhèu dhu tadhe mèka Ama Lamatua.

35 Abhu dhu pakarèi, na, “Ladhe dhèu madhe mamuri hari, j'ara na tasamia? Aa ngi'u aae j'aj'i sèmi ngaa sa?”

36 Goa, ee! Te ladhe sèle hini, hini ne hud'i roe ètu d'ara rai uuru ku, heka na bisa muri kèna. 37 Aa hini dhu èdhi sèle, rupa na leko-leo nèti dhu muri, èli, heka cèu rèu kèna. Te nèngu èèna hini dhu mango-meto, nuka sèmi gandum, do are, do hini dhu leo. 38 Èci-èci ka madhutu raropa ra, madhutu dad'èi Lamatua. Lula Nèngu ka dhu ator raropa nèti ana aaj'u sèra.

39 Badha dènge dhèu rai-haha sèmi èèna kahèi. Èci-èci ka dènge raropa ra, madhutu dad'èi Ama Lamatua. Hèia ngi'u dhèu rai-haha madhutu raropa dhèu rai-haha. Ngi'u badha èci-èci ka dènge raropa ra. Manu-bhui dènge raropa ra. I'a dènge raropa ra. Dhu leo sèra dènge raropa ra.

40 Abhu mèdha ètu dedha-liru, aa abhu ètu rai-haha. Ètu dedha-liru dènge kolo-karisi na. Te ngaa kolo-karisi ne, leko-leo nèti dhu ètu rai-haha. Dhu ètu rai-haha abhu kolo-karisi kahèi. Te ngaa kolo-karisi se, leko-leo nèti dhu abhu ètu dedha-liru. 41 Ètu dedha-liru kolo-karisi madha lod'o leko-leo; kolo-karisi hèru leko-leo; aa kolo-karisi hua-hètu leko-leo kahèi. Èci-èci ka dènge kolo-karisi ra. De aa'i-aa'i ra dènge kolo-karisi, si?

42 Ladhe dhèu madhe mamuri hari, èèna nuka sèmi hini deo na. Te ladhe padhane ka dhèu madhe, ngi'u aae na ele iie, si? Te ngaa ladhe mamuri hari, ngi'u na sèmi heka uru èèna. Te ladhe mamuri hari, bisa heka madhe. 43 Ropa èdhi padhane dhèu madhe, èdhi mad'enge ngi'u aae ne. Te ngaa ladhe dhèu èèna mamuri hari, na saraga titu kèna! Te nèngu j'aj'i mola-mèci! Dhèu dhu madhe le bisa heka tao ngaa-ngaa lod'o dhèu padhane ne. Te ngaa ropa na mamuri hari, nèngu èra titu kèna! 44 Ladhe dhèu mamuri era, ne'a dhoka ngee dènge rasa di, si? Te ngaa ropa na madhe, ho mamuri hari, na, Roh Lamatua hia ne mamuri dhu lèke. Ka dhèu ne sèmi heka uru èèna.

45 Dhèu rai-haha dhu uru-uru j'ara, dhu sama sèmi èdhi, nuka Adam. Madhutu Sasuri Mola-Mèci Lamatua dhu suri tèke, peka na, “nèngu j'aj'i dhèu rai-haha dhu mamuri, dhu ne'a ngee dènge rasa.” Te ngaa dhèu rai-haha dhu raropa na sama sèmi Adam, dhu dedha risi eele, nuka Kristus. Roh Na ka dhu bisa hia dhèu mamuri dhu lèke.^k 46 Raropa dhèu dhu uru-uru j'ara, nuka dhèu dhu ne'a dhoka ngee dènge rasa di, ka bisa madhe. Te ngaa dhu mamuri hari, nuka dhèu dhu abhu mamuri dhu lèke nèti Roh Lamatua. 47 Raropa dhèu dhu uru-uru j'ara ètu rai-haha ne, dhu tao nèti ahu rai. Te ngaa raropa ka dua, nuka Kristus dhu mai nèti sorga. 48 Èdhi dhu mamuri ètu rai-haha ne ca ropa dènge dhèu partama dhu Lamatua paj'aj'i nèti ahu rai. Te ngaa dhèu dhu pa'èki dènge Ama Lamatua ètu sorga, ca ropa dènge Kristus dhu mai nèti sorga. 49 Èdhi dhèu limuri ne, ca ropa dènge Adam dhu Ama Lamatua paj'aj'i nèti ahu rai. Te ngaa nèbhu-nèbhu, gati dènge raropa hiu, sama sèmi Kristus dhu mai nèti sorga.

50 A'ari pasue aa'i-aa'i! Dhu ja'a neo peka dènge miu, sèmi ne'e: èdhi dhu ca ropa dènge dhèu partama, ngi'u èdhi j'aj'i nèti sisi dènge raa. Dènge j'ara ne'e, èdhi bisa boe abhu pusaka ho j'aj'i ana-ana Ama Lamatua ètu sorga. Bisa boe! Te raropa dhèu sèmi èèna, bèli-camèd'a ngi'u ra ele iie, ka bisa boe sèmi rare ngaa dhu taha nare nèbhu.

51 De nanene paie-iie! Te ja'a neo bhoke paled'a rahasia èci. Èèna na abhu dhèu parcaya cahag'e dhu madhe boe. Te ngaa èdhi aa'i-aa'i ti, èèna na gati raropa hiu. 52 Ropa lii tiu tèbhe limuri tèka, aa'i-aa'i se j'aj'i dènge sahèka. Malai risi nèti ate musi madha. Te ropa tèbhe limuri tèka lii, cag'ag'a laa dhèu madhe mamuri hari. Aa ladhe ra mamuri hari, dhèu se madhe heka, aa ele iie heka. Sèmi èèna kahèi dènge èdhi dhu mamuri era. Èdhi aa'i-aa'i ti abhu raropa hiu.^l 53-54 Te ngi'u aae èdhi dhu bisa ele iie ne'e ne, j'aj'i ngi'u hiu dhu ele iie heka! Aa èdhi dhu bisa madhe ne'e ne, neo ub'a j'aj'i raropa hiu dhu madhe heka! Èèna madhutu ngaa dhu suri tèke ètu d'ara Sasuri Mola-Mèci, peka na,

56 Nga tao ka mamadhe nèti rasa pèd'a hia èdhi dhèu rai-haha? Lula èdhi ad'u-ue sasala. Tasamia ka sasala sèra dènge koasa? Lula Atora Ama Lamatua peka na, sasala èdhi, nuka sisu paredha Na! 57 Te ngaa limuri ne, aa'i-aa'i se j'aj'i leko-leo le! De èdhi hud'i manèngi makasi ae-ae mi Ama Lamatua. Te Nèngu ka tao èdhi bisa segi bhabhelu-katub'a lula Kètu èdhi, Yesus Kristus. Mema tare'a, te Kristus ka dhu segi aa'i!

58 De a'ari pasue aa'i-aa'i! Pa'èra d'ara! Baku roe! Sasab'a miu hia mi Ama Lamatua hud'i asa be'a, aa asa ae. Te miu me'a le, na, sab'a bia hia Lamatua èdhi èèna, iia d'ara boe.