Dhèu ro'o boe madhutu lii Ama Lamatua
3
Nèti badha aa'i-aa'i dhu Ama LAMATUA paj'aj'i ètu rai-haha ne, mege ka dhu mèu risi kapod'e-kabèli. Ca lod'o, mege karèi bhèni na, aku nèngu na, “Tare'a, do? Ama Lamatua kai miu baku mi'a hua aaj'u aa'i-aa'i ètu d'ara oka ne'e.” 2-3 Ka bhèni na b'ala, “Aad'o! Ji'i bisa nga'a! Dhodhoka aj'u ca kapua ètu talora oka ne, Ama Lamatua kai, baku nga'a hua na. Na peka na, ji'i baku nga'a, aa baku g'ag'e hua èèna kahèi, te aad'o na, ji'i madhe!”
4 Te ngaa mege na dhaa, aku nèngu na, “Waa! Sèmi boe èèna! Miu se madhe boe! 5 Ama Lamatua mema kai tare'a sèmi èèna, lula dhu ne'a le, ladhe mi'e hua aaj'u èèna, miu j'aj'i d'èlu-mèu sèmi Nèngu. Ho èèna na me'a mia dhu be'a, aa mia dhu karehe.”
6 Aa bhèni ne ladhe na aj'u ne be'a titu kèna, dènge hua na ele boe kee. Na ngee, “Ladhe ja'a ku'a hua aj'u ne'e, ja'a d'èlu-mèu.” Hèia puu nare ka hua aj'u èèna, ka na'e. Na'e nare, nèti hia dhèu èmu na, ka na'a kahèi. 7 Ra'a rare ka, heka re'a na rèngu dhu pake boe mèdha dhu hutu ua rèngu. Nèti èèna ka, ra lui rèu aj'u ho pa'abhe era makae rèngu.
8 D'ai lod'o nihia, dua ra tadèngi lii core haga Ama LAMATUA ètu d'ara oka èèna. Ka dua ra rai lasi lu'u asa ca bèka aj'u, sèna ka LAMATUA baku nèdhi si. 9 Te ngaa Ama LAMATUA paroa mi dhèu mone èèna, aku Nèngu na, “Adam! Èu ètu mia?”
10 Hèia mone na dhaa, “Ja'a tadèngi lii Lamatua ètu ne'e. Te ngaa ja'a makae, lula ja'a pake boe mèdha ètu ua. Nèti èèna ka, ja'a rai pahuni iisi.”
11 Ka Lamatua peka na, “Cee ka dhu peka, na èu dhu pake boe mèdha-papake? De tasamia? Tatu èu mu'a le hua aj'u dhu Ja'a kai na, sina ma?”
12 Ka na b'ala, peka na, “Bhèni dhu Èu hia ho pa'anga dènge ja'a èèna, ka dhu hia ja'a ku'a!”
13 Hèia Ama LAMATUA peka dènge bhèni na, aku Nèngu na, “Nga tao ka, èu ad'u madha j'ara èèna?”
Ka bhèni ne dhaa, peka na, “Te mege ne ka dhu ag'o ja'a! Nèti èèna ka, ja'a ku'a.”
Ama Lamatua dhoo si
14 Èle èèna ka, Ama LAMATUA dhoo mege èèna, aku Nèngu na,
“Ja'a huku èu, lula tatao èu. Nèti badha aa'i-aa'i, dhoka èu di dhu abhu huku sèmi ne'e. Mulai nèti deo ne'e toke èu madhe, èu dhoka rod'o dènge kakara, aa mu'a ètu rai di. 15 Ja'a tao sèna ka, èu loe boe pamusu dènge bhèni ne. Aa ana-èpu miu dua mi sèmi èèna kahèi. Ana-èpu èu, èèna na kadhi hui tèdhu dhèu. Te ngaa ca dhèu nèti ana-èpu bhèni ne, èèna na dhedhe palaho kètu èu.”
16 Èle èèna ka, Ama Lamatua peka dènge bhèni ne,
“Èèna na, Ja'a pasusa tabha èu, ropa èu dènge babia; lod'o mora iisi, èu asa tabha j'èra. Masi ka sèmi èèna, d'ara èu d'èi taruu dhèu èmu èu, aa nèngu ka dhu ator èu.”
17 Ka Ama Lamatua peka dènge mone ne,
“Èu madhutu boe lii paredha Ja'a, te ngaa èu nanene dhoka lii dhèu èmu èu di, ka èu mu'a hua aj'u dhu Ja'a kai èèna. Nèti èèna ka, èu abhu huku kahèi. Aa rai lèke huku kahèi. Nèti deo ne'e, toke d'ai èu madhe, hud'i èu kabèli rai, heka èu abhu nganga'a kèna. Dènge sab'a bia sèmi ne'e ka, èu heka mamuri kèna. 18 Masi ka èu sèle rupa-rupa hini èèna ka, te ngaa dhu muri mai dhodhoka dhudhu-sete di. 19 Hud'i èu èi kabhèsu haa ku, heka rai hia èu nganga'a kèna. Èu hud'i sab'a bia sèmi èèna ku, toke d'ai lod'o èu madhe. Èu ne, Ja'a paj'aj'i nèti rai. De ladhe èu madhe, èu j'aj'i hari rai.”
20 Èle èèna ka, Adam pangare dhèu èmu na ‘Hawa’ (dhu sasoa na ‘dhu mamuri’), te nèngu ka j'aj'i ina nèti dhèu dhu mamuri aa'i-aa'i.a
21 Hèia Ama LAMATUA tao mèdha-papake nèti ka'uri badha, ka papake dua ra.
Ama Lamatua babège eele Adam dènge Hawa
22 Ka Ama LAMATUA peka, “Limuri ne, dhèu re'a le, mia dhu be'a dènge mia dhu karehe, sèmi Èdhi kahèi. De mage dhoka, rèngu ra'a hua aj'u dhu èci hari na, dhu hia mamuri taa-taa.” 23 Èle èèna ka, Na babèga eele si nèti d'ara oka Eden èèna, ho lasi asa era leo, sèna ka ra mamuri dènge sab'e oka-tedhe. Lula dhèu j'aj'i nèti rai, de mamuri kahèi nèti rai. 24 Babège nare si, ka Lamatua paredha ana pajuu Na nèti sorga, dhu dènge èla,b ho lasi j'aga oka èèna re ca bèka dhimu. Rèngu dènge samala dhu heo ha'a-ha'a, dhu seru la'e-mai. Lamatua pua si bèdho eele j'ara la'e sa d'ara, te Nèngu d'èi boe dhèu puu rare hua aj'u dhu hia ra mamuri taa-taa èèna.