Au sura' susura ia fee basa atahori mamahere' mana soa ra'ab'ue sia kota Korintus ma sia profinsi Akaya.^a 2 Au hule-o'e mbali Lamatualain, naeni hita Aman, noo Yesus Kristus, naeni hita Lamatua na. Au hule fo ratud'u rala malole na ra neu nggi, naa fo misod'a noo nee-nee lino-lino ma mole-d'ame.

3 Hai hii 'a basa atahori so'u rananaru Lamatualain nara na. Huu Eni, hita Lamatuan Yesus Kristus Ama na. Basa rala susue' ra ra'oka mia Eni, boe ma Eni hii 'a tao manggatee rala ta ra. 4 Mete ma hita hambu sususa', na, Eni mana tao namaho'o nggita. Naeni de hita o bisa tao tamaho'o atahori laen mana hambu sususa'. Hita bisa tao manggatee rala na ra, 'ona' Lamatualain tao manggatee rala ta ra boe. 5 Kristus hambu sususa' naen seli fee nggita ena. Dad'i, huu Kristus named'a doid'oso' mata' naa ena, naeni de mete ma hita hambu sususa', na, Ana tao manggatee rala ta ra.

6 Mete ma hai sia ia hambu sususa', na, Lamatualain tao manggatee hai rala ma ra. Ma mete ma hai hambu sususa', ma hai mi'itataa' noo rala nemeho'ot, na, hei o musi mihine mae, Lamatualain pake dala' naa fo tao manggatee rala ma ra, ma mbo'i nggi mia de'ulaka'. Huu mete ma hei hambu sususa' 'ona' hai boe, Lamatualain tao manggatee rala ma ra, fo ama bisa mi'itataa' noo rala nemeho'ot. 7 Naeni de hai mimihere mae, hei bisa mi'itataa' mihere' nda minggongga sa. Huu hai bub'ulu' mae, mete ma hei hambu sususa' 'ona' hai, na, Lamatualain tao manggatee rala ma ra, ma Ana o tao manggatee hai rala ma ra boe.

8 Toronoo ngga ra, e! Hai hihii ma ra hei mihine teb'e so'al sususa' fo hai hambu sia profinsi Asia. Hai med'a beran seli, lena' hai aru-lelembam. De hela' a mbei fo hai masaloe, huu du'a mae, hai mae' a mate ena.^b 9 Hai o med'a beran seli, 'ona' atahori sa fe'e rena nala, mana ma'etu' ded'eat na'etu' hukun mate neu e. Te basa naa ra dad'i, fo tamahere neu Lamatualain, 'afi' tamahere neu ao ta ra. Te Lamatualain naa, na'ena koasa fo tao nasod'a bali' atahori mates ra. 10 Eni mana mbo'i nggita mia de'ulaka', lele' tae' a mate. Dei fo Eni o nau mbo'i nggita mia de'ulaka'. Hita tamahena tahere' tae, dei fo Ana mbo'i nggita mia dala de'ulaka' ra nakandoo 'a 11 Mete ma hei hule-o'e mikindoo 'a fee hai, naa o tulu-fali hai boe, te Lamatualain nae tao fee hai dala malole' hetar. Ana nae tao ta'o naa, huu atahori hetar hule-o'e fee hai. Ma lele' atahori hetar rasaned'a hai, na, ara ro'e makasi naen seli neu E.

12 Hai bisa 'ola' koao, huu hai bub'ulu' sia rala ma ra mae, saa fo hai tao sia raefafo' ia, tungga Lamatualain hihiin fee hai. Hai nda dinggo' hela ue-tataos naa sa, naa fo basa atahori rita hai ue-tao noo rala meu'. Hai o milalao ue-tatao ma ra, mendi' mahine'^c lao' mia Lamatualain, nda mendi' mahine' mana na'oka sia raefafo' ia sa. Huu Lamatualain natud'u rala malolen neu hai. Naeni de hai tao ues manggate lena', lele' mi'ib'ue moo nggi. 13 Au sura' fee nggi' a so'al dala-d'ala' fo ama bisa baca ma mihine. Ia naa hei mihine au masud ngga ruma ena. Te au 'umuhena, dei fo hei mihine noo matetu-manad'ai'. 14 Ia naa, hei fe'e mihine mbei 'a so'al hai. Te dei fo, mete ma hita Lamatuan Yesus Kristus bali' nema, na, au 'umuhere hei mihine nae' ena. Noo ta'o naa, hei bisa 'ola' koao so'al hai, 'ona' hai o 'ola' koao so'al hei boe.

15 Huu au 'umuhere hei mihine dala' ia ra, naa de ma'ahulun au parnaa 'u'etu' 'ae 'eti selu' sia nggi, naa fo ama bisa hambu papala-b'ab'anggi' lao rua. 16 Dad'i dalahulun au du'a, mete ma au dad'i 'eti sia profinsi Maked'onia, na, au bisa tuli fo se'u 'ita nggi. Basa fo au bali' mia Maked'onia, au bisa tuli selu' nggi. Noo ta'o naa, hei bisa tulu-fali au, fo au bisa lao 'ukundoo profinsi Yud'ea 'uu. Te au nda dad'i tuli hei sa.^d

17 Lele' au 'ufad'e 'ae, au 'ae 'eti se'u nggi, au teb'e-teb'e' 'ae 'eti se'u nggi. Au nda 'u'etu' dala' ia tungga 'a hihii-nanau ngga, 'ona' atahori laen mana sia raefafo' ia sa. Au nda atahori mana dea-rala', mana nataa nae, “Hei” te du'a nae “Hoko'”. Au nda atahori 'ona' naa sa. 18 Hita bisa tamahere neu Lamatualain, huu mete ma Ana 'ola' dala' sa, na, tantu Ana tao tungga. Naeni de hai o ta'o naa boe. Mete ma hai mitaa mae, “Hei” na, hai nda du'a mae, “Hoko'” sa.

19 Au, Silas, ma Timotius minori nggi so'al Yesus Kristus, Lamatualain Ana na. Eni nda atahori mana dea-rala' mana nataa nae, “hei”, te masud na, “hoko'”. Eni ralan nda bab'anggi sa. De mete ma ana 'ola' nae, “hei”, na, teb'e-teb'e' “hei”.^e 20 Basa dala' fo Lamatualain helu-fuli ena, dei fo Eni tao se dad'i. Naeni de, mete ma Yesus helu-fuli dala' esa nae, “hei,” hita bisa tataa tae, “Teb'e. Naeni ena! Amin!” Huu, tahine mema' saa fo Yesus nae tao' a. Hai mifad'e dala' ia fo natud'u Lamatualain manaseli na. 21 Lamatualain naa, mana pili nala hei ma hai boe. Eni mana so'u nggita dad'i atahori na. Eni o mana tao fee nggita ta'atataa' takandoo 'a. 22 Eni mana fee Dula-d'alen nauli nggita, ma natud'u dud'u'an fee nggita. Naa 'ona' atahori sa tao eni cap na neu saa esa fo natud'u nae, naa eni hata-heto na.

23 Au hule fo Lamatualain mana dad'i sakasii sia 'o'ola ngga ia. Te Ana bub'ulu' au rala ngga. Ana bub'ulu' saa de au nda dad'i 'uu sia kota Korintus sa. Au nda nau tao nggi mae sa, naeni de lele' naa au nda dad'i 'eti sa. 24 Hai nda so'u-so'u' aom dad'i malangga fo denu-d'enu' nggi mae, hei musi mimihere neu seka. Te hai tao ues mi'ib'ue moo nggi, fo rala ma ra ma'ahee. Ama bisa mi'itataa' mihere', huu mimihere neu Lamatualain.