Besa-b'esa moo sud'i 'a saa sosonggo' ra!
10
Toronoo susue ngga ra, e! Hei 'afi' lilii' dud'ui dalahulu' ra lele' bei-ba'i ta ra mia mamana rou' a. Lamatualain natud'u dala' soa' neu basa se nendi' lelee', mana lao' sia mata na ra. Boe ma ana tad'a hendi tasi oe' a, de noo se tungga naa losa ara seli tasi' a seri' reu noo masod'a'.a 2 Lelee' a noo tasi' naa, dad'i nekendandaa' esa. Bei-ba'i ta ra ramahere ba'i Musa de nalalao se, de ara tungga lelee' a, ma maso' tasi oe' rala reu roo e. Naa 'ona' hita mana tamahere neu Kristus, lele' hita hambu sarani', naa natud'u 'oi, hita dad'i Eni atahorin ma hita rena Eni boe. 3 Hita bei-ba'i na ra basa se raa nanaat fo Lamatualain Dula-d'alen sad'ia fee se raa.b 4 Boe ma basa se rinu oe fo Lamatualain Dula-d'alen sad'ia fee se rinu. Sira rinu' naa, nandali mia fatu monae' fo Lamatualain Dula-d'alen natud'u neu se. Ara lao' bee reu o, fatu naa, sia ena. Fatu naa, naeni Kristus.c 5 Te Lamatualain nda hii atahori hetar tatao-nono'i na ra sa. Lele' ara lao' ndule mamana rou' ma loa' naa, atahori hetar mate mia naa. Dad'i ara ra'oi atahori naa ra sia mamana' hetar.d6 Basa naa ra dad'i fo netud'u conto, fo ata 'afi' hii tao de'ulaka' 'ona' se.e 7 'Afi' songgo 'ona' sira ruma. Sia Lamatualain Susura Meumaren nenesura' 'oi, “Atahori Isra'el ra 'endo' raa-rinu ra'ab'ue sia paton sapi ana' a mata na. Basa ma ara mulai songgo-tanggu.”f 8 Ata 'afi' hohongge. Huu fai mana lao' naa, ara hohongge 'ona' naa, de atahori rifon rua nulu telu (23.000) mate mia 'a fai esa rala.g 9 Ata 'afi' sob'a-sob'a tao de'ulaka' mata'-mata', fo tae mete Kristus nae huku-d'oki nggita, do hoko'. Huu atahori Isra'el ra ruma rae sob'a Lamatualain ta'o naa, boe ma Ana haitua mengge maraso' hetar rema 'ero risa se.h 10 Ata o 'afi' unggu-remu. Huu sira ruma unggu-remu rakandoo 'a, de Lamatualain denu aten esa mia sorga neu tao nisa se.i
11 Dala' naa dai atahori Isra'el ra, fo dad'i conto fee nggita. Ara sura' basa se ena, de ata tanori ma 'afi' tao tungga sala na ra. Huu fai matete'en deka-d'eka nema ena.
12 Ned'a-ned'a', e! Ia naa dud'u'a mae, bisa mu'utataa' muhere' ena. Te musi besa-b'esa, fo 'afi' tud'a. 13 Lele' hii mae tao de'ulaka', na, musuned'a te atahori laen ra o med'a rita sob'a-d'ou' 'ona' naa boe. Te ho bisa mumuhere neu Lamatualain fo Ana tao tungga 'o'ola na. Ana nda hela nggo hambu sob'a-d'ou' nalena' beb'e'i-b'ara'ai ma sa. Lele' hambu sob'a-d'ou' 'ona' naa, na, Ana fee nggo dala sosoi'. Ana nau tao nggo mu'utataa' muhere', fo 'afi' tud'a.
14 Dad'i toronoo susue ngga ra, e! Mete ma atahori rae ra'asusuu' nggi fo be'utee neu sosonggo' ra, na, mela hela naa leo! 'Afi' eo-ao fai!
15 Au 'ola-'ola' 'oo nggi mana mihine dud'u'a naru' ra. Hela fo ama timba-tai ao ma ra, fo bub'ulu' saa fo au 'ae 'ola' naa, teb'e. 16 Dud'u'a sob'a dala' ia dei: mete ma taa ta'ab'ue sia Lamatua' mein, ma ha'i tala nggalaas a, de to'e makasi mbali E, ma tinu mia nggalaas naa, na, sosoan nae, hita nenepa'a' too Kristus ena. Lele' Ana fee raan nandali de mate, naa 'ona' hita o mate boe. Lele' hita bib'ib'i roti a, fo hita taa, naa sosoan 'ona esa', naeni, hita nenepa'a' too Kristus. Dad'i lele' Ana mate, naa 'ona' hita o mate boe.j 17 Basa nggita ha'i bab'anggi' mia roti balok esa. Dad'i basa mana ha'i bab'anggi' mia roti naa, mae hita hetar o, 'ona' hita nenepa'a' teu ao' esa. 18 Dud'u'a sob'a atahori Isra'el lele ulu' ra. Lele' ara hala banda sia mei tutunu-hohotu' a fo be'utee neu Lamatualain, malangga agama mana hala' naa, mana hambu naa sisi a. Eni sosoan, sira nenepa'a' roo Lamatualain, boe ma sira o nenepa'a' roo atahori mana nendi banda tutunu-hohotu' a.k
19-20 Au masud ngga ta'o bee? Lele' atahori nda mana rahine Lamatualain sa rae fee tutunu-hohotu' neu sosonggo na ra, naa nda na'ena sosoan saa sa boe, do? Huu sosonggo' naa ra, 'aka' paton mates ra! Hoko'! Au masud ngga ta'o ia: lele' atahori hala banda dad'i tutunu-hohotu' fee neu sosonggo na ra, ara songgo dula-d'ale de'ulaka' ra. Te ara nda be'utee neu Lamatualain matetu' a sa. Dad'i au nda nau nggi nenepa'a' moo dula-d'ale de'ulaka' 'ona' naa sa.l 21 Mete ma hei nenepa'a' moo Lamatualain, ma minu mia nggalaas sia Lamatua' mei tutunu-hohotun, na, ama 'afi' mii mib'ali moo dula-d'ale de'ulaka' ra, ma minu mia sira nggalaan lele' atahori songgo se. Huu naa sosoan nae, hei nenepa'a' moo dula-d'ale de'ulaka' ra ena. 'Ona' naa boe, mete ma hei mia sia Lamatua' mei tutunu-hohotun, ama sud'i boe mia sia sira mein fai. Huu naa sosoan nae, hei nenepa'a' moo dula-d'ale de'ulaka' ra! Nggoa' ra, e! 22 Hei du'a ta'o bee? Mae tao hita Malanggan horo-mbala nggi, do? Naa soe ena ma! Mbei ma du'a mae hei ma'ad'ere' lena' E, do?m
Tao basa-b'asa' e fo so'u nenanaru Lamatualain nara na
23 Mbei ma hei mae, “Au sud'i 'a 'ae tao saa, na, bole. Huu naa au hak ngga.” Teb'e. Musuned'a te, nda basa dala' ra malole' soa' neu nggo sa. Ma nda basa dala' ra bisa tulun tao ma'ad'ere ralam sa.n 24 'Afi' sangga 'aka' a hahambu' soa' neu 'a ao ma. Malole lena', sangga hahambu' soa' neu atahori laen boe.
25 Dad'i au hule ta'o ia: mete ma hasa sisi sia mamana neseo-nehasa', na, mia. Sud'i boe mitane fai mae, “Ia sisi sosonggo', do?” Do du'a mae, “Au 'ua sisi ia, do hoko'?” 26 Te sia Lamatualain Susura Meumaren nenesura' 'oi, “Raefafo' noo basa isi na ra, hita Malanggan ena na.”o
27 Mete ma hambu atahori nda fe'e ramahere Kristus sa rae, “'Ima, mia sia ume ngga!” Mete ma mae muu, na, muu leo, ma mua basa saa fo ara fee neu nggo' a. Sud'i boe mutane mae, “Au bisa 'ua nanaat ia ra, do hoko'?” 28 (Te mete ma hambu atahori sa nema 'utu-'utu nae, “'Afi' mua, huu ia sisi sosonggo',” malole lena' 'afi' mua. Musi mete malolole atahori mana nendi hara' naa, ana 'ai, do hoko'. 29 Au masud ngga, du'a malolole tungga atahori naa dud'u'an, bole mua, do 'afi'. 'Afi' du'a mae malole, tungga 'a hihii ma.)
Tao-tao te, au bole tao tungga hihii ngga boe. Te mete ma atahori laen du'a nae, nda malole' sa mete ma eni tao dala' esa, na, 'ona bee de nda nggolo au tao tungga hihii ngga sa, huu dala' naa nda malole' soa' neu 'aka' a atahori naa sa? 30 Mete ma au 'o'e makasi mbali Lamatualain, basa ma 'ua, na, ta'o bee de atahori 'ola' ra'atutud'a' au?
31 Dad'i hei mae mia do, minu do, tao sud'i 'a saa, na, tao basa' e fo mitud'u Lamatualain nara malole na. 32 'Afi' tao mi'isususa' atahori Yahud'i, do, atahori nda Yahud'i sa, do, Kristus atahori mamahere na ra. 33 Tao 'ona' au sie. Huu au sob'a-sob'a tao 'umuho'o se sia basa dala' ra. Au sob'a tao malole' nda fee neu 'aka' ao ngga sa. Te au sob'a tao malole' fee neu basa se, fo ara hambu masoi-masod'a' boe.