Lamatualain Dula-d'alen fee koasa neu nggita, fo tao ue-tataos mata'-mata'
12
Toronoo susue ngga ra, e! Au nau fo ama mihine so'al koasa noo bab'anggi-b'ab'a'e' fo Lamatualain Dula-d'alen fee neu nggita fo ata pake' a. 2 Hei bub'ulu' ena mae, lele' ama nda fe'e dad'i Lamatua' atahorin sa, hei 'aka' songgo-tanggu sud'i 'a saa nda mahara' naa ra sa. Hei tungga noo poke-mbake' neu se. 3 Huu naa, au nau fo ama mihine mae, nda bisa hambu atahori nenepa'a' noo Lamatualain Dula-d'ale Meumaren 'oi, “Sumba-ndoon neu Yesus naa!” Ma nda bisa hambu atahori fo nda nenepa'a' noo Lamatualain Dula-d'ale Meumaren nae, “Yesus naa, au malangga ngga mana na'ena hak parenda au!”4 Lamatualain Dula-d'alen fee atahori esa-esa' noo bab'anggi-b'ab'a'e', fo ara ralalao ue-tataos laen-laen. Te basa bab'anggi-b'ab'a'e' naa ra, lao' mia Dula-d'ale' esa. 5 Atahori hambu bab'anggi-b'ab'a'e' mata'-mata' fo mete-se'u atahori, te basa se rena mia Malangga esa. 6 Atahori hambu ue-tataos mata'-mata' fo nalalao Lamatualain ue-tataon, te 'aka' na Lamatualain mana tulu-fali se fo ralalao basa ue-tataos ra. 7 Lamatualain natud'u Dula-d'alen sia atahori esa-esa' masod'an noo dala' esa-esa' noo 'enan, te masud na basa se hambu hahambun 'ona esa'. 8 Ana fee koasa Dula-d'alen neu atahori na ra. Ruma simbo koasa fo ara bisa du'a naru', fo fee nenori' nandaa. Ruma simbo koasa fo rafad'e noo relo-relo saa fo sira rahine' a. 9 Ruma fai simbo koasa fo ramahere rahere' Lamatualain, huu sira nenepa'a malolole roo Eni Dula-d'ale na. Ruma fai simbo koasa fo tao ra'ahahai' atahori mamahed'i' ra. 10 Ruma fai simbo koasa fo tao manad'ad'i manaseli' mata'-mata' fo ratud'u Lamatualain mandete-masa'a na. Ruma fai simbo koasa fo dui-b'engga Lamatualain hehelu-fufulin neu atahori na ra. Ruma fai simbo koasa fo rahine dula-d'ale' bee mana na'oka sia Lamatualain, ma bee hoko'. Ruma fai simbo koasa fo 'ola' rahine rendi' ded'eat mata'-mata'. Ruma fai simbo koasa fo rafad'e ded'eat naa ra sosoa na. 11 Te 'aka' Dula-d'ale' esa' a mana tao fo basa atahori tao rala' ue-tataos naa ra. Ana fee atahori esa-esa' fo bisa tao ues tungga Dula-d'ale' a hihii-nanau na.a
Ao' esa, noo bab'anggin mata'-mata'
12 Au 'ae 'u'usasama' bab'anggi-b'ab'a'e' naa ra noo atahori ao na. Ao' esa bab'anggin hambu mata'-mata'. Te bab'anggi' mata'-mata' naa, nenepa'a' dad'i ao' esa' a.
Naa 'ona' Kristus atahori na ra boe.b 13 Basa nggita nenepa'a' too Dula-d'ale' esa. Naeni de lele' sarani nggita, ata dad'i 'ona' nusa' esa. Mae hita atahori Yahud'i do atahori nda Yahud'i sa, ate do atahori nenembo'it o, Lamatualain fee basa nggita Dula-d'ale' esa' a. Naa 'ona' basa nggita tinu oe mana nendi masod'a' mia oe mata' esa.
14 Mema' ao' naa, nda mia 'a bab'anggi' esa' a sa. Huu eni ia, dad'i mia bab'anggi' hetar. 15 Mete me ei ma nae, “Au ia, nda lima' sa. Dad'i au nda dad'i bab'anggi' mia aom sa.” Mae ana 'ola' na'o naa, te eni fe'e bab'anggi' esa mia ao ma. Teb'e, to? 16 Boe ma 'ona' ndikim nae, “Au ia, nda matam sa. Dad'i au nda dad'i bab'anggi' mia aom sa.” Mae ana 'ola' ta'o naa o, eni fe'e bab'anggi' esa mia ao ma. 17 Dud'u'a dei! 'Ona' aom dad'i 'aka' mata', na, ta'o bee fo hambu rena? Boe ma 'ona' aom dad'i 'aka' ndiki', na, ta'o bee fo bisa hae mala foo-foo' ra?
18 Te hei bub'ulu' ena, Lamatualain tao nggita dad'i 'ona' ao' esa, ma ator se noo bab'anggin mata'-mata', tungga Eni hihii na. 19 Mete ma hita aon dad'i 'aka' bab'anggi' mata' esa' a, na, naran nda ‘ao'’ sa ena, to? 20 Te matetun, hita aon na'ena bab'anggi' mata'-mata'. Naa mana tao e dad'i ao teme-ao esa.
21 Atahori matan nda bisa naloe-nad'ae liman nae, “Au nda parluu nggo sa!” Boe ma atahori langgan nda bisa 'ola' neu atahori naa ein nae, “Au nda parluu nggo sa.” 22 Matetun, naeni hambu ao' a bab'anggin fo hita tae nda ma'adere' sa ma nda pantiin sa, te hita fe'e parluu se. 23 Hambu bab'anggi' fo hita tae nda ra'ena sosoa' sa, te fe'e ta'ab'oi se noo malole'. Ma hambu bab'anggi' fai fo hita mae tatud'u, de talusa tahere' se. 24 Te mete ma bab'anggi' nda mana tao fee nggita mae sa, na, ata nda tao saa-saa neu se sa boe.
Te Lamatualain na'ab'ue basa bab'anggi' ra fo tao se dad'i reu ao' esa. Ma Ana ator fo bab'anggi' fo hita tae nda pantiin sa, ata ta'ab'oi se noo malolole, 25 huu Ana nda nau hita aon neneb'ab'anggi' sa. Ana nau fo basa bab'anggi' ra, esa mete-se'u esa. 26 Mete ma bab'anggi' esa hambu sususa', na, basa se med'a sususa' boe. Ma mete ma esa simbo had'a-hormat, na, basa se tungga ramaho'o boe.
27 Hei o 'ona' naa boe. Huu hei 'ona' Kristus ao teme-ao na. Atahori mamahere' esa-esa' dad'i 'ona' bab'anggi' esa mia Kristus ao na. 28 Huu sia atahori mamahere' ra talad'an, Lamatualain fee koasa fo tao ue-tataos mata'-mata'.
Kaesan, Ana denu atahori ruma reu dui-b'engga hehelu-fufuli na.
Karuan, Ana pake atahori ruma dad'i mana 'ola-'ola na.
Katelun, Ana tao ruma ranori rahine atahori so'al Eni.
Boe ma Ana fee koasa neu atahori ruma fo tao manad'ad'i manaseli' mata'-mata', fo ratud'u Eni mandete-masa'a na.
Ruma fai hambu koasa fo tao ra'ahahai' atahori mamahed'i' ra.
Ruma fai hambu bab'anggi-b'ab'a'e' fo tulun atahori.
Ruma fai hambu papala-b'ab'anggi' fo rauli atahori, fo tao ues reu esa noo malole'.
Boe ma Ana fee koasa neu atahori ruma fai, fo ara bisa 'ola' rendi' ded'eat mata'-mata'.c
29 Naa, hei du'a ta'o bee? Lamatualain denu basa atahori, fo lao' reu dui-b'engga hehelu-fufulin, do? Hoko'. Ana tao basa atahori dad'i mana 'ola-'olan, do? Hoko'. Ana tao basa atahori ranori rahine, do? Hoko'. Ana fee koasa neu basa atahori fo tao rala manad'ad'i manaseli', do? Hoko'. 30 Ana fee koasa neu basa atahori fo tao ra'ahahai' atahori mamahed'i' ra, do? Hoko'. Ana tao basa atahori bisa 'ola-'ola' rendi' ded'eat mata-mata', do? Hoko'. Ana tao basa atahori fo bisa rafad'e ded'eat naa ra sosoan, do? Hoko'.
31 Naa! Hei musi mihehere fo simbo ma pake bab'anggi-b'ab'a'e' mana na'ena ngguna' lena' soa' neu atahori hetar.
Mae 'ona' naa o, au fe'e 'ae 'utud'u nggi dala malole manaseli' lena' fai.