2-3 Dalahulun, Lamatualain nafad'e neu mana 'ola-'ola na ra fo sura' so'al Hara-lii Malole' naa, sia Susura Meumare na. Sia Susura naa, Lamatualain helu-fuli nae haitua Anan Yesus, fo nema dad'i atahori. Ia naa, Hehelu-fufulin naa dad'i ena, huu Yesus nema dad'i atahori mia mane Daud tititi-nonosin ena. 4 Te Lamatualain natud'u bukti nae, Yesus Kristus naa, Eni Anan boe. Huu Yesus Dula-d'alen, meumare' teb'e-teb'e' 'ona' Lamatualain. Ma Lamatualain pake koasan de nafefela bali' Yesus mia mamate na. Naa de, hita bub'ulu' tae Lamatualain Anan, naeni Yesus, hita Lamatua na, mana na'ena hak parenda nggita.

5 Yesus natud'u rala malolen neu au, huu Ana pili nala au dad'i ded'enun fo 'uu dui-b'engga hehelu-fufulin sia bee-b'ee. Huu Ana nau atahori nda Yahud'i ra sa o, ramahere E boe ma rasod'a tungga hihii-nanau na. Au o nau fo atahori mia basa nusa' ra, ramahere Kristus ma rasod'a tungga hihii-nanau na.

6 Hei mana sia Roma ra o, 'ona' naa boe. Hei 'ima mia nusa' hetar sia mamana' hetar. Yesus Kristus no'e nala nggi nae, “'Ima leo! 'Ima dad'i atahori ngga ra!” 7 Naa de au haitua susura fee nggi sia Roma, ma fee nggi nesenened'a' 'ae, Lamatualain sue-lai nggi. Ana o no'e fo ama dad'i Eni atahorin mana rasod'a meumare'.

Au hule-o'e fo Lamatualain, hita Aman, noo Yesus Kristus, hita Lamatuan, ratud'u rala malole na ra neu nggi ma fee nggi misod'a noo mole-d'ame.

8 Au mulai sura' susura ngga ia, noo 'o'e makasi nae-nae neu Lamatualain, huu Yesus Kristus ue-tao sia rala ma ra. Au o 'o'e makasi boe, huu atahori mana leo sia mana parenda Roma ra nusa na ra, ara 'ola-'ola' so'al hei nemehere ma ra neu Yesus.

9 Au hule-o'e nda nama'etu sa fee nggi. Teb'e! Lamatualain bub'ulu' nae, saa fo au 'ola' ia, teb'e. Ana o bub'ulu' au manggate tao ues, fo dui-b'engga Anan Hara-lii Malole na. 10 Mete ma au hule-o'e na, au 'o'e ta'o ia: “Lamatua', au nda 'ita' 'ae dalan ta'o bee sa boe. Te mete ma Lamatualain hii-nau, na, soi dala' fo au 'uu 'ita nonoo ngga ra sia Roma.”

11 Au hule-o'e ta'o naa, huu au hii-nau 'ae 'ita nggi, fo banggi fee nggi koasa mia Lamatualain Dula-d'alen, fo ama dad'i mii Lamatua' atahorin mana ma'atataa mahere'. 12 Au masud ngga ta'o ia: mete ma au dad'i 'uma leo 'oo nggi, na, au 'ae tao manggatee rala ma ra, fo nemehere ma ra boe manggatee. Ma au nau fo hei o tao manggatetee rala ngga boe.

13 Toronoo susue ngga ra, e! Au nau fo ama bub'ulu' mae, au 'ae 'eti se'u nggi sia Roma lao hetar ena. Te losa fai' ia au nda fe'e 'eti sa boe. De mete ma dad'i 'eti, na, au hule-hule' fo atahori hetar fe'e ramahere rahere' neu Kristus, 'ona' sia mamana' laen ra boe. Noo ta'o naa, au ue-tatao ngga na'ena buna-b'oa malole'.^a

14-15 Mae ta'o bee o, au musi dui-b'engga Lamatua' Hara-lii Malolen neu atahori mana 'ola' ded'ea Yunani do, atahori dintiu mana 'ola' ded'ea laen do, atahori moko do, anak do, sakola' do, nda sakola' sa. Au musi dui-b'engga Lamatua' Hara-lii Malolen neu basa atahori. Naa de au sad'ia 'ala ena 'ae 'eti se'u nggi sia Roma.

16 Au nda mae mbei-mbei sa boe, so'al Lamatua' Yesus Hara-lii Malole na. Te mete ma atahori namahere neu Lamatualain, na, Hara-lii' naa na'ena koasa mia E fo fee masoi-masod'a' neu atahori naa sala-kilu na. Atahori Yahud'i ra bub'ulu' ra'ahulu' dala' ia ra, dei de nusa' laen ra.^b 17 Hara-lii' naa o natud'u Lamatualain dalan fo tao natetu atahori masala' ra. Basa naa ra bisa dad'i, sad'i atahori ramahere neu E, ma ramahere rakandoo 'a. Huu nenesura' sia Lamatualain Susura Meumaren 'oi,

18 Te Lamatualain nafad'e basa ta'o ia: hambu atahori nda nau taoafi' neu E sa. Ma hambu ruma tao dala de'ulaka' mata'-mata'. Te Lamatualain nda simbo tatao-nono'i na ra naa sa. Atahori ia ra rahine ndoo-tetu' a sia rala na ra ena. 'Ona' naa o, ara 'aka' tao rakandoo 'a dala-d'ala nda matetu' ra sa. Ara nda nau simbo ndoo-tetu' a sa, ma ara 'aka' kokoe-nanasi atahori, losa basa se nda rita' rae bee ndoo-tetu' sa ena. Naa de Lamatualain nae na'onda' huku-d'oki' neu se mia lalai nema. 19-20 Atahori ia ra nda ra'ena toto'u-nonoet fo rasala'e ao na ra sa, huu dala' mana tao atahori bisa bub'ulu' so'al Lamatualain naa, manggarelo' ena. Te Mesa' ne mana natud'u naa! Au masud ngga ta'o ia: eni' a mia Ana na'ad'ad'ad'i' lalai noo raefafo' losa lele' ia, mete ma atahori rae rahine so'al Lamatualain, noo koasan nda mana mama'etu' sa, na, bisa! Mae Lamatualain nda nenenita' sa o, te hita atahori fe'e tahine E mia saa fo Ana tao' ra. Naa de au 'ae, atahori de'ulaka' ra nda ra'ena toto'u-nonoet fo rasala'e ao na ra sa ena rae, “Au nda 'uhine saa-saa so'al Lamatualain sa.”

21 Dad'i mae rahine Lamatualain, te nda nau rataa E rae, “Lamatua' naa, hita Lamatualain na!” Ara o nda nau ro'e makasi mbali E sa boe. Boe ma dud'u'a na ra liuali, losa nda rahine saa-saa fo matetu' a sa ena. Ara nda rita' rae ta'o bee sa de ara ander-ander mata'-mata' so'al Lamatualain. Ma rala na ra ma'ahatu'.^d

22 Ara esa-esa' 'ola' noo koaot rae, “Au ia, atahori mana nahine dala' nae'!” Mae ara du'a ra'o naa o, te matetun, nggoa na ra 'ona' 'amba e. 23 Boe ma ara nda be'utee neu Lamatualain manaseli' a sa, huu ara rae, “Hai nda parluu Lamatualain mata' naa sa!” Te ara mulai be'utee neu paton mata'-mata', mana 'ona' atahori. Ma ara o be'utee neu paton mana 'ona' mbui', 'ona' banda laen, ma mana 'ona' mengge ra boe. Noo ta'o naa, ara timba hendi Lamatualain fo nda mana mate' a sa, de nggati noo sud'i 'a saa mana bisa mate' ra!^e

24 Naa de Lamatualain hela se ta'o naa ena, fo hela se tao tungga 'a hihii na ra. Ana hela se sud'i 'a tao tungga dala de'ulaka' mata-mata' mana na'oka sia rala na ra. Losa nda ra'ena mamaet sa ena. Boe ma ara tao-tao 'a manggenggeo' mata'-mata' neu ao na ra, ma tao 'ona' naa neu atahori laen ao na ra boe. 25 Ara rahine nenori ndoo-tetu' so'al Lamatualain sia rala na ra ena, te ara nda nau taoafi' sa. Dud'u'a na ra rambalulutu ena, ma ara dud'u'a rae, “Malole lena', ata tao mata'-mata', fo rambalulutu, te nda hambu nggenggero' saa sa boe!” Ara be'utee neu sud'i 'a saa fo Lamatualain tao' ra, te nda nau be'utee neu Lamatualain mana tao basa sud'i 'a saa naa ra sa! Ara tao ao na ra 'ona' atahori mamahere' ra, tao-tao te hoko', nda maisi' saa sa boe!

Huu matetun, hita atahori musi koa-kio fee had'a-hormat neu Lamatualain nekendoo 'a! Naa, dei fo nandaa!

26 Huu de'ulaka na ra, naa de Lamatualain hela se, fo ara tao-tao 'a manggenggeo', tungga 'a hihii-nanau na ra. Ara 'aka' hohongge mata'-mata', nda mae rahine sa. Ina' ra nda nau sunggu' roo sao na ra sa, te ara hii 'a saa, mana nda nandaa noo had'at sa. Huu ina' ra sunggu' roo ina' ra! 27 Tou' ra o 'ona' naa boe! Ara nda hii sunggu' roo sao na ra sa, te sunggu' roo 'a tou' ra! Nda mae rahine sa boe! Naa de ara hambu huhuku-d'od'oki' nandaa noo tatao na ra! Huu ara lao ra'ad'od'oo' mia dala ndoo-tetu' a ena.

28 Ara du'a rae, “Malole lena', ata 'afi' nenepa'a-sii' too Lamatua',” Naa de Lamatualain hela se reu' ena, de ara sud'i 'a tao tungga hihii-nanau na ra! Dad'i ara du'a 'aka' de'ulaka' ra! Boe ma tao-tao 'a dala-d'ala nda matetu' ra sa!

29 Masod'a na ra sofe' roo de'ulaka' mata'-mata'. Ara nda rahine tao malole' ra sa, te rahine tao 'a de'ulaka'. Ara hii-nau leli. Ara rambed'a' rala'. Ara hii 'a horo-mbala. Ara risa atahori. Ara 'aka' ratofa-rauu'. Ara peko-leleko'. Ara lakaese. Ara rendi-rendi 'a ded'ea lena'. 30 Ara hii ra'amuti atahori nara na. Ara mburu-oe' roo Lamatua'. Ara 'ona' nda nenenenori' sa. Ara hii 'a raloe-rad'ae atahori. Ara hii 'a koa-b'o'u ao na ra. Ara hii 'a sangga dud'u'a de'ulaka' mata'-mata'. Ara hii 'a lab'an atahori lasi' ra. 31 Ara nda nau rahine saa fo matetu' a sa. Ara ralena-langga neu sira hehelu-fufuli na ra, losa atahori nda ramahere se sa ena. Ara nda sue rahine atahori sa. Ara nda ra'ena susue-lalai' mbei sa boe neu atahori.

32 Ara rahine Lamatualain hohoro-lalanen mana 'oi, atahori mana tao de'ulaka' mata' naa ra, randaa hambu hukun mate. Mae rahine hohoro-lalane' naa o, te ara fe'e tao de'ulaka' nda mbei-mbei' a sa. Nda 'aka 'a naa sa, ara o 'aka' dunggu-mbau atahori, fo ara o tungga tao sala' 'ona' naa boe. Naa seli teb'e!