Lamatua' Yesus nasod'a bali'
20
Fai nggarei, naeni nggarei feu' sia fai kaesan, Maria mia kambo Magdala neu fe'e fefetu ana' sia Yesus rates na. Losa naa ma, ana nita fatu monae' fo ara tatana rendi' neu rates a, nenelolir hendi' mia mamanan ena. 2 Boe ma ana nela bali' nisi' Simon Petrus ma au, naeni Yesus ana mana tunggan fo Ana sue' a, de nafad'e nae, “Ara ramana'o rendi hita Lamatuan mia raten ena! Hai nda bub'ulu' ara tao E sia bee sa boe.” 3 Boe ma au 'oo Petrus mela' rates mii. 4 Hai mela' mimilolo', te au 'ela hela e. De au losa rates a 'u'uhulu' e. 5 Te au nda rates rala 'uu sa. Au 'ukuloloik rala neu. Sia naa, au 'ita 'aka' teme banggana'us fo ara mboti rendi' neu Yesus ao-sisi mamate na.
6 Te lele' Petrus losa naa, ma ana nakandoo rates rala neu. Ana o nita teme banggana'us a sia naa boe. 7 Ana o nita lesu esa boe, fo ara bab'ata neu Yesus langga na. Te lesu a nened'iku', ma na'ad'oo' noo teme banggana'us a. 8 Boe ma au, mana losa 'u'uhulu' faa' ra, tungga rala 'uu boe. Lele' au 'ita basa naa ra, ma 'umuhere neu Yesus 'o'olan dalahulun 'oi, dei fo Eni nasod'a bali' mia mamate na. 9 Huu lele' naa, hai mana dad'i Eni ana mana tunggan nda fe'e mihine saa fo nenesura' mema' sia Lamatualain Susura Meumaren 'oi, Kristus musi nasod'a bali' mia mamate na. 10 Basa boe ma hai ru'a nggi bali'.
Lamatua' Yesus natud'u aon neu Maria mana mia kambo Magdala
11 Te Maria fe'e nambarii' sia rates a dea'. Ana nggae nakandoo 'a. Lele' ana fe'e nggae, ma nakaloloik rates rala neu. 12 Ana nita Lamatualain aten rua mia sorga. Sira bua-b'a'u na ra muti'. Ara 'endo' sia mamana' fo relo' a atahori mbed'a' Yesus ao-sisi na. Esa 'endo' sia langgan mamana na. Esa fai 'endo' sia ein mamana na. 13 Ara ratane rae, “Saa de susi nggae?”
Boe ma nataa nae, “Au nggae, huu ara 'o'o rendi Lamatua ngga ao-sisin ena. Te au nda bub'ulu' ara reu tao E sia bee sa boe.” 14 Ana 'ola' basa na'o naa, ma ana heo' dean de mete dea'. Nita atahori esa nambarii' sia naa, te nda nahine nae, Atahori naa, Yesus sa.
15 Boe ma Yesus natane e nae, “Ta'o bee de susi nggae? Susi sangga seka?”
De Maria nae ne'o atahori naa, mana tao osi. De ana kokoe nae, “Papa. Mete ma ama' 'o'o mendi ao-sisi mamaten ena, na, mufad'e dei, Papa mbed'a' sia bee. Naa fo au 'endi E nisi' mamana' laen fo 'u'oi E noo malolole. Tulun dei!”
16 Basa ma Yesus no'e nae, “Maria.”
Boe ma ana heo' mbali Yesus nae, “Raboni!” (Sia ded'ea Aram na, sosoan nae, “Au Meser ngga!”)
17 Yesus nafad'e neu e nae, “'Afi' kois Au dei, huu Au nda fe'e hene 'uu sia Ama ngga sia sorga sa. De susi muu leo, fo mufad'e toronoo ngga ra mae, ‘Au 'ae hene lao 'isi' Ama ngga. Eni o, hei Amam boe. Eni, Au Lamatualain ngga. Dad'i Eni o, hei Lamatualain ma boe.’”
18 Dei de, Maria mia Magdala neu dui Yesus ana mana tungga na ra nae, “Au 'undaa 'oo hita Lamatuan Yesus ena!” De ana nafad'e Yesus hehelu-fufulin neu se.
Lamatua' Yesus natud'u aon neu ana mana tungga na ra
19 Fai' naa nandaa noo fai nggarei', naeni nggarei feu' fai kaesa na. Relo a fe'e mopo ena. Boe ma Yesus ana mana tungga na ra ra'ab'ue. Ara nggoe rahere' ume ra lelesu na ra, huu ara ramatau atahori Yahud'i ra malangga na ra. Boe ma Yesus nema nambarii' sia talad'a na ra, de nae, “Sod'a-mole'!” 20 Lele' Yesus natea se ta'o naa, boe ma Ana natud'u hina' mana sia liman noo mbambau na. Ana mana tungga na ra ramaho'o seli lele' ara rita sira Lamatua na. 21 Basa ma Yesus nafad'e se nae, “Hela fo misod'a noo mole-d'ame. Misined'a, Au Ama ngga denu Au ta'o bee, na, Au o denu nggi ta'o naa boe.”
22 Ana 'ola' basa na'o naa, ma Ana deka-d'eka noo se, de fuu hahaen neu se esa-esa'. Ma 'ola' nae, “Au fee nggi Lamatualain Dula-d'ale Meumare na. Simbo mala E leo. 23 De mete ma hei lilii' hendi atahori salan, na, sala' naa mopo ena, huu Lamatualain o 'ose hendi sala' naa ra ena. Te mete ma hei nda nau lilii' hendi atahori salan sa, na, Lamatualain o nda 'ose hendi sala' naa sa boe.”a
Lamatua' Yesus noo Tomas
24 Hambu esa mia Yesus ana mana tungga kasanahulu rua na ra, naran, Tomas, fo ara ro'e rae, ‘ana dua' ra.’ Lele' Yesus nema natud'u aon neu se, Tomas nda na'ab'ue noo ana mana tunggan laen ra sa. 25 Naa de lele' nonoo na ra rafad'e rae, “Hai mindaa moo hita Lamatuan ena,” boe ma ana nataa nae, “Ta'o ia. Au musi 'ita hina' mia mbaku' sia liman dei. Ma au musi dunggu lima 'u'u ngga neu hina' mana sia mbambaun dei. Huu mete ma au nda fe'e tao ta'o naa sa, na, au nda 'umuhere 'ae, Ana nasod'a bali' ena sa.”
26 Nggarei esa fai ma, Yesus ana mana tungga na ra ra'ab'ue roo Tomas sia ume esa rala. Mae lelesu ra mananggoe mahere' ena, te Yesus rala neu ririi sia talad'a na ra. Ana nahara noo se nae, “Sod'a-mole'!” 27 Boe ma Ana 'ola' noo Tomas nae, “Loo lima 'u'u ma nema, fo paresa' lima ngga dei. Boe ma 'uma nggama hina' sia Au mbambau ngga ia. Naa, mumuhere leo mae, Au 'usod'a bali' ena! Nggari hendi rala nda nemehere ma sa leo.”
28 Tomas nataa nae, “Awii, Papa, e! Ia naa au 'umuhere teb'e ena! Papa ia, naeni au Lamatua ngga, mana na'ena hak parenda au!”
29 Boe ma Yesus nafad'e neu e nae, “Tomas! Mumuhere Au 'usod'a bali' ena, huu mita Au noo matam ena. Te mana 'onton lena' fai, naeni atahori nda mana rita Au sa, te ramahere.”
Buku ia masud na
30 Yesus o tao manad'ad'i manaseli' laen hetar boe, te au nda sura' sia buku ia rala sa. Ana mana tungga na ra rita mata' manad'ad'i manaseli' naa ra. 31 Te dala' fo au sura' sia buku ia rala, au sura' fo ama mimihere mae,
Yesus naa, naeni Kristus fo Lamatualain helu-fuli mema' nae haitua nema' a.
Yesus o, Lamatualain Ana na boe.
Lele' hei mimihere E, ama hambu masoi-masod'a ndoo-tetu' a nda mana basa' sa, huu hei dad'i Eni atahori na ra.