3 Simon Petrus nafad'e nonoo na ra nae, “Au 'ae 'uu mbo'i pu'at.”

Boe ma ara rataa rae, “Hei boe! Hai o tungga boe.” Boe ma ara reu risi' dano a suu na. Ma ara sae 'ofa' de reu pu'a 'u'u. Te tetemba' naa ara nda hambu saa sa boe.^a

4 Mbila fefetun, ma Yesus nambarii' sia dano a suu na. Te ana mana tungga na ra nda rahine rae Eni, Yesus sa. 5 Boe ma nameli de natane se nae, “'A'a ra, e! Hambu 'u'u ena, do?”

Ara rataa rae, “Rou', 'a'a! Hai nda mala saa sa boe.”

6 Boe ma nafad'e se nae, “Mbo'i sob'a pu'at neu 'ofa' bob'oa 'ona na. Dei fo hei mala.”

De ara tao tungga. Boe ma ara rala 'u'u. 'U'u hetar seli, losa ara nda rae 'a nore rala pu'at 'ofa' rala neu sa.^b

7 Naa, au o mia naa boe. Au ia, ana mana tunggan fo Yesus sue' a. De au 'ufad'e Petrus 'ae, “Awii! Eni, hita Lamatuan!”

Rena au 'o'ola ngga, boe ma Simon Petrus 'olu bali' bad'un, de boke dano ralan nae nane mad'a' ata neu. 8 Huu mbei ma 'ofa' doon 'aka' meter natun esa mia mad'a' ata. De nonoo na ra sefe 'ofa' bali' mad'a' ata reu, ma nore rendi pu'at mana sofe' noo 'u'u sia 'ofa' a dea'.

9 Lele' ara losa mad'a' ata ma, ara rita ai kaa' mana rombe' sia naa. 'U'u sia ai a ata ena. Ma hambu roti boe. 10 Yesus nafad'e se nae, “Mendi 'u'u mbei mia faa' ra fo hei pu'a mala' ra.”

11 Boe ma Simon Petrus hene bali' 'ofa' rala neu, de ana nore pu'at mad'a' ata neu. Pu'at naa sofe' noo 'u'u monae'. Ded'esi na ra 'u'u natun esa lima nulu telu (153). Mae 'u'u desi basa naa te, pu'at naa nda sika hendi e sa.

12 Basa de Yesus no'e se nae, “'Ima fo mia leo!”

Ara o bub'ulu' rae, Eni, sira Lamatua na. Naa de ara nda rambarani ratane rae, “'A'a ia, seka?” 13 Boe ma Yesus ha'i nala roti noo 'u'u, de fee neu se.

14 Naa, naeni lao katelun Yesus natud'u aon neu ana mana tungga na ra, lele' Ana nasod'a bali' mia Eni mamate na.

15 Lele' ara raa basa, ma Yesus natane Simon Petrus nae, “Wee, Simon, Yohanis ana na. Ta'o bee? Ho sue Au lena' nonoo ma ra ia ra, do?”

Ana nataa nae, “Teb'e! Papa bub'ulu' au sue nggo ena.”

Boe ma Yesus helu neu e nae, “Mete ma ta'o naa, na, tad'a malolole Au bib'i lombo ana ngga ra fo ara hambu raa.”

16 Boe ma Yesus natane selu' e nae, “Simon, Yohanis ana na. Ta'o bee? Ho sue Au, do?”

Ana nataa nae, “Teb'e'! Papa bub'ulu' au sue Papa.”

Boe ma Yesus helu neu e nae, “Mete ma ta'o naa, na, mu'ub'oi malolole Au bib'i lombo ngga ra.”

17 Basa ma Yesus natane selu' e fai nae, “Simon, Yohanis ana na. Ta'o bee? Ho sue Au, do?”

Boe ma Petrus ralan susa neu' ena, huu Yesus natane lao telu ena nae, “Ho sue Au, do?” De ana nataa nae, “Papa mana bub'ulu' basa dala' ra. Dad'i Papa bub'ulu' mae, au sue Papa.”

Boe ma Yesus helu neu e nae, “Mete ma ta'o naa, na, tad'a malolole Au bib'i lombo ngga ra fo ara hambu raa. 18 Muhine Au masud ngga ena, do? Au o 'ae 'ufad'e ta'o ia: fe'esa'an, lele' fe'e soru', na, pake bad'u, noo bori bob'orit sia leleb'o ma, ma lao' sud'i 'a bee muu, tungga 'a hihii ma. Te mete ma mumulasi ena, na, loo lima ma ra fo atahori laen pa'a se rendi bob'ori ma. Basa ma lea rendi nggo misi' mamana' esa fo nda nau muu sia naa sa.” 19 (Yesus 'ola' na'o naa fo nafad'e neu Petrus so'al saa mana nae dad'i sia eni ao na. Huu dei fo Petrus mamaten naa natud'u Lamatualain mandete-masa'a na.)^c

Basa naa ma, Yesus nafad'e neu Petrus nae, “'Uma fo dad'i Au atahori ngga leo!”

20 Lele' naa, Petrus heo' de mete dea', boe ma ana nita au tungga sira ru'a se dea na ra. Au ia, naeni mana tungga' fo Yesus sue' a. Au o 'endo' sia Yesus bob'oan lele' hai 'endo' mia fefeta Paska. Au ia, mana 'utane Eni 'ae, “Papa, e! Dei fo seka mana seo hendi Papa?”^d 21 Lele' Petrus nita au, ma ana natane Yesus nae, “Papa, e! Papa 'ola' so'al au faa' ra ia ena. Te eni 'ona bee?”

22 Yesus nafad'e Petrus nae, “Ho nda urusan ma naa sa. 'Ona' mae Au hii fo ana nahani sia ia losa Au bali' 'uma, na, naa salan saa? Sad'i musi musuned'a saa fo Au helu neu nggo faa' ra, naeni: 'uma dad'i atahori ngga leo.”

23 Huu Yesus 'ola' na'o naa, Ana mana tunggan laen ra 'ola-'ola' rae, “Yohanis naa, nda mate sa.” Tao-tao te, Yesus nda 'ola' ta'o naa sa. Eni 'o'olan naa, naeni: “Naa nda urusan ma sa. 'Ona' Au hii fo ana nahani sia ia losa Au bali' 'uma, na, naa salan saa?”

24 Ana mana tungga' fo Yesus 'ola' naa, naeni au, Yohanis. Au mana dui basa dala' ia ra neu nggi. Au mana 'ita noo mata ngga. Ma au mana sura' basa ia ra. Boe ma hita bub'ulu' ena tae, saa fo au 'ufad'e neu nggi naa, teb'e.

25 Fe'e hambu dala' hetar fo Yesus tao. Mete ma atahori rae sura' rala basa e, eni' a mia Yesus nalalao ue-tataon losa basa, na, au du'a na raefafo' loa-narun nda fua nala basa buku ra sa.