2 Boe ma nggarei fefetu anan, telu' se risi' rates naa. 3-4 Sia dala' talad'an ara 'ola-'ola' rae, “Wee! Seka bisa tulun lolir hendi fatu monae' mia rates a bafa na? 'Aka' telu' nggita, na, nda be'i sa, te fatu naa monaen seli!”

Te ara losa naa ma, rita fatu a nenelolir hendi' ena. 5 Basa ma ara risi' rates rala reu. Te ara nggengger, huu rita atahori soru' esa 'endo' sia bob'oa 'ona na ra, pake bua muti makahahad'ok. 6 Boe ma atahori soru' naa nafad'e se nae, “'Afi' mimitau! Au bub'ulu' 'ima mae sangga Yesus mia Nasaret, fo ara tao risa E sia hau nggangge' a. Ana nda sia ia sa ena, huu nasod'a bali' ena! 'Ima fo mete neu' ena, mamana' fo ara tao ao-sisin, rou' ena. 7 Ama bali' lai-lai leo! Mii mifad'e Petrus se mae, Yesus nasod'a bali' ena. Ana lao na'ahulu' nisi' Galilea ena. Dei fo ara randaa roo E sia naa, 'ona' a ma'ahulun, ana nafad'e basa neu se ena. De ama bali' leo!”^a

8 Ina' ra rita mamana' naa rou' ma, ara nggengger. Boe ma rela dea reu, de ara bali' lai-lai. Te ara nda rafad'e esa-esa mia dala' a sa boe, huu ramatau rae mate.

9 Nggarei fefetu anan, ma Yesus neu natud'u matan na'ahulu' neu Maria mana mia Magdala, fo ma'ahulun Yesus 'oi hendi nitu hitu mia ao na. 10 Maria nita Yesus ma, ana bali' neu nafad'e basa atahori fo fai ma'ahulun mana tungga Yesus ra. Ara fe'e ra'ab'ub'ue noo rala sususa' ma luu oe na ra tud'a, huu rasaned'a Yesus mamate na. 11 Boe ma Maria nafad'e se nae, “Ta'o bee de ama fe'e susa? 'Afi' susa leo, te Yesus nasod'a bali' ena! Faa' ra, au fe'e 'undaa 'oo E ena!”

Te basa se rataa rae, “We! Ho leleko'!”

12 Basa ma, Yesus mana tunggan rua lao' risi' kambo' esa. Mia dala' talad'an, Yesus natud'u matan neu se, te Yesus matan dad'i laen ena. Te doo-d'oo' ma, ara rahine E. 13 Basa ma ru'a se bali' reu rafad'e nonoo na ra rae, “We! Rena dei! Faa' ra, hai mindaa moo Yesus mia dala' a!”

Te nonoo na ra rataa rae, “We! 'Afi' leleko' ta'o naa!”

14 Basa ma, Yesus nandaa noo mana tungga kasanahulu esa na ra, lele' ara 'endo' raa. Ana natea se nae, “We! Langga fatu ma ra! Atahori rafad'e nggi rae, sira rita Au noo sira mata na ra o, te ama nda nau mimihere se sa! Hei mae, ara leleko'! Ia naa, Au 'uma ao ngga ena. Au mema' mate, te 'usod'a bali' ena! Ama mete neu' ena.

15 Dad'i ia naa, mii ndule raefafo' ia, fo dui-b'engga neu basa atahori Au Hara-lii Malole ngga.^c 16 Atahori mana namahere neu Au, ma hambu sarani, na, dei fo Lamatualain o fee masoi-masod'a' neu e, fo ana leo nakandoo noo Lamatualain sia sorga. Te atahori mana nda namahere sa, dei fo ana hambu huhuku-d'od'oki', ma Lamatualain timba hendi e fo ana leo nakandoo sia dea'. 17 Atahori mana ramahere Au, dei fo ara tao manadad'i manaseli' mata'-mata', fo basa atahori rahine rae, sira koasan, mema' mia Lamatualain. Conto 'ona': ara o bisa 'oi nitu ra pake Au nara ngga boe. Ma dei fo Lamatualain fee se 'ola' rendi' ded'eat laen fo ara nda rahine' ra sa. 18 Mete ma sira to'u mengge maraso', do, rinu raso, na, ara nda hambu de'ulaka' sa. Ma mete ma ara nggama liman na ra reu atahori mamahed'i', fo hule-o'e fee ne, na, atahori naa hai.”

19 Yesus 'ola-'ola' basa noo mana tungga na ra ma, Lamatualain so'u E sorga neu. Sia naa, Ana dad'i Lamatualain lima 'onan, de ru'a se 'endo' parenda ra'ab'ue.^d

20 Basa ma, mana tungga na ra tungga parenda na. Ara reu sia bee-b'ee de rafad'e basa atahori, Yesus Hara-lii Malole na. Boe ma Lamatualain fee se koasa fo ara tao basa manadad'i manaseli' ra fo Yesus nafad'e hela' ra. Basa ma atahori hetar ramahere Yesus, huu rahine rae, Hara-lii Malole' naa, teb'e.

9 Lele' ina katelu' ra losa Petrus se, ma rafad'e neu basa se, saa fo atahori soru' a 'ola' mia rates faa' ra. 10 Basa ma, Yesus parenda mana tungga na ra, fo reu rafad'e Eni Hara-lii Malolen sia basa mamana' ra, losa raefafo' suu na. Hara-lii Malole' ia natud'u dala' fo Lamatualain fee masoi-masod'a' neu atahori mia sira sala-singgo na ra, fo rasod'a rakandoo roo E.

Hara-lii Malole' ia, mema' teb'e lao esa' a. Naa de, ana na'atataa' nakandoo losa doon neu.]