'Aib'oi' ma, atahori rua pake bua-b'a'u makahahad'ok, rema ririi mia bob'oa na ra. 5 Mama naa ra ramatau rita' mamate na ra, de be'utee losa rae a. Boe ma atahori karua' ra ratane rae, “Ta'o bee de hei 'ima sangga atahori masod'a' sia atahori mates ra mamana na ra? 6 Yesus nda sia ia sa ena! Huu Ana nasod'a bali' ena. Mbei ma hei lilii' hendi saa fo Ana 'ola' lele' Ana fe'e mia Galilea, do? 7 Huu Ana nafad'e mema' nae, dei fo ara seo hendi Atahori Matetu' a neu atahori de'ulaka' ra lima na. Basa ma ara mbaku risa E sia hau nggangge' a ata. Te fai katelun ma, Ana nasod'a bali'.”^a

8 Ara rena rala ta'o naa, dei de fe'e rasaned'a Yesus 'o'olan ma'ahulun. 9 Boe ma ara bali' lai-lai, fo rafad'e basa-b'asa' e neu Yesus ded'enu kasanahulu esa na ra, ma atahori laen mana tungga E. 10 (Mama-mama mana reu sia rates a, naeni Yakob'is maman Maria, noo Maria mia kambo Magdala, ma Yohana noo mama laen hira fai. Sira mana reu dui basa ia neu Yesus ana ded'enu na ra.)

11 Te lele' ded'enu' ra rena dud'uit naa, ara du'a rae mama naa ra leleko'.

12 Te Petrus fela de nela-nela' rates neu. Losa naa ma, ana mete rates rala neu, te nita 'a teme' fo ara mboti neu mamates a. Boe ma ana bali' de dud'u'a nae, “Ia ta'o bee, e?”^b

13 Fai' naa o, Yesus ana ded'enun rua reu sia kambo' esa, naran Emaus. Dod'oon mbei ma kilo sanahulu esa mia kota Yerusalem.^c 14 Ara lao-lao' ma 'ola-'ola' Yesus mamaten. 15 'Aib'oi' ma, Yesus nambarii' deka-d'eka noo ru'a se, ma lao' na'ab'ue noo se. 16 Te ara nda rahine rae naa Yesus sa, huu Lamatualain tao fo ara nda rahine sa. 17 Boe ma Yesus natane se nae, “Hei ru'a nggi, 'ola-'ola' saa, e?”

Ara rena ma, ru'a se rambarii'. Mata na ra 'ona' manasusa' seli. 18 Basa ma, Kleopas natane E nae, “Ama' ia, 'ona' atahori feu' fo nda nahine saa mana fe'e dad'i sia Yerusalem sa, do?”

19 Boe ma Yesus natane nae, “Saa sia naa?”

Ara rataa rae, “Te so'al Yesus, mana mia Nasaret a! Eni teb'e-teb'e' Lamatualain mana 'ola-'ola na. Ma Lamatualain fee koasa neu E fo tao manad'ad'i manaseli' mata'-mata' ra. Eni nanori nahine atahori. Basa atahori ra hii E, ma Lamatualain o hii E boe.

20 Tao-tao te, hai malangga agama Yahud'i ra malangga na ra roo lasi-lasi 'ad'at ra to'u rala E. Basa ma ara fee E nisi' hofernor fo hukun risa E. Boe ma ara mbaku risa E mia hau nggangge' ata. 21 Fefeun basa hai mimihena mae, Eni Kristus, mana nema mbo'i hai atahori ma ra mia mana parenda Roma mana tuni-ndeni hai. Te hari lima fai' naa, ara tao risa E ena.

22 'Ale'ia hai boe bingun. Huu faa' ra hai mama ma ra rema rafad'e rae, fefetu anan sira reu mia rates. 23 Te ara dui rae, Yesus ao-sisin mopo hendi ena. Boe ma rita Lamatualain aten mia sorga, nafad'e se nae, Yesus nasod'a bali' ena. 24 Rena ta'o naa, ma hai nonoo ma ra hira rela' rates reu. Ara o rita 'ona' hai mama ma ra nefad'e na ra boe. Ara o nda rita Yesus ao-sisin sa boe.”

25 Ru'a se dui basa ma, Yesus 'ola' noo se nae, “Hei nggonggoa ma ra seli! Ta'o bee de hei nda nau mimihere saa fo Lamatualain mana 'ola-'ola na ra rafad'e mema' eni' a fai dalahulun! 26 Ara sura' ena rae, Kristus naa, musi hambu doid'oso' mata' naa, dei fo Ana simbo had'a-hormat ma koasa manaseli'.” 27 Boe ma Yesus nanori se, basa' e fo Lamatualain mana 'ola-'ola na ra sura' mema' so'al Kristus. Mulai mia ba'i Musa susuran, losa mana 'ola-'ola' laen ra 'ena na ra.

28 Lele' ara rae losa Emaus, ma Yesus tao 'ona' nae lao' nakandoo. 29 Te ru'a se ro'e rae, “Ama'! tuli fo leo moo hai tetemba' ia, te relo a nae 'a mopo ena.” Boe ma Yesus ume rala neu noo se.

30 Lele' ara 'endo' rae raa, ma Yesus ha'i nala roti bue' sa, boe ma Ana hule-o'e no'e makasi mbali Lamatualain, ma Ana bib'ib'i roti a. Lele' Ana loo roti fee ru'a se, 31 dei de ru'a se fe'e rahine rae, na, Yesus, te 'aib'oi' ma, mopo E mia mata na ra! 32 Boe ma ru'a se bab'ales rae, “Waa! Lele' rena Ana 'ola' tao manggarelo mana 'ola-'ola' ra susuran faa' ra, hita tamed'a 'ona' rala ta ra ramaho'o.”

33 'Oras naa boe, ru'a se fela de lao bali' Yerusalem reu. Ara randaa roo Yesus ana ded'enun atahori kasanahulu esa' ra, ma atahori laen mana ra'ab'ue' sia naa. 34 Boe ma ana ded'enu' naa ra rafad'e ru'a se rae, “Mema' teb'e! Lamatua' Yesus nasod'a bali' ena! Faa' ra natud'u aon neu 'a'a Petrus.”^d

35 Basa ma, atahori karua' ra dui basa mana dad'i' mia dala', losa ru'a se rahine Yesus lele' Ana bib'ib'i roti.

36 Lele' ara fe'e 'ola-'ola' ta'o naa 'aib'oi' ma, Yesus nambarii' sia talad'a na ra. Ana natea se nae, “Sod'a-mole'!”

37 Te ara nggengger ma ramatau, huu rae ne'o nitu.

38 Te Yesus 'ola' nae, “Ta'o bee de hei mimitau ta'o ia? Hei nda mimihere mae, ia Au, 'usod'a bali' ena sa, do? 39 Mete sob'a lima ma ei ngga ra sie. Ia Au. Loo lima ma ra fo nggama neu' ena! Naa fo mimihere mae, ia Au, nda nitu sa. Huu nitur nda ma ao' sa, te basa hei bisa mita Au ao ngga, to?!”

40 Fe'e 'ola' na'o naa ma, Ana natud'u neu se bisu foa' mana sia lima-ei na ra. 41 Ara ramaho'o seli, huu Yesus nasod'a bali' ena. 'Aka' ara 'ona' mana bingun, huu nda rahine rae ta'o bee de dad'i ta'o naa sa. Boe ma Yesus natane se nae, “Hei mia saa sia ia?” 42 Boe ma ara loo fee Ne 'u'u manapangga' 'e'etu' sa. 43 Yesus simbo nala 'u'u a, de naa mia mata na ra.

44 Boe ma Ana 'ola' nae, “Ta'o bee? hei fe'e misined'a lele' au 'u'ub'ue 'oo nggi, do? Au 'ufad'e fai' naa 'ae, basa saa fo Lamatua mana 'ola-'ola na ra, sura' so'al Au naa, musi dad'i. Naeni, mia ba'i Musa, mia mana 'ola-'ola' laen ra, ma mia buku Sosod'a Koa-kio' ra.”

45 Basa ma, Ana soi dud'u'a na ra fo rahine teb'e-teb'e' Lamatualain Susura Meumaren sosoa-ndandaa na. 46 Ana 'ola' fai fai nae, “Lamatualain mana 'ola-'olan sura' ena nae, Kristus, fo Lamatualain haitua nema' naa, musi hambu doid'oso' mata'-mata', dei fo Ana mate. Te fini-esan, ma Ana nasod'a bali'. Ara sura' basa ia ra ena na! 47 De ia naa Au fee nggi koasa fo mendi Hara-lii Malole' ia neu basa atahori, mulai mia Yerusalem ia, Mifad'e se mae, atahori mana nataa salan ma bali' nisi' Lamatualain, dei fo Lamatualain 'ose hendi basa sala na ra. 48 Hei musi dad'i sakasii fo dui-b'engga, Au hambu doid'oso', de mate, basa ma 'usod'a bali' 49 Dei fo Au haitua Dula-d'ale Meumare ngga nema, fo Ama ngga helu-fuli mema' ena. Te hei musi mihani sia kota Yerusalem ia, losa ama simbo mala koasa mia sorga.”^e

50 Fai' sa, Yesus noo se kota a dea' reu. Lele' ara rae losa kambo Betania, Ana boti' liman de 'ola' fee se papala-b'ab'anggi'.^f 51 Lele' Ana fe'e 'ola' fee papala-b'ab'anggi', ma Ana neneso'u' sorga neu. 52 Basa se rita ta'o naa, ma ara sende' lulu-langga na ra fo be'utee neu E. Basa ma ara bali' Yerusalem reu roo rala nemeho'ot seli. 53 Tungga fai ara ra'ab'ue sia Ume Hule-o'e Huu' a fo koa-kio Lamatualain.

Ama Teofilus! Dud'ui ngga losa 'a ia.