2 Te mana rala neu tungga lelesu a, naeni bib'i lombo ra manatad'an mana na'ab'oi se. 3 Mana nanea lelesu a nahine manatad'a, de soi lelesu fee ne. Bib'i lombo ra o rahine manatad'a hara na. Basa ma, mete ma nameli esa-esa' naran, ara tungga e dea reu. 4 Lele' ana noo se dea reu, ana lao' sia mata'. Bib'i lombo ra tungga-tungga dean, huu ara rahine hara na. 5 Mete ma hambu atahori fo bib'i lombo ra nda rahine sa, na, ara nda tungga e sa. Te ara rela ra'ad'od'oo', huu ara nda rahine atahori fui' naa haran sa.”

6 Mae Yesus dui nekendandaa' naa neu se, te ara nda rahine masud na saa sa boe.

7 Basa ma Yesus tute 'o'olan mbali se nae, “Au 'ufad'e mbali nggi' a ia, teb'e. Au 'ona' lelesu sia bib'i lombo lalae na. 8 Basa atahori mana rema ra'ahulu' Au, Ara 'ona' na'o re. Mae ara ro'e rakandoo 'a o, bib'i lombo ra nda rena atahori naa ra sa. 9 Boe ma, Au 'ona' lelesu naa. Mete ma hambu esa nau rala neu tungga Au, Lamatualain nau fee masoi-masod'a' neu e mia sala-kilu na ra. Naa 'ona' ana rala neu sia Lamatualain mamanan, tungga Au fo mana dad'i eni lelesu na. Boe ma atahori mana rala neu tungga Au, eni lao' sud'i 'a bee neu, ma hambu nanaa-nininu matetu' a.^a 10 Na'o ra tao 'aka' nemue-neanggi' a. Ara rema fo ramana'o, tati-mbau risa, ma tao ralutu atahori masod'a na ra. Te Au 'uma 'endi masod'a malole manaseli' a, huu Au 'uma fo atahori bisa rasod'a noo mole-d'ame ma masod'a ndoo-tetu' a.

11 Au 'ona' manatad'a malole' esa boe. Huu manatad'a malole' a nahehere fee aon losa mate, fo 'ona bee na bib'i lombo na ra bisa rasod'a. 12 Te atahori mana tao ues fo bib'i lombo ra nda lamatuan sa, mete ma nita busa fui esa nema, na, ana nela na'ad'od'oo' hela bib'i lombo ra reu naa. Boe ma busa fui a 'ed'a nala bib'i lombo ra, ma bib'i lombo laen ra rela sea-saranggaa. 13 Atahori mana tao ues a nela, huu eni tao ues sangga' a doi'. Ana nda taoafi' fo nanea malolole bib'i lombo naa ra sa.

14 Teb'e! Au 'ona' manatad'a malole' a. Au 'uhine bib'i lombo ngga ra. Ma ara rahine Au boe. 15 Naa 'ona' Ama' sia sorga nahine Au, ma Au 'uhine E boe. Au 'uhehere fee ao ngga losa mate, fo bib'i lombo ngga ra hambu masod'a'.^b 16 Au bib'i lombo laen ngga ra, nda fe'e ra'ab'ue roo bib'i lombo mana sia ia ra sa. Au musi 'uu mboo 'u'ub'ue se boe. Dei fo mete ma ara rena hara ngga, na, rahine neu' ena. Boe ma ara rema ra'ab'ue dad'i nononggo' esa mana na'ena manatad'a esa boe.

17 Huu naa, Ama ngga sia sorga sue Au. Au 'uhehere fee ao ngga losa mate, fo bisa 'usod'a bali'. 18 Nda hambu atahori ra'asusuu' Au fo mate sa, te mesa' nggo mana 'uhehere fee ao ngga losa mate. Au 'u'ena hak fo fee ao ngga. Au o 'u'ena hak ha'i bali' boe. Parenda' ia, Au simbo mia Ama ngga sia sorga.”

19 Huu ara rena Yesus 'ola' ta'o naa, boe ma atahori Yahud'i ra rareresi selu' fai. 20 Hambu hetar mia sira rae, “Weh! Atahori ia, mulu'! Nitu sia ralan! Ta'o bee de hei nau rena E?”

21 Te hambu ruma fai rae, “Ia nda atahori mulu' a 'o'olan sa, to? Ded'ea-'o'ola' 'ona' naa, nda parnaa kalua mia nitu a bafan sa! Boe ma nitu ra nda tao fee atahori poke' ra rita bali' sa, to?”

22 Lele' naa, atahori Yahud'i ra rae tao sira agaman fai malolen esa. Fai malole' naa, nandaa noo fula-fai ma'arini'. Sia fefetas naa, atahori Yahud'i ra rasaned'a lele' atahori laen tao ranggenggeo Lamatualain Ume Hule-o'e Huun mana sia kota Yerusalem. Basa ma ara tao rameu e de tab'is selu' e.^c 23 Yesus lao rereo' Ume Hule-o'e Huu' a sod'an, sia mamana' fo ara bab'ae rae, ‘Mane Soleman Ume Loos na’. 24 Boe ma atahori Yahud'i ra malangga na ra rema heo rala E rae, “Weh! Hai musi mihani mikindoo losa fai hira', dei fo hai fe'e mihine ena? Mete ma Papa ia, naeni Kristus, na, tulun nefad'e relo-relo dei.”

25 Yesus nataa nae, “Au 'ufad'e mema' ena, te hei nda nau mimihere sa. Tao-tao te, dala-d'ala' fo Au tao' ra, basa se tungga 'a Ama ngga parenda na. Basa dala' naa ra ratud'u rae, Au ia, seka. 26 Te hei nda mimihere Au sa, huu hei nda Au bib'i lombo ngga ra sa. 27 Huu Au bib'i lombo matetu ngga ra rahine Au hara ngga. Ara o tungga Au boe. Ma o Au 'uhine se boe. 28 Au fee se masoi-masod'a ndoo-tetu' nda mana basa' sa, ma ara nda saranggaa mia Lamatualain sa. Nda hambu atahori esa sa boe bisa rambas nala se mia Au sa. 29 Ama ngga sia sorga fee se reu Au ena. Eni manaseli' lena' basa e. Naeni de nda hambu atahori esa bisa rambas nala se mia liman sa. 30 Huu Au 'oo Ama ngga, esa.”

31 Rena ta'o naa, ma atahori Yahud'i ra malangga na ra 'o'o fatu lao esa fai, fo rae honda risa Yesus. 32 Boe ma Yesus nafad'e se nae, “Hee! Au 'utud'u dala malole' hetar mia Ama ngga ena. Hei mae mbia misa Au, mendi' dala malole' bee?”

33 Ara rataa rae, “Hai nda mbia nggo sa, huu tao dala malole'. Te hai fee huku-d'oki' a neu nggo, huu mu'umuti mala seli ena. Huu ho atahori, te so'u aom 'ona' Lamatualain! Seli teb'e ia ma!”^d

34 Boe ma Yesus nataa nae, “Ta'o bee? Nenesura' sia agama hohoro-lalanen fo hei to'u' a 'oi, ‘Au 'ufad'e mema' 'ae, hei malangga ia ra, lamatua'’.^e 35 Naa, hita tahine ena tae, basa mana nenesura' sia Lamatualain Susura Meumaren naa, teb'e, ma nda bisa nene'ose hendi' sa. Lamatualain mesa' ne mana nafad'e atahori na ra nae, sira, ‘lamatua'’. 36 Dad'i ta'o bee de hei bisa 'ola' mae Au 'u'umuti huu Au 'ae Au Lamatualain Anan? Nda maso' dud'u'at sa! Huu Ama' sia sorga mana dud'u nala Au, ma mana denu Au raefafo' ia 'uma. 37 Ta'o ia. Mete ma Au nda 'ulalao Ama ngga ue-tataon sa, na, ama 'afi' mimihere Au. 38 Te Au 'ulalao ue-tataon 'ukundoo 'a. Dad'i mae hei nda nau mimihere Au sa, te nau do nda nau sa o, hei musi simbo manad'ad'i manaseli' fo Au tao' ra. Noo ta'o naa, hei bisa mihine mae, Ama ngga nenepa'a' noo Au. Ma Au o nenepa'a' 'oo Ama ngga boe.”

39 Basa ma ara sob'a humu selu' E, te nda rala E sa.

40 Boe ma Yesus neu selu' sia loe Yordan bob'oan, sia mamana' fefeun fo dalahulun Yohanis sarani atahori ra. De Ana leo na'atataa' sia naa.^f 41 Atahori hetar rema sangga E. Boe ma ara 'ola-'ola' rae, “Yohanis nda tao manad'ad'i manaseli' saa sa boe. Te basa 'o'olan so'al Yesus ia, teb'e!” 42 Boe ma atahori hetar ramahere E sia naa.