3 Yesus nataa nae, “Teb'e! Ma Au 'ae 'ufad'e ta'o ia: mete ma atahori nda neneb'onggi bali' sa, na, ana nda dad'i Lamatualain atahorin sa.”

4 Boe ma Nikod'emus natane nae, “Ta'o bee fo atahori bisa neneb'onggi' 'ona' naa, mete ma ana na'amoko ena!? Ana nda bisa bali' lao karuan nisi' maman tein rala neu, fo bonggi selu' e sa. Nda bisa sa, to!?”

5 Yesus nataa nae, “Teb'e! Te Au 'ufad'e ta'o ia: atahori musi neneb'onggi' noo oe fo dad'i meu', ma neneb'onggi' noo dula-d'ale' a fo dad'i atahori feu'. Noo ta'o naa, dei fo ana bisa dad'i Lamatualain atahori na. 6 Huu atahori neneb'onggi' mia atahori, te atahori dula-d'alen neneb'onggi feu' mia Lamatualain Dula-d'ale na. 7 'Afi' heran mete ma Au 'ae, ‘Hei musi neneb'onggi feu', fo hambu masod'a feu'.’ 8 Ata ta'asasama' noo anin. Huu anin humbu tungga hihii na. Hita rena muun, te nda bub'ulu' ana mia bee nema, ma nae bee neu sa boe. Basa atahori mana neneb'onggi feu' mia Lamatualain Dula-d'alen o 'ona' naa boe. Huu ata bisa tita Lamatualain Dula-d'alen tao atahori dad'i feu' ena, mae hita nda tahine tae ta'o bee de dala' naa bisa dad'i sa.”

9 Basa ma Nikod'emus natane nae, “Ta'o bee de bisa dad'i ta'o naa?”

10 Yesus nataa nae, “Wee, 'a'a. 'A'a dad'i atahori Isra'el ra meser monaen ena. Ta'o bee de 'a'a nda nahine dala' ia ra sa? 11 Au 'ufad'e teteb'es. Naa, hai mihine dala' ia ra. Huu hai dad'i sakasii so'al dala-d'ala' fo hai mita noo mata ao ma ra ena. Te hei nda simbo noo malole' hai 'o'ola ma ra sa. 12 Hei nda nau mimihere lele' Au 'ufad'e dala-d'ala' manad'ad'i' sia raefafo' ia sa. Saa fai mete ma Au 'ufad'e so'al dala-d'ala manad'ad'i sia lalai a. Tantu hei nda mimihere teb'e-teb'e' sa boe! 13 Nda hambu atahori esa sa boe hene neu nataa mbali Lamatualain sia lalai a sa. 'Aka' Au, naeni Atahori Matetu' ia, mana 'onda nema mia E.

14 Fai ma'ahulun sia mamana rou', ba'i Musa londa mengge riti esa sia hau ata, fo basa atahori mete rita e, fo ara hambu masoi-masod'a'. Dala' 'ona' naa boe o musi dad'i neu Au, Atahori Matetu' ia. Dei fo ara rae londa doko-d'oko au sia hau ata,^a 15 fo basa atahori mana ramahere Au hambu masod'a ndoo-tetu' nda mana basa' sa.

16 Huu Lamatualain sue-lai naseli' basa atahori sia raefafo' ia. Naeni de Ana denu Au, Ana 'isen ia, fo basa atahori mana ramahere neu Au nda saranggaa mia Lamatualain sa. Noo ta'o naa, ara hambu masod'a ndoo-tetu' nda mana 'etu' ma nda mana b'asa' sa. 17 Naa! Lamatualain nda denu Au, Anan ia, 'uma sia raefafo' ia fo nggero-furi atahori huku-d'okin sa. Te Ana denu Au 'uma fee masoi-masod'a' neu atahori mia sala-kilu na ra. 18 Lamatualain nda huku-d'oki atahori mana ramahere neu Au sa. Te Ana na'etu' mema' huku-d'oki' fee neu atahori nda mana namahere neu Au sa, huu atahori naa nda namahere neu Au sa, naeni Lamatualain Ana 'isen ia.

19 'Ona' ta'o ia: Lamatualain haitua manggarelo' a nema fo naronda sia raefafo' ia. Te atahori hii 'a rasod'a sia ma'ahatu' a. Ara nda hii rasod'a sia manggarelo' a sa, huu sira tatao na ra nda malole' sa. Naa de Lamatualain nae huku-d'oki se. 20 Huu basa atahori nda mana tao malole' ra sa, binci manggarelo' naa. Ara nda hii manggarelo' a naronda sia se sa, naa fo manggarelo' a 'afi' soi natud'u tatao de'ulaka na ra. 21 Te atahori mana tao tungga ndoo-tetu' a, ara rema fo manggarelo' a naronda sia se. Huu manggarelo' a natud'u nae, sira tao tungga Lamatualain hihii-nanau na.”

22 Basa naa ma, Yesus noo ana mana tungga na ra lao hela kota Yerusalem, de leo ra'atataa' sia nusa Yud'ea. Ara sarani atahori mia naa. 23-24 Lele' naa, Herod'es se nda fe'e tao Yohanis bui rala neu sa. Ma Yohanis o sarani atahori sia kambo Ainon, deka kambo Salim, huu oe mata' hetar sia naa. Boe ma atahori 'aka' rema sia Yohanis fo ana sarani se.^b

25 Naa, sia agama Yahud'i hambu 'ad'at esa, naeni tao nemeu ao', dei fo ara fe'e bisa hule-o'e ena. Sia naa, hambu atahori Yahud'i esa nareresi noo Yohanis ana mana tungga na ra so'al dala' naa. 26 Basa ma ara rema risi' Yohanis de rafad'e rae, “Ama Meser! Musuned'a do hoko', Atahori fo mana sangga papa mia loe Yordan bob'oan, fo papa mae, Eni, Kristus? Ana o sarani atahori boe! De ara nda rema sia hai sa ena! Huu basa se 'aka' reu sia E!”

27 Yohanis nataa nae, “Ta'o ia! Atahori nda bisa tao rala saa-saa sa boe, mete ma Lamatualain sia sorga nda soi dala' fee ne sa. 28 Hei rena au 'ufad'e relo-relo ena 'ae, ‘Au ia, nda Kristus fo hita tahani' a sa. Te Lamatualain denu au 'uma 'u'uhulu', fo soi dala' fee neu Kristus. Ta'o 'a naa ena!’^c

29 Conto, tou' mana nae sao' a na'ena ina' fo nae sao' a. Te eni sakasiin, mana nambarii' noo eni, lele' rena tou' mana nae sao' a 'ola-'ola', na, ralan namaho'o. Yesus naa, 'ona' tou' mana nae sao' esa. Boe ma au ia, 'ona' Eni sakasii na. Naeni de lele' ia, rala ngga namaho'o nala seli. 30 Pantiin na, Eni musi bau dad'i atahori manaseli' nakandoo, ma au bau 'umukura 'ukundoo dad'i atahori anad'iki'.”

31 Yohanis tute 'o'olan nae, “Ana 'onda nema mia Lamatualain sia lalai, naeni de Ana monae' lena' mia basa' e. Te au 'uma mia 'a raefafo' ia, naeni de au 'ona' basa atahori mana sia raefafo' ia. Au 'ola' so'al dala mana dad'i tungga-tungga fai sia raefafo' ia. Te mana 'onda nema mia Lamatualain sia lalai a naa, Eni manaseli' lena' basa e. 32 Ana nafad'e so'al saa fo Ana nita ma rena ena. Te atahori nda simbo noo malole saa fo Ana nafad'e' a sa. 33 Mete ma atahori simbo saa fo Atahori mana nema mia ata' naa nefad'en, naa o natud'u bukti boe 'oi, ana namahere Lamatualain 'o'olan naa, teb'e. 34 Atahori fo Lamatualain haitua nema' a, nafad'e Lamatualain hehelu-fufuli na. Te Lamatualain fee Dula-d'alen nda mana 'etu mana basa' sa neu Eni ena. 35 Huu Ama' sia sorga sue nala Anan seli. Ma Ana fee basa-b'asa' e neu Ana' naa liman ena.^d 36 Ma atahori mana namahere neu Anan, ara hambu masod'a ndoo-tetu' nda mana basa' sa. Te atahori nda mana namahere neu E sa, ma nda tao tungga hehelu-fufulin sa, ara nda hambu masod'a' naa sa, huu Lamatualain 'aka' natud'u' a nasan fo huku-d'oki se.”