Usif Yesus anleek In asimo anoni' sin tuaf bo'es am nuug
(Nai Mateos 10:5-15; Nai Markus 6:7-13)
9
Tabug mese, Nai Yesus nabguab In asimo anoni' sin tuaf bo'es am nuug. Lalit In ntaon sin kuasat he nabe'i nli'u nitu le'uf, ma naleko' menas huma'-huma' na'ko amenat sin. 2 In anleek sin he annaon ma natonan anmatoom nok Uisnenog In aplenat. In anlulu ma anleek sin amsa' he naleko' amenat anbin meel am meel. 3 Mes In natoon noi sin am nak, “Mimnau milek-leko'. Hi naik meki saa'-saa' ambi lalan. Amnao nai, ampake haa soo balug mese. Naik meki tees, ai' aluk, ai' bukael, ai' loit. Naik meki bale tukal amsa'! 4 Kalu hi mtaam moi kuan mese, ma anmu'i tuaf ansimo ki, amtuup ambi sin umel naan. Naika mpili umel. Mitgua mbi le' naan, tal antee hi mnao misaitan kuan naan. 5 Kalu hi mtaam moi kuan mese, lalit abiten kuan naan ka nlomi he nsimo ma ka nlomi he nneen ki fa, ampoi mnao misaitan sin. Tabug hi mpoi mnao misaitan sin naan, hi mmo'e maan mo'et mese natuin halat: amtekal afu skuku' na'ko hi haem een naan. Mitonan sin am mak, ‘Hi ka mlomi fa he mneen ate, maut he hi mitae kiim!’”a6 Lalit asimo anoni' een naan, annaon na'kon kuan noi kuan. Sin natonan ma noi tuaf-tuaf namfaun anmatoom nok Uisnenog In Tu'in Alekot. Lalit sin naleko' amenat sin amsa'.
Kesel Herodes antakamana' anmatoom nok Usif Yesus
(Nai Mateos 14:1-12; Nai Markus 6:14-29)
7 Tabug naan, Kesel Herodes Antipasb anneen nalali benog huma'-huma' anmatoom nok Nai Yesus. Anneen aguab een nane, in namkaak, natuin tuaf fauk nak, “Nai Yesus naan, es le' nai Yohanis Aslanit le' anmoni nfaan.”
8 Tuaf abjaan anteni nak, “In le' naan baba nai Elia le' anmoni nfaan.”
Tuaf abjaan anteni nak, “In le' naan, tuaf mese na'ko Uisnenog In mafefa knino' abjaan faijan unun.”c
9 Mes nai Herodes namnau mnak, “Tabug mese, au leek tuaf anketu nai Yohanis in anakan. In anmoni nfani, ka? Lalit tuaf le' iij, sekog antein?” Es on naan in n'etu lalan he na'eku nok Nai Yesus.
Usif Yesus antuthae toog nifun niim
(Nai Mateos 14:13-21; Nai Markus 6:30-44; Nai Yohanis 6:1-14)
10 Tabug mese, asimo anoni' sin le' Nai Yesus anlulu ma anleek sin naan, sin nfanin neman ma nabguan nfanin nok Ne. Sin natonan noi Ne ale' kanan lasij le' sin anmo'en nalali sin. Lalit Nai Yesus nok In asimo anoni' sin annaon nok manifa' noin balel mese anpaumaak kuan Betsaida, he nasnasan akle'og anbin naan. 11 Mes too mfaun sin nasneku' noi sin he annaon n'anin mee, lalit sin na'iko Nai Yesus sin anbin sin kotik een. Es on naan Nai Yesus ansimo sin, lalit In naleko' amenat sin ok-oke', ma In natoon noi sin Uisnenog In aplenat.
12 Tabug manas he noi nmofu on nane, In asimo anoni' sin bo'es am nuug, neman ma nekin haan totis am nak, “Aam! Leko nnesi Ho mlelu too mfaun sin iij he annaon noi kuan-kuan le' anmapaumakan etan balel iij, he sin nabe'i napenin kuuk amnahat. Ma sin namin balel he ntupan ntahan een. Natuin bale luman on le' iij, sin he napenin amnahat on mee?”
13-14 Mes Nai Yesus natael am nak, “On ii! Hi lo he mtuthae sin!”
Mes sin nplotees een am nak, “Hee! Ama' amsa', Ho es! Too mfaun sin le' iij, nifun niim anneis. Naan fe' atonij sin, bifeen nuug ma li'aan een ka maso'it fa fe'! On ii te, hit utunu een ala fgua' niim aah, ma ika' een ako'el nuug aah. Es on naan Aam, kalu Ho mlomi he hai mtuthae too mfaun sin iij, hai he mmo'e on meel he msoos maan amnahat noi sin?”d
Lalit Nai Yesus anlelu sin am nak, “Am'atol sin he antokon pukan-pukan. Pukan mese ate, tuaf bo' niim.”
15 Es on naan sin annaon n'atol een on naan. 16 Tabug sin antokon on nane, Nai Yesus naiti utunu afgua niim een naan, ma ika a'ko'el nuug een naan. Lalit anbaisenu, ma an'onen nasaeb sukuul ma makasi. Lalit In an'ebi utunu' ma ika' sin naan. Es on naan In annona' noi In asimo anoni' sin he annaon anbatin noi too mfaun sin naan. 17 Sin ala sin anbukaen tal namsenan. Lalit amnaah nesif een naan, sin nabguab nafani' sin anbin aba' bo'es am nuug nahen-henun.
Nai Petrus nahine nak, Usif Yesus naan, Kristus, Tuaf le' Uisnenog anba'an nani Je na'ko unu'
(Nai Mateos 16:13-19; Nai Markus 8:27-29)
18 Tabug mese, Nai Yesus anmes-mese n'onen anbi balel mese. Lalit In asimo anoni' sin neman ma nabguan nok Ne. An'onen nalaal, In antoti sin am nak, “Hi mneen tuaf abjaan sin naguab een noi Kau, nak Au le' iij, sekog?”
19 Sin nataen am nak, “Tuaf abjaan nak, Ho le' iij, nai Yohanis Aslanit. Tuaf abjaan anteni nak, of oni' Ho le' iij, baba nai Elia. Kalu kaha fa te, tuaf mese na'ko Uisnenog In mafefa knino' sin un-unu' le' anmoni nfaan.”e
20 Es on naan Nai Yesus antoti sin anteni mnak, “Kalu natuin hi penit, hi mak Au le' iij, sekog?”
Lalit nai Petrus natael am nak, “Aam. Ho le' iij Kristus, Tuaf le' Uisnenog anlulu naan Je na'ko unu'!”f
21 Lalit Nai Yesus antaal sin matani', he naik natonan noi sekom-sekog, nak In le' naan, Kristus.
Usif Yesus naguab anmatoom nok In amaten, ma In amonin anfaan
(Nai Mateos 16:21-28; Nai Markus 8:31—9:1)
22 Lalit Nai Yesus naguab anteni mnak, “Au le' iij, Mansian Namneo-Namneo. Au lo he asutai mane'at ma mafena' huma'-huma'. Atoni mnasi halat Yahudi sin, anaak lasi palsait Yahudi sin anakaf sin, ma kulu agama sin ka nlomin fa he nsimo Kau nak, Au Kristus Kau. Lalit sin of namate Kau. Namneo Au 'maat, mes anmiu ntein, Au 'moni faan.”g
23 Lalit In naguab noi too mfaun sin am nak, “Sekom-sekog le' anlomi he natuin Kau, in lo he nalan piut ma natuin Kau nenog-nenog! In lo he anpolin nani in lomin sin kuun. In lo he natuin piut-piut, maski he na'matel ee msa', nahuum on le' atoni nasae hau nehe he nnao noi bale 'maten.h 24 Tuaf le' nabalab on he anmate natuin in nok Kau, in of anmoni piut nok Uisnenog. Mes noi tuaf-tuaf le' ala nlomi he nmoni noi in tuan ee kuun, of in mabeti' na'ko Uisnenog.i 25 Kalu tuaf mese napeni nani pah-pinan iij in nesan ok-oke', mes Uisnenog antita napoitan, in napeni mnisat saa'? 26 Au le' iij, Mansian Namneo-Namneo. Es on naan kalu sekom-sekog namaeb on noi In natuin Kau, ma namaeb on noi in annaa' Au noni' sin, Au msa' of umaeb Ok he manakug 'bi Uisnenog In human ma In matan, tabug Au 'fani 'uum a'ko sonaf neno tunan. Fun Au of a'fani 'uum 'eki Ama' In kuasat le' anpiin ma naklaah alekot, ubgua 'ok In ahaket sin na'kon sonaf neno tunan. 27 Au utoon ki namneo-namneo. Anmui' naan tuaf fauk na'ko hi ala ki le' iij, of nitan kuuk neki sin matak fuak een Uisnenog In Aplenat, lalit na' sin nabe'i anmaten.”
Usif Yesus nabaino anbi anu'af ee tunan
(Nai Mateos 17:1-8; Nai Markus 9:2-8)
28 Anfini nenog faan, Nai Yesus nok nai Petrus, nai Yohanis, ma nai Yakobus annao nekin nsaen noi anu'af he an'onen een. 29 Tabug Nai Yesus an'onen on nane, In masan nabaino, ma In bale pakel sin nalim-liman.
30 Nok askeken ate, tuaf nuug anpoi neman. Tuaf nuug le' naan, es le' baba nai Musa ma baba nai Elia. Es on naan sin nua sin naguab een nok Nai Yesus. 31 Sin mamnita' anbin pina' ma klaha'. Sin tenu sin naguab een anmatoom nok Nai Yesus In amaten anbi koot Yerusalem.
32 Tabug naan, nai Petrus nok in amnono tuaf nuug naan, anpe'ug een le'-le'uf, es on naan sin ntupan. Tabug sin anfenan, sin niit Nai Yesus anhake nok atonij nuug. Sin niit Nai Yesus naliim-liim amsa'.
33 Tabug baba nai Musa ma baba nai Elia he anfanin on nane, nai Petrus antaka'mana. In ka nahine noi he anmo'e saa'. Es on naan in naguab alagua-lafug am nak, “Usi'! Hit atbi iij, na' naleko', oo! Es on naan naleko nnesi hai mihakeb maan la'at teen. Es noi Ko, Usi', es noi baba nai Musa, ma es anteni noi baba nai Elia.” 34 Mes tabug in naguab fe' on nane, nopel ansanu ma an'amu naan sin. Lalit nai Petrus sin namtaun. 35 Es on naan sin annenan hanaf na'ko nopel naan in nanan am nak,
“Au Anah le' iij, Au 'pili 'aan Je leeh!
In naguab saa'-saa', amneen milek-leko' moi Ne.”j
36 Hanaf naan oke', nai Petrus sin niit Nai Yesus anmes-mees. Sin tenu sin anfeef a'temen. Sin ka natonan fa noi sekom-sekog saa' le' sin niit nalalij je naan. Alaloog ate, na' sin anmulai natoon noi tuaf abjaan.
Usif Yesus naleko' li'ana' le' nitu le'uf ansaen
(Nai Mateos 17:14-18; Nai Markus 9:14-27)
37 Anmiu on nane, tabug Nai Yesus ma nai Petrus sin ansanu nfanin na'kon anu'af naan, too mfaun sin neman ma na'ekun nok Nai Yesus. 38 Es on naan anmu'i naan tuaf mese ankua' Ee mnak, “Aam Kulug! Ambaban maan kau nok au aan monel. Koijoo, in afgua' mese aah! 39 Anmu'i nitu le'uf annaa', anmo'el ma naskeke te, ankua'. Ka loog ate, ankua' ma antepo tal antee hapen fulen anpoi na'ko in fefan. Nitug naan anbanan nafan-fani msa', ma nokij piut-piut. 40 Au 'toti Ho asimo anoni' sin he anbaban kau, he naleko te, nitug naan anpoi na'ko au anah. Mes sin ka nabe'ij fa!”
41 Anneen on nane, Nai Yesus anhaan maslaal noi sin ok-oke' am nak, “Hoi! Hi ka mpalsai fa mmak Uisnenog nabe'i naleko' tuaf? Hi lo namneo-namneo mansian le' ka mmoni fa mbi laal amneot! Au lo he 'ok ki 'tee leka', he na' hi mpalsai moi Kau? Au he alan noi ki 'tee meel anteen?”
Lalit In nail an'ali noi anaef nane mnak, “Meki li'ana' naan neem noi ii!”
42 Tabug sin neki li'ana' naan noi Nai Yesus, nitu amaufinut naan naitij ma npesek ee noi naijaan. Mes Nai Yesus naplenat nitug he anpoi nasaitan li'ana' naan. Es on naan in naleko nani. Lalit Nai Yesus annona' li'ana' naan noi in amaf. 43a Too mfaun sin le' niit Uisnenog In kuasa nmatani' naan, sin ala sin ansanmakan namneo-namneo.
Usif Yesus naguab anteni lasij anmatoom nok In amaten
(Nai Mateos 17:22-23; Nai Markus 9:30-32)
43b Tabug too mfaun sin ok-oke' fe' naguab een anmatoom nok lasi sanmakat sin le' Nai Yesus anmo'e sin naan, In natonan In asimo anoni' sin am nak, 44 “Hi mitaka' milek-leko' Au 'guaban iij! Ka loog fa nteni te, tuaf nasosa' Kau, Mansian Namneo-Namneo le' ii. Lalit sin nana'at Kau noi atoni ateta' sin.” 45 Mes In asimo anoni' sin antaka'mana. Sin ka nahinen fa noi In salit saa'. Sin he ntoti in oten amsa', namtaun.
Sekog es le' ahunut anbi maat
(Nai Mateos 18:1-5; Nai Markus 9:33-37)
46 Tabug mese, Nai Yesus In asimo anoni' sin anmatoen lasij anmatoom noi sekog of es le' anjali tuaf ahunut anbi maat.k 47 Mes Nai Yesus nahine sin lasi matoes naan. Es on naan In no'en naan li'ana mese, lalit nahakeb anbi In aon-abjaan. 48 Lalit In natoon noi sin am nak, “Amneen milek-leko'! Tuaf le' natuin Kau ma antuthae tuaf abjaan on le' li'ana' le' iij, in oten nak, naan in antuthae Kau msa'. Ma in antuthae Au Ama' et sonaf neno tunan amsa' le' anleek Kau 'uum 'oi pah-pinan ii. Anmu'i tuaf namfau nail anlaksa-sael aah tuaf abjaan. On le' atoni kasian, asusat, atoni ka mapake' fa, amaufinut, abaut. Haa! Atoni le' anlomi he antuthae tuaf-tuaf sin on le' naan, Uisnenog naan sin on atoni matani'.”l
Sekog ka nlaban fa, naan hit amnono
49 Lalit nai Yohanis natoon noi Nai Yesus am nak, “Usi'! Tabug mese, hai miit atonij mese anli'u nitu le'uf ate, anteek Ho kanam. Es on naan hai mtaal, he naik nteek Ho kanam naan, natuin in ka hit ee fa.”
50 Mes Nai Yesus natae am nak, “Naik on naan! Natuin atoni le' ka nlaban kit fa te, in oten nak, naan hit amnono een kuuk.”
Toog anbin kuan mese et propinsi Samaria ka nlomin fa he nsimo Usif Yesus
51 Nai Yesus nahine nak, In tabug he nsae noi sonaf neno tunan naan anpaumaak eeh. Lalit In nafeek he annao noi koot Yerusalem. 52 In anleek tuaf he annao nahunu na'ko sin, he sin of naloitan bukaet. Es on naan tuaf sin naan antaman noin kuan mese et propinsi Samaria he naloitan ume tupas. 53 Mes abiten Samaria sin ka nlomin fa he nsimo Nai Yesus sin, natuin In he nnao nabesan Uisnenog noi koot Yerusalem.m 54 Tabug nai Yakobus ma nai Yohanis annenan nak abiten Samaria sin amo'ek een on nane, sin anfuli' Nai Yesus am nak, “Usi'! Lekog ate hit atoti Uisnenog he nasanut aij he notu naklati sin.”n
55 Mes Nai Yesus nail an'ali noi sin nua sin, ma nakain sin am nak, “Naik mitenab on naan.” 56 Lalit sin annaon nfinin noi kuan abjaan.
Tatuin Usif Yesus ate, in sarat een es le' iij
(Nai Mateos 8:19-22)
57 Tabug sin annaon on nane, anmu'i atonij mese naguab noi Nai Yesus am nak, “Aam! Ho mnao m'ani meel am meel lah, au utuin Ko piut!”
58 Mes Nai Yesus natael am nak, “Lekog amsa'! Mes mumnau. Ale' mansian sin ma mu'it sin anmu'in balel he natguan. Asu fuij anfani noi in nuat he antuup. Kolog anfani noi in kunan. Mes Au, Mansian Namneo-Namneo iij, Au ka 'mu'i kuuk fa umel he 'fani 'oi ne. Aka'nunu' amsa', Au ka 'mu'if.”
59 Tabug mese, Nai Yesus no'en tuaf mese anteni' mnak, “Uum he mutuin Kau, he mjali Au nuug.”
Mes tuaf naan natael am nak, “Lekog! Mes, on iij fe', Usi'! Maut he au 'fani he ulus aan amaihonit sin fe'. Kalu au ama' anmate nalali te, na' au 'uum he utuin Ko.”
60 Mes Nai Yesus naguab noi ne mnak, “On ii! Maut he tuaf-tuaf le' ka npalsain fa noi Uisnenog, n'ulus amates sin. Mes hi, le' ampalsai moi Uisnenog, hi mepug sin es le' he amnao minaoba' Uisnenog In Aplenat.”
61 Anmu'i tuaf mese anteni naguab am nak, “Usi'! Au he utuin Ko piut-piut. Mes amfee maan kau meinuan ba-baun he au 'nao matabe ma maneek aan 'ok au nonot sin fe', na' au 'uum he utuin Ko.”o
62 Mes Nai Yesus natonan ee mnak, “On ii! Kalu tuaf anmulai anfoi naijaan, lalit antaisibu nteni ulusan abjaan tal antee anniken nani noi he nseen, in lelel naan ka anjalif. On nane msa' noi tuaf-tuaf le' nafeek he natuin Kau, mes namnau piut-piut in amonin unu' naan. Tuaf on le' naan, ka mapake' fa anjali ameput anbi Uisnenog In aplenat.”