Iij tu'in alekot anmatoom nok Uisnenog In Anah.^a In kanan nai Yesus Kristus, le' Uisnenog anlulu ma anleek nanij na'ko un-unu'. In tu'in iij, na'uub on na'ko ii:

2 Nahunu na'ko Nai Yesus naiti In mepug, Uisnenog anlulu ma anleek atonij mese neem nahuun. Atonij le' naan, kanan nai Yohanis. Nai Yohanis le' iij, lo he neem nahuun he nasoitan lalan noi Nai Yesus. Mes nahunu na'ko nai Yohanis he neem, Uisnenog ansonu' nahunun In mafefa knino' tuaf mese, kanan nai Yesaya. Na'ko afi ahunut, nai Yesaya anluul nalali, nak on ii:

4-6 Sin bijaas anteek nai Yohanis nak 'Aslani Atonij’. In natgua anbi bale luman. In bale pakel anmo'el na'ko bijakase unta in funun. In pasu 'futu' anmo'el na'ko pasug. In neku sisi afokog ma ninu oni haug. [Nai Yohanis in amonin ii, nahuum on le' mafefa knino' baba nai Elia faijan unun.]^d

Tabug naan, too mfaun na'ko koot Yerusalem, ma propinsi Yudea in nanan ok-oke' sin neman ma na'eku nok nai Yohanis anbi in balan. Sin neman he niit neki sin maatk een ma annenan neki sin lukek een lasi-noni' na'ko nai Yohanis. In nsaksii ma natoon noi sin am nak, “Hi, mes lo he mmanaku' ma misaitan hi sanat ma penu sin ok-oke', maut he Uisnenog annose nani hi sanat sin le' naan. Lalit hi mes lo he mislani fe', he nfani taka' nak, hi mmahalan nekaf amfaan jen mok Uisnenog.”

Tabug sin nneen nalalin on nane, sin nmanaku' sin saant een, lalit sin nana'at sin tuak een noi nai Yohanis, ma in naslani sin anbi noel Yarden.

7 In naguab noi sin am nak, “Of ka loog fa te, Atonij mese of he neem. In matani' nnesi na'ko kau. Au ka 'taam fa so'it maski oni au 'jali haa In aan lelu ma aan leka', au ka umnees 'ok Ne fa.^e 8 Au 'manoek aal es le' he uslani ki 'eki oel, mes Atonij naan of anmo'e nnesi na'ko kau. Fun In of natgua ma namonib ki neki Uisnenog In Asmana Knino'.”

9 Lalit Nai Yesus neem na'ko kuan Nasaret et pah Galilea, he na'eku nok nai Yohanis. Ma nai Yohanis naslanij anbi noel Yarden. 10 Ma tabug Nai Yesus anpoi na'ko noel, nok askeken nenog natfai. Lalit Uisnenog In Asmana Knino' ansanu neem noi Ne, nakliil on on le' algua-sisij. 11 Ma hanaf Uisnenog anpoi neem na'ko neno tunan am nak,

12 Lalit Uisnenog In Asmanan anpoo' neki Nai Yesus noi bale luman. 13 Anbi balel naan, anmu'i mu'i fuij sin. Nai Yesus natgua anbi balel naan faij bo' haa ma nenog bo' haa. Anbi balel naan amsa', nitu le'uf sin anakaf anaet neem ma nsobal Nai Yesus he natuin in lomin, mes ka nabe'ij fa. Lalit ahake neno tunan na'ko Uisnenog neman he antuthae' ma nabha'e' Nai Yesus anbi lasi aof ma asmanaf.

14 Anbi tabug mese, le' sin nataam nalali nai Yohanis Aslanit anbi ume buij, Nai Yesus annao noi propinsi Galilea, he natoon Tu'in Alekot na'ko Uisnenog anbi naan.

15 In naguab am nak,

16 Tabug mese, Nai Yesus annao naleku nefog Galilea in ninen. In niit atonij nuug. Es in kanan nai Simon, nok in olif nai Anderias. Sin nua sin anpolin tiif kaij he nheken ika'. Mepug naan, sin mepug nenog-nenog. 17 Nai Yesus no'en sin am nak, “Hoi, ba'e sin! Iim he mituin Kau nai! Hi amnami ika' ki, mes anbi tabug iij, Au he unoni' ki he mjali amnami tuaf moi pukan Uisnenog.” 18 Anneen nalalin on nane, sin nua sin nasaitan tiif kaij naan, ma annao natuin Ee.

19 Lalit Nai Yesus annao ankono kle'og. In niit nai Sebedius in aanh een tuaf nuug. Aan unu in kanan nai Yakobus, ma in olif kanan nai Yohanis. Sin nua sin naloitan sin tiif kaij anbi abelo mese in nanan. 20 Nai Yesus no'en sin am nak, “Hoi, ba'e sin! Iim he mituin Kau nai!” Es on naan sin nua sin annao nasaitan sin amaf nok in ameput sin anbi abelo' naan, ma sin natuin Ee.

21 Lalit Nai Yesus nok tuaf haa' een naan, sin neman anteen koot Kapernaum. Nenog naan nateef nok atoni Yahudis sin neno onen.^h Es on naan Nai Yesus antaam anbi ume onen ma nanoni' tuaf anbi naan. 22 Tabug sin anneen In aguaban sin ansanmakan, fun In nahiin namneo-namneo lasi-noni' naan in nesan. Naan in naik kuun na'ko atoni Yahudis sin kulu agama sin.ⁱ

23 Tabug naan, anmu'i atonij mese, le' anitu sae. In ntaam nok anbi ume onen amsa'. Lalit nitug le' anbi atonij naan anhunun am nak, 24 “Hoi! Yesus, atoni Nasaret! Ho uum he mselo' saa' mok kai? Ho uum he mule'un kai, ai'? Hai mihine Ko. Ho le' iij, Atonij le' Uisnenog anba'an nanij he anleek he neem na'ko un-unu'. Ho le' iij, Uisnenog In Atoni Knino' le' ka mmu'i' fa sanat.”

25 Mes Nai Yesus namaunun atonij naan ee am nak, “Mumeka'! Ho mpoi nai mu'ko atonij ii!”

26 Lalit nitu le'uf naan, anmo'e atonij naan in aon nakbete anfiin. Ma in anpoi na'ko atonij naan nok haan hunun. 27 Lalit abiten ume onen naan ansanmakan. Lalit sin naguab een am nak, “Oin ee! Sa'an es le' ii! In naplenat nitu le'uf sin he anpoin, ma sin anneen ma natuin In aguaban. Iij anoni fe'ug, ai'? Anaef naguab lo matani'!”

28 Es on naan sin nmulain an'etun ma natonan 'mo'et na'ko Nai Yesus, na'ko kuan noi kuan anfuun am nateef anbi propinsi Galilea.

29 Tabug sin anpoin na'ko ume onen naan, Nai Yesus annao noi nai Simon ma nai Anderias sin umel. Nai Yakobus nok nai Yohanis nokan amsa'. 30 Nai Simon in baif nameen mainikij, ma antuup anbi hala'. Tabug Nai Yesus nok In asimo' noni' sin antaman anbi umel naan, atonij mese neem ma natonan nai Simon am nak, “Ho be'ij nameen mainikij.”

31 Es on naan Nai Yesus antaam nail bifee mnasi ameen mainikij naan. In annaa' in animan, ma anfiti nafena'. Tabug nane msa', in naleek. Lalit bifee mnasi' naan, anpoi ma antuthae sin.

32 Tabug manas he noi anmouf, too mfaun sin neki ale' amenat, ma ale' tuaf le' nitu ansaen sin. Sin neki sin noi Nai Yesus ma antoti babat he naleko' sin. 33 Ale' too mfaun anbi koot naan neman ma nauban naan anbi umel naan in nesun. 34 Too mfaun sin naan, amenat huma'-huma', ma Nai Yesus naleko' sin ok-oke'. Ma In anli'u napoitan nitu le'uf namfau. Mes In ka nfee fa meinuan noi nitu le'uf sin naguab een, natuin sin nahinel.

35 Nesi noi anmiu le' fe' anmesi'ook, Nai Yesus anfeen ma annao nasaitan umel naan. In annao noi bale luman ma makolo', he n'onen ma naguab nok Uisnenog. 36 Tabug nai Simon sin anfenan, sin ka niit Ee fa. Es on naan sin nnao ma namij. 37 Tabug sin na'eku nokan, sin naguab noi Ne mnak, “Aam! Too mfaun sin nami Ko. Atkoen ok atfani nai.”

38 Mes In natael am nak, “Lekog amsa'. Mes naleko' nneis, hit tnao toi kuan abjaan anteni' fe', le' anpaumakan anbin le' ii. Au he utoon Tu'in Alekot 'noi sin amsa'. Natuin Au mepug in uun es le' naan.”

39 Lalit In nnao anfuun am nateef anbi propinsi Galilea, he nsaksii ma natoon Tu'in Alekot na'ko Uisnenog anbi ume onen sin mese-mese. Anbi nane msa', In anli'u napoitan ale' kanan nitu le'uf sin na'ko amenat sin.^j

40 Tabug naan, anmu'i atonij mese le' nameen atho'al-atlaku' neem noi Nai Yesus. In nli'tuu ma antoti babat na'ko Nai Yesus am nak, “Aam! Ambaab maan kau. Au uhiin 'ak Ho mube'i he muleko' au menas, henati' atoni naikan nmainisin anteni' kau. Lamun Ho mloom.”

41 Ma Nai Yesus ankasian atonij naan, es on naan In annona' In animan ma anpoel. In naguab am nak, “Au 'loom! Es on naan Au uleko' ko nai!” 42 Nok askeken ate, menas naan namneku naan, ma in naleko anfaan anbi tabug le' naan. 43 Lalit Nai Yesus anlelu atonij naan he anfani, ma namnaub ee, 44 mnak, “Amneen mulek-leko', Au he 'ba'an ko! Ho muleko amfaan jen, mes ka nabe'i' fa he mutoon noi atonij abjaan. Ho lo he mutuin nai Musa in aplenat. Es on naan ho mnao muhuun moi anaak lasi palsait Yahudi henati' in npalekas ho aom, he in nahiin namneo-namneo nak, ho muleko amfaan jen, ai' kaah? Lalit ho meki fua'-tulu' he nfani taka' nak, ho mtoti makasi, hena' too mfaun sin nahinen am nak ho muleko amfaan jen namneo-namneo.”^k

45 Mes atonij naan anpoi annao ma ansaksii na'ko bael es noi bael es anbi mee-mee. Es on nane, too mfaun sin namin lalan he na'eku nok Nai Yesus, tal antee In ka nabe'i fa he naklila' In tuan anbi koot. Es on naan In natgua anbi balel-balel luman ma makolo', le' naloog na'ko koot. Ma too mfaun sin na'ko mee-mee, neman ma namij he na'eku nokan.