9
Hi naik amniken Au aguab een le' ii. Na'ko hi ala ki ok-oke' le' iij, of anmu'i tuaf le' fe' anmonin tal sin niit Uisnenog antoko ma naplenat neki kuasat matani'.”
Nai Markus 9:1-32
Usif Yesus nabain o', ma In bale-pakel naliim anbi 'nu'af
(Nai Mateos 17:1-13; Nai Lukas 9:28-36)
2 Ankono nenog nee, Nai Yesus antoti nai Petrus, nai Yakobus, ma nai Yohanis, he annaon ansaen nabguan noi 'nu'af amnanu' mese, le' ka nmu'i fa tuaf. Tabug sin anteen in tunan, sin nail niit Nai Yesus nabain o'. 3 Ma In bale-pakel naan anjali muti' ma naliim. Ka nmu'i fa bale' anbi pah-pinan le' ii, in mutin namnees nok In bale-pakel naan. 4 Nok askeken, sin niit Nai Yesus naguab nok baba nai Elia ma baba nai Musa.
5-6 Sin tenu sin namtaun nmaten. Nai Petrus namkaak, tal in naguab alafug-alafug. Lalit in naguab noi Nai Yesus am nak, “Aam! Hit tbi iij, na' naleko nneis. Kalu naleek hit atmo'e mafo' teen. Es noi Ko, es noi baba nai Musa, ma es atfeel ee noi baba nai Elia.”
7 Lalit anmu'i nopel le' ansanu neem ma n'amu naan sin. Ma sin anneen hanaf mese anpoi neem na'ko nopel nane mnak, “Amneen nai, oo! Nai Yesus le' iij, Au Aan neka'. Hi mneen ma mituin Ee lek-leek!”a
8 Tabug nai Petrus sin nneen niit hanaf naan, sin nail anfuun ma nateef, mes nok askeken sin ka niit anteni' fa tuaf nua' een le naan. Aal Nai Yesus anmees.
9 Lalit Nai Yesus nok In asimo anoni' sin ansanun anfanin na'ko 'nu'af naan. Ma Nai Yesus antaal sin am nak, “Saa' le' lelon hi miit milali hi naik mitoon noi atonij abjaan. Au le' iij, Mansian Namneo-Namneo, Au lo he 'mate fe'. Tabug Au 'moni 'faan, na' hi mitoon lasij naan noi too mfaun sin.”
10 Sin annaa' nahelan Nai Yesus In lasi manpaa' naan, ma sin ka natoon ee fa noi tuaf mese amsa'. Mes sin tenu sin anmatotin es nok es am nak, “In salit on mee, es na' In nak, In he nmoni nfaan na'ko In amaten le' naan? On mee?”
11 Ma sin antoti Nai Yesus am nak, “Kulu agama sin nak, baba nai Elia lo he neem nahunu fe', lalit na' Kristus neem. Mes anbi Ho tenab on mee?”b
12 Nai Yesus natael am nak, “Namneo on naan. Baba nai Elia lo he neem nahunu fe', he nasoitan lalan noi Kristus, Tuaf le' Uisnenog anlulu nanij na'ko un-unu'. Mes on mee? Hi ka mihine fa saa' le' sin anluul nanij et Uisnenog In Sula Knino' anmatoom nok Mansian Namneo-Namneo? Fun sin anluul nalali mnak, tabug In neem antee, atoni of anhamu'ij ma sin of anlolo nisan. 13 Ma hi lo he mtahaa hi lukem een lek-leko, oo! Baba nai Elia neem nalaal je. Ma atoni nhamu'ij natuin sin alomik een. Lasij naan namnees nok saa' le' uun-unu' sin babaf sin anluul nanij.”
Usif Yesus naleko' li'ana mese, le' nitu le'uf natgua anbi in aon
(Nai Mateos 17:14-21; Nai Lukas 9:37-43a)
14 Tabug Nai Yesus nok In asimo anoni' tuaf teen na'eku anfanin nok asimo anoni' abjaan, sin niit too mfaun sin nabguan. Too mfaun sin naan neman he niit asimo anoni' abjaan sin anmatoen nok kulu agama sin. 15 Tabug too mfaun sin niit Nai Yesus on nane sin naskeken, fun sin nateenb een nak oni' In nabala fe' et anu'af in tunan. Ma sin naen ansenug.
16 Lalit Nai Yesus antoti sin am nak, “Hi mmatoe noi lasi sa'an mok sin?”
17 Anmu'i atonij mese neem naguab am nak, “Aam, kalu lekog amneen maan kau. Au 'eki au aan monel he Ho muleko' maan. In namuum ma ka naguab fa, fun nitu le'uf mese ansaen. 18 Tabug nitu le'uf naan ansaen, in ntepon on noi naijaan. Lalit li'ana' naan in hapen na'fule', ma in neku in nisin. Lalit in aon amneo guah on le' haug nono mese. Au 'toti Ho asimo anoni' sin, he sin anli'u nitu le'uf naan. Mes sin ka nabe'ij fa.”
19 Anneen on nane, Nai Yesus namaunun sin am nak, “Hoi! Lo hi 'teeb-teeb! Au unoni' ki tenij-tenij, mes hi ka mheke maan fa. Ma hi ka mpalsai Kau fa namneo-namneo! Au he 'alan 'noi ki antee meel! Meki Kau li'ana' naan neem noi ii!” 20 Lalit sin nabnono neki li'ana' naan neem noi Nai Yesus. Tabug nitu le'uf naan nail niit Nai Yesus on nane, in ntepon li'ana' naan ma antilobin anbi naijaan, ma in hapen fulen ansae.
21 Lalit Nai Yesus antoti li'ana' naan in amaf am nak, “Ho anah iij in menas iij na'kog leka?”
In amaf natael am nak, “Na'ko in aan'-ana' fe'. 22 Nitu le'uf naan he namate au anah ii 'ala loog ee. In antepon au anah iij tenij-tenij anbi aij, ma nalemab anbi oel. Es on naan ambaban maan kai, Aam! Kalu lekog amneek kai, he muleko' maan au anah le' ii.”
23 Nai Yesus natael am nak, “Nansaa' am es ho mak ‘kalu lekog?’ Namneo, Au ube'i 'mo'e ale' saa'-saa', lamun atoni lo he npalsai fe'!”
24 Lalit atoni mnasi naan natae ma he nkae nok am nak, “Aam! Namneo, au 'palsai 'ulaal je. Mes ambaban kau he au 'neek atebes le' iij, naheel antein!”
25 Tabug naan, Nai Yesus nail too mfaun sin nmulain neem nauban sin. Ma In naplenat nitu le'uf nane mnak, “Hoi! Nitu abulalut! Ho mpoi nai mu'ko li'ana' le' ii, he in nabe'i anneen, ma in nabe'i naguab. Ho naik amtaam amfani uum!”
26 Anneen Nai Yesus naguab on nane, nitu le'uf naan anhunun naheel naan jon. In anmo'e li'ana' naan antiloot ma nakbeet on, lalit na' anpoi nasaitan. Ma li'ana' naan natseel on le' anmate nalaal je. Tal too mfaun sin le' anbi naan naguab een am nak, “Ooo! In nmate nalaal je!”
27 Mes Nai Yesus annaa' li'ana' naan in animan, ma nfiti nafena. Es on naan li'ana' naan anfeen nani tabug naan.
28 Lalit Nai Yesus nok In asimo anoni' sin annao nasaitan balel naan, ma antaman noin umel mese. Anbi naan sin antoti Nai Yesus am nak, “Aam! Nansaa' am es lelon hai ka mibe'i fa he amli'u maan nitu le'uf naan?”
29 Ma Nai Yesus naguab noi sin am nak, “Amneen milek-leko'! Nitu le'uf sin lo amaufinut een. Es on nane, kalu hi ka m'onen fa he mtoti Uisnenog, hi ka mibe'i fa he mli'u nitu le'uf on le' naan.”
Usif Yesus natoon anteni In amaten
(Nai Mateos 17:22-23; Nai Lukas 9:43b-45)
30 Lalit Nai Yesus nok In asimo anoni' sin annaon nasaitan balel naan, ma antaman noi propinsi Galilea. Tabug naan, Nai Yesus ka nlomi fa he atoni nahine nak In et balel naan. 31 Mes In aal he nanoni' In asimo anoni' sin. In naguab noi sin am nak, “Ka loog fa leen, sin of nasosa' Kau noi atonij abjaan. Lalit sin nlolo niis Kau, Mansian Namneo-Namneo le' ii. Namneo, Au lo he 'maat, mes anbi anmiu nteinc Au of a'moni 'faan.”
32 Nai Yesus naguab on naan, ma In asimo anoni' sin naskeket namkakan. Sin ka nabe'in fa he antoti anteni Nai Yesus In tenab on mee.
Usif Yesus In asimo anoni' sin anmatoen nak sekog es le' nanae' nneis
(Nai Mateos 18:1-5; Nai Lukas 9:46-48)
33 Lalit Nai Yesus sin annaon anteen noi Kapernaum. Tabug sin antaman anbin umel, In antoti noi In asimo anoni' sin am nak, “Lelon hi mmatoe noi' lasi saa' anbi lalan?”
Nai Markus 9:33-50
34 Mes ka tiit fa tuaf mese he natae, fun anboni lalan sin anmatoen am nak, sekog es le' anaek annesi anbi sin.d
35 Lalit Nai Yesus antoko ma nanoni' sin am nak, “Sekog es le' anlomi he anjali atoni naek, in amonin lo he namneo-namneo on le' atoni neek palan, he ntuthae ale' too mfaun sin.”e
36 Lalit Nai Yesus naskau naan li'ana mese anbi naan, ma anfani noi sin atnaank een. Ma In naguab am nak, 37 “Sekog le' natuin Kau ma ntuthae tuaf abaut sin on le' li'ana abaut le' ii, tuaf le' naan on le' ntuthae Kau msa'. Ma in antuthae Au Ama' le' anleek Kau he 'taam 'uum a'bi pah-pinan iij ee msa'.”f
Sekog es le' anjali hit tuaf sin?
38 Lalit Nai Yesus In asimo anoni' nai Yohanis, ankalaka mnak, “Aam! Anbi tabug mese, hai miit atonij mese anpake Ho kanam ma anli'u nitu le'uf sin. Mes hai amtaal natuin ka hit tuaf ee fa.”
39 Mes Nai Yesus natael am nak, “Hoi! Hi naik mikain. Fun sekog es anpake Au kanak he anmo'e lasi sanmakat, in of ka nuug aa fa naguab nale'uf Au kanak. 40 Kalu in ka nlaban kit fa, on nane in le' naan hit tuaf emsa'.g 41 Es on nane, mimnau milek-leko'! Kalu anmu'i tuaf le' nahine nak hi mituin Kristus, lalit in anbaban ki, Uisnenog ka nniken fa in haet naan. Maski in aal na'inut ki neki oel luman aklaas mese msa', Uisnenog ka nniken fa.”h
Naik mimnono mok sanat
(Nai Mateos 18:6-9; Nai Lukas 17:1-2)
42 Lalit Nai Yesus naguab anteni' noi sin am nak, “Kalu atonij mese anmo'e nsaan noi li'ana mese, tal in ka npalsai nteni' Kau fa, ampaant om, oo! Naleko nnesi, maiti fatu naek mese,i ma amfutu mikfilit noi in neon, ma ampolin mitaam noi tasij in atnanan.
43 Kalu ho musanab meki ho 'nimam, mketu mpolin ho 'nimam naan! Fun naleko nneis ho mtaam moi sonaf neno tunan meki ho 'nimam mese, na'ko sin anpolin nataam ko noi ai maputu' ma ai malala' abal-balat meki ho 'nimam nuug.j 44 [Ai malala' naan, namneo-namneo bale mane'at. In aij ka nmate niit fa. Ma ale' kaun kalis nale'un ka nasnaas fa.]k 45 Kalu ho musanab meki ho haem, mketu mpolin ho haem naa. Fun naleko nneis ho mtaam moi sonaf neno tunan meki ho haef mese, na'ko sin anpolin nataam ko noi ai maputu' ma ai malala' abal-balat meki ho haef nuug. 46 [Ai malala' naan, namneo-namneo bale mane'at. In aij ka nmate niit fa. Ma ale' kaun kalis nale'un ka nasnaas fa.]l 47 Ma kalu ho musanab meki ho matam, amloti mpolin ho matam naan. Fun naleko nneis ho mtaam moi sonaf neno tunan meki ho matam afgua mese, na'ko sin anpolin nataam ko noi ai maputu' ma ai malala' abal-balat meki ho matam afgua' nuug.m
48 ‘Ai malala' naan, namneo-namneo bale mane'at.
In aij ka nmate niit fa.
Ma ale' kaun kalis nale'un ka nasnaas fa.’n
49 Au 'fee lasi-noni' le' iij, lo mafena'. Es on nane, sekog es le' he natuin Kau, lo in he nalan he nok Kau piut, on le' sisi se'it lo he npake masi', hena' sisij naan antahan aloog.
50 Masik naan, lo lekog. Hit atpakel he taminab amnahat. Mes kalu masi' naan ka miin masi' fa leen, he tpakel noi saa' antein? Lo hit taiti tpolin haa. Hi lo he mjali on le' masi amsa', he mmoni anbi manekat mok ale' too mfaun sin.
[Es on naan hi naik ammatoe amteni nai, mak sekog es le' anaek ma sekog es le' abaut.]”o