Usif Yesus in
Haef een sin Tu'in
Uisnenog anpaa' he nfee In Asmana Knino'
1
1-3 Ama' Teofilus.a Tetus ao-mina' na'ko kau, nai Lukas.Anbi sulat ahunut, au 'luul ulali ale' saa'-saa' le' anmatoom nok Usif Yesus In amonin. Es le' saa'-saa' le' In anmo'e sin, ma saa'-saa' le' In nanoni' nalali sin na'ko un-unu'. In anbeti nalali In haef een. Maski atoni' sin nasusab ma nhamu'ij tal antee namatel, mes Uisnenog namonib nafani'. Ma tabug In anmoni nfaan, In nakliil On noi In haef een. Sin niit Ee tenij-tenij tal nenog bo' haa', es on naan sin nahinen nak In nmoni nfani namneo-namneo. In naguab noi sin am nak, Uisnenog on le' Usif le' nnaa' aplenat. In anleek haef een neki Uisnenog In Asmana Knino' In kuasan. Tal antee In ansae nfaan noi sonaf neno tunan.
Ale' lasij le' iij ok-oke', le' au 'luul 'iit sin.
4-5 Tabug mese, tabug Nai Yesus nabgua nok In haef een anbin anu'af Saitun, In anfeen sin pleent am nak,
“Mimnau! Nahunut, nai Yohanis naslani neki oel, mes kalu hi mpao mteni' nenog fauk amnemat, Uisnenog of anmo'e annesi noi ki, natuin In anfee In Asmana Knino' noi ki. Es on naan nati' hi naik amnao misaitan koot Yerusalem. Hi ampao ambi iij, tal Au Ama' anfee In Asmana Knino' noi ki, on le' In npaa' nalali. Ma hi mneen milali ma'ko Kau.”b
Usif Yesus na'aiti On noi sonaf neno tunan
6 Tabug Nai Yesus nabgua nok In haef een, sin antoti mnak, “Ama! Hai he mtoti miit on ii: Ho muhiin faijan unun, pah Israel in napleent on kuun. Tabug iij, Ho he mufetin kai na'ko anaa' aplenat abjaan', ai' hai he mpao mtein?
7 Lalit Nai Yesus natae sin am nak, “Hi naik amtoti noi in tabug nane fe'. Aal Au Ama' nekin on es naloitan in tabug. 8 Es on naan kalu Uisnenog In Asmana Knino' neem antaam noi ki, of hi mipeni 'be'if ma matanif. Lalit hi lo he amnao mitoon noi ale' mansian een ok-oke' anmatoom nok Kau. Mitoon noi abiten koot Yerusalem, abiten propinsi Yudea ma propinsi Samaria, tal antee pah-pinan iij anfuun am nateef.”c 9 Naguab nalali on nanet, Nai Yesus na'aiti On noi sonaf neno tunan anbi sin maatk een. In na'aiti On tal antee nopel an'amu naan Ee, ma sin ka niit antenij fa.d
10 Tabug sin anbaisenun fe', nok askeken tuaf nuug anhaken anbi sin abnaapk een, sin anpaken tai muti le'uf. 11 Tuaf nuug een naan naguab een am nak, “Hoi, atoni Galilea ala ki! Nansaa' am es hi msanmaak ma ambaisenu piut moi nenog atnanan? Lelon na hi miit Nai Yesus na'aiti On noi neno tunan tal antee nopel an'amu naan Ee. Hi miit meki hi maatm een tabug In ansae noi neno tunan. In ansae on le' meel ete, In of anfani neem on le' nane msa'.”
Sin namin tuaf he nseek nai Yudas
12 Lalit Nai Yesus In haef een ansanun na'ko nu'af Saitun, ma nbelok anfanin noin koot Yerusalem. Anu'af Saitun naan in aloon na'ko koot of oni' kilog mese.e
13 Anteen koot nanet, sin antaman noin umel le' sin natguan anbi naa. Lalit sin ansaen noi ke'an abit tunan. Sin kaank een, es le':
nai Petrus,
nai Yohanis,
nai Yakobus,
nai Anderias,
nai Felipus,
nai Tomas,
nai Bertolomeos,
nai Mateos,
nai Yakobus (nai Alfeus in anah),
nai Simon (na'ko amnono politik Selot),f
ma nai Yudas (nai Yakobus in anah).g
14 Sin ala sin nabguan nekaf mese tenij-tenij ma an'onen. Sin an'onen een nabguan nok bi Maria, Nai Yesus In inaf, nok bifeel abjaan ma nok Nai Yesus In olif sin.
15 Tabug mese, sin nabguan nfanin, of oni' sin tuaf natun mese am bo' nuug. Lalit nai Petrus anfeen anhake ma naguab am nak, 16 “Ina'-ama' ala kit ok-oke! Of oni' hi fe' mimnau nai Yudas, le' nenog naa, in nok tuaf pukan mese sin neman ma anheke Nai Yesus. Saa'-saa' le' anbool noi nai Yudas lo he njali on le' naan. Fun nahunut, Uisnenog In Asmana Knino' anpake kesel nai Daut he anluul nanij anmatoom nok nai Yudas on le' naan. 17 In le' naan, hit ee ma nmepu nabgua nok kit.”
18 (Mes tabug nai Yudas nasosa' nalali Nai Yesus, in naiti loit naan ma annao nsoos naijaan pisa mese. Lalit in anmaat anbi balel naan, natuin in anmofu an'akabobo on ma in tain anpee' ma taif een natlolon npoin ok-oke. 19 Tabug naan, tuaf abjaan een anmulai naguab anmantutan na'ko es noi es, tal abiten koot Yerusalem nahinen lek-leek anmatoom nok nai Yudas in amaten. Es on nane, sin nakanab balel naan neki sin aguab Aram nak ‘Hakeldama’, le' neki hit aguab nak ‘Naijaa Naa'’.)h
20 Nai Petrus anluut anteni mnak, “Nahunut kesel nai Daut anluul lasij naan anbi Sulat Pules-Bo'is sin. In anluul am nak,
‘Mautu he in balel 'tua' naan luman;
naik anmu'i tuaf le' he natgua antenij anbi naa.’
Ma in anluul anteni mnak,
‘Mautu he in mepug nanaa't ee noi tuaf abjaan.’i
21-22 Es on naan hit lo he tami tuaf he anseek nai Yudas. Hit tami taan tuaf mese, le' nabgua nok kit aloog ee. In lo he es le' atonij le' anhaumaak nok Nai Yesus tabug In annao anbi meel am meel, anmulai na'ko nai Yohanis naslani Nai Yesus. In lo he niit neki in matan nak Nai Yesus anmoni nfaan na'ko In maten, tal na'aiti On anfani noi sonaf neno tunan.”j
23 Tabug nai Petrus naguab nalali on nanet, sin ala sin nataam kanaf nuug. Tuaf es, es le' nai Matias, ma es anteni' es le' nai Yusuf, (le' teef es, sin anteek nak nai Barsabas; ma sin anteek nai Yustus amsa'). 24-25 Lalit sin an'onen nabgua mnak, “Ama' abit sonaf neno tunan! Ho muhiin muleko' mani tuaf mese-mese in nekan. Nai Yudas anmate anpolin in mepug. Es on naan Ho mekin om amlulu ma amleek tuaf mese na'ko sin nua sin le' iij, he anseek nai Yudas, he hai maiti anjali Usif Yesus In haef.” 26 Lalit sin anhelan suul ana' noi tuaf nuug een naan. Ma sin anheel antoom nai Matias in kanan. Es on naan, sin naiti anjali Usif Yesus In haef nabgua nok tuaf bo'es am mees een naan.