Usif Yesus anleek tuaf bo' hitu mnuug
10
Lalit Nai Yesus anpili naan asimo anoni' abjaan anteni, tuaf bo' hitu mnuug (72).a Lalit In anbati sin tuaf nuug-nuug, he annaon nahunun noin balel-balel le' In he ntaman sin. 2 In anleek sin neki aguab manpaa' am nak, “Anmu'i toog namfau on le' anel le' namnatu nalaal jen et lelel. Alahaa he lele tuaf ee anlelu tuaf he annaon nonun. Es on naan hi lo he m'onen amtoti Uisnenog he anleek anloulu In tuaf ameput anteni he nabguab tuaf-tuaf le' he natuin Kau. Natuin tuaf le' he natuin Kau naan, namfau. Mes tuaf ameput, sin fauk aah.b3 Tabug iij, amnao nai! Au 'leek ki he amnao moi too mfaun sin. Mes mimnau. Hi on le' abibi-kase ana' le' in nekan naleek, le' annao ma natgua anbi asu fuin abulalut een sin atnaank een.c
4 Hi naik meki loit, ai' aluk he mpaan pakel, ai' atali abjaan. naik ampolin tabug he mmaseon luum-luum mok es ambi lalan.
5-8 Kalu hi he mtaam moi kuan mese, hi naik mitnani umel, mako umel mese noi umel abjaan. Kalu atoni' ansimo ki nok alekot, mitgua mbi naan, tal antee hi mnao mteni moi kuan abjaan. Kalu hi mtaam moi umel mese, hi lo he mtoti Uisnenog he anfee tetus noi tuaf anbi umel naan. Kalu ume tuaf naan ansimo ki nok alekot, Uisnenog of naklila' In nekan alekot noi ume tuaf sin naan. Mes kalu sin ka nlomin fa he ansimo ki, mautu he Uisnenog naklila' In nekan alekot naan noi ja haa ki mmees. Kalu hi mtaam moi umel mese, ai' kuan mese, meku ma minu saa'-saa' haa le' sin nnona' ki sin. Amsimo sin nok neek malinat, fun sin anfee sin he nsenu banin hi haet sin naan.d 9 Mileko' sin amenat sin. Ma mitonan sin am mak, ‘Uisnenog In aplenat et hi maatm een!’
10 Mes kuan abjaan sin tuaf een ka nlomin fa he nsimo ki. Kalu sin anmo'en on naan noi ki, amnao mhake moi kuan naan in lalan ma miguab am mak, 11 ‘Amneen milek-leko'! Hai iim meki Uisnenog In A'an ma Plenat noi ki, mes hi ka mlae mituin fa ba-baun amsa'. Es on naan tabug iij, hai mtekal afu skuku' na'ko hai haem een iij, he anjali taka' nak, hi of mitae ma msutai kiim in amle'ut! Mes mimnau milek-leko'! Uisnenog In aplenat et hi maatm een!’e
12 Hi mihine koot Sodom in maufinun, ai'? Au utoon ki, he! Nateef neno amsupot, of Uisnenog nasanut hukum noi tuaf-tuaf le' ka nsimo ki naan, in ma'fenan annesi na'ko abiten Sodom!”f
Tuaf-tuaf le' ka nlomin fa he ansimo Usif Yesus
(Nai Mateos 11:20-24)
13 Nai Yesus anluut anteni am nak, “Hi abiten kuan Korasing ma kuan Betsaida, ampaant om, oo! Amle'ut ee of antoman ki! Au 'mo'e lasi sanmakat huma'-huma' 'bi hi humam ma hi matam, mes hi ka mlomi fa he mpalsai noi Uisnenog. Fun, hi le' iij, atoni Yahudis le' ammanaku' mmak hi mihine Le. Mes kalu lasi sanmaakt een le' Au 'mo'e sin anbi hi kuan naan, anjali taka' anbi koot Tirus ma koot Sidon, abiten naan oni sin na'piis alaloog een, ma nasaitan sin sanat een, lalit natuin Uisnenog. Oni sin amsa' anpaken tai-nukat, ma antaon afug anbi sin anaak een he anjali taka' nak, sin antof ok na'kon sin sanat sin. Fun kaah, abiten Tirus ma Sidon sin, ka atoni Yahudis fa le' anmanaku' nak sin nahine Uisnenog.h 14 Namneo! Hi mail kiim! Kalu Uisnenog nafeek nani ale' kanan lasij na'ko too mfaun sin, abiten Tirus ma Sidon sin napenin hukum manafa nnesi na'ko hi nuug.
15 Ampaant om, hi abit Kapernaum! Hi naik mitenab am mak, Uisnenog of naiti ki msae noi sonaf neno tunan on haa le' naan. Kalu ka fa! Uisnenog of naiti npolin ki moi ai maputu' ma malala' abal-balat!i
16 Mimnau milek-leko'! Tuaf-tuaf le' anneen ki, paap mese on le' anneen Kau. Mes tuaf-tuaf le' ka nlomin fa he anneen ki, paap mese on le' ka nlomin fa he nneen Kau. Saa' anteni, tuaf-tuaf le' ka nlomi fa he anneen Kau naan, paap mese on le' sin ka nlomi fa he nneen Uisnenog, le' anleek Kau 'taam 'uum 'oi pah-pinan ii.”j
Haef tuaf bo' hitu mnuug anfani neman
17 Tabug haef tuaf bo' hitu mnuug (72) anfani neman,k sin neek een anmalinan. Sin anmulai natu'in noi Nai Yesus am nak, “Matani le'uf, atoni sin! Tabug hai mpake Ho kanam, he mli'u mipoitan nitun, nitun naan sin natniin kai, es on naan sin anpoi nanin!”
18 Es on naan Nai Yesus natae sin am nak, “Lekog! Tabug hi mmo'e on nane, Au 'iit Uisnenog anpolin napoitan nitu le'uf sin nok sin anakaf na'ko nenog, on le' limat naliim aliij ma ane'ug. 19 Mimnau, oo! Nitu le'uf een sin anakaf naan, hit musug. Ma in anmu'i kuasat amsa'! Mes Au 'fee ulali ki kuasat, he mile'un mani in kuasat naan. Es on naan kalu hi mtali maan kaun lasog sin, ai' kalitij, hi ka mimeen fa saa'-saa'. Ka tiit fa tuaf le' he nabe'i namle'ub ki.l 20 Hi neekm een anmalinan, natuin nitu le'uf sin natniin ki. Naan lekog amsa', mes lasij naan, aan-ana haa! Leko nnesi hi neekm een anmalinan, natuin Uisnenog anluul hi kaanm een he mjali In too nuug le' antaman noin sonaf neno tunan.”
Usif Yesus In nekan anmaliin
(Nai Mateos 11:25-27, 13:16-17)
21 Tabug naan, Uisnenog In Asmana Knino', anmo'e Nai Yesus In nekan anmaliin. Lalit In anbo'is Uisnenog am nak, “Koi, Aam Uisnenog! Ho es le' amjali Usi Naek et neno tunan ma pah-pinan. Au 'toti makasi na-naek, natuin Ho mtobe-mukolo' maan lasin iij na'ko atoni sin le' sin naan sin tuak een anjalin atoni ahinet ma ka aneek palan sin. Mes Ho muklila' lasin le' naan ok-oke' moi li'ana sin ma tuaf-tuaf le' anmu'i neek apalat. Namneo! Naan anhalinab Ho nekam.”
22 Lalit Nai Yesus natoon noi too mfaun sin am nak, “Amneen, oo! Au Ama' et sonaf neno tunan, anfee nalali Kau ale' kanan kuasat sin ok-oke'. Ala Au Ama' anmees, es le' nahine Kau lek-leek nak, Au le' iij sekog. Ma ala Ama' In Anah, es le' Au, es le' uhine Au Ama' ulek- leko' ee 'ak, Ama' naan sekog. Ma Au 'pili tuaf-tuaf abjaan sin, he utonan sin, mautu he sin nahinel lek-leko msa'.”m
23 Lalit Nai Yesus nail an'ali In asimo anoni' sin am natonan sin nmes-mesen am nak, “Hi m'ua-leko namneo-namneo, natuin hi miit Uisnenog In kuasan. 24 Kesel sin ma mafefa knino' sin un-unu', anmalinan nmaten he nitan kuuk saa' le' hi miit kiim sin, mes ka nabe'i fa. Sin anmalinan nmaten he annenan kuuk saa' le' hi mneen sin, mes ka nabe'i fa msa'.”
Atoni Samarias le' neek alekot
25 Tabug mese, atoni ahine lasi atolan hukum Yahudi tuaf mese, anhake ma naguab nok Nai Yesus he nakleog. In antoti mnak, “Aam Kulug! Ambaban he mutoon maan kau fe'! Au he 'mo'e saa', he nabe'i amoni ubal-baal 'ok Uisnenog 'bi sonaf neno tunan?”
26 Nai Yesus natael am nak, “Baba nai Musa anluul am nak saa', anmatoom nok lasij iij? Ho hinem on mee noi lasi iij?”
27 Atoni naan natael am nak, “In anluul am nak:
‘Ho lo he mneek Uisnenog, ho Usi', annesi na'ko saa' ee ok-oke'.
Es on nane, ho lo he mumnau Goe piut-piut,
ammepu matani' he mutuin In alomin,
ma muhinel.’
Malula' amsa' am nak, ‘Ho lo he mneek ho aom-abjaan, on le' ho mneek ho tuam ee kuum.’”n
28 Nai Yesus natael am nak, “Namneo! Kalu ho mmo'e mutuin sin on nane, ho mnoni mubal-baal mok Uisnenog.”o
29 Mes atonij naan in anmo'e in tuan on le' atoni amakoet anbi lasi Uisnenog. Lalit in natae Nai Yesus am nak, “Mes au ‘aok-abjaan’ naan, es le' mee?”
30 Es on naan Nai Yesus natael am nak, “On ii! Au he utoon aan leta mese. Lalit ho of amteek, meel es namneo-namneo ho ‘aom-abjaan’. Leta' naan on ii: anmu'i naan atoni Yahudis es annao na'ko koot Yerusalem, neki nnuu' noi Yeriko. Mes nok askeken, apaikalut sin neman anbulalun atonij ii. Lalit anbaan ma nabaak neki in loit ma in pakel sin ok-oke'. Lalit sin naiti npolin anbi lalan, ma sin annaon nasaitan. Atoni naan he nma-maat la leen.
31 Mes naan, anmu'i anaak palsait Yahudis mese neem annao nsanu npe'o lalan naan amsa'. Ala tabug in niit atoni ao apapat mese antuup anpalaasn on anbi lalan ee te, in ka nasnaas fa he nbaban. Mes in nbelok noi lalan panin, ma nnao nfiin. 32 Ka loog fa te, tuaf mese anteni' neem annao npe'o lalan naan. Atoni naan na'ko uuf nai Lewi le' bijaas antuthae nbi Uisnenog In Ume Onen Uuf. Tabug in niit atoni palasan naan anbi lalan ninen, in annao npaumak-maak ma ntael, mes ka anbaban ee fa. Lalit in anbelok an'ani lalan panin, ma annao nfiin.
33-34 Ka loog fa te, atonij mese na'ko pah Samaria nok in bijakase keledai, neman annaon anpe'o lalan naan. Hit ala kit tahine tak, atoni Yahudis kit bijaas, hit tiit atoni Samarias ate hit tail tasbiti' sin. Tabug atoni Samarias naan niit atoni anpalasn on nane, in ankasian. In neem anpaumak-maak he nbaban atonij naan. In n'oop anggur he naknino' paap een, lalit in nhuut mina' noi sin. Lalit an'amu paap een naan lek-leek, ma nasaeb noi in bijakaese keledai. In neki atonij naan antee koot. Lalit in natokob ntahan atoni naan anbi losmen, ma an'ulus ee lek-leek.p
35 Anmiu on nane, atoni Samarias naan anbaen antahan loi muti' afgua' nuugq noi losmen tuaf naan, ma naguab am nak, ‘Ampake loit een le' iij, he m'ulus amenat naan leka' naleek. Kalu ka ntee fa te, ampake mtahan hi loit. Tabug au 'fani 'uum, au of 'eki ki loit he ufani' sin ok-oke'.’”
36 Nai Yesus in tu'in naan antuu' on le naan. Lalit In antoti atoni ahine lasi hukum sin am nak, “Natuin ho tenab, meel es le' namneo-namneo ‘aon-abjaan’ noi atoni apalasan naan?”
37 Atoni naan natael am nak, “Namneo-namneo in es le' atoni le' ankasian ee, oo!”
Nai Yesus natae mnak, “Namneo on naan. Es on naan amnao nai he mmo'e mutuin on naan.”
Usif Yesus, bi Marta ma bi Maria
38-40 Lalit Nai Yesus nok In asimo anoni' sin annaon piut noin koot Yerusalem. Sin nesi nokan kuan mese. Anbi kuan naan, anmu'i naan bifeel nuug, sin anma'oli-tatan een. Sin kaank een, es bi Marta, es bi Maria. Bi Marta anfee haan honet noi Nai Yesus sin he ntupan naan faij mese anbi sin umel. Lalit Nai Yesus sin antupan ntahan een anbi naan.
Tabug Nai Yesus antoko ma nanoni' tuaf, bi Marta nhae nmat-maat he nabalab bukaet anbi ume 'hana'. Mes in olif bi Maria, antoko npaumak-maak Nai Yesus In haen een, ma anneen kuun In aguaban. Ka loog fa te, bi Marta antaam neem ma namunu' noi Nai Yesus am nak, “Hoi, Aam! On meel ee es le' iij? Au 'hae mmat-maat he uloitan bukaet, ma bi Maria in antoko kuun es ii. Amlelug he nbaban naan kau kle'og!”r