Usif Yesus antuthae atonij nifun haa'
(Nai Mateos 15:32-39)
8
1-3 Ka loog fa on nane, anmu'i too mfaun neem nabguan he anneen Nai Yesus In aguaban. Sin natuin Ee tal antee nenog teen gue. Es on naan sin nalalin bukael. Lalit Nai Yesus no'en In asimo anoni' sin am nak, “Au 'kasian too mfaun een ii. Abjaan neman na'ko bale aloot, ma nabguan nok kit nenog teen gue, tal antee sin nalalin bukael. Naleko nneis sin naik annaon anfanin neki tai luman. Naik-naika' sin antiloton anbi lalan atnanan.”
Nai Markus 8:1-21
4 Nai Yesus In asimo anoni' sin natael am nak, “Ama! Balel iij naloo' na'ko kuan. Es on naan hit ka nuug fa he atuthae taan too mfaun een le' ii!”
5 Nai Yesus antoti sin am nak, “Hi mmu'i utunu' afgua fauk?”
Sin nataen am nak, “Hai mmu'ij haa utunu' afgua hitu, Aam.”
6 Lalit Nai Yesus anlelu too mfaun een naan he antokon anbi naijaan. Lalit In naiti utunu' afgua hitu een naan, ma antoti makasi noi Uisnenog. Lalit In an'ebi sin pisa'-pisa', ma nfee sin noi In asimo anoni' sin. Sin annaon ma anbatin noin too mfaun sin ok-oke'. 7 Ma sin napenin ika' babaun amsa'. Lalit Nai Yesus antoti makasi anteni' noi Uisnenog anmatoom nok ika' sin naan. Lalit In anlelu In asimo anoni' sin, he annaon anbatin nteni' noi too mfaun sin. 8-9 Sin ala sin ok-oke' of oni' atonij nifun haa. Sin anbukaen tal namsenan. Anbukaen nalalin on nane, asimo anoni' sin nabguab amnaah nesif sin nahenu aba hiit. Lalit Nai Yesus anleek sin he anfanin ok-oke'. 10 Ma tabug sin annaon anfanin on nane, Nai Yesus nok In asimo anoni' sin ansaen noi abelo', ma annaon an'abnonon anpe'o nefog naan in ninen, noin balel mese, kanan Dalmanuta.
Atoni Farisis sin namin lalan he nanofu Usif Yesus
(Nai Mateos 16:1-4)
11 Tabug Nai Yesus sin anteen Dalmanuta, anmu'i tuaf na'ko amnono palsait Farisi neman he na'eku nokan. Sin antoti na'kekat Nai Yesus, ma sin antoti mnak, “Ama! Muklila' lasi sanmakat he anjali taka' le' mamnita' nak, Ho mupeni Ho matanim na'ko Uisnenog.”a
12 Nai Yesus anheel In asnasan, lalit In nak, “Kalu Au 'neen hi aguab sin naan, Au 'nekak nameen. Nansaa' am es hi mtoti lasi sanmakat? Naik on naa! Lasi sanmakat lo anmu'i msa', mes Au ka 'mo'e 'fee ki fa.”b
13 Lalit Nai Yesus annao nasaitan sin, ma ansae nfani anbi abelo' nabgua nok In asimo anoni' sin. Ma sin anlakan noin nefog naan in panin.
Usif Yesus nanoni' nak, ampanat milek-leko' atoni Farisis sin lasi maloep ma aikalili'
(Nai Mateos 16:5-12)
14 Tabug Nai Yesus sin anteen nefog naan in atnanan, na' asimo anoni' sin namnaun nak, sin anniken nanin nak, sin ka nekin fa bukael. Aal sin neki utunu' afgua mese. 15 Anneen sin naguab een anteek utunu' on nane, Nai Yesus nak sin am nak, “Hi lo he mpanat milek-leko'! Naik hi mloe mituin kesel Herodes ma atoni Farisis sin lasi maloep ma aikalili' amle'ut. Sin lasi aikalili' naan, namnees on le' lalu taif antumees anselog nok uut, he uut ansae.”c
16 Anneen In naguab on nane, In asimo anoni' sin namkakan. Ma sin naguab een nak, “Anaef ii naguab lasi saa'? Of oni' In naguab on naan, natuin hit ka teki fa utunu'.”
17 Mes Nai Yesus nahine sin neek tenab. Es on nane, In naguab am nak, “Nansaa' am es hi miguab ala haa utunu'? Hi ka amheke maan fa Au salit iij ee, oo? Hi lole bubu ki. 18 Hi miit milali meki hi maatm een, mes hi ka mihine fa in oten! On le' hi fe' ka miit ee fa. Hi mneen meki hi lukem een, mes hi ka mihine fa saa'-saa'. On le' hi ka mneen miit fa msa'! Hi mniken manid 19 utunu' afgua' niim le' Au 'ebi sin pisa'-pisa' ma 'tuthae toog nifun niim, ai'? Nenog naan hi mibguab maan utunu anesit aba fauk?”
Sin nataen am nak, “Aba bo'es am nuug, Aam.”
20 Nai Yesus antoti anteni' sin am nak, “Hi mimnau, ai' kaha, anbi neot es, tabug Au 'ebi abati' utunu' ma 'tuthae toog nifun haa? Hi mibguab maan utunu nesif sin naan aba fauk?”
Sin nataen am nak, “Aba hitu, Aam.”
21 Es on naan Nai Yesus nak, “Namneo! Hi miit meki hi matam. Mes nansaa' am es hi ka mihine fa Au matanik ii in amneman na'ko mee?”
Usif Yesus naleko' tuaf afolot mese anbi Betsaida
22 Lalit Nai Yesus sin anteen kuan Betsaida. Anbi naan, anmu'i tuaf neki atoni afolot mese noi Nai Yesus. Sin antoti he anpoe' naleko' atoni afolot naan.
Nai Markus 8:22-38
23 Es on naan Nai Yesus annaa' atonij naan in animan ma nekij anpoi noi kuan in kotin. Lalit In npulan hapel noi atonij naan in matan, ma In anpoel. In antoti mnak, “On mee? Ho miit, ai' kaha?”
24 Atonij naan na'aiti in matan, ma nail aliij ma ane'ug, ma in natael am nak, “Aam! Au 'iit mansian sin anbaknaon een. Mes namnees on le' au 'iit hau-nuug es anaot een!”
25 Ma Nai Yesus antao anteni' In animan noi atonij naan in matan. Ma atonij naan niit lek-leko antein, ma in nahiin nak in niit leek gue. Tabug iij in niit lek-leek gue'. 26 Lalit Nai Yesus anlelu atonij naan he annao nfaan, ma namnaub ee mnak, “Ho mfani nai, mes amnao mutuin lalan ateta'! Naik amnao amfani moi Betsaida.”
Nai Petrus anmanaku' nak, Usif Yesus naan ee Kristus, Tuaf le' Uisnenog anlulu nanij na'ko unu'
(Nai Mateos 16:13-20; Nai Lukas 9:18-21)
27 Lalit Nai Yesus sin annaon anfuun ma nateef kuan-kuan anbi Kaisarea Filipi. Anbonin lalan Nai Yesus antoti sin am nak, “Kalu tatuin too mfaun een sin aguab een, sin nak Au le' iij, sekog?”
28 Sin nataen am nak, “Abjaan sin nak ‘nai Yohanis Aslanit’. Abjaan sin nak, ‘baba nai Elia, mafefa knino' Uisnenog unun naa’. Ma abjaan anteni nak, Ho le' iij tuaf mese na'ko Uisnenog In mafefa knino' ahunut een.”e
29 Ma Nai Yesus antoti nteni' noi sin am nak, “Mes natuin hi hinem, Au le' iij, sekog?”
Nai Petrus natael am nak, “Ho le' iij Kristus, le' Uisnenog anlulu nanij na'ko unu'.”f
30 Mes Nai Yesus antaal sin matani' nak, “Ka nabe'i' fa he hi mitonan atonij abjaan saa' le' nai Petrus naguab le' ii!”
Usif Yesus natoon In mane'at ma In amaten
(Nai Mateos 16:21-28; Nai Lukas 9:22-27)
31 Lalit Nai Yesus anmulai naguab noi In asimo anoni' sin am nak, “Au le' iij, Mansian Namneo-Namneo Kau. Au of upeni lasi hamu'it namfau, natuin anakaf halat sin, anakaf lasi palsait Yahudis sin anaakf een, kulu agama sin ok-oke' of ka nsimo Kau. Sin of anlolo niis Kau, mes anmiu ntein,g Au 'moni 'faan.”
32 Nai Yesus natoon maat-maat on naan, es on naan nai Petrus anheel naskotub noi nine ma nakain Ee mnak, “Aam! Naik muguab on naan! Au ka 'nona Ko fa he sin ntepo' Ko.”
33 Mes nai Petrus in aguaban naan ka natuin fa Uisnenog In lomin. Es on nane, Nai Yesus nasneku' ma nail In asimo anoni' abjaan sin. Lalit In nakain nai Petrus neki haan matani' mnak, “Hoi! Nane nitu le'uf een sin anaak anaet in aguaban! Muskotu mu'ko ii! Ho ala mutenab meki tenab mansian, mes tenab naan ka natuin fa Uisnenog In lomin!”
34 Lalit Nai Yesus no'en too mfaun he neem nabguan nok In asimo anoni' sin. Ma In nanoni' sin am nak, “Atonij le' anlomi natuin Kau, lo in he nalan ma natuin Kau nenog-nenog! In lo he anniken nani in lomin kuun, ma natuin aah noi Uisnenog In lomin. Maski atoni he nlool goe msa', mes in natuin piut, on le' atoni nasae in hau nehe he nnao noi in bale 'maten.h 35 Fun atoni le' anmoni aal noi in aon kuun, of in amonin namneku palsuum. Mes atoni le' nabalab in aon he anmate natuin in anjali Au nuug ma natoon Uisnenog In laal a'honis, in of anmoni nabal-baal nok Uisnenog.i 36 Amneen, oo! Kalu ho mupeni pah-pinan iij in nesan oke', mes Uisnenog ka nsimo ko, ho mupeni saa'? 37 Maski nak ho mloi meki pah-pinan in nesan oke' msa', amaus naan ka nuug fa he antukal naan ho asmanam!
38 Mimnau! Mansian batan muni' iij, anmo'en amle'ut huma'-huma'. Sin ka nfaloli fa he natuin Uisnenog. Es on nane, sekog le' namaeb on he natuin Kau, ai' namaeb on he natuin Au noni' sin, Au of umaeb ok amsa' he 'manaku' in tuan anbi Uisnenog In human ma In matan. Fun Au, Mansian Namneo-Namneo le' iij, of Au a'fani 'uum u'ko neno tunan. Ma Uisnenog In ahake neno tunan sin of nauban naan Kau. Tabug hai msanu iim mi'ko sonaf neno tunan meki Ama' In pinan ma aklahan, of mansian na' nahinen nak, in amneot Au le' iij sekog kau.