2 Nateef nok atoni Yahudis sin neno onen, Nai Yesus antaam anbi ume onen he nfee lasi-noni'. Nenog naan, too mfaun sin neman he n'onen een. Tabug sin ala sin anneen In anoni' sin, sin ansanmakan ma naguab een am nak, “Atonij ii in nhinen matani'! In anmu'i kuasat amsa'! Natuin lalan mee es In nabe'i on le' ii? 3 In amneot In aal tukal haug. Hit tahiin In inaf bi Maria, nok ale' In olif sin, es le': nai Yakobus, nai Yoses, nai Yudas nok nai Simon. Hit tahiin In fetof een amsa'. Hit tok Ne ala kit tatgua kuan mese!” Es on naan sin neek-menan Nai Yesus, ma ka nneen anteni fa.

4 Lalit Nai Yesus naguab am nak, “Teeb! Atoni' antola annesi mafefa' knino' Uisnenog le' anao-amnemat, na'ko mafefa knino' kua tuaf.”^a

5-6a Too mfau sin, sin neek-manun ansaat gon, tal sin ka nlomin fa he npalsain noi Nai Yesus. Es on nane, In ansanmaak, tal antee In ka anmo'e anteni' fa lasi sanmakat anbi naa. In aal anpoe' naleko' naan amenat fauk aah.

6b Lalit Nai Yesus annao noi kuan-kuan le' anmapaumakan anbi naa, ma anfee sin lasi-noni' anmatoom nok Uisnenog In lomin. 7 In no'en naan asimo anoni' tuaf bo'es am nuug, ma anlelu sin tuaf nuug-nuug, he nnaon ma natoon Uisnenog In Tu'in Alekot. In nfee kuasat amsa' noi sin he nli'u nitu le'uf. 8-9 In npaa' sin am nak, “Naik meki bale pakel namfau ambi lalan, fun Uisnenog of es naloitan hi paluut sin. Hi naik meki bukael, nonij-loit, ma aluk. Aal hi meki tees, atali ma ampake mana soo balug mese. 10 Kalu sekog ansimo ki he mtaam moi in umel, amtoko' ambi naan tal antee hi mnao mkoon noi balel abjaan. 11 Mes kalu anbi balel mee sin ka nsimo ki fa, ma sin ka nneen ki fa, ampoi mi'ko balel naa. Ma mitonan sin am mak, ‘Natuin hi ka mlomi he mneen fa, es on nane maut he hi amsutai kiim in amle'ut!”’^b

12 Lalit sin annaon ma natoon Tu'in Alekot naan. Sin nak, “Ale' mansian ala ki mes lo he misaitan hi sanat ma penu sin, ma mbelok amfaan he mmoni mituin Uisnenog In lomin.” 13 Ma sin anli'u napoitan nitu le'uf sin amfaun. On nane msa', sin nalolip mina' noi atoni amenat sin anaak een, ma an'onen he naleko' sin. Es on naan sin nalekon.^c

14 Tabug naan, toog anbi balel-balel anneen nalali anmatoom nok Nai Yesus. Tu'in anmatoom nok Nai Yesus In kuasan naneenb on nalali anteen kesel Herodes amsa'. Tuaf abjaan naguab een am nak, “Nai Yohanis Aslanit anmoni anfaan anbi Nai Yesus In aon! Es manum In nabe'i he anmo'e ale' kanan lasi sanmakat.”

15 Mes tuaf abjaan nak, “Kahaf! In le' iij, mafefa knino' nai Elia es le' anmoni anfaan anbi In aon.” Abjaan amsa' nak, “In le' naan, Uisnenog In mafefa knino' tuaf mese na'ko ahunut sin.”^d

16 Mes tabug kesel Herodes anneen lasij nane, in nak, “Iij nai Yohanis Aslanit, le' nenog naan au 'leek tuaf he n'ote nafeek in anakan. Tabug ii in nmoni nfaan je.”

17-18 Kesel nai Herodes anlelu on le' naan, natuin in anmo'e lasij nok nai Yohanis. Lasij naan in uun, on ii: kesel nai Herodes nasiik naan in olif nai Felipus in feel, kanan bi Herodias. In amneot nai Felipus nok bi Herodias ka nmapolin een fa fe'. Natuin lasij naan, es nai Yohanis nakain piut-piut am nak, “Aam kesel! Ka nabe'i' fa he ho maiti ho oli' in feel. Natuin lasij naan antanhai hit halat atoni Yahudis.” Mes nai Herodes in ka nafetin fa bifeel naan. Ma in anleek tuaf he anheke nai Yohanis ma nataam noi ume buij.^e

19 Natuin nai Yohanis nakain ee tenij-tenij on le' naan, es on nane bifeel naan nabela' neek to'as he nlolo nisan. Mes in ka napeni fa meinuan fe', fun nai Herodes nataam nalali nai Yohanis anbi ume buij, 20 ma anleek solalus sin he anpao gue lek-leek.

Nai Herodes an'ao-mahain nai Yohanis. In nahine mnak Uisnenog es le' anleek nai Yohanis. Ma nai Yohanis naan atoni neek alekot. Nai Herodes anlomi he nneen nai Yohanis in aguaban. Mes tefes-tefes in ka nlomif nai Yohanis in aguaban.

21 Tabug mese, fenaij bi Herodias napeni meinuan he nateba' in neek to'as naan. Tabug naan, sin anfesek een noi nai Herodes in neno maihonin. Sin anhone anaet sin he nokan anbukaen anbin fesek naan. Amnokat sin, sin es le' anaa' aplenat, anaak solalus, ma amnasi-amnasi' pah Galilea. 22 Tabug fesek anbati nuug een, fenaij bi Herodias in aan feto antaam neem ma nabsoo'. In abso'at naleko nmaat tal antee anmo'e kesel nai Herodes nok ale' tamu sin fesek naan anmalinan anmaten. Es on nane, nai Herodes no'en li'feto abso'at naan ee mnak, “Ho mlomi he mtoti saa', mutoon! Au mes lo he 'fee ko. 23 Maski ho mtoti tal antee anbati nuug au plenat iij ee msa', au 'fee ko gue. Au 'suup 'eki Uisnenog In kanan!”

24 Li'aan feto naan annao ma antoti in iinf ee mnak, “Oin! Ho mlomi he au 'toti saa' le' naleko nnesi na'ko nai aam?”

Ma in inaf natael ee mnak, “Lekog! Amnao nai ma mtoti maan nai Yohanis in anakan.”

25 Lalit li'aan feto naan neem labah noi nai Herodes in matan ma nak, “Aam! Au 'toti he amfee kau nai Yohanis in anakan. Amtao manij anbi dulang mese. Labah!”

26 Tabug nai Herodes anneen haan totis nane, in nekan namneek. In ka nabe'i' fa he anheel nafani' in haan supat, natuin ale' too mfaun sin anneen nalali haan supat naan. 27 Lalit in naplenat naan anakaf solalus mese ma annao an'ote neki nai Yohanis in anakan na'ko ume buij. 28 Lalit sin an'ote naan nai Yohanis in anakan, ma antaog anbi dulang mese. Lalit sin annao neki noi li'aan feto naan. Li'aan feto naan ansimo ma nnao anfeel ee noi in inaf. 29 Tabug nai Yohanis in asimo anoni' sin annenan nak, an'ote nalali nai Yohanis in anakan, sin neman ma naiti neki nai Yohanis in ta'un, ma annaon ma ansuub.

Tu'in anmatoom nok nai Yohanis in amaten antuu' ma nhiu' on le' naan.

30 Tabug mese, Nai Yesus In asimo anoni' sin le' In anleek sin anbi tabug ahunut, sin anfani neman ma nabguan nokan. Sin natoon ale' kanan lasij le' sin anmo'e nalali sin, nok ale' saa' le' sin nanoni' nalali sin noi too mfaun sin.

31 Tabug naan, too mfaun sin annao na'onin nuu-mneem he nami Nai Yesus. Tal antee In nok In asimo anoni' sin ka napenin fa meinuan he anbukaen. Nai Yesus naguab nok In asimo anoni' sin am nak, “Iim he tnao tami bale makolo', he tapeni meinuan he tasnaas a'kle'og.”

32 Es on naan sin ala sin ansaen anbi abelo', ma sin annao namin bale makolo', naloog na'ko kuan.

33 Mes too mfaun sin niit abelo' naan annao an'abnoon anpe'o nefog naan in ninen. Lalit sin natuin een anpe'o laal meto', ma sin anteen nahunun Nai Yesus nok asimo anoni' sin. 34 Tabug Nai Yesus ansanu na'ko abelo' naan, In niit too mfaun sin anpao nanij. Lalit In ankasian sin, natuin sin ka nahinen fa he anmo'en saa', namnees on le' abibi-kasen le' ka nmu'in fa atukus. Lalit In nanoni' sin Uisnenog In lomin,^f 35-36 na'ko tabug manas na'puup tal antee manas anmaab. Es on naan In asimo anoni' sin naguab noi Ne mnak, “Aam! Leko nnesi Ho mlelu too mfaun sin ok-oke', he nnao ansosan amnahat anbi ale' kuan apaumakat anbi ii. Fun manas he noi anmouf gue, ma ka tiit fa amnahat anbi balel ii.”

37 Mes Nai Yesus natae sin am nak, “Naik! Lo hi es le' he mfeen sin he nbukaen.”

Mes sin antoti Nai Yesus mnak, “Ka ka ka! Kalu hit attuthae too mfaun sin ii, hit lo he tapoin loit anaek! Namnees nok ameput mese in seeb anbi toon mese!^g Hit he tapeni loit amfaun on naan na'ko mee?”

38 Mes Nai Yesus natae sin am nak, “Hi mnao mami miit fe', sekog es amneki bukael.”

Lalit sin annao antoti ma anfani neem natonan am nak, “Anmu'i utunu' afgua' niim, nok ika' a'ko'el nuug aah.”

39 Lalit Nai Yesus anlelu too mfaun sin naan he antokon pukan-pukan anbi ma'ug. 40 Es on naan sin antokon puukn ok. Pukan abjaan nabguan natun-natun, ma pukan abjaan anteni' bo' niim-niim.

41 Lalit Nai Yesus naiti naan utunu' afgua' niim ma ika' a'ko'el nuug. Ma In anbaisenu noi neno tunan ma ntoti makasi noi Uisnenog. Lalit In an'ebi utunu' naan pisa'-pisa', ma anfee sin noi In asimo anoni' sin, he nnao anbatin too mfaun sin ok-oke'. Ika' a'ko'el nuug een nane msa', In anbati sin noi sin ala sin. 42 Es on naan sin ala sin anbukaen nabguan tal antee namsenan. 43 Tabug sin anbukae nalalin on nane, asimo anoni' sin nabguab nafani' amnaah nesif naan, nahenu aba' bo'es am nuug.

44 Sin ala sin of oni' toog nifun niim. Naan sin anso'i naan ahaa atoni sin. Bifeel ma li'ana' ka maso'it fa.

45 Lalit Nai Yesus anlelu In asimo anoni' sin he nnao ansaen abelo' he nnao nahunun noin kuan Betsaida et nefog panin. Mes In nabaal aah anbi nane fe', he anlelu too mfaun sin he nnao anfanin. 46 Tabug sin ala sin anfanin In ansae noi anu'af mese ma an'onen.

47-50 Tabug manas anmabe nalali Nai Yesus ansanu nfaan. In niit asimo anoni' sin abelo' antee nalali nefog atnanan. Mes sin ansepo een matani', natuin abelo' naan annao anma'aut nok anin anaek. Tabug nesi noi anmiu Nai Yesus annao natuin sin. Mes In nnao nanete oel in tunan. Tabug In he annao nahunun abelo' nane, sin nail niit Ee. Sin namtaun nmaten. Es on naan sin nmatotin es nok es am nak, “Hoi! Sa'an es le' nae? Nitu ee, ka?”

Mes Nai Yesus naguab am nak, “Hoi! Hi naik mimtau! Au es le' ii.”

51 Tabug Nai Yesus antaam noi abelo' naan, anin naan nasnaas naan. In asimo anoni' sin ansanmakan namneo-namneo. 52 Sin fe' niit Nai Yesus In anpake kuasat ma antuthae toog nifu niim am anneis, mes sin ka nahine fa fe' namneo In kuasat naan, natuin sin neek manun.

53 Tabug sin anteen nefog naan in panin, sin ansanun anbi koot Genesaret in ninen. 54 Tabug sin ansanun na'kon abelo' naan, too mfaun sin niit sin. Ma sin anmakua' een am nak, “Hoi! Nai Yesus neem een, oo!” 55-56 Sin ala sin naenan ma anmantoon een anfuun am nateef, tal antee sin anloi neki ale' kanan amenat sin.

Taguab tuk-tuka', lamun sin annenan nak Nai Yesus et balel mee, sin aal sin anloi neki ale' kanan amenat sin, ma natupab sin anbi amnela'. Sin nateenb een am nak, “Lamun amenat sin anpoe' naan Nai Yesus In soo balu mnanu' in panan sin of nalekon.” Sin anmo'en on nane, sin naleko nanin.