2-6 Anbi naan, anmu'i atonij mese le' nitu le'uf sin natgua nbi in aon tal in neek-maun. In natgua anbi nitu nate sin. Faij-manas in na'oni nuu-mneem nok ao-monas piut anbi ale' anu'af ma anonof sin, ma anhunun piut. In ntutu napaap in aon neki fatug. In be'in matani', ka tiit fa es, le' nabe'i he nfutug maski anpake konelit amsa'. Sin anfutu in haen-niman 'tenij-tenij anpake konelit, mes in nafeek konelit ma niti besin naan in an'ipu sin na'ko in haen een. In lo be'in matani, tal antee ka tiit fa tuaf mese, le' nabe'i an'eek naan.

Tabug Nai Yesus sin ansanun na'ko abelo', atoni le' nitu le'uf natgua naan niit sin na'kon aloog. In anpoi na'ko nitu nate sin, ma in naen an'ani Nai Yesus ma nli'tuu anbi In matan. 7-8 Tabug Nai Yesus niit atonij naan In naguab am nak, “Hoi! Nitu le'uf! Ampoi nai mu'ko atonij ii!”

Lalit atonij naan anhunun naheel-naheel am nak, “Hoi! Ho he munsa'an kau? Au uhiin 'ak Ho le' ii Nai Yesus, Uisnenog Akuasat In Anah. Au 'toti' Ko he Ho naik amhamu'i kau, oo!”

9 Lalit Nai Yesus antoot je mnak, “Ho kanam sekog?”

In natael am nak, “Au kanak nai Legion, natuin hai mimfau le'uf, on le' solalus batalion-batalion sin!”

10 Nitu le'uf een anpake atonij naan he ntoti Nai Yesus he naik anlelu sin he npoin na'ko balel naa.

11 Anhaumaak balel naan, atonij fauk anpaon fafij pukan anaek mese. Fafin le' naan sin of oni' nifun nuug. Sin namin amnahat anbin anu'af naan in abnapan. 12 Lalit nitu le'uf sin antotin am nak, “Amlelu kai, he hai mnao amtaam moi fafin nae.”

13 Nai Yesus ansimo sin haan totis naan. Es on nane, ale' nitu le'uf sin anpoin ma antaman noin fafin naa. Fafij pukan naa, naen ansikasaan ok, ma natlolo ansanun anpe'o ainu'at ma anmofun anteen nifug nanan. Ma sin anleem anmaten ok-oke'.

14 Nail nitan on nane, apao fafin sin namtaun nmaten. Sin naenan anfuun ma nateef kuan-kuan le anpaumakan ma natonan ale' too mfaun sin. Es on nane, too mfaun sin anpoi neman he nail nitan kuuk saa' le' anjalin nalali anbi naa. 15 Sin neem na'eku nok Nai Yesus, ma sin niit atoni anitu-saet naan antoko anbi naa. Mes in tenab naleko nfaan je, ma in anpake beti. Ma tabug sin niit lasij naan sin ala sin namtaun, fun sin nahinen nak sekog es le' nabe'i' he anli'u napoitan nitu le'uf sin na'kon atonij naa, lo in atoni abe'it amatanis. 16 Lalit sin ala sin anmantoon een nak sin niit neki sin maatk een nak, atoni anitu-saet naan naleko nfaan je, ma fafin sin anleman anmaten. 17 Lalit sin antotin teb-teeb he Nai Yesus annao nasaitan sin pah.

18 Tabug Nai Yesus he ansae anfani noi abelo' naan, atoni le' nitu le'uf natgua anbi in aon naleko nfaan je, in neem ma antoti he nabe'i in nnao nabgua nok Nai Yesus.

19 Mes Nai Yesus ka nlomi. In naguab noi atonij nane mnak, “Leko nnesi ho mfani nai moi ho nonot sin. Mutoon noi sin ale' kanan lasij le' Uisnenog anmo'e nalali sin noi ko. Mutoon noi sin mak, Uisnenog anneek ma nkasian ko!”

20 Lalit atonij naan annao anfuun ma nateef pah mese nok nani in koot een bo'es, le' anteek nak ‘Dekapolis’. In ansaksii ma natoon ale' kanan lasij le' Nai Yesus anmo'e nalali sin noi ne. Ma ale' tuaf-tuaf le' anneen in aguaban naan ansanmakan ma naguab een am nak, “Lo matani', oo!”

21 Lalit Nai Yesus sin ansaen abelo' ma anlaak anfanin noin nefog in panin. Tabug sin ansanun na'kon abelo' naan, too mfaun sin neman ma nauban naan Ee.

22 Anbi koot naan, anmu'i atonij mese, in kanan nai Yairus. In es le' anakat anbi atoni Yahudis sin ume onen koot naa. Tabug in niit Nai Yesus, in nli'tuu anbi In matan, 23 ma antoti mnak, “Koi, Aam! Au aan feto fe' toon bo'es am nuug. In nameen ma he noi anmaat leh. Ho mkoen Om uum he ambaban muleko' maan au anah naa!”^a

24 Es on naan Nai Yesus annao natuin nai Yairus noi in umel.

Tabug sin annaon on nane, too mfaun sin nokan ma anbe'ug.

25 Anbi too mfaun sin naan, anmu'i bifeel mese le' napeni funan le' anloli babaun-babaun ka natfeek niit fa oni' toon bo'es am nuug ee. 26 In nalali loit nok in amu'in he nbaen amalo' menas sin. Mes ka tiit fa tuaf mese nabe'i naleko' in menas naa. In naa' nat'oop ka nheti niit fa, tal in menas naan mafena'. 27-29 Bifeel naan anneen tenij-tenij anmatoom nok Nai Yesus. Es on nane, in nbe'u too mfaun sin naan, he npaumak-maak anbi Nai Yesus In kotin. In natenab am nak, “Lamun au 'poe' 'anahaa In soo balu mnanu', au of uleek.”

Tabug in anpoe' Nai Yesus In soo balug, nok askeken, naa' naan anheet. In annaben ate in naleek gue.

30 Nateef tabug nane msa', Nai Yesus annaben anmu'i nenuf le' anpoi na'ko In aon. Es on nane, In nasneku' ma nail noi too mfaun sin naa. Lalit In antoti sin am nak, “Sekog es anpoe' Au soo balug?”

31 In asimo anoni' sin nataen am nak, “Ho mail Kuum. Too mfaun sin anmabe'un es nok es, Ho mtoti kuum am mak, ‘Sekog es le' anpoe' Au soo balug?”’

32 Nai Yesus nail sin mese-mese he nami tuaf le' anpoe' In soo balug. 33 Anneen Nai Yesus antoti on nane, bifeel le' naan namtau ma nata'ij. Lalit in nli'tuu anbi Nai Yesus In human ma In matan, ma anmanaku' mnak, “Koi, Aam! Au es le' a'poe' Ho soo balug naa.”

34 Ma Nai Yesus natae bifeel nane mnak, “Oin! Natuin ho nekam anpalsai namneo noi Kau, es on nane ho muleek. Ho mfani nai nok neek malinat, fun ho susal naan namsoup gue.”

35 Tabug Nai Yesus naguab fe' on nane, tuaf neman na'kon nai Yairus in umel, ma tuaf es natoon am nak, “Eee, kasian! Ho aan feto asnasan natfeek een. Naik muhaeb Usi' kulug antein!”

36 Mes Nai Yesus ka nfaloli fa tuaf nane in aguaban. Es on naan In naguab noi nai Yairus am nak, “Naik mumtau! Ampalsai noi Uisnenog!” 37 Lalit Nai Yesus anlelu too mfaun sin ok-oke' he nabaal nah anbi naa. Mes In nok ala haa nai Petrus, nai Yakobus ma in olif nai Yohanis, he sin annaon anfinin. 38 Tabug sin anteen nai Yairus in umel, sin niit too mfaun an'ulus mepug huma'-huma', abjaan ankaen, ma abjaan ansunan. 39 Nai Yesus antaam anbi naan. In antoti sin am nak, “Nansaa' am es hi mtaisibu ma amkae on le' iij? Li'ana' le' iij ka nmate fa. In aal antuup aah.”

40 Tabug sin nneen Nai Yesus naguab on nane, sin anmanis.

Lalit In nlelu sin he npoin ok-oke'. In no'en li'ana' naan in inaf-amaf, ma nok In asimo anoni' tuaf teen, lalit sin ala sin antaman anbin li'ana' naan in ke'an. 41 Lalit Nai Yesus annaa' li'ana' naan in animan, lalit In neki sin aguab Aram am nak, “Talita kum!” (Le' neki hit aguab iij nak, “Aan feto! Amfeen nai!”)

42-43 Nok askeken ate, li'aan feto naan anfeen ma anhaak. Nai Yesus anleek aan feto naan in inaf am nak, “Amfee ne he naah!”

Ale' too mfaun sin le' niit lasij naan ansanmakan. Mes Nai Yesus antaal sin neki haan matani' mnak, “Naik mitonan es am es mak Au umonib ufani' li'aan feto amates le' iij!”