Usif Yesus naleko' solalus Roma mese in ameput
(Nai Mateos 8:5-13)
7
Nanoni' nalali on nane, Nai Yesus anbelok anfani noi koot Kapernaum. 2 Anbi naan, anmu'i anaak solalus Roma tuaf mese. In anmu'i naan ameput tuaf mese, mapalsa'ij. Ameput naan nameen, ma he nmaat eeh. 3 Tabug anakaf naan anneen aguab anmatoom nok Nai Yesus, in anleek tuaf na'ko atoni Yahudis sin he nnaon noi Nai Yesus, he anhone Le neem naleko' ameput naan. 4 Sin naguab anfuli Nai Yesus, he kalu nabe'i te, In neem nok sin he naleko' amenat naan. Sin nfulij Ee mnak, “Aam! Atoni Romas iij, atoni alekot! In le' naan, Ho mbaban maan ee te, lo pantas. 5 Fun In nafenab naan ume onen mese noi kit, ma in anneek hit atoni Yahudis amsa'.” 6 Es on naan Nai Yesus natuin sin.Sin ka nteen fa fe' noi umel nane, anakaf naan anleek tuaf anteni he neem neki hanaf noi Nai Yesus am nak, “Usi' naik muhaeb Om amteen, natuin au ka pantas fa he 'senu Ko ma 'eki Ko 'oi au umel. 7-8 Ma au ka pantas fa msa' he 'baisenu Ko. Au uhine 'ak, Ho mmu'i kuasat. Es on naan lamun Usi' Ho muguab ahaa na'ko balel naan, lo tebes, au ameput naan of naleko naan. Au uhine lasij iij, natuin au anaet sin anmu'in kuasat he naplenat kau. Ma au 'mu'i kuasat amsa' he uplenat au solalus sin. Kalu au uplenat au solalus sin 'ak, ‘Moi nae!’ lo tebes in annao noi nae. Kalu au 'ak, ‘Moi iij!’ lo tebes in neem noi ii. Kalu au leek au ameput mese 'ak, ‘Ammepu ii!’ lo tebes in anmepu on le' naan. Es on naan lamun Usi' Ho muguab aah, lo tebes au ameput naan, naleko nani.”
9 Anneen on nane, Nai Yesus ansanmaak. In nail an'ali noi tuaf-tuaf le' nok Ne naan. Lalit In nki'un ma naguab am nak, “Alaloog le' iij, Au ka a'iit fa tuaf mese na'ko atoni Yahudis le' in palsait ee nakii' matani' on le' atoni Romas le' iij!”
10 Es on naan Nai Yesus annao ntuu' ahaa balel naan. Lalit anaak solalus naan in amnono sin anbelok anfanin. Anteen anakaf naan in umel, sin niit amenat naan naleko nalaal je.
Usif Yesus namonib nafani' bifee banu mese in anah
11 Anmiu naan, Nai Yesus nok In asimo anoni' sin, annaon noin kuan mese, kanan, Nain. Too mafaun sin nok sin amsa'. 12 Tabug sin he noi ntee leen kuan naan in eno' 'tamas, anmu'i toog pukan mese anpoin na'kon kuan naan, he annaon nsuban amates. Amates naan, bifee banu es in aan mone mese. 13 Tabug Nai Yesus niit bifee banu' naan, In nkasian. Es on naan In anhaan mau noi bifee banu' naan am nak, “Oin! naik amkae!”
14 Lalit Nai Yesus annao npaumak-maak noi sin, ma nle'o hala' na'ko amates naan. Es on naan aloit sin anhaken akle'og. Lalit Nai Yesus naguab noi amates nane mnak, “Anah! Amfeen nai!” 15 Es on naan li'ana amates naan anmoni nfaan, lalit anfeen ma antoko nani tabug naan. Es on naan in anmulai naguab nok ahaket een le' napuun naan le' naan. Lalit Nai Yesus naguab noi bifee banug naan am nak, “Oin! Ho anah es ii.”
16 Abiten le' nane ok-oke' namtaun nmaten! Es on naan sin anmulai nbo'is nanaeb Uisnenog am nak, “Uisnenog anleek nalali In mafefa knino' matani' mese noi kit!” Tuaf abjaan nak, “Uisnenog ankoen On neem nalaal je es hit atnanak, ma naklila' In nekan alekot!” 17 Es on naan lasij naan matona' anbi propinsi Yudea, tal antee pah abjaan amsa'.
Nai Yohanis Aslanit anleek tuaf he annao nateef Usif Yesus
(Nai Mateos 11:2-19)
18-20 Nai Yohanis Aslanit in asimo anoni' sin anneen nalalin ale' kanan lasij le' Nai Yesus anmo'e sin. Lalit sin annaon ma natonan nai Yohanis anbi ume buij. Es on naan in anleek tuaf nuug he annaon ma antoti Nai Yesus am nak, “Aam. Ho le' iij namneo-namneo Kristus, le' hai mpa-paog le? Ai', hai lo he mpao mteni tuaf teta' antein?”
Es on naan sin nateef Nai Yesus ate, sin antotij Ee on le' naan.
21 Tabug tuaf een anbin naan, Nai Yesus naleko' too mfaun een sin menas een huma'-huma'. Ma In anli'u napoitan nitu le'uf sin na'ko tuaf-tuaf le' nitug ansaen sin. Ma In naleko' afolot sin he niit anfanin.
22 Lalit Nai Yesus natoon noi nai Yohanis in tuaf een am nak, “Hi mnao mfani ma mitonan nai Yohanis, ale' kanan lasi le' hi miit ma mneen kiim sin, namnees on le' Uisnenog In mafefa knino' baba nai Yesaya anluul am nak,
‘Afolot, niit anfaan.
Ao a'olet, anfeen ma annao.
Ameen atho'al atlaku, naleko knino'.
Akosot, anneen anfaan.
Amates, anmoni anfaan.
Atoni kasian, anneen Tu'in Alekot.’a
23 Amfani nai. Mit mitonan nai Yohanis am mak, ‘Atoni le' ka namaeb on fa he ansimo Kau, sin of napenin amnisat.’”
24 Tabug nai Yohanis in tuaf een anbelok anfanin, Nai Yesus naguab noi too mfaun een naan, anmatoom nok nai Yohanis am nak, “Tabug hi mnao mami nai Yohanis anbi bale luman naloog na'ko kuan, hi mitenab mak hi he miit ma mi'eku mok atonij human on le' mee? Ka nuug fa he hi miit ai' mi'eku atoni le atai pasen, on le' kaka'. Le' anin anfuu nabekob te, in nata-tuin aah! 25 Ka nuug fa he hi mnao he miit ai' mi'eku mok atonij le' anpake tai-ma'upa', natuin tuaf on le' naan, aal et haa sonaf! 26 Es on naan hi mnao mail sekog anbi nae? Hi mitenab mak, hi mnao mami Uisnenog In mafefa knino'? Namneo! Mes in le' naan, mafefa' le' matani' le'uf. 27 Fun anluul nanij et Sula Knino' anmatoom nok nai Yohanis am nak,
‘Amneen! Au leek Au tuaf,
he nasoitan lalan noi Ko.’b
28 Anbi pah-pinan iij, ka tiit tani fa tuaf mese, le' matani' nesi na'ko nai Yohanis. Mes anbi Uisnenog In aplenat, tua abaut in matani' annesi na'ko nai Yohanis.”
29 Too mfaun le' anneen Nai Yesus In aguaban naan, nahine nalalin nak, Uisnenog In lalan naan, laal 'Honis amneot. Ahoki noni ponij sin amsa' on naan. Natuin nahunut, nai Yohanis naslani nalali sin ma nanoni' sin. 30 Mes tuaf-tuaf na'ko amnono palsait Farisi ma ahine lasi hukum Yahudis sin, ka nlomin fa he natuin Uisnenog In lomin. Es on naan sin ka nak fa nai Yohanis he naslani sin.c
31 Lalit Nai Yesus antoti mnak, “Au he unesa' atoni tabug iij nok saa'? Sin le' naan, mansian human on le' mee? 32 Sin le' naan nahuum on le' munif sin le' antok-tokon kuuk et a'masa'. Sin anmakua een ma anmatoen am nak,
‘Hit tfuu fekug ma atleku ok-oke',
mes hi ka malinan fa bso'at.
Lalit hai msii ambi be'at,
mes hi ka mkae fa.’
33 Nai Yohanis Aslanit ka ninu fa tua min-kase, ma in bijaas nanaah on amsa', mes hi mi'akan ee mmak, ‘In annitu sae!’ 34 Mes tabug iij, Au, Mansian Namneo-namneo, Au inu tua min-kase ma eku utunu' on le' bijaas. On ii te, hi mak Kau mak, ‘In le' naan, apalu'! Amafu matan-tani es antein! namnono nok akoni noni ponij sin! Amnono mese nok atoni ka mapake een fa! Ka ntae nahine fa in tuan!’ 35 Mes hi mitaka' kiim Au hanak le' iij, hee! Atoni le' nahine namneo-namneo, sin natuin Uisnenog In lomin.”
Usif Yesus anbukae fesek anbi nai Simon in umel
36 Anbi koot naan, anmu'i atoni Farisis mese, kanan nai Simon. Tabug mese, in anhone Nai Yesus he neem anbukae anbi in umel. Ansimo nalali haan honet naan ate, Nai Yesus sin annaon ma antokon he anbukaen. 37 Tabug naan, anmu'i bifee akaket mese anneen nak, Nai Yesus anbukae nok et balel naan. Es on naan in antaam. In annaa' neki miin foo meni' botil mese. Mina' iij in ma'upa' namneo. 38 In neem anpaumaak Nai Yesus na'ko In kotin. Lalit in nli'tuu anbi Nai Yesus In haen een. Es on naan in ankae nsase'ul, tal antee in nuun anmofun anbin Nai Yesus In haen sin. In annose Nai Yesus In haen een anpake in anaka funun, ma anneek nafan-fani' Nai Yesus In haen een. Lalit in n'oop miin foo meni' naan noi Nai Yesus In haen een.d
39 Nai Simon nahine namneo-namneo bifeel naan in ahaken. Es on naan in natenab anbi in nekan am nak, “Iij anjali a'taka' mese nak Nai Yesus iij, ka Uisnenog In mafefa knino ee fa! Kalu namneo-namneo Uisnenog es anleek Ee neem, lo amneot ee, Nai Yesus nahine nani bifeel le' anleo Goe le' iij, bifee akaket. Uisnenog In mafefa knino' sin, ka on fa In le' iij, natuin atoni' knino ee, ka nabe'i fa he anpaumaak atoni 'oemetan sin!”
40 Mes Nai Yesus antae niit nai Simon In tenab. Es on naan in naguab am nak, “Koijoo, Simon. Au he utoon ko lasi mese.”
Ma nai Simon natael am nak, “Muguab kuum, Aam Kulug.”
41 Es on naan Nai Yesus anfee aguab mapolin am nak, “Anmui' atonij mese natusab loit noi tuaf abjaan. Tabug mese, in natusab loit noi tuaf nuug. Le' tuaf es, in natusab loi muti' afgua' natun niim (500). Es anteni, afgua' bo' niim (50) aah. 42 Mes antee in tabug he nafani' loit een naan, tua nuug een naan ka nabe'in fa. Es on naan tuaf atusab loit naan ankasian sin nua sin. Es on nane, in ankolen sin he naik anbaen sin tusa' een naan. Es on naan kalu tatuin nai Simon ho tenab, meel es le' anneek nanesib tua atusab loit naan?”
43 Nai Simon nsenu nfeek am nak, “Lo amu'i tusa' amfaun naan!”
Nai Yesus natael am nak, “Namneo, aam!”
44 Es on naan In nail an'ali noi bifeel naan, ma naguab noi nai Simon am nak, “Ho mail miit bifeel le' ii. Tabug Au 'taam 'uum 'oi ho umel, ho ka mubalab fa oel he ho mboe Au haek een natuin hit atolan halat. Mes bifeel iij, nboe Au haek een anpake in matan nuun, lalit annose naknino' sin neki in anakan funun. 45 Ma lelon na, tabug ho amsenu Kau moi ho umel iij, ho ka mneek Kau fa mutuin hit atolan halat. Mes anmulai na'ko tabug Au 'taam ulali a'bi umel iij, bifeel le' iij anneek au haek een piut-piut. 46 Aam Simon, ho mniken mani hit halat le' he mupehe tamu sin, tabug Au 'taam 'uum lelon na. Mes bifeel iij, anhuut Kau anpake miin foo meni' le' ma'upa' noi Au haek een. 47 Simon, ho mneen mulek-leko' fe'! Bifeel le' iij in saant een lo namfau. Mes Uisnenog nnose nalali sin, natuin in naklila' in lasi manekat ma sukuul na-naek noi Kau. Mes tuaf-tuaf le' annaben in tuan ee ka nmo'e fa sanat namfau, in annaben nak in ka npaluu fa he napeni sakot anaek. Es on naan in ka nmaneek nahine fa, ma ka nasaeb nahiin fa sukuul noi Uisnenog.”
48 Lalit Nai Yesus nail bifeel nane mnak, “Au 'nose 'ani ho saant een naan leeh!”
49 Abukaet sin le' anbin naan, anmas'eog een am nak, “Hoi! In natenab nak In le' iij sekog?! In balani he anfee sakot noi atoni asanat, ee oo? Fun kaah, aal Uisnenog Kuun es le' anmu'i hak he annose nani sanat mansian! tpuih!”
50 Mes Nai Yesus naguab noi bifeel nane mnak, “Natuin ho mpalsai Kau, es on nane, Uisnenog ansoi naan ko. Amfani nai nok mamut ma aomina'!”