2 Antee tabug he nsiu anggur in afguan, naija tuaf naan anlelu in ameput tuaf mese, he annao noi amepu po'an naan he naiti in paa'. 3 Mes tabug in antee, amepu po'an sin naan anhekel ma antepog. Lalit sin anlelug he anfani luum-luum.

4 Lalit naija tuaf naan anlelu in ameput mese antein. Mes amepu po'an sin naan ntutu' in anakan tal papa'-papa'. Lalit sin namael ma anli'u na'aenab. 5 Lalit naija tuaf naan anlelu in ameput tuaf mese abjaan anteni'. Mes sin anlolo nisan. Maski sin anmo'e on mee-on meel emsa', mes naija tuaf naan anlelu in ameput sin piut. Mes amepu po'an sin naan antepo abjaan, ma nlolo niis abjaan. 6 Namuni te, naija tuaf aal anmu'ij haa tuaf mese. Tuaf mese naan, es le' naija tuaf in aan mone mese le' in neek nisan. Natuin ka tiit atteni fa lalan abjaan, es nane in nlelu in aan monel naa. In natenab am nak, ‘Kalu au 'leek au aan monel nekin on, sin of ansimog lek-leek, ma sin of anneen ee msa'.’

7 Es on naan in anleek in aan mone naan he nnao. Mes tabug amepu po'an sin naan niit anah naan neem, sin naguab een am nak, ‘Hoi! Hi mail miit fe'! Anaef ee anleek in aan honij nekin on neem! Kalu anaef ee anmaat, in le' iij of es ansimo ale' bale pusaak sin. Es on naan iim he atlolo tisan he hit atpaal tani ale' kanan in amu'in sin!’ 8 Lalit sin aal sin anhekel ma anlolo nisan, ma sin anpolin in aon naan anbi po'an in kotin. Leta' naan antuu' ma namsoup on le' naa.”

9 Lalit Nai Yesus antoti ale' kase naek een nane mnak, “Natuin hi teenb een, of naija tuaf naan anmo'e saa' noi amepu po'an sin naan? Natuin Au tenab, in of neem ma nlolo niis ale' ameput sin naan ok-oke'. Lalit in anfee' po'an anggur naan noi atonij abjaan.

10 Hit ala kit attae tiit anbi Uisnenog in Sula Knino' mnak,

12 Kase naek naan nahinen nak, Nai Yesus ansali sin neki leta' le' naan. Sin paap' mese nok atoni amepu po'an anggur sin. Es on naan ate, sin anmulai namin lalan he nhekel. Mes sin namtausan too mfaun sin le' anlomin he nneen Nai Yesus In anoni'. Es on naan sin annaon nasaitan aah.

13 Lalit atoni Yahudis sin anakaf sin anlelu tuaf fauk na'kon amnono palsait Farisi ma na'ko amnono politik Herodes neman he antoti Nai Yesus he nanofug. 14 Sin neman anteen, sin antoti Nai Yesus mnak, “Aam kulug! Hai ala kai mihine mmak, Ho nekam lo amneot, ma ka mputa-kliun miit fa. Ho mail aah atoni in nekan. Ho mutoon mane'og Uisnenog In lomin, natuin Ho ka mbeti fa humaf. Es on naan tabug ii, hai he mtoti aguab mese. Tatuin hit atolan palsait Yahudi, of hit he atbaen noni-ponij noi kesel anaek pah Roma,^c ai' kaha?”

15 Mes Nai Yesus nahine nalali nak, sin namin lalan he nsuu' Ee, he anlaban aplenat pah Roma. Es on naan Nai Yesus natae neki haan mafena' am nak, “Nansaa' am es hi he amsuu' Kau meki lasij naan? Miklila' miit Kau loit afgua' mese!”

16 Lalit sin annona' loit afgua' mese noi Nai Yesus. In ansimo ma ntae loit naan. Lalit In antoti sin am nak, “Sekog in human es le' ii? Sekog kanan es le' malula le' ii?”

Sin nataen am nak, “Le' naan kesel anaet pah Roma.”

17 Lalit Nai Yesus naguab am nak, “Kalu on nane, meki noi plenat saa' le' anfani plenat in hak. Ma meki noi Uisnenog saa' le' anfani Uisnenog In hak.”

Anneen In haan taes on nane, sin ala sin ansanmakan, natuin In aguaban naan lo namneo. Es on naan sin ka nabe'i fa he nanofug.

18 Lalit atonij fauk na'kon nonot palsait abjaan neman he nanofu Nai Yesus. (Sin na'kon nonot palsait Saduki le' nanoni een am nak, amates ka nmoni nfani niit fa).^d

19 Sin naguab een nok Nai Yesus am nak, “Aam kulug! Baba nai Musa anluul hit atolan halat mese am nak: kalu atonij mese anmate nasaitan in feel, ma ka nmu'i fa anah, atoni amates naan in olif lo he ansao bifee banu naan, he nahoni anfee sufa-ka'uf noi in tataf le anmate nalaal jen.^e 20 Namneo, baba nai Musa nanoni' kit on le' naan. Es on naan hai he mtoti miit Ko. Anmu'i atonij hiit anma'oli-taatn een. Mone unu ansao nahunu, lalit in anmaat, mes ka nahoni' fa. 21 Es on naan in olif le' natuin eel ansao bifee banu' naan. Mes ka loog fa in anmate ma ka nahoni' fa. On nane msa', in olif le' natuin eel ansao bifee banu' naan, ma in nmate msa', mes ka nahoni' fa. 22 Ma lasij naan anjali msa' noi amunit een, tal antee aheti susug nmate msa'. Lalit banu' naan anmate msa'.

23 Es on naan tabug ii, hai he mtoti Ko on ii: bifeel naan ansao naan atonij hiit! Kalu pah-pinan ii namsoup, ma Uisnenog namonib nafani' amates sin, of sekog es le' anfani monel noi bifeel naan?”

24 Ma Nai Yesus natae sin am nak, “Kalu hi mtoti on naan, hi ka mihine namneo fa Uisnenog In Sula Knino' in nesan. Ma hi ka mihine fa Uisnenog In kuasat amsa'. Es on naan hi msaan milaal je!

25 Amneen! Ka tiit fa lasi matsaos anbi sonaf neno tunan. Ale' amates le' Uisnenog namonib nafani' sin, ka nmatsaon antenin fa. On nane msa' Uisnenog In ahake' sonaf neno tunan ka nmatsaon fa. 26 Es on naan anmatoom nok ale' amates he nmoni anfani, ai' kaah, Au he utoon ki on ii: of oni' hi fe' ka mitenab maan fa leta' anmatoom nok aij le' notu haug uu' ana mese, mes ka nputu fa. Leta' naan nak, Uisnenog naguab noi baba nai Musa mnak, ‘Ho baba sin Uisnenog es le' Au. Sin es le' baba nai Abraham, baba nai Isak, ma baba nai Yakop. Sin aal sin naluli' een ma nabesan piut noi Kau, tal antee tabug ii.’^f 27 Es on naan hit tahine mtak, sin baba sin anmaten nalalin tabug ahunut. Mes, natuin Uisnenog nak, In anfani sin Uisnenog fe', es on nane hit tahiin tak, sin anmoni anfanin. Es on naan maski sin anmaten nalalin, mes sin anmoni nfanin amsa'. Namneo, amonit es le' naluli' ma nabees noi Uisnenog. Mes atoni amates kaah fa, ai'? Es on naan kalu hi mnaa' mihelan anoni' le' nak, amates sin ka nmonin anfanin fa, lo hi amsaan teb-teeb!”

28 Anbi tabug naan, anmu'i naan kulu agama tuaf mese le' anhake ma nail Nai Yesus antoko ma naguab nok atoni nonot Saduki sin. Kulu agama naan natenab nak, Nai Yesus natae sin haan totis sin nok alekot. Lalit in antoti Nai Yesus am nak, “Aam! Au he atoti Ko on ii: hit atolan halat ma plenat lasi palsait sin namfau le'uf. Na'ko ale' kanan aplenat baba nai Musa, aplenat mee es le' anpentiing anneis.”

29 Nai Yesus natael am nak, “Aplenat le' anpentiing anneis anbi Uisnenog In Sula Knino' nak on ii:

31 Ma aplenat nono nuug nak:

Aplenat nono nuug een le' ii, es le' anpentiing annesi. Ka nmu'i fa aplenat abjaan le' anpentiing annesi na'ko aplenat nua' een le' ii.”^h

32 Lalit kulu agama naan naguab anteni noi Nai Yesus am nak, “Namneo! Le' Ho muguab naan, namneo. Uisnenog anfani hit Usif, ma ka tiit fa Uisnenog abjaan.ⁱ 33 Hit lo he tneek Ee annesi na'ko ale' kanan saa'-saa', ma tamnaug Ee piut, tahinel ma atmepu taheel he tatuin In lomin, ma hit lo he tneek hit aok-abjaan sin, namnees on le' hit atneek hit aok. Nok lalan nane, na' Uisnenog anmaliin annesi, na'ko hit aal he tatuin atolan lasi palsait anmees. Naan naleko nnesi na'ko hit aal he atlolo mu'it he tatulu', ai' atfee bale' abjaan noi Ne.”^j

34 Anneen in haan taes on nane, Nai Yesus natenab nak kulu agama naan nahine In salit naan nok alekot. Es on nane Nai Yesus nak, “Aal a'kle'og ho of amjali Uisnenog Inin.”

Lalit, ka nmu'i fa tuaf mese antein le' he nlomi he antoti Nai Yesus, fun ka tiit fa es le' nabe'ij.^k

35 Lalit Nai Yesus nanoni' too mfaun sin anbi Uisnenog In Ume Onen Uuf. In antoti sin am nak, “Natuin hi tenab, on mee? Kulu agama sin nanoni een am nak, Kristus le' naan es le' Tuaf le' Uisnenog anlulu nanij na'ko aafj aan unu. Ma sin natenab nak, In ala sufaf na'ko kesel nai Daut. Mes tenab naan ka namneo fa. 36 Natuin aafj aan unu' Uisnenog In Asmana Knino' anpake nai Daut he anluul am nak,

37a Na'ko nane, hit tahiin tak kesel nai Daut anteek Kristus nak ‘Usif’. In oten nak, kalu sin anteek nak Kristus naan, aal kesel nai Daut in sufan-ka'un, naan fe' ka namtisi fa. Fun In anfani kesel nai Daut in Usin amsa'.”

37b Tabug Nai Yesus naguab on nane, too mfaun sin anlomin he anneen Ee. 38 Lalit In naguab anteni noi sin am nak, “Hi lo he ampaant om mi'ko kulu agama sin. Sin anlomin he anpaionis ok neki sin soo balu mnanu' sin, he annao na'eku nok too mfaun sin, he sin niit sin am nak, ‘Hoi! Sin lo kase naek namneo!’ 39 Kalu sin antaman anbi ume onen, ai' nokan anbin fesek, sin namin atoko alekot he too mfaun sin niit sin. 40 Mes ampaant om! Fun sin le' naan anputa-kliun bifee banu sin, he nasiik ma ansimo naan sin umen. Mes anbi too mfaun sin maatk een, sin nakolo' sin 'mo'et amle'ut een naan nok sin onen amnanu-mnanu'. Sin anlomin he tuaf abjaan sin nahinen nak sin neek een aknino' een. Mes Uisnenog of anfee kasat mafena' noi sin.”

41 Lalit Nai Yesus antoko anma'ail nok peti 'tulu', anbi Uisnenog In Ume Onen Uuf. In niit tuaf namfau neman ma antao sin loi kolekte anbi peti 'tulu' naan. In niit atoni amu'it sin neman ma nataam sin loit anaek anbi naan. 42 Lalit bifee banu' amamu'it tuaf mese neem ma n'onen nok. In nataam loit sen nuug anbi petij naa. Loit naan in osan aan'-ana'.

43 Es on naan Nai Yesus an'au'nape In asimo anoni' sin ma naguab noi sin am nak, “Hi mail milek-leko' moi bifee banu' amamu'it nae. In nataam loit aal sen nuug aah, mes in anfee annesi na'ko ale' kanan afeet een. 44 Sin aal sin anfeen kolekte na'ko loi nesif. Mes bifee banu' ii, anfee nani in loit sin oke' noi Uisnenog.”