2 Mes Nai Yesus natael am nak “Ume Onen iij, lo namaas! Mes ka loog fa sin of anpukai natselab ale' fatug ii.”

3 Lalit Nai Yesus sin annaon noin anu'af Saitun, ma antokon napene an'anin Uisnenog In Ume Onen Uuf. Lalit In asimo anoni' sin tuaf haa, neman ma naguab nokan. Sin es le' nai Petrus, nai Yakobus, nai Yohanis, ma nai Anderias. 4 Sin antoti mnak, “Aam! Iti Ho mutoon mufani' miit kai Ho guabam lelon. Leek ate in tabug antee? Ma in ataka' sin, on le' mee?”

5 Lalit Nai Yesus natael am nak, “Lamun hi ampanat milek-leko', he naik namoe naan ki. 6 Natuin of anmu'i tuaf namfau le' neman ma npaas sin abaask een am nak, ‘Au le' ii, Kristus, Atonij le' Uisnenog nba'an nani na'ko unu'.’ Es on naan sin namoe naan tuaf namfau. 7 Kalu hi miit atoni anmakenan, ai' hi mneen aguab anin nak anmu'i makenat anbi mee-mee, hi naik mimtau. Natuin ale' lasij naan lo he anbolan, mes neno amsoput sin ka ntee fa fe'. 8 Fun uuf mese of anfeen ma anmalaban nok uuf abjaan. Ma pah mese of anmakeen nok pah abjaan. Nainunus anbeko' anbi meel am mee. Amnahas of anae le'uf amsa'. Ale' lasij le' ii anjalin ataka' paap mese on le' bifee ma'apu' le' annaben meen maihonit.

9 Es on naan hi aal ki lo he ampanat milek-leko'. Sin of neman ma anheke ki, lalit anheel neki ki noi ume feek lasi palsait. Ma sin of antepo ki anbi ume onen sin naank een. Ma sin of anfutu neki ki noi ale' anaa' aplenat sin, natuin hi mituin Kau. Mes lasij nane msa', anjalin lalan he hi mitonan sin ale' lasij anmatoom nok Kau. 10 Fun Uisnenog In anah sin lo he annaon ma natoon nahunun Au Tu'in Alekot noi ale' uuf-uuf anbin pah-pinan ii, lalit na' neno amsoput sin antee. 11 Mimnau! Kalu sin anfutu neki ki noi ume feek lasi, hi naik mimtau ma mitenab am mak, ‘Au he uguab 'ak saa'? Ai' au he utae 'ak saa'?’ Kalu in tabug antee, hi miguab mituin saa' le' Uisnenog In Asmana Knino' natoon noi ki.^a

12 Anbi umel mese in nanan, kalu tuaf mese anpalsai noi Kau, of in olif-tataf sin es le' namin lalan he nlolo nisan. Kalu anah es le' anpalsai, of in amaf kuun es le' nekin on anlolo nisan. Ma kalu in inaf-amaf anpalsai Kau, of sin anah sin es le' anlolo niis sin. 13 Es on naan of tuaf abjaan sin nas'unu' niis ki, natuin hi ampalsai moi Kau. Mes sekog es le' nalan tal antee namsoup, Uisnenog lo nafetin ma anfee ne 'honis.”^b

14 Nai Yesus naguab anfini mnak, “Tuaf mese le' neki maufinug of he neem. In antaam ma anhake anbi bale nunij anbi Uisnenog In Ume Onen Uuf, le' ka pantas fa noi ne, tal in anhai'nisi balel naa. Es on nane, Uisnenog annao nasaitan balel naa. Kalu hi miit lasij naan, hi mpanat milek-leko'! (Sekog es le' antae lulat iij mes lo he npaant om!) Nane anjali taka nak neno susal sin anpaumakan le'uf. Kalu hi miit on nane, abiten propinsi Yudea amfeen maen nai moi 'nu'af sin.^c 15 Ma hi lo he maen lab-laab, he naik amkaisaan om. Kalu tuaf mee anpoi nalali na'ko in umel, naik anbelok anfani he naiti bale' abjaan antein. 16 Ma tuaf le' anbi lelel, naik anbelok anfani he naiti tai nusat antein. Lo in naen anfiin!^d 17 Le' ansuus anneis-nesij es le' bifee ma'apu', ma bifeel le' nasusu li'ana'. Fun sin ka nabe'i naen nanan fa. 18 Es on naan leko nnesi hi am'onen ma amtoti he lasi amle'ut naan naik neem nateef nok tabug ulan-anin. 19 Fun tabug naan, manukat anae' le'uf! Anmulai na'ko Uisnenog anmo'e pah-pinan ii tal antee nenog iij, ka tiit fa susal anaek on le' naan. Ma atoni of ka niit anteni' fa susal paap mese on le' naan.^e 20 Kalu Uisnenog ka napalan fa neno susal sin naan, ka tiit fa tuaf he nmoni piut. Mes natuin Uisnenog anneek niis In aan mabeti sin, es on nane In napalan neno susal sin naan.

21 Kalu nenon naan anteen, hi of amneen abjaan naguab een am nak, ‘Mail nai! Kristus es ii!’ Mes tuaf abjaan nak, ‘Kristus et nae!’ Mes nati' hi naik amneen, oo! 22 Ma of anmu'i atoni le' anpoi ma npaas in abaasn ee mnak, ‘Au le' ii, Kristus!’ Abjaan anteni' nak, ‘Au le' ii, Uisnenog In mafefa knino'.’ Sin of anmo'en lasi sanmakat huma'-huma' neki kuasat na'ko nitu le'uf he nputa-kliun. Sin namin lalan huma'-huma' he kalu naleko te, sin nasekeb Uisnenog Inin. 23 Hi lo he ampanat milek-leko'! Neno susal sin naan ka anteen fa fe', mes Au umnaub 'ani ki sin!”

24 Lalit Nai Yesus anluut anteni In aguaban noi In asimo anoni' sin am nak, “Kalu neno susal sin anfinin,

26 Lalit na' ale' mansian of niit Kau, Mansian Namneo-Namneo le' ii. Of Au 'uum u'ko neno tunan. Ma ale' too mfaun sin of niit Au kuasat, ma Au pinak ma klahak ok-oke'.^h 27 Lalit Au of a'lelu Uisnenog In ahake sin na'kon sonaf neno tunan, he annaon nabguab ale' tuaf sin le' Au 'beti 'ulali sin, na'ko pah-pinan ii tuuk am tuuk, na'ko saen am tesan, na'ko aliij am ane'ug.”

28 Nai Yesus anluut anteni In aguaban am nak, “Au 'aiti leta' u'ko haug. Kalu haug naan in noon sin anmulai namnatun, naan anjali 'taka nak tabug faku-nais anpaumaak.

29 On nane msa', kalu hi miit neno susal nane sin neman, on le' saa' le' Au utoon ulali ki naan, naan anjalin taka nak anpaumaak he Au 'uum eeh. 30 Tabug iij, amneen milek-leko'! Na'ko hi aal-ala ki le' ii, of anmu'i tuaf le' anmoni fe', tabug neno susal sin naan anteen. 31 Maski neno tunan ma pah-pinan namneku, mes Au aguab ii of antahan nabal-baal.”

32 Nai Yesus anluut anteni am nak, “Ka tiit fa tuaf mese, le' nahine nenog mee, ai' leku fauk aa, of Au 'fani 'uum. Uisnenog In ahake neno tunan sin amsa' ka nahinen fa. Au le' iij amsa', ka uhine fa. Aal Au Ama' anmese nahine Kuun.ⁱ 33 Natuin lasij nane, hi lo he ampanat milek-leko', natuin hi ka mihine maan fa leka te in tabug antee.

34 Ka loog fa of Au 'nao usaitan ki. Mes of Au 'fani 'uum. Paap mese on le' tuaf le' annao nasaitan in umel noi balel ala loog. In anlelu in ameput sin he anpao in umel naan lek-leek. Ma in anbati anfeen sin es-es nok in mepug. In naplenat apao eno' he anpanat nalek-leko' tal antee in anfani neem.^j 35 Hi lo he mpao faij-manas amsa', natuin hi ka mihine fa tabug mee ume tuaf naan of anfani neem. He manas anmabe ka, fai atnanas ka, manas napupu' ka, ai' manas fe' ansae. Hi ka mihine maan fa he leka'. 36 Naik-naika' in neem nok askeken, in napeni ki amtuup amfiin ma mikono fe'.

37 Es on naan saa' le' Au utoon noi ki ii, Au utoon 'noi abjaan sin amsa' am 'ak, ‘Hi lo he ampanat milek-leko' he amsenu Kau.”’

[Nok lasij nane, Nai Yesus natu'ab In aguaban nok In asimo anoni' sin anbin anu'af Saitun.]