Usif Yesus sin antaman noin Yerusalem, ma too mfaun sin anbo'is on le' kase naek
(Nai Mateos 21:1-11; Nai Lukas 19:28-40; Nai Yohanis 12:12-19)
11
Tabug sin anhaumaak koot Yerusalem, sin anteen kuan Betfage ma Betania, et anu'af Saitun in abnapan abjaan.a Anbi balel naan, Nai Yesus sin nasnasan babaun. Lalit In nlelu In asimo anoni' sin tuaf nuug he annao nahunun.
Nai Markus 11:1-14
2 In nba'an sin am nak, “Hi nua ki amnao mihuun moi kuan le' nae. Tabug hi mtaam, hi of miit bijakase keledai tipu' mese, le' fe' ka masaen fa, mafutu' et balel naan. Hi mnao amsefi in tanij ma amheel mekij neem. 3 Kalu atoni antoti ki mnak, ‘Nansaa' am es hi mheel meki bijakase keledai naan?’ On nane, hi mitae mmak, ‘Hai Usi' he npakel. Ma tabug In anpake nalalij na' hai meki mifani' neem.”’
4 Lalit tuaf nua' een naan sin annaon, ma sin niit bijakase keledai tipu' naan mafutu' anbi umel mese in nesun, anbi lalan in ninen. Sin ansefij he anheel nekij annao. 5 Mes atonij fauk le' anhaken anbi naan antoti sin am nak, “Hoi! Ba'e! Nansaa' am es hi msefi atoni in bijakasel?”
6 Sin nataen am nak, “Hai Usi' he npakel. Kalu anpake nalalij of hai meki mifani' neem.” Es on naan tuaf sin le' naan, anfeen sin meinuan he anheel neki bijakasel naan. 7 Sin anheel nekij annaon antee Nai Yesus. Lalit sin napeni' bijakasel naan anpake betik. Lalit Nai Yesus ansae.
8 Tabug sin he antaman noi koot, too mfaun sin naiti sin tais ma betik sin ma sin beti ana' sin, lalit nabeen sin anbi lalan. Anmu'i tuaf abjaan an'oten on le' pet-noob anbi lalan in ninen, ma nabeen sin anbi lalan in atnanan. Anpake mo'et on nane, sin he natonan ma naklila nak sin neek senut noi Nai Yesus nok lasi tola, paap mese on le' sin neek senut noi kase naek. 9 Anmu'i tuaf abjaan le' annao nahunun anbi Nai Yesus In matan, ma abjaan namunin. Sin anmulai ansakanan am nak,
“Hosana! Hai mpules ma mbo'is Uisnenog!c
Uisnenog anfee tetus-athoen noi amnemat le' neem ma neki Uisnenog In kanan,
natuin Uisnenog es le' anlelu nalalij!d
10 Hosana! Hai mpules ma mbo'is Uisnenog!
Natuin Uisnenog he nahakeb nafani' kesel nai Daut in aplenat!
Hosana! Hai mpules ma mbo'is Uisnenog!
Natuin Uisnenog naplenat naan et tuun alatan!”
11 Tabug sin anteen koot naan in nanan, Nai Yesus sin annaon antaman anbin Uisnenog In Ume Onen Uuf in kintal. Lalit Nai Yesus nail natef-tefan balel naan. Mes, natuin tabug tuuk-tuka, es on nane sin anbelok anfanin noin kuan Betania.
Usif Yesus naplenat hau sena' uu' mese he naik nafgua antein
(Nai Mateos 21:18-19)
12 Nok-nok ana', sin anpoin na'kon Betania he antaam anfanin noin koot Yerusalem. Anboni lalan Nai Yesus annaben In namnaah. 13 In niit hau sena' uu' mese anbi lalan in ninen. Bijaas sin neku in afguan.e Es on naan Nai Yesus anhaumaak hau sena' naan he nail niit, naik-naika' in nafgua, ai' kaha. Mes tabug In antee hau sena' naan in uun In ka niit fa saa'-saa', natuin haug naan in tabug ka ntee fa fe' he nafgua. In fe' he nanoo. 14 Ma Nai Yesus naguab noi hau sena' naan am nak, “Natuin ho ka mufgua fa moi Kau, es on nane anmulai na'ko tabug ii, ho ka mufgua amteni fa. Ma of ka tiit fa tuaf mese he neku nteni ho fguam.”
In asimo anoni' sin anneen In aguaban naan mafena' msa'.
Usif Yesus antaam anbi Uisnenog in Ume Onen Uuf, ma naiti anpolin bale' sosa' anbi naan
(Nai Mateos 21:12-17; Nai Lukas 19:45-48; Nai Yohanis 2:13-22)
15 Lalit sin annaon ankonon tal anteen Yerusalem, ma Nai Yesus antaam antein anbi Uisnenog in Ume Onen Uuf. Anbi Ume Onen naan in kintal, too mfaun sin anmo'en amasa' ma nasoos' een algua-sisij, le' bijaas sin anpake sin he anfeen afgua'-tulu'. Tabug Nai Yesus niit sin on nane, In annao ma anli'u napoitan sin. In ntepo nasana' me'ij le' sin anpake sin he ntukal loit, ma ntepo nasana' hau 'bena sin le' sin anpake sin he nasoos' een kolog naa.
Nai Markus 11:15-33
16 In antaal too mfaun sin he sin naik neki bale' ma annaon lefin antenin anpe'o Ume Onen naan in kintal. 17 Lalit In nanoni' sin am nak, “Hi mihine milali saa'-saa' le' Uisnenog In mafefa knino' anluul nani mnak, ‘Au ufena' Au Umel he tuaf-tuaf na'ko ale' pah ma uuf neman he n'onen een anbin balel naa.’ Mes hi mmo'e Umel naan anjali bale buat noi abakat sin!”f
18 Tabug anaak lasi palsait Yahudi sin anakaf sin ma kulu agama sin annenan am nak Nai Yesus anmo'e lasij nane, sin namaunun ma neku sin nisik een. Lalit sin namin lalan he nlolo nisan. Mes sin namtaus Ne msa', natuin too mfaun sin anlomi niis In anoni'.
19 Ma tabug manas anmabe on nane, Nai Yesus sin anpoin na'kon koot Yerusalem, ma nbelok anfanin he ntupan anbin kuan Betania.
Kalu hit atpalsai namneo-namneo toi Uisnenog, In of anfee saa'-saa' le' hit atotij
(Nai Mateos 21:20-22)
20-21 Nok-nok ana', sin annaon anfanin noi Yerusalem. Ma sin annaon anbonin hau sena' le' aafj aan naan Nai Yesus naguab noin. In asimo anoni' sin ansanmakan, natuin hau sena' naan anmate nalaal je tal in abaa'n amsa' anmeto nmaat. Lalit nai Petrus namnau niit Nai Yesus In aguaban aafj aan naa. Lalit in naguab am nak, “Aam! Mail miit! Hau sena' le' aafj aan Ama' amsukat naan anmate nalaal je!”
22 Ma Nai Yesus natael am nak, “Namneo! Lo hi he ampalsai Uisnenog on le' naan. 23 Kalu hi ampalsai namneo-namneo, hi of amlelu anu'af mese he natnani' balel noi tasij. Lalit Uisnenog of natnanib anu'af naan, lamun hi naik ampalsai miba'-ba'el! Hi lo he ampalsai namneo-namneo moi Uisnenog.g 24 Naik amniken! Lamun hi ampalsai namneo-namneo mak Uisnenog nabe'i anfee saa'-saa' le' hi mtotij, In of anfee ki on naan. 25 Mes kalu am'onen, ma ammu'i neek mafena' mok es fe', hi lo he amnao he ammahalan nekaf mokan fe'. Nok lalan nane, na' hi Ama' abit sonaf neno tunan he ansako nani hi sanat sin. 26 [Mes kalu na'ko ki, anmu'i neek menas, ma ka mlomi fa he amsako hi aom-abjaan in sanat, lo tebes hi Ama' abit sonaf neno tunan ka ansako fa hi sanat sin amsa'.]”h i
Sin anmatotin anmatoom nok Usif Yesus in hak
(Nai Mateos 21:23-27; Nai Lukas 20:1-8)
27 Lalit sin annaon ankonon. Tabug sin anteen Yerusalem, sin antaman antenin anbi Uisnenog In Ume Onen Uuf. Tabug sin antaman anteen in kintal, anaak lasi palsait Yahudi sin anakaf sin, kulu agama sin, ma amnasi halat Yahudi sin neman, 28 ma antoti Nai Yesus am nak, “Aafj aan naa sekog es le' anlelu ko he uum meki taisibug anbi balel ii? Sekog es le' anfee ko hak!?”
29 Nai Yesus nahine nak sin namin lalan he nanofug. Lalit In natae sin am nak, “Au he atoti ki msa'. Hi mitae Kau fe', hena' Au 'utae ki. 30 Au he atoti ki on ii: hi ala ki mihiin nai Yohanis Aslanit le' nane, oo? Sekog es le' anleek ee he naslaan? Uisnenog kah, ai' mansian?”
31 Es on naan sin nateenb een nuu-mneem, ma naguab een am nak, “Oin ee! Hit afgua een oke een! Kalu hit tatae mtak, ‘Uisnenog es anlelug,’ In of natae kit am nak, ‘Kalu on nane, nansaa' am es hi ka mpalsai fa nai Yohanis!?’ 32 Mes kalu hit tatae mtak, ‘Mansian es anlelug.’ Of ale' too mfaun sin antaisibun, natuin sin anpalsain am nak, nai Yohanis le' naan Uisnenog In mafefa knino'.”
33 Es on naan sin nataen am nak, “Neu! Hai ka mihine fa.”
Lalit Nai Yesus natae noi sin am nak, “Haa! Kalu on nane, Au ka utoon ki fa amsa', sekog es anlelu Kau.”