Bifee banu' ama'mu'it anfee kolekte anaek anneis
21
Tabug Nai Yesus nanoni' anbi Ume Onen Uuf, In niit atoni amu'it een neman ma nanoufut een kolekte anbi peti tulu'. 2 In niit bifee banu ama'mu'it mese neem nok amsa', he n'onen. In nanoufut loit sen nuug anbi petij naan. Loit le' naan in upan aan'-ana'! 3 Lalit Nai Yesus naguab nok In asimo anoni' sin am nak, “Amneen milek-leko'! Bifee banu' ama'mu'it le' iij, aal nanoufut loit sen nuug gah, mes in anfee annesi na'ko tuaf abjaan sin ok-oke'. 4 Tuaf abjaan le' naan sin nanoufut een kolekte anpake sin loi nesif een. Mes bifee banu le' iij, in anfee nani in loit een ok-oke'. Fun kaah, loit een le' naan in amonin.”Usif Yesus natoon nak Ume Onen Uuf of antiloot
(Nai Mateos 24:1-2; Nai Markus 13:1-2)
5 Tabug naan, Nai Yesus In asimo anoni' sin naguab een ma nanaeb Ume Onen Uuf nane mnak, “Aam! Mail miit Umel iij, naleko nmaat! Sin anmo'el anpake fatug le' an'ote sin anjalin on le' hau timif. Fatun naan anaek-anaek. Lalit sin anbaki nasaeb sin lek-leek. Ma anmu'i tuaf anfee bale' ma'upa' he namasab Uisnenog In Umel iij!”
Mes Nai Yesus natael am nak, 6 “Umel le' iij namneo naleko nmaat. Mes ka loog fa nteni te, tuaf abjaan sin of naseel fatun le' iij ok-oke' tal namneel.”
Neno susal ma mane'at sin
(Nai Mateos 24:3-14; Nai Markus 13:3-13)
7 Lalit nai Yesus In asimo anoni' sin antotin am nak, “Aam Kulug! Saa' le' Ho muguab lelon na, of leka' te, anjaal? Kalu in tabug anpaumaak, in a'taka' sin on le' mee?”
8 Es on naan Nai Yesus natael am nak, “Lamun hi mpanat hi tuam een lek-leek he naik namoe naan ki. Fun of anmu'i tuaf huma'-huma' neman, lalit anpaas sin abaask een am nak, ‘Au le' iij, Kristus.’ Anmu'i nteni' tuaf nak, ‘Neno amsupot ee anpaumaak he neem een!’ Mes naik ampalsai! 9 Kalu hi mneen aguab anin am nak, atoni sin antaisibun ma anmakenan et meel am meel, naik mimtau. Namneo, lasin le' naan of anpoin ma anjalin nahunun fe'. Mes neno amsoput naan ka ntee fa fe'.
10 Of uuf mese anmakeen nok uuf abjaan. Pah mese anmakeen nok pah abjaan. 11 Of nainunus anbeko', ma tabug amnahas matani' le'uf antaam. Menas huma'-huma' le' atoni namtausan sin, annaon on anbin meel am meel. Mansian sin of nitan lasij huma'-huma' le' anmo'e sin funuk een anfenan, ma nitan a'taka' huma'-huma' le' matani' le'uf anbin nenog. 12 Lasin le' iij ka njalin oke' fa fe', mes tuaf abjaan sin of anheke ki, anha'mui' ki, natuin hi mituin Kau. Lalit sin nana'at ki amnao m'aa' lasij noi ume onen sin, ma nataam ki noi ume buij. Sin of anlelu ki he mnao mbaisenu kesel een ma anaa' aplenat abjaan sin. Lasin le' iij anjalin, natuin hi mituin Kau. 13 Mes hi lo he mpake maan kiim meinuan akle'og naan, he mitonan sin Au Tu'in Alekot. 14 Es on naan naik mitenab mihunu mak, hi he mimneob om on mee. 15 Fun Au of afee aguab he hi mimneob om. Nok lalan naan, hi musun naan ka nahine ntenin fa he nak on naan meel ee ntein.a 16-17 Tuaf-tuaf namfau nfiin of ka nlomi nani ki fa, natuin hi mituin Kau. Anmu'i na'ko hi nonot kiim, on le': inaf-ama', olif-tataf, bae feto-bae mone, ma amnono sin. Anmu'i tuaf na'ko sin namin lalan he nasosa' ki, tal antee anmu'i tuaf na'ko ki, sin anlolo niis sin. 18 Mes hi naik mimtau, natuin Uisnenog ka nniken ki fa. Nakfunu' nono mese amsa', ka nkua fa, kalu ka In alomin ee fa. 19 Kalu hi malan ma mtahan piut-piut, Uisnenog of ansoi nafetin naan ki.”
Koot Yerusalem in amle'un
(Nai Mateos 24:15-21; Nai Markus 13:14-19)
20 Nai Yesus anluut In aguaban nak, “Kalu hi miit musun anfuun ma na'toko' nalali koot Yerusalem, hi mihine nai mak, naan in he namle'u gue. 21 Mail on nane, abiten propinsi Yudea maen nai moi anu'af. Abiten koot amsa', maen nai. Abiten kuan, naik amtaam moi koot anteni. 22 Fun Uisnenog nasanut neno susal sin naan, he anhukum tuaf-tuaf le' ka nlomin fa he natniin Ee. Lasin le' naan, anjalin namnees nok saa' le' Uisnenog In mafefa knino' sin anluul nani sin na'ko un-unu'.b 23 Tabug naan, tuaf le' he tneek sin baineis-neisi, es le' bifee ma'apu', ma bifeel le' nasusu li'ana' mee' fe'. Tabug naan, pah-pinan iij ok-oke' napenin susal, ma atoni Yahudis sin ok-oke' napenin mane'at matani', natuin Uisnenog nato'an sin. 24 Of atoni Yahudis sin musun anlolo sin tuaf abjaan, ma an'eek abjaan, he neki sin anjalin atel anbin meel am meel noi pah-pinan ii. Lalit kasel le' ka nahine fa Uisnenog, neem ma antali hae n'oemetab koot Yerusalem, ma ankuaas koot iij in nesan nanan, tal antee sin tabug naan, namsoup.”
Mansian Namneo-Namneo In amneman
(Nai Mateos 24:29-31; Nai Markus 13:24-27)
25 Lalit Nai Yesus natoon lasij anmatoom nok tabug In he anfani neem. In naguab am nak, “Kalu Mansian Namneo-Namneo he nfani neem, anmu'i 'taka' anpoi nbi manas, anbi funan, ma akfuun sin. Anbi pah-pinan iij amsa' anmu'i 'taka', es le' oe tasij namaunu manenu', ma ani nautus ma okin pesaan-pee anaek-anaek na'ko tasij ansae ma nalemab. Lasin le' iij of anmo'e mansian sin namkakan, tal antee sin ka nahine ntenin fa noi he anmo'en saa'.c 26 Kuasat le' anbin nenog natselan amsa'. Nail on nane, mansian sin namtaun nmaten, natuin pah-pinan iij he napeni amleut matani'! 27 Lalit na' mansian sin niit Kau, ‘Mansian Namneo-Namneo le' iij, 'sanu 'uum a'bi nopel’. Au 'sanu 'uum 'eki kuasat, ma Au 'pina' ma klaha' ma'tani'.d 28 Kalu ataka' een le' iij anjalin nalalin, mi'aiti' hi 'naakm een naan nai, fun Uisnenog In tabug antee lee he ansoi nafetin naan ki.”
Leta' mese na'ko hau uuf
(Nai Mateos 24:32-35; Nai Markus 13:28-31)
29 Lalit Nai Yesus naiti nteni aleta' mese am nak, “Hi mail ma mitenab milek-leko' miit noi haun nuug. 30 Kalu sin nook een anmulai namnatun ma nmolok een, naan anjali 'taka' nak, tabug faku-nais he ntaam eeh. 31 On nane msa', neno susal ma mane'at sin. Kalu sin nbool neman, naan anjali 'taka' nak Uisnenog In aplenat ee he nkoen On neem eeh.
32 Au utoon 'ani ki! Na'ko mansian sin le' amonit tabug iij, of anmu'i tuaf le' ka nmate fa fe', mes neno susal sin naan antaman nalalin. 33 Maski nenog ma pah-pinan iij namnekun, mes Au Aa't een antahan nabal-balan.”
Tabalab hit tuak noi tabug Usi' he nkoen On neem
34 Lalit Nai Yesus anluut In aguaban am nak, “Ampanat, nok askeken Au 'uum! Naik-naika hi mitenab noi amle'ut, hi mmafu lalug, ma mtaisibu he m'etu noi monit alekot aah. Naik-naika hi ka mneen mihine fa in ataka', natuin hi mtaisibu nok ulusan abjaan. 35 Naik mitenab mak hi ka mipeni fa. Fun Au 'fani 'uum nok askeken. Ma tabug Au 'fani 'uum, ka tiit tani fa es he nabe'i nakolo' in tuan na'ko Au humak. 36 Es on naan miloitan piut-piut. Am'onen faij-manas naik natfeek, he hi mibe'i malan ambi susal sin naan. Nok lalan naan, tabug Au 'fani 'uum een, ma hi mhake mbi Mansian Namneo-Namneo In human ee te, hi ka mimaeb om fa.”