Sin anmatotin anmatoom nok Usif Yesus In hak ma kuasat
(Nai Mateos 21:23-27; Nai Markus 11:27-33)
20
Tabug mese, Nai Yesus annao ntaam anbi Ume Onen Uuf, lalit nanoni' Uisnenog In Tu'in Alekot anbi kintal. Es on naan anaak lasi palsait Yahudi sin anaakf een, kulu agama sin, ma atoni mnasi halat sin neman ma antotij Ee. 2 Sin antotij Ee mnak, “Sekog es anfee Ko hak, he ho mmo'e taisibug ambi iij aafjaan naa? Mutoon miit kai!”3 Es on naan Nai Yesus natael am nak, “Au he 'toti aan lasij mese amsa', lalit na' Au utae ki. 4 On ii: hi mihine nai Yohanis Aslanit, ai'? Sekog es le' anfee ne kuasat he in naslani atonij? Uisnenog ka, ai', mansian?”
5 Es on naan sin nabguan ma naguab een nuu-mneem am nak, “Ouww! nakleo nafani kit eeh. Kalu hit tak, ‘Uisnenog es anlelu’, of In nak, ‘On nane, hi ka mpalsai fa nai Yohanis noi saa'?’ 6 Mes hit ka tabe'i fa he tak, ‘mansian es anlelu’, natuin too mfaun sin of naitin fatug ma npoli namate kit. Natuin sin npalsain nak nai Yohanis naan, Uisnenog In mafefa knino'.”
7 Lalit sin natae Nai Yesus am nak, “Hai ka mihine fa.”
8 Es on naan Nai Yesus natae noi sin am nak, “Kalu on nane, Au ka 'lomi fa he utoon amsa', 'ak sekog es anlelu Kau.”
Tu'in anmatoom nok tuaf le' anseeb po'an anggur
(Nai Mateos 21:33-46; Nai Markus 12:1-12)
9 Lalit Nai Yesus natu'in sin leta mese antein. Tu'in nane nak, “Anmu'i naan atonij mese anseen hau anggur. In anfee po'an anggur naan noi tuaf he nmepug, he sin anbatin tabug sin napenin po'an naan in nesan. Lalit in nnao noi pah @@a'pen-pene abjaan ma natgua mas aloog anbi naan.a 10 Tabug he nsiun anggur in afguan, naijaa tuaf naan anlelu in ameput tuaf mese he neem ansimo in paa' na'ko ammepu po'an sin naan. Mes ammepu po'an sin antepo ameput naan, ma anli'u ge anfani luum aah. 11 Lalit naijaa tuaf naan anleek tuaf mese antein. Mes ammepu po'an sin naan antepog ma namael. Lalit anli'u ge nfani luum aah. 12 Es on naan naijaa tuaf naan anleek ameput mese anteni, mes sin antepo napaap, lalit antokan napoitan.
13 Naijaa tuaf naan antoko ma natenab am nak, ‘Au he 'mo'e on meel ateni? Leko nnesi Au leek au aan neka'. Sin of antola ma nsenug nok lek-leko.’ Es on naan in anleek in aan honi' annao noi balel naan.
14 Mes tabug ammepu po'an sin niit li'ana' naan, sin naguab een am nak, ‘Mail miit! Anaef ee anleek noi in aan honi'. In es le' of ansimo anaef ee in pusaak sin ok-oke'. Es on naan iim he thekel ma tlolo tiis ne nai! Maut he hit es atpaal kuuk po'an ii.’ 15 Tabug li'ana' naan neem antee, sin anheel anfonat ee npoi na'ko po'an naan, lalit anlolo nisan.
Es on naan Au he 'toti ki. Hi mitenab saa' noi poo' tuaf naan. In he nmo'e saa' noi ammepu po'an sin naan? 16 Anbi Au tenab, in lo he neem ma anlolo niis sin ok-oke', lalit anfee po'an naan noi tuaf abjaan antein.”
Tabug too mfaun sin annenan Nai Yesus naguab on nane, sin nataen am nak, “Kalu naleko te, Uisnenog naik anhukum kai on naan!”
17 Lalit Nai Yesus napiin matan noi sin, ma antoti sin am nak, “Kalu ka njali fa he nhukum sin on nane, nansaa' am es Uisnenog In mafefa knino' een anluul am nak on ii:
‘Anmu'i naan fatug mese le' tukal sin naiti npolin,
mes tabug iij, fatug naan anjali fatu 'sukif noi nii inaf?’b
18 Tuaf le' nakletun on anbi fatug naan, of namle'u, natuin in napeni hukum. Ma kalu fatug naan anmofu ma ntoom tuaf es, in of namle'u msa', natuin in napeni hukum.”
19 Tabug kulu agama sin ma anaak lasi palsait Yahudi sin anakaf sin annenan tu'in naan, sin nahinen nak Nai Yesus ansali sin anpake aguab mapolin lelon na. Natuin sin namnees nok le' ammepu po'an anggur sin naan. Es on naan sin nato'an nmaten. Ma sin n'atol een lalan he anheke Nai Yesus. Mes sin aotiin gok noi too mfaun sin le' anlomi Nai Yesus In anoni' een. Es on naan sin annaon nasaitan Ee on ahaa le' naan.
“Amfee noi Uisnenog saa' le' Uisnenog In hak”
(Nai Mateos 22:15-22; Nai Markus 12:13-17)
20 Lalit Nai Yesus In musun nnatnuu' Ee ma namata Ee piut. Sin namin amata', le' nabe'i nmoo'l on on le' atoni ammo'e alekot, he annao naguab nakleo Nai Yesus. Sin nafnekan een he on meel ate, Nai Yesus naguab namofu anaa' aplenat pah Roma, lalit sin natlakan noi gubernur, he in anleek tuaf he anheke Nai Yesus. 21 Es on naan sin anleek amata' naan he annao ntoti Nai Yesus am nak, “Aam Kulug! Hai mihine mak Ho nekam naan amneot. Ho ka mputa-kliun muhine fa, ma ka mpili fa humaf. Ho munoni' Uisnenog In A'an ma Plenat namneo ma namnoon. 22 Tabug iij, hai he mtoti maan Ko, lasij mese: tatuin hit atolan lasi palsait Yahudi, of hit he tbaen noni ponij noi plenat Roma in usi anaek ee, ai' kaha?”
23 Mes Nai Yesus nahine nani sin salit le' he nakleog. Es on naan In natael am nak, 24 “Miklila' miit Kau loi muti' afgua mese fe'!” Es on naan sin naklila' loit naan noi Ne. Lalit In antoti mnak, “Sekog in human ma in kanan es le' malula' le' iij?”
Ma sin nataen am nak, “Usi naek kesel.”
25 Es on naan Nai Yesus nak, “Kalu on nane, amfee noi plenat saa' le' plenat in hak. Ma amfee noi Uisnenog saa' le' Uisnenog In hak.”
26 Annenan on nane, sin ansanmakan, natuin sin ka nabe'i nakleo naan Ee fa anbi too mfaun een sin maatk een. Es on naan sin anfefa temen.
Usif Yesus nanoni' anmatoom nok amates anmoni nfaan
(Nai Mateos 22:23-33; Nai Markus 12:18-27)
27 Lalit anmu'i tuaf fauk na'kon amnono palsait Saduki neman he naguab nakleo Nai Yesus. Atoni Sadukis sin nanoni een am nak, atoni amates sin ka nabe'i nmoni nfanin fa tabug neno amsupot sin antee. Sin neman ma antoti Nai Yesus am nak,c 28 “Aam Kulug! Baba nai Musa anluul nani kit atolan am nak: kalu anmu'i atoni' anmaat, mes ka nahoni fa, atonij naan in olif lo he ansao bifee banu' naan, he nfee sufa' noi in tataf amates naan.d 29 Namneo nahunut baba nai Musa nanoni' on naan. Mes tabug iij hai he mtoti on ii: anmu'i naan atonij tuaf hiit sin anma'oli-tatan een. Aan mone unu' anmatsao, mes anmaat, ma ka nahoni' fa. 30 Lalit in olif le' natuin ee ansao bifee banu' naan. Ka loog fa te, in anmaat, mes ka nahoni' fa. 31 On nane msa', in olif es anteni. In ansao bifee banu' naan, mes anmate msa', ma ka nahoni' fa. Matsaos naan nanaob on piut tal namsoup antee aheti susug, mes in anmate msa'. 32 Namuni te, bifee banu' naan anmate msa'. 33 Es on naan tabug iij, hai he mtoti on ii: bifeel naan ansao niit atonij hiit. Kalu pah-pinan iij namsopu te, Uisnenog namonib nafani amates sin, bifeel naan in monel, es le' mee?”
34 Es on naan Nai Yesus natael am nak, “Mansian anmatsaon anbin pah-pinan iij ee haa. 35-36 Mes anbi sonaf neno tunan, ka tiit fa matsaos antein. Ma anbi nae msa' ka tiit fa 'maten anteni. Sin paap mese on le' Uisnenog In ahaket een sonaf neno tunan. Fun tabug Uisnenog namonib nafani' amates een, In anpili naan sin anjalin In aanh een. 37 Anbi baba nai Musa in sulat, anmu'i tu'in nak haug uu' ana mese anpiin mes ka nputu fa. Na'ko tu'in naan hit tahine tak, amates nabe'i anmoni nfaan. Anbi naan Uisnenog naguab noi baba nai Musa am nak, ‘Au le' iij, sin ho baba sin Uisnenog. Es le' baba nai Abraham, baba nai Isak, ma baba nai Yakop. Sin ala sin ok-oke' naluli' een ma nabesan piut-piut noi Kau anteen nenog ii.’e 38 Fun kaah, anaef een naan anmaten nalalin et neno unu'. Mes natuin Uisnenog naguab nalali mnak, In anjali sin Uisnenog fe', es on nane, hit tahine tak sin anmonin fe'. Es on naan maski atoni anmate nalaal je amsa', sin anmoni nfanin. Fun aal atoni amonit mese le' naluli' ma nabees noi Uisnenog. Ka tiit fa amates nabees noi Uisnenog!”
39 Anneen Nai Yesus natae on nane, anmu'i kulu agama abjaan naguab een am nak, “Aam Kulug. Ho haan taes naan, naleko nmaat.” 40 Anmulai na'ko tabug naan, ka tiit fa tuaf anteni nbalani he antoti Nai Yesus, natuin ka nabe'i nakleo naan Ee fa.
Kristus naan, kesel nai Daut in sufan, ma in Usin amsa'
(Nai Mateos 22:41-46; Nai Markus 12:35-37)
41 Lalit Nai Yesus nanoni' fe' anbi Ume Onen Uuf. Es on naan In antoti nafani' sin am nak, “Natuin hi teenb een, on mee? Kulu agama sin nanoni' ki mnak Kristus naan, es le' Tuaf le' Uisnenog anlulu nani Je na'ko un-unu'. Tatuin sin, In le' naan aal kesel nai Daut in sufan. Mes nane, ka nanokab fa fe'. 42 Natuin nahunut, kesel nai Daut nekin on anluul anbi in suul Siit Pules-Bo'is sin am nak,
‘Uisnenog an'etu ma natoon noi au usi' am nak,
“Uum he mtoko mbi maat, ambi Au aok-abjaan ane'ug.
43 Fun Au of amo'e ho musun,
tal antee sin naluli' een noi ko.’”f
44 Es on naan na'ko sulat naan, hit tahine tak kesel nai Daut amsa' in nekin on anteek Kristus nak, ‘Usi'’. In oten, kalu anmu'i tuaf nak Kristus naan, aal kesel nai Daut in sufan, nane ka nanokab fa fe'! Natuin In anjali kesel nai Daut in Usin amsa'.”
Ampaant om ma'ko kulu agama sin le' ankuub sin saant een
(Nai Mateos 23:1-36; Nai Markus 12:38-40)
45 Tabug too mfaun een antaha' sin lukek een he nneen Nai Yesus, In naguab noi In asimo anoni' sin am nak, 46 “Hi lo he mpanat milek-leko' hi tuam een ma'ko kulu agama sin. Natuin sin anlomi le' he annaon npai'onis ok anpaken soo balu mnanu pilole, he nateef nok too mfaun sin, he tuaf abjaan sin nak, ‘Hoi! Sin le' naan kase naek!’ Sin anlomin he namin bale 'toko' anbi matan, tabug antaman noi ume onen sin, ai' anbin fesek matsaos, ai' balel-balel le' bijaas too mfaun sin nabguan. 47 Mes ampanat hi tuam een naan, natuin sin nputa-kliun bifee banu sin ma nasiik naan sin umen. Mes anbi too mfaun een sin maatk een, sin ankuub lasi amaufinut naan anpake lalan, an'onen amnanu-amnanu'. Sin nlomin he tuaf abjaan sin nak, sin le' naan tuaf le' anmakoe nbi Uisnenog In lasin. Mes Uisnenog nahine nani sin saant een, es on naan In of nasanut hukum noi sin mafena' nneis-neis.”