Sin antifkai naan ika' namfa-fau
(Nai Mateos 4:18-22; Nai Markus 1:16-20)
5
Tabug mese, Nai Yesus nanoni' tuaf namfau anbi nefog Galilea in ninen.a Too mfaun sin neman ma anlomin he nneen Uisnenog In A'an ma Plenat. Sin namfaun tal antee sin anmatiit een ma nmabe'un. Ma sin he noi nsaen Nai Yesus. 2 Anpaumaak balel naan, anmu'i naan atifkai ika' naknino' sin tiif kaij anbin meto'. Es on naan Nai Yesus niit abelo nuug luumn een anhaken anbin naan. 3 Es na'ko abelo nuug een naan, nai Simon inij. Lalit Nai Yesus ansae noi nai Simon in abelo, ma naguab noi nai Simon he ntita' abelo naan noi oel ee kle'og. Es on naan In antoko ma anmulai nanoni' noi too mfaun sin naan.b4 Nanoni' nalali te, In naguab noi nai Simon am nak, “Simon! Meki ho abelo iij moi nefog atnanan ba-babaun, he ho musanut ho tiif kaij iij noi naan. Hi of mipeni ika' namfau.”
5 Mes nai Simon natael am nak, “Usi' amsa', Ho msa'! Hai mmepu faij es nok a'temel, mes ika' afgua' mese amsa' hai ka mipenif! Mes neu Aam, Ho es muguab on naan, maut he au 'sobal 'iit!”c 6 Es on naan sin nasanut tiif kaij naan. Lalit sin he nheel nafani' ee, mes tiif kaij naan nahenu nalaal je nok ika' tupug mese, tal antee tiif kaij naan anmulai natkai.d 7 Es on naan nai Simon ankua' in amnono sin na'kon abelo abjaan he neman nbaban. Lalit sin naun ika' ma nkuab een noi abelo nuug tal antee nahenun, es on naan aal ba-babaun ate anleman. 8-10 Nai Simon in amnono atifkai ika' sin, es nai Yakobus ma nai Yohanis, aam Sebedius in aanh een, nbi nane amsa'. Sin ansanmakan amsa', natuin sin napenin ika' namfau on naan. Tabug nai Simon Petrus niit saa' le' anjali nbi naan, in naen neem ma nlituu anbi Nai Yesus In matan, ma naguab am nak, “Au le' iij, tuaf mese le' anmo'e nsaan amfau-hutug. Es on naan leko nneis Usi' naik ampaumaak kau ntein.”e
Mes Nai Yesus natael am nak, “naik mutenab museke' lasij naan. Au 'lomi he pake ki. Hi aal ki le' iij, atoni amnami ika'. Mes tabug iij, Au he unoni' ki he mami tuaf he natuin Kau!”
11 Lalit sin anheel sin abelo een anteen meto'. Es on naan sin annaon nasaitan ale' saa'-saa', ma natuin Nai Yesus.
Usif Yesus naleko' tuaf mese, le' napeni menas atho'al atlaku'
(Nai Mateos 8:1-4; Nai Markus 1:40-45)
12 Anbi kuan mese, Nai Yesus na'eku nok tuaf mese, le' in aon ee ok-oke' nameen atho'al atlaku'. Tabug in niit Nai Yesus, in annao nlituu ma naluli' antee naijaan anbi Nai Yesus In matan. Es on naan in nak, “Aam! Ambaban maan kau fe', Usi! Au uhine 'ak, Ho mube'i muneku mani au menas le' iij, he leko te, tuaf abjaan sin naika nmainisin kau. Lamun Ho mlomi, Usi.”
13 Lalit Nai Yesus annona In animan ma anpoel. Es on naan In naguab am nak, “Au 'loom! Muleko nai!” Naguab nalali on nane, menas naan namneku naan. 14 Es on naan Nai Yesus namnaub ee mnak, “Mumnau mulek-leko'! Ho muleek gue, mes naik mutoon moi sekom-sekog! Ho lo he mutuin baba nai Musa in aplenat unu' naan. Es on naan ho mnao moi anaak lasi palsait, he in anpalekas ho aom ee, he in nahine nak, ho menas naan namneku namneo-namneo, ai' kaha. Lalit ho mseun bani meki fua'-tulu', he too mfaun sin nahinen namneo nak, ho muleek gue.”f
15 Maski Nai Yesus antaal ee on nane msa', tu'in anmatoom nok In kuasan naan, naneenb on ma nabenob on na'ko tuaf noi tuaf anbi meel am meel. Es on naan too mfaun een sin amneemk een ansai on le' noel. Sin anmalinan he nneen In anoni' sin. Lalit In naleko' tuaf namfau na'kon sin menas huma'-huma'. 16 Mes Nai Yesus bijaas anlomi he napasib On na'ko too mfaun sin, he annao n'onen anbi bale luman makolo'.
Usif Yesus naleko' ao a'olet tuaf mese
(Nai Mateos 9:1-8; Nai Markus 2:1-12)
17 Tabug mese, Nai Yesus nanoni' tuaf anbi umel mese. Tabug naan anmu'i tuaf na'ko pukan nonot palsait Farisi ma kulu agama tuaf fauk neman ma anneen nok sin. Sin neman na'kon kuan-kuan anbi propinsi Galilea, propinsi Yudea, ma na'kon koot Yerusalem. Uisnenog anfee kuasat noi Nai Yesus he naleko' amenat sin. 18-19 Tabug naan, anmu'i naan tuaf fauk anloi neki tuaf mese le' ao a'olet anbi hala'. Sin n'etun lalan matani' he neki amenat naan, he Nai Yesus naleko'. Mes umel naan nahenu nmaat nok mansian, tal antee he naseke ok he ntaman amsa' ka nabe'i fa. Es on naan sin neki ao a'olet naan noi umel in selel a'pakan. Lalit sin anpukai selel a'pakan naan, ma sin nasanut ao a'olet naan nok nani in hala'. Sin nasanut anbi too mfaun een sin atnaank een, anbi nani Nai Yesus In matan. 20 Nail on nane, Nai Yesus nahine noi sin anpalsain nak, In nabe'i naleko' sin amnono ao a'olet naan. Es on naan In naguab noi ao a'olet naan am nak, “Ba'e! Au 'nose ulali ho sanat sin naan.”
21 Anneen Nai Yesus naguab on nane, atoni Farisis ma kulu agama sin anmulai anmatotin een am nak, “Kaa! Aal Uisnenog Kuun es le' anmu'i hak he annose nani sanat mansian. On ii te, in le' iij, sekog, tal antee anmo'e lon on le' Uisnenog! Lasin iij, si'ug ma akan matani'!”
22 Mes Nai Yesus nahine ntee sin nekak nanan. Lalit In naguab noi sin am nak, “Nansaa' am es hi mitenab mak Au le' iij uguab lasi si'ug ma akan? 23-24 Au le' iij, Mansian Namneo-Namneo. Ma Au 'mu'i hak he 'fee sakot noi sanat mansian. Kalu Au aal utoon noi ao a'olet iij ee m'ak ‘Au sako ulali ho sanat,’ hi ka miit fa Au kuasat anbi pah-pinan ii. Mes kalu Au 'ak, ‘Amfeen nai! Maiti ho nahek naa, ma amfani nai.’ Kalu in anfeen nani tabug naan, na' hi miit Au kuasat. Es on nane, Au he uleko' ao a'olet iij, maut he hi mihine msa' mak, Au 'mu'i hak he sako sanat mansian.”
Es on naan In nbelok anfani noi ao a'olet naan. Lalit naguab noi ne mnak, “Ba'e! Amhake nai! Maiti ho nahek naa, ma amnao nai!”
25 Nok askeken ate, ao a'olet naan anfeen anhake anbi too mfaun een sin maatk een. Lalit in nasae naan kuun in anahek. Es on naan in anpoi annao nfaan, ma nbo'is Uisnenog. 26 Niit on nane, sin al-alasin ansanmakan. Lalit sin nanaeb Uisnenog In kanan nalat-laat am nak, “Uisnenog mapina'-maklaha', oo! Nenog iij hit tiit kuuk lasi sanmakat mese, teki hit maatk ee kuuk!”
Usif Yesus no'en nai Lewi he natuin Ee
(Nai Mateos 9:9-13; Nai Markus 2:13-17)
27 Ka loog fa te, Nai Yesus anpoi na'ko umel naan, ma In na'eku nok tua akoni noni ponij mese, antoko nbi balel akoni noni ponij. Tuaf naan, kanan nai Lewi.g Lalit Nai Yesus nak ee mnak, “Uum he mutuin Kau!” 28 Anneen on nane, nai Lewi anfeen nani tabug naan, ma annao nasaitan ale' saa'-saa' anbin balel nane ok-oke', ma natuin Nai Yesus.
29 Lalit nai Lewi anmo'e fesek anaek ma anhone Nai Yesus neem nok anbi in umel. In anhone in amnono akoni noni ponij sin ma tamu abjaan amsa', he sin nokan anbin fesek naan. 30 Mes anmu'i tuaf fak-fauk na'ko amnono palsait Farisi, ma kulu agama sin, namunu' een anbin Nai Yesus In asimo anoni' sin am nak, “Nansaa' am es hi mtoko mmeku mibgua mok atoni ka mapake een fa, on le' akoni noni ponij ma atoni amle'ut sin? Atoni alekot sin naika mseol gom mok tuaf on le' sin!”h
31 Mes Nai Yesus natonan sin am nak, “Amenat sin lo npaluun mantali menas. Mes ao-mina' sin ka npaluu ge fa. 32 Au 'uum he 'paloli tuaf-tuaf le' ka mapake een fa. Mes Au ka 'uum fa, he 'paloli tuaf-tuaf le' annaben in tuan ee, naleek!”
Kulu agama sin anmatoen nok Usif Yesus anmatoom nok lasi tanaah ok
(Nai Mateos 9:14-17; Nai Markus 2:18-22)
33 Lalit tuaf-tuaf na'ko amnono palsait Farisi ma kulu agama sin anmalebo een noin Nai Yesus am nak, “On ii, Aam! Nai Yohanis Aslanit in asimo anoni' sin bijaas nanaah ok ma n'onen een. Atoni Farisis sin asimo anoni' sin on nane msa'. Mes nansaa' am es ho asimo anoni' sin naah ma ninu piut-piut on naan? Sin ka nanaah nahiin lok fa. Ai'?”
34 Mes Nai Yesus natae sin neki aguab mapolin am nak, “Hi mihine milaal je, kalu anmu'i fesek matsaos, tamu sin ka nanaah ok fa, mes sin anbukaen tal namsenan. Kalu nai monel anbi nane fe', sin lo he anbukaen nabgua tal namsenan. 35 Mes of tabug mese, kalu tuaf abjaan anheke neki nai monel nane fe', na' in amnono sin ansusan. Tabug naan sin nanaah ok.”
36 Lalit Nai Yesus anfee aguab mapolin mese anteni, nak, “Ka tiit fa tuaf le' naiti tai fe'ug ma ntapas ee noi soo balu mnaa'. Fun kalu atfase soo balug nane, tais fe'ug le' fe' antapas ee naan, of an'uk gon, ma soo balu mnaa' naan of natpisu' nkoon. 37-38 On nane msa' atoni ka ntisi fa tua min-kase fe'ug noi asaap molof. Fun asapa' naan of nabola', ma tua min-kase naan of nat'oop anpoi oke'. Es on naan tua min-kase fe'ug lo he ttisij noi asaap fe'ug.i [Nok lalan naan, Nai Yesus nanoni' sin am nak, In noni' fe'ug naika mselog nok atoni Farisis sin anoni' mnaa'.] 39 Atoni le' ninu niit tua min-kase mnaa', ka nlomi fa he ninu tua min-kase fe'ug, natuin in nahine mnak, ‘Tua min-kase mnaa' naan, es le' aminat anneis-neis!’”