50
Es on naan nai Yusuf anhoo in amaf, ma nkae nme'-me'ul. Ma in anneek nafan-fani'. 2 Lalit nai Yusuf naplenat tuaf a'ulus amates he npaloli nai Yakop in aon-ta'un he naik anpuun. 3 Es on naan tua a'ulus amates een naan, anpaloli nai Yakop in aon-ta'un naan nenog bo' haa, on le' bijaas sin anmo'e nani. Ma abiten Masir ankaen amsa' tabug nai Yakop anmaat. Sin nkaena' nai Yakop tal antee nenog bo' hiit (70), on le' sin anaet es anmaat.4 Nenog bo' hitu namsoup, nai Yusuf natoon noi in anaak mepug ee mnak, “Amneen milek-leko'! Au 'toti ki he meki au hanak ii moi kesel. Hi mak on ii: 5 ‘Tabug au ama' he noi anmaat, in antoti kau he 'nao 'suub in aon-ta'un iij 'oi pah Kana'an. Es on naan au 'baisenu ko aam kesel he mfee kau meinuan, he au 'eki au ama' in aon-ta'un ma 'nao 'suub ee 'oi pah Kana'an. Lalit, na' au 'fani 'uum.”’
6 Tabug kesel anneen hanaf nane, in natael ee mnak, “Kalu ho msuup mulali moi ho ama' on nane, maut he mnao ma msuub.”
7 Es on naan nai Yusuf annao he nsuub in amaf. Too mfaun sin nokan amsa'. Sin es le' kesel in anaak mepug sin ok-oke', ma kase naek na'kon pah Masir. 8 Nai Yusuf in olif-tataf sin, ma sin ameput een ok-oke' amsa' nokan anbin subat naan. Abalat anbi Gosen, ala haa sin feek een, li'ana' sin, ma mu'it een. 9 Solalus sin nokan namfaun. Abjaan ansaen kaleta bijakasel, abjaan ansaen bijakasel. Natuin amnokat sin namfaun, es na' pukan anaot noi subat naan, naklalo ok tui kalalo mnanu'.
10 Lalit sin ala sin annaon ma nlaak anboni noel Yarden, anbi balel mese in kanan, Atat. Bijaas, abiten naan neman ma nhalin anel anbin balel naan. Anbi naan, nai Yusuf sin ankaena' sin amaf. Sin anbe'an antenin faij hiit.
11 Tabug abiten Kana'an niit sin ansusan on nane, sin naguab een am nak, “Hoi! Hi mail miit. Atoni Masiras sin anbe'an amates, nuuk ee ka aan'-ana' fa. Sin ankaen, on le' nae ee!” Es on naan sin nakanab balel naan Abel-Misraim. In oten, nak ‘atoni Masiras sin nukat’.
12 Lalit nai Yakop in aanh een anmo'e natuin saa' le' sin npaa' nalali. 13 Es on naan sin anloi neki nai Yakop in aon-ta'un naan, ma annaon nsuub ee nbi nuat le' npaumaak kuan Makpela ma kuan Mamre. Nai Abraham ansoos nafeek balel naan na'ko atonij mese na'ko uuf Hetes, kanan nai Efron; he nmo'el ee anjali sin bale subat.
Nai Yusuf anhatani in taatf een
14 Tabug ansuub nalali sin amaf nai Yakop, nai Yusuf nok in olif-tataf sin, annaon nfanin noin pah Masir. Too mfaun le' nokan anbin subat nane msa' on naan.
15 Tabug sin anteen pah Masir, nai Yusuf in taatf een anmulai namtaun, natuin sin amaf nmate nalaal je. Es on naan sin naguab een es nok es am nak, “Hoi! Hit tatenab talek-leko' tiit fe'! Naik-naika nai Yusuf natenab kit fe'. Kalu in he nmo'e lasi le'uf noi kit, on mee?” 16 Lalit sin anma'akolan ma ansonu een hanaf noi nai Yusuf am nak, “Aam. Hai fe' mimnau, tabug hit ama' fe' anmoni, in anlelu kai 17 he mitoon ko mak, ‘Nai Usu lo he nniken nani in taatf een sin sanat sin. Natuin sin anmo'e nalalin lasi le'uf noi ne.’ Hai mimnau msa' am mak, hit ama' in naluli' ma nabees noi Uisnenog na'ko faijan unu'. Hai mfani Uisnenog naan In atel amsa'. Es on naan tabug ii hai iim amtoti sako sanat, natuin hai mmo'e milali sanat moi ko.”
Anneen on nane, nai Yusuf ankae.
18 Lalit in taatf een nekin on neman ma nlituun anbin in matan, ma naguab een am nak, “Maiti kai mjali ho atel.”
19 Mes nai Yusuf nak noi sin am nak, “Sin au tata' ala ki! Hi naika mimtau mtein! Uisnenog anmees kuun es le' anmu'i hak he nhukum tuaf. Mes au le' iij, ka 'mu'i fa hak. 20 Nahunut, namneo hi m'akool he mmo'e amle'ut moi kau. Mes Uisnenog nabaino' hi salit amle'ut naan, he nmo'el ee njali alekot. Es on naan In naiti kau 'jali anaet a'bi pah iij, henati' too mfaun sin napenin ahonis. 21 Es on naan tabug iij, au utoon ki, he naika mimtau piut-piut. Au ufeek kuuk am 'ak, au of 'ail ki, ma hi aanh een ok-oke'.”
Nok aguab nane, nai Yusuf anhatani in taatf een.
Nai Yusuf in amaten
22 Lalit nai Yusuf natgua nabalah anbi pah Masir nok in olif-tataf sin ok-oke'. In nmoni naan toon natun mese am bo'es. 23 In niit nai Efraim in anah in aanh een fe'. Ma in nbabi nai Manase in anah in aanh een, es le' nai Makir in aanh een.
24 Nai Yusuf naguab noi in taatf een am nak, “Sin au tata' ala ki! Au 'naben, au neno matek ee he nteel ee. Mes au 'palsai 'ak Uisnenog of anpaloli ki. In of neki ki mpoi ma'ko pah le' ii. In of nanaak noi ki he mfani moi pah le' In nfeel ee noi hit baba nai Abraham, baba nai Isak, ma hit ama' nai Yakop. In nfee balel naan neki lasi supat.” 25 Lalit nai Yusuf antoti in olif-tataf sin he nsupan am nak, “Hi lo he mpaa' moi kau. Kalu ntee tabug le' Uisnenog neki ki mfani moi hit pah, hi lo he meki au aok-ta'uk ii.”
26 Lalit nai Yusuf anmate nbi pah Masir, ma in nmoni naan toon natun mese am bo'es (110). Lalit sin npaloli in aon-ta'un. Ma sin natunu in aon-ta'un naan anbi in petij.