Nitu le'uf een sin anaak anaet ansobal Usif Yesus
(Nai Mateos 4:1-11; Nai Markus 1:12-13)
4
Tabug nai Yohanis naslani nalali Nai Yesus, Nai Yesus annao nasaitan noel Yarden. Uisnenog In Asmana Knino' nokan. Lalit Asmana Knino' neki Je noi bale luman naloog na'ko kuan. 2 Nai Yesus natgua anbi balel naan, antee nenog bo' haa. Tabug naan, In ka nbukae niit fa saa'-saa', tal antee In namnaah anmaat. Lalit nitu le'uf een sin anakaf ee neem he nakleo nsobal Nai Yesus.3 In naguab nakleo nsobal noi Nai Yesus am nak, “Kalu namneo-namneo Uisnenog In Aanh aa Ko, Ho mmu'i kuasat. Es on naan muguab moi fatun le' iij, he anjalin utunu', he Ho mube'i meku sin.”
4 Mes Nai Yesus natael am nak, “Ho lomim aan in lekon kaah! Ho ka muhine fa, ka? Malula' et Uisnenog In Sula Knino' am nak,
‘Mansian ka nmoni fa alahaa na'ko mnahat!’”a
5-6 Lalit anaak nitug naan neki Nai Yesus noi bale alatas, ma naklila' noi Ne ale' plenat pah-pinan iij es-es nok nani sin pina' ma klaha' sin ok-oke'. Lalit in anfuli' Nai Yesus am nak, “Ale' plenat een sin kuasat naan, au nuug ok-oke'! On nane msa' sin pina' ma klaha' sin! Es on naan au 'mu'i hak he 'nona' 'oi sekom-sekog haa le' au lomij. 7 Au lomi he 'fee sin noi Ko. Aal Ho lo he mmo'e maan lasij mese, he na' au 'nona' Ko ge. Ka nmafena! Mubees moi kau. Es le' nane haa!”
8 Mes Nai Yesus natael ee mnak, “Ho mupeni lasij naan na'ko mee? Anbi Uisnenog In Sula Knino' malula' am nak,
‘Ho lo he mubees moi Uisnenog anmees.
Ma ho lo he mtuthae kuum Ee.’”b
9 Lalit anaak nitug naan neki Nai Yesus antaam noi koot Yerusalem. Anbi naan, in nasaeb Nai Yesus anbi Ume Onen Uuf in fufun. Lalit in naguab am nak, “Kalu Ho namneo-namneo Uisnenog In Anah, mumoufut Ho tuam ee nai! 10 Fun malula' et Uisnenog In Sula Knino' ee mnak,
‘Uisnenog of anlelu In ameput sin na'kon sonaf neno tunan,
he anpafa' ma anpanat Ko.
11 Sin of natnaat Ko,
maut he Ho haem sin naik antoom fatug ba-baun amsa'.’”c
12 Mes Nai Yesus natael am nak, “naik muba'el Kau. Fun malula' et Uisnenog In Sula Knino' ee mnak,
‘naika msobal Uisnenog!’”d
13 Anaak nitug naan ansobal Nai Yesus anpake lalan huma'-huma', mes ka niis Ee fa. Lalit In annao nasaitan Nai Yesus he anpao nteni tabug abjaan.
Usif Yesus annao noi Galilea, ma anmulai natoon Uisnenog In Tu'in Alekot
(Nai Mateos 4:12-17; Nai Markus 1:14-15)
14 Lalit Nai Yesus anfani nteni noi propinsi Galilea, fun Uisnenog In Asmana Knino' anfee Ne kuasat. Ka loog fa te, Nai Yesus In kanan anmulai mateka' anbi abiten pah le' naan. 15 In nanoni' anbi atoni Yahudis sin ume onen sin anbin meel am meel. Es on naan too mfaun sin anbo'is Ee mnak, “Nai Yesus naan, atoni matani'!”
Sin ka nsimo fa Usif Yesus anbi kuan Nasaret
(Nai Mateos 13:53-58; Nai Markus 6:1-6)
16 Tabug mese, Nai Yesus neem anbi In kuan Nasaret. Nateef nok atoni Yahudis sin neno onen, le' sin anteek nak, ‘neno Sabat’, In antaam noi ume onen, on le' bijaas In anmo'e. Lalit In anhake he ntae na'ko Uisnenog In Sula Knino'. 17 Es on naan sin nana'at Ee baba nai Yesaya in lulat. In anfai, he nami taes, es on naan In ntae nak,
18 “Kuasat na'ko Uisnenog In Asmanan, et Au.
Es on naan In anlulu ma anleek Kau,
he utoon Uisnenog In Tu'in Alekot 'oi atoni kasian sin.
In anleek nalali Kau.
he utoon am 'ak,
abiten ume buij, of anpoin na'ko ume buij;
afolot sin, of nabe'i niit anfanin;
tuaf-tuaf le' napenin hamu'it, of anmonin anbin meinuan.
19 Fun tabug iij, Uisnenog In tabug antee lee,
he ansoi nafetin Inin.”e f
20 Antae nalali lulat nane, Nai Yesus annunug ma annona' nafani' noi amepu ibadat, lalit In antook. Abiten ume onen naan ok-oke' nail Ee piut. 21 Lalit In naguab noi sin am nak, “Saa' le' lelon naa hi mneen milalij naan, tabug iij najalib on.”
22 Lalit too mfaun sin le' anbin naan, anmulai naguab nanaeb Nai Yesus am nak, “Hoi! Saa' le' lelon In naguab naan, naleko nmaat! Mes In le' ii nai Usu Anah, ai'? Nansaa' am es on le' iij?”
23 Es on naan Nai Yesus naguab noi sin am nak, “Hi of mihine aguab mese nak, ‘Hoi, mantali menas! Muleko' ho tuam ee fe'!’ Hi mpake aguab naan he m'ote Au aguab mak, ‘Nansaa' am es Ho ka mmo'e fa lasi sanmakat mese noi kai ambi iij, nahuum on le' Ho mmo'el anbi koot Kapernaum?’ 24 In amneot ee on ii: atoni ka nlomi fa he ansimo Uisnenog In mafefa knino' anbi in kuan ee kuun.g 25-26 Taiti 'leta' na'ko Uisnenog In mafefa knino', baba nai Elia. Tabug mese, ulan ka nmofu fa toon tenu ma stena'. Tabug naan, anmu'i bifee banu' namfau anbi pah Isra'el. Mes Uisnenog ka nleek fa baba nai Elia he anbaban too Israelas sin. Mes Uisnenog anleek he annao nbaban banu mese anbi kuan Sarfat anpaumaak koot Sidon. Fun, bifee banu' naan, ka atoni Yahudis fa. Mes in npalsai Uisnenog In kuasan.h
27 Taiti 'leta' abjaan na'ko Uisnenog In mafefa knino', nai Elisa. Tabug naan, anmu'i atoni Yahudis namfau napenin menas atho'al atlaku' anbi pah Isra'el. Mes Uisnenog ka naleko' sin fa. Uisnenog aal anlelu nai Elisa he naleko' tuaf mese aah, kanan nai Na'aman. Fun, amenat naan atoni Sirias, ka atoni Yahudis fa. Mes in anpalsai Uisnenog In kuasan.”i
28 Tabug sin anneen Usif Yesus naguab on nane, sin al-alasin neku nisik een noi Ne. 29 Lalit sin nfenan nabgua, ma anli'u napoitan Ee na'ko ume onen naan. Lalit sin anheel nekij noi kuan in ninen, he antita nataam Ee noi kefa mnanu' anbi naan. 30 Mes In aal annao npoi kuun na'ko too mfaun sin naan sin atnaank een, lalit annao nasaitan sin anbin balel naan.
Usif Yesus anli'u nitug na'ko tuaf mese
31 Lalit Nai Yesus annao noi koot Kapernaum et nefog Galilea in ninen. Ansuun neno onen sin, In nanoni' too mfaun anbin ume onen sin. 32 Too mfaun sin ansanmakan tabug sin nneen In aguaban naan, fun In nahiin namneo-namneo saa' le' In nanoni' sin naan in nesan.j
33 Tabug mese, tabug Nai Yesus nanoni' anbi ume onen, anmu'i naan tuaf mese annitu sae ma anmulai ankua' naheel-heel am nak, 34 “Hoi, Yesus, Atoni Nasaretas! Ho mmu'i ulusan saa' mok kai! Ho uum he mule'un miis kai, oo? Hai mihine Ko. Ho le' iij, Atoni Knino' le' Uisnenog anba'an he anleek Ee neem.”
35 Mes Nai Yesus ankekog ee mnak, “naika mteef lae! Ampoi nai mu'ko atonij naan!” Nok askeken, nitug naan naiti npesek atonij naan noi naijaan, anbi too mfaun een sin maatk een. Anpesek nalali je on nane, nitug naan anpoi na'ko atonij naan ma nasaitan, ma ka namenab ee fa.
36 Too mfaun sin ansanmakan ok-oke' am nak, “Koijoo! Atoni iij In aguab ee anmu'i kuasat matani', oo! Tal antee nitu le'uf sin amsa' natuin In aplenat, ma anpoin na'ko tuaf-tuaf anitu-saet sin!” 37 Lalit tu'in anmatoom nok Nai Yesus naneenb on ma nabenob on anfuun ma natef-tefan balel naan.
Usif Yesus naleko' nai Simon in feel ee inaf, ma tuaf abjaan anteni
(Nai Mateos 8:14-17; Nai Markus 1:29-34)
38 Tabug sin anpoin na'ko ume onen naan, Nai Yesus annao noi atonij mese in umel. Atoni naan, kanan nai Simon.k Nai Simon in feel ee inaf nameen mainik matani'. Lalit sin antoti Nai Yesus am nak, “Aam! Ambaban kai he muleko' maan bifee mnasi ii fe'!” 39 Nai Yesus annao nhake nbi hala' ee matan, lalit anli'u napoitan meen mainikij naan. Tabug naan amsa', menas naan namneku nani na'ko bifee mnasi' naan. Lalit in anfeen ma nabalab bukaet noi sin.
40 Tabug manas noi nmofu naan, too mfaun sin anmulai neman ma nekin amenat huma'-huma' noi Nai Yesus. Lalit In antao In animan noi sin ok-oke', ma naleko' sin. 41 Anbi amenat sin naan amsa' anmu'i tuaf fauk le' nitug ansaen sin. Lalit Nai Yesus naplenat nitu le'uf sin naan he anpoin na'kon tuaf-tuaf sin naan. Tabug sin anpoin, sin anhunun een am nak, “Ho le' iij, Uisnenog In Anah!” Fun nitu le'uf sin naan nahinel nak, In le' naan, Kristus le' Uisnenog anba'an nanij he nleek Ee neem. Natuin lasij naan, es na' Nai Yesus nakain sin nok matani' he sin naik naguab een hanaf mese amsa' anmatoom nok In tuan.
Usif Yesus annao natoon Tu'in Alekot anbi ume onen sin
42 Tabug fa-fai ana, Nai Yesus anfeen ma annao noi bale luman mese anbi koot in kotin. Too mfaun sin namij anbin meel am meel. Tabug sin niit ma nateef nokan, sin naguab een am nak, “Aam. Leko te, Ho mutgua mok kai mbi iij ee nai! naika mnao mteni moi balel abjaan!”
43 Mes In natael am nak, “Au lo he 'nao 'oi kuan abjaan he utoon Tu'in Alekot anmatoom nok Uisnenog In Aplenat. Fun Uisnenog le' anleek Kau ge, nak Au lo he mepu mepug naan.”
44 Es on naan In anmulai nnao, npoi ma ntaam na'ko kuan mese noi kuan mese, ma nanoni' tuaf anbin ume onen sin anbin propinsi Yudea.