Nai Yohanis Aslanit naiti in mepug
(Nai Mateos 3:1-12; Nai Markus 1:1-8; Nai Yohanis 1:19-28)
3
1-2 Tabug naan, nai Tiberius anjali usi naek kesel ma annaa' aplenat anbi pah Roma toon bo'es am niim eeh. Nai Pontius Pilatus anjali gubernur anbi propinsi Yudea. Nai Herodes anjali gubernur anbi propinsi Galilea. Nai Herodes tataf nai Felipus, anjali gubernur anbi propinsi Iturea ma propinsi Trakonitis. Ma nai Lisanias anjali gubernur anbi propinsi Abilene.aTabug nane msa', nai Hanas ma nai Kayafas anjalin anaak lasi palsait Yahudi sin anaak anaet anbi koot Yerusalem.
Tabug naan, nai Yohanis, nai Sakarias in anah, natgua nbi bale luman naloog na'ko kuan. Anbi balel naan, Uisnenog naguab ma anpaa. 3 Anneen nalali on nane, nai Yohanis antaam noi ale' kuan-kuan le' anpaumaak noel Yarden, ma natoon noi abiten naan am nak, “Hi lo he mmanaku' ma misaitan hi sanat sin ok-oke', he Uisnenog annose nani sin. Lalit hi lo he mislani fe', he nfani taka nak hi mmahalan nekaf amfaan jen mok Uisnenog.”
4 Nahunut, Uisnenog In mafefa knino' baba nai Yesaya anluul anmatoom nok nai Yohanis le' iij am nak,
“Anmui' tuaf le' of annao noi balel le' ka matua' fa, lalit anhunun ma ankua' am nak,
‘Ale' too mfaun sin lo he mibalab ma miloitan lalan, he msenu ma mitaim Usi' In amneman!
Miknoni' lalan he msenug.
5 Amkuub ma mnae mineel kefan ma kubaij.
Amnae ma mhani mineel a'nu'af sin.
Mineo ma minoon lalan apenut am abeot sin,
Amha'eki laal kubaij ma fatu putun.
6 Maut he tuaf-tuaf na'ko uuf-uuf ma pah-pah,
nabe'i nahinen nak, Uisnenog anlomi he ansoi nafetin mansian
na'ko sin sanat ma penu sin.’”b
7 Too mfaun neman na'kon meel am meel, ma antoti nai Yohanis he naslani sin. Mes in ankeko sin am nak, “Hoi, aputa-kliun amaufinu ki! Hi on le' kaun lasog aan! Hi naik mitenab mak, hi mipiis mima-moe he hi mibe'i msoi maan om ma'ko Uisnenog In hukum! Kahaf! Ka loog fa te, Uisnenog nasanut hukum noi tuaf-tuaf le' napiis nama-moe lah!c 8 Hit tahine tak baba nai Abraham naan, Uisnenog in nonot. Mes hi naik mitenab am mak, ‘Au ka upeni fa hukum, natuin au le' iij baba nai Abraham in sufan.’ Hi mipeni lasij naan na'ko mee? Naan ka nabe'i nbaban ki fa. Natuin lasij naan ka nmo'e ki fa he mjali atoni neek amneot. Uisnenog nabe'i anmo'e fatun le' iij anjalin baba nai Abraham in sufan. Au utoon ki, hee! Miklila' ambi hi 'monim sin nane nai, mak hi mnao misaitan hi sanat sin ee, ma mfani iim mituin Uisnenog.d 9 Hi lo he mmo'e lasi alekot. Kalu ka fa te, Uisnenog In hukum mafena' anmofu ntoom ki on le' atoni anpake fanij he n'ote niis haug na'ko in a'ba'an. On le' naa! Haug naan ka mapake' fa, kalu ka nmu'i fa in fuan alekot! Es on naan leko nnesi amlalug, lalit totug he anputu nmaat.”e
10 Lalit too mfaun sin antoti nai Yohanis am nak, “Es on naan hai he mmo'e on mee?”
11 Lalit, in natae sin am nak, “Kalu ho mmu'i soo balug nuug, amfee mese noi tuaf le' ka nmu'i fa soo balug. Kalu ho mmu'i mnahat, ambati noi tuaf le' ka nmu'i fa amnahat.”
12 Lalit akoni noni ponij sin neman ma antoti nai Yohanis he naslani sin. Sin antotin am nak, “Aam kulug! Hai he mmo'e on mee?”f
13 In natael am nak, “Hi lomim een es le' amputa-kliun. Mes anmulai tabug iij, hi lo he mmepu nok neek amneot. naika mheel noni ponij anneis-neis na'ko plenat in atolan. Maut he toog ee nbaen sin noni ponij anmatai nok atolan.”
14 Solalus fauk anbin nane msa'. Sin antoti nai Yohanis am nak, “Kalu hai, on mee? Hai lo he mmo'e on mee?”
Lalit in natae sin am nak, “naik amhoki tuaf abjaan een sin loit een mituin hi lomim sin naan. naika misuub tuaf abjaan sin alafgua-lafug. Hi lo he misaeb sukuul ma minokab hi tenab sin nok ahaa hi sebat sin naan.”
15 Anneen in aguab een nane, too mfaun sin anmakosun ma nmase'og een am nak, “Hoi! Naik-naika nai Yohanis le' iij, Kristus, le' Uisnenog anba'an he anleek Ee neem na'ko unu' nane, oo!”
16 Mes nai Yohanis nakain sin am nak, “Amneen milek-leko'! Anmui' tuaf mese, le' matani' annesi na'ko kau of he neem. Maski au 'jali haa in aan lelu amsa', au ka umnees 'ok Ne fa.g Au aal ube'i uslanij haa ki apake oel, mes In of anmo'e nnesi na'ko kau, natuin In nahenu hi nekam sin nok Uisnenog In Asmana Knino'. In of naknino' ki, on le' ttoutu nunu' anpake aij. 17 In anhukum tuaf le' anmo'e nsaan, nahuum on le' atoni tani le' anpake anin he nfuu anbeti anel noko in ta'un. Lalit in napaan anel anbi aba', mes notu naklati ane ta'ug ma ane apa'. On nane msa' Kristus of anhukum tuaf-tuaf le' anmo'en sanat, ma naiti npolin sin noi ai malala' abal-balat.”
18 Nok lalan naan, nai Yohanis namnauba too mfaun sin nok lasi huma'-huma', ma natoon Uisnenog In Tu'in Alekot noi sin.
19-20 Tabug naan, nai Yohanis anmulai naguab maat-maat anmatoom nok nai Herodes in amo'en. In lasij on ii: nai Herodes naan, gubernur et propinsi Galilea. In sanat sin na'tupu nsae. Es, es le' in anheel naan in olif ee feel, kanan bi Herodias. Fun, in olif anmoni fe', ma ka npolin fa in feel bi Herodias fa fe'. Nai Herodes in amonin le' ka namneo fa naan, anmo'e nai Yohanis nakain ee maat-maat, tal nai Herodes aneek fotan. Lalit nai Herodes anheke nai Yohanis, ma nataam ee nbi ume buij.h
Nai Yohanis naslani Usif Yesus
(Nai Mateos 3:13-17; Nai Markus 1:9-11)
21 Nahunut, tabug sin ka nheke fa nai Yohanis fa fe', in naslani too mfaun. Ma in naslani Nai Yesus amsa'. Lalit Nai Yesus an'onen, es on naan nenog natfai. 22 Lalit Uisnenog In Asmana Knino' ansanu neem noi Ne. Asmana Knino' naan In masan nahuum on le' algua-sisij. Ma anmu'i hanaf na'ko nenog ee mnak,
“Ho le' iij, Au Aan neka'.
Ho mmo'e Au nekak iij, anmaliin piut.”i
Usif Yesus In babaf sin, natuin nai Yusuf in uuf sin
(Nai Mateos 1:1-17)
23 Tabug Nai Yesus anmulai natoon noi too mfaun sin anmatoom nok Uisnenog In lalan, In oni' anmoni naan toon bo' teen gue. Tuaf amfaun nahinen nak, Nai Yesus naan, nai Yusuf in Anah. Nai Yusuf in uuf een, on ii:
Nai Yusuf in amaf, nai Eli.
24 Nai Eli in amaf, nai
Nai Matat in amaf, nai Lewi.
Nai Lewi in amaf, nai Melki.
Na' Melki in amaf, nai Yanai.
Nai Yanai in amaf, nai Yusuf.
25 Nai Yusuf in amaf, nai Matatias.
Nai Matatias in amaf, nai Amos.
Nai Amos in amaf, nai Nahum.
Nai Nahum in amaf, nai Hesli.
Nai Hesli in amaf, nai Nagai.
26 Nai Nagai in amaf, nai Maat.
Nai Maat in amaf, nai Matatias.
Nai Matatias in amaf, nai Semein.
Nai Semein in amaf, nai Yosek.
Nai Yosek in amaf, nai Yoda.
27 Nai Yoda in amaf, nai Yohanan.
Nai Yohanan in amaf, nai Resa.
Nai Resa in amaf, nai Serubabel.
Nai Serubabel in amaf, nai Seltiel,
Nai Seltiel in amaf, nai Neri.
28 Nai Neri in amaf, nai Melki.
Nai Melki in amaf, nai Adi.
Nai Adi in amaf, nai Kosam.
Nai Kosam in amaf, nai Elmadam.
Nai Elmadam in amaf, nai Er.
29 Nai Er in amaf, nai Yosua.
Nai Yosua in amaf, nai Eliaser.
Nai Eliaser in amaf, nai Yorim.
Nai Yorim in amaf, nai Matat.
Nai Matat in amaf, nai Lewi.
30 Nai Lewi in amaf, nai Simeon.
Nai Simeon in amaf, nai Yahuda.
Nai Yahuda in amaf, nai Yusuf.
Nai Yusuf in amaf, nai Yonam.
Nai Yonam in amaf, nai Elyakim.
31 Nai Elyakim in amaf, nai Melea.
Nai Melea in amaf, nai Mena.
Nai Mena in amaf, nai Matata.
Nai Matata in amaf, nai Natan.
Nai Natan in amaf, nai Daut.
32 Nai Daut in amaf, nai Isai.
Nai Isai in amaf, nai Obet.
Nai Obet in amaf, nai Bo'as.
Nai Bo'as in amaf, nai Soleman.
Nai Soleman in amaf, nai Nahason.
33 Nai Nahason in amaf, nai Aminadap.
Nai Aminadap in amaf, nai Atmin.
Nai Atmin in amaf, nai Arni.
Nai Arni in amaf, nai Hesron.
Nai Hesron in amaf, nai Peres.
Nai Peres in amaf, nai Yahuda.
34 Nai Yahuda in amaf, nai Yakop.
Nai Yakop in amaf, nai Isak.
Nai Isak in amaf, nai Abraham.
nai Abraham in amaf, nai Tera.
Nai Tera in amaf, nai Nahor.
35 Nai Nahor in amaf, nai Seruk.
Nai Seruk in amaf, nai Rehu.
Nai Rehu in amaf, nai Pelek.
Nai Pelek in amaf, nai Eber.
Nai Eber in amaf, nai Sela.
36 Nai Sela in amaf, nai Kenan.
Nai Kenan in amaf, nai Arpaksat.
Nai Arpaksat in amaf, nai Sem.
Nai Sem in amaf, nai Noh.
Nai Noh in amaf, nai Lamek.
37 Nai Lamek in amaf, nai Metusalak.
Nai Metusalak in amaf, nai Hanok.
Nai Hanok in amaf, nai Yaret.
Nai Yaret in amaf, nai Maharael.
Nai Maharael in amaf, nai Kenan.
38 Nai Kenan in amaf, nai Enos.
Nai Enos in amaf, nai Set.
Nai Set in amaf, nai Adam.
Nai Adam naan, Uisnenog nekin On es anmo'el.