Kmalar Lulik latan babelen baa ita ida-idak atu halo serwisu oi-oik
12
Mamaluk sia! Ha'u kakara nebee emi hatene hosi lia babelen mak Na'i Maromak Kmalar Lulik latan baa ita. 2 Emi hatene ha'ak, oras emi sei la dadi dauk Kristus eman, emi lo'u-sudur baa ai'oi lulik nunuk sia. Emi tuir sia nu'u karau tuu inun. 3 Nebee emi hatene, ema mak talin malu no Maromak Kmalar, sia la dala ida dale nahaat Yesus na'ak, “Kalo'an naa!” Nunia moos, ema mak la talin malu no Maromak Kmalar la dala ida dale tonun Yesus na'ak, “Ha'ukaan Na'in!”4 Ita ida-idak simu babelen hodi hala'ok serwisu oi-oik. Masik babelen oi-oik moos, huun ida dei. Ne'e mak, Maromak Kmalar. 5 Ita hotu-hotu hetan babelen oi-oik atu hodi haliku ema seluk, mais ita hanono baa Na'in ida dei. 6 Nia foo ita serwisu oi-oik, mais Nia mesan mak tulun ita bele hala'ok serwisu nia sia. 7 Nia latan Niakaan Kmalar Lulik baa ita ida-idak tuir dalan oi-oik, tan Nia nakara nebee ita hotu-hotu hetan sotir bele-bele. 8 Oras Nia latan Kmalar Lulik beran baa ita ida-idak, balu simu babelen atu hanoin naruk, hodi foo tate'an makonak. Balu simu babelen atu katak malorek lia mak sia simu nosi Nia. 9 Balu simu babelen atu fiar metin, tan sia kre'is no Maromak Kmalar. Balu simu babelen atu nadi'ak nola ema moras. 10 Balu simu babelen atu nalo tadak blaar oi-oik mak natudu Na'i Maromak maka'as. Balu simu babelen atu katak Na'i Maromak mamenon baa ema sia. Balu simu babelen atu natene na'ak, lia saa mak nahabut baa Na'i Maromak, no lia saa mak lale. Balu simu babelen atu dale nodi lia oi-oik. Balu tenik, simu babelen atu nodi nalore lia nia sia isin. 11 Babelen oi-oik nia nahabut baa Maromak Kmalar mesak dei. Nia foo baa ita ida-idak, tuir Niakaan beer.a
Masik ita wa'in, ita nu'u isin lolon ida, tan talin malu ho Kristus
12 Ha'u atu kanesa ita hotu-hotu mak simu babelen oi-oik nia sia, baa ema ida isin lolon. Isin lolon ida noo isin rohan oi-oik. Mais rohan oi-oik nia talin aan baa malu dadi baa isin lolon mesak.b
Nunia moos ita mak dadi baa Kristus eman sia. 13 Ita hotu-hotu talin malu tan ita simu Maromak Kmalar mak mesak dei. Baa oras ita simu sarani, ita dadi nu'u ema klubun ida. Masik ita ema Yahudi ka, lahoos ema Yahudi ka, ata ka, lahoos ata ka, Na'i Maromak latan Niakaan Kmalar mesak dei bodik ita hotu-hotu. Lia nia nu'u ita hotu-hotu hemu wee mak foo moris nosi wee knuuk mesak dei.
14 Tebes. Isin lolon ida noo rohan wa'in, lahoos rohan ida dei. 15 Kalo ain na'ak, “Ha'u ne'e, lahoos liman. Ha'u la ksoman ko isin lolon,” bele nunia ka? La bele. Masik ain dale nunia moos, nia soman bei-beik no isin lolon. 16 Kalo tilun na'ak, “Ha'u ne'e, lahoos matan. Ha'u la ksoman ko isin lolon,” bele nunia ka? La bele. Masik tilun dale nunia moos, nia soman bei-beik no isin lolon. 17 Manoin lai! Kalo isin lolon dadi loos matan dei, oin nunabee ita bele rona? Kalo isin lolon dadi loos tilun dei, oin nunabee ita bele horan nuhar?
18 Mais emi hatene ti'an ha'ak, Na'i Maromak nase'i ita atu dadi nu'u isin lolon ida no rohan oi-oik. Nia babilan isin lolon rohan oi-oik nia, tuir Niakaan beer. 19 Kalo itakaan isin lolon dadi loos rohan oik ida dei, nia lahoos ‘isin lolon’ ona. 20 Isin lolon ida noo rohan oi-oik. Rohan oi-oik nia soman malu dadi isin lolon tomak ida.
21 Ema ida matan la bele naraik liman, nodi na'ak, “Ha'u la kbuka o!” Nunia moos ulun la bele naraik ain na'ak, “Ha'u la kbuka o!” 22 La bele. Mais nune'e. Noo isin lolon rohan sia mak ita la hafolin. Masik nunia moos, ita buka sia. 23 Isin lolon rohan nia sia mak ita hafolin la kabaas, ita haliku hodi tais kabaas. Isin lolon rohan mak ita moe hasai, ita taka di'a-di'ak. 24 Mais isin lolon rohan mak la namoe ita, ita la titu resik.
Na'i Maromak nalo rohan nia sia dadi baa isin lolon ida. Hotu Nia babilan nebee rohan mak ita hafolin la kabaas, ita haliku di'a-di'ak. 25 Nia la nakara isin lolon rohan sia sasa fa'e malu, mais nakara nebee naliku malu. 26 Kalo rohan ida netan susar, rohan seluk sia tuir susar bele-bele. Kalo rohan ida netan kneter, rohan seluk sia tuir neon di'ak bele-bele.
27 Nunia moos ita. Ita nu'u Kristus isin lolon. Ita ida-idak nu'u rohan ida nosi Niakaan isin lolon nia. 28 Na'i Maromak foo babelen baa ita ida-idak iha hutun sarani laran atu hodi serwisu oi-oik.
Dala uluk, Nia solok ema balu dadi baa Niakaan klosan.
Dala rua, Nia nalo ema balu dadi baa Niakaan mako'an atu nato'o Niakaan mamenon.
Dala tolu, Nia nalo ema balu dadi baa ema manorik mak matenek nanorin nosi Nia.
Nia moos foo beran baa ema balu atu nalo tadak blaar oi-oik nodi natudu Niakaan maka'as.
Balu netan beran atu nadi'ak nola ema moras.
Balu netan babelen atu tulun ema.
Balu netan babelen atu babilan ema makserwisu di'a-di'ak.
Nia foo beran baa balu tenik, nebee bele dale nodi lia oi-oik.c
29 Dadi, nunabee? Na'i Maromak solok Niakaan ema hotu-hotu atu dadi baa klosan ka? Nia nalo hotu-hotu baa mako'an ka? Nia nalo hotu-hotu baa manorik ka? Nia foo beran baa hotu-hotu atu nalo tadak blaar ka? 30 Nia foo beran baa hotu-hotu atu nadi'ak nola ema moras ka? Nia nalo hotu-hotu dale nodi Kmalar lian ka? Nia nalo hotu-hotu bele natene lia isin nosi Kmalar lian ka? Lale.
31 Lia nune'e! Kalo emi buka atu simu babelen nosi Na'i Maromak, buka babelen sia mak bele tulun ema wa'in. Tan babelen nia sia, mak folin liu.
Mais noo lia ida mak di'ak kaliuk. Oras ne'e, ha'u atu kalore lia nia baa emi.