2 Korintus
Paulus nakerek dala rua
bodik hutun sarani iha kota Korintus
Tabe
1
Hakerek ne'e nosi ha'u, Paulus, mak Na'i Maromak boi baa Yesus Kristus klosan. Itakaan maluk Timotius namutuk no ha'u iha ne'e. Ami rua solok tabe.Ha'u kalo hakerek bodik emi hutun sarani sia iha kota Korintus no rai Akaya tomak.a 2 Ha'u kaloon baa itakaan Ama Maromak no itakaan Na'in Yesus Kristus, nebee natudu laran di'ak baa emi, nebee emi bele moris manek no dame.
Paulus tonu Na'i Maromak
3 Ami hakara nebee ema hotu-hotu foti-nahaas Na'i Maromak naran. Tan Nia, itakaan Na'in Yesus Kristus Aman. Horan dodan hotu-hotu nahabut nosi Nia. Nia mak nakbiit itakaan neon nohuun. 4 Kalo ita hetan susar, Nia nalo ita neon di'ak. Hodi nunia, ita bele halo ema seluk neon di'ak. 5 Kristus netan susar wa'in tan nalo lia di'ak bodik ita. Mais oras ita hetan susar, ita moos hetan babiit hosi Na'i Maromak, tan ita talin malu ho Kristus. 6 Oras ami hetan susar, Na'i Maromak nakbiit amikaan neon, nebee ami bele haterus aan hodi neon boot. Na'i Maromak moos nodi dalan nia nebee ami bele hakbiit emikaan neon no sori emi hosi lia aat sia. Hodi nunia, kalo emi hetan susar hanesan ami, Na'i Maromak moos nakbiit emikaan neon, nebee emi bele haterus aan hodi neon boot hanesan ami. 7 Ami fiar ha'ak, emi bele terus biit. Tan kalo emi hetan susar nu'u ami, Na'i Maromak bele nakbiit emikaan neon, nu'u Nia moos nakbiit ti'an amikaan neon.
8 Mamaluk sia! Ami hakara nebee emi hatene tebes hosi susar mak ami hetan iha rai Asia. Baa oras nia, ami horan todan liu tan amikaan babelen. Ami neon mamar, to'o haneo loos mate dei.b 9 Ami horan nu'u ema ida mak rona tekis ema makotu lia taa ukun mate baa nia. Mais lia nia sia hotu-hotu dadi, nebee ami hetak fiar baa Na'i Maromak, no la tara aan baa amikaan babelen du'uk. Na'i Maromak, mak noo beran atu nalo ema mak mate ti'an moris nikar. 10 Nia mak sori ami nosi lia aat sia baa oras ami kre'is mate. Ami haloon baa Nia ha'ak, Nia moos nakara sori emi nunia. 11 Kalo emi hamulak bodik ami, hahalok nia tulun ami. Hodi nunia, Na'i Maromak nalo lia di'ak bodik ami, tan ema wa'in namulak bodik ami. Hotu, baa oras ema wa'in nia sia nanoin ami, sia moos sera dodan baa Na'i Maromak.
Tan saa Paulus sei la baa tenik kota Korintus dauk
12 Ami bele dale wa'in, tan amikaan serwisu loos no tebes. Ami serwisu hodi neon moos tuir Na'i Maromak nakara. Ami hetan matenekc hosi Na'i Maromak, lahoos hosi ema raiklaran. Hodi nunia, ami bele tulun ema wa'in, kaliuk emi. 13 Iha hakerek ne'e, ha'u kakerek loos lia mak emi bele hatene. Oras ne'e, emi foin hatene ha'ukaan hakaran balu. Mais ha'u kaloon, kalo bele, emi hetak hatene liu tan tenik. 14 Masik baa oras ne'e, emi foin hatene balu, nosi ikus, oras itakaan Na'in Yesus Kristus mai nikar, ha'u kfiar emi bele hatene hotu. Hodi nunia, emi bele neon boot tan ami, hanesan ami moos neon boot tan emi.
15 Uluk, ha'u kakotu ti'an atu ktone karee emi tenik, nebee ha'u kbele tulun emi isin rua. 16 Ha'u kaneo ka'ak, kalo ha'u kbaa rai Makedonia, ha'u ktuli karee emi. Hotu, kalo ha'u kfila mai kosi Makedonia, ha'u kbele tuli emi tenik. Hotu, emi bele tulun ha'u la'o liu baa rai Yudea.d
17 Mais ha'u ksei la tone dauk. Arumak emi haneo ha'ak, ha'u kbosok emi ka? Arumak emi haneo ha'ak, ha'u kdale karin nu'u ema mak tuir raiklaran beer ka? Arumak emi haneo ha'ak, ha'u ne'e, ema oin-kotuk mak iha oin na'ak, “he'e!” iha kotuk na'ak “lale!” Arumak emi haneo ha'ak, ha'u ne'e, ilas nunia ka? 18 Lale. Nune'e mai. Kalo Na'i Maromak dale lia ida, nanis Nia nalo tuir. Ami moos nunia. Kalo ami dale iha oin ha'ak, “he'e!”, iha kotuk la ha'ak, “lale.”
19 Ha'u ko Silas no Timotius hanorin emi ti'an hosi Yesus Kristus, Na'i Maromak Oan. Kristus lahoos ema oin-kotuk mak iha oin dale “he'e”, iha kotuk dale “lale”. Yesus moos la koen kedas, tan kalo Nia dale “he'e”, “he'e” bei-beik.e 20 Lia hotu-hotu mak Na'i Maromak nameno bodik ita, nanis Nia nalo tuir. Nunia moos, kalo Yesus nameno lia ida na'ak, “he'e,” ita bele hatebes ha'ak, “tebes!” tan ita talin malu ho Nia. Hodi nunia ita moos hatudu Na'i Maromak Niakaan maka'as. 21 Na'i Maromak, mak boi nola emi no ami ti'an. Nia mak foti ita baa Niakaan ema. Nia moos nalo ita bele terus bei-beik. 22 Nia foo Niakaan Kmalar Lulik atu babilan ita, nodi natudu Niakaan hakaran bodik ita. Lia nia hanesan ema ida marak niakaan karau sia atu foo tadak na'ak, karau nia, niakaan sasoin.
23 Ha'u kdale ne'e, la bosok. Na'i Maromak natene ha'ukaan neon laran. Nia natene tan saa ha'u ksei la tone emi iha kota Korintus dauk. Nune'e mai. Ha'u la ktone dauk, tan la ko'uk kamoe emi, tan emikaan hahalok aat. 24 Ami la beer dadi ulun bodik emi. Mais ami beer serwisu bele-bele ho emi, nebee emi bele neon boot no haterus aan biit, tan fiar baa Na'i Maromak.