2-3 Uluk aan, Na'i Maromak babilan kedan, nebee Niakaan mako'an sia nakerek nola Manfatin Di'ak nia iha Hakerek Moon laran. Iha Hakerek nia, Na'i Maromak nameno atu solok Oan Yesus, nebee dadi ema raiklaran. Baa oras ne'e, Na'i Maromak mamenon nia dadi ti'an, tan Yesus moris iha raiklaran ti'an. Nia dadi ema raiklaran nosi Na'i Daud husar-binan. 4 Mais Nia moos Na'i Maromak Oan, tan Nia moon manesak no Na'i Maromak. Nosi ikus, Na'i Maromak nodi Niakaan beran, nalo Yesus moris nikar nosi mate. Tan lia nia, ita bele hatene ha'ak, Yesus Kristus nia, Na'i Maromak Oan, mak itakaan Na'in.

5 Yesus natudu laran di'ak baa ha'u, nodi solok ha'u atu kbaa katak Niakaan lia di'ak iha fatin hotu-hotu. Nia nakara nebee ema lahoos Yahudi sia moos fiar baa Nia no tuir Niakaan dalan moris. Tan lia nia, ha'u moos kakara nebee ema nosi klubun hotu-hotu fiar baa Nia no tuir Niakaan dalan moris.

6 Nunia moos, emi iha kota Roma. Emi mai hosi klubun wa'in, hosi fatin lear. Yesus Kristus boi nola emi ti'an, dadi Niakaan ema. 7 Tan lia nia, ha'u kakerek lia ne'e bodik emi iha Roma. Ha'u ksolok tabe kodi foo katene ka'ak, Na'i Maromak nadomi emi. Nia moos nusu nebee emi dadi ema mak moris moon.

Kamulak nebee itakaan Ama Maromak no itakaan Na'i Yesus Kristus natudu laran di'ak baa emi, nodi foo moris manek no dame.

8 Ha'u kahuu kakerek ne'e kodi kamulak sera dodan baa Na'i Maromak, tan Yesus Kristus serwisu iha emikaan neon ti'an. Ha'u moos sera dodan, tan ema hotu-hotu mak nein iha ukunrai Roma rain dale nosi emikaan fiar baa Yesus.

9 Loron-kalan ha'u la kanawa kamulak bodik emi. Lia ne'e tebes. Na'i Maromak du'uk natene. Ha'u kserwisu bodik Nia kodi neon tomak atu keke Niakaan Oan Manfatin Di'ak. 10 Sura oras kamulak, ha'u kakro'an nune'e: “Aaa, Na'i Maromak! Ha'u du'uk la katene dalan nunabee. Mais kalo tuir Ita Boot beer, loke dalan nebee ha'u kbele baa karee ha'ukaan mamaluk sia iha Roma.”

11 Kamulak nunia, tan ha'u kbeer karee emi, atu kakbiit emikaan neon kodi Na'i Maromak Kmalar Lulik beran, nebee emi dadi Na'i Maromak eman mak fiar hetak biit. 12 Ne'e na'ak, kalo ha'u kdadi mai kein ko emi, ita bele hakbiit malu neon, to'o hetak fiar.

13 Mamaluk sia mak ha'u kadomi! Nebee emi hatene, dala wa'in ti'an ha'u kakara baa karee emi iha Roma. Mais to'o oras ne'e, la dadi dauk. Mais kalo ha'u kdadi mai, kaloon nebee ema wa'in hetak fiar baa Yesus Kristus, hanesan ema iha fatin seluk sia. Hodi nunia, ha'ukaan serwisu noo folin.^a

14-15 Ha'u kmusti keke Yesus Manfatin Di'ak baa ema hotu-hotu. Baa ema mak natene lia Yunani no ema mak natene lia seluk sia. Baa ema boot no ema ki'ik. Baa ema mak sakola no ema mak la sakola. Tan lia nia, ha'u kadi'a aan ti'an atu kbaa Roma, nebee keke Manfatin Di'ak baa emi iha nebaa.

16 Ha'u la kmoe keke Yesus Manfatin Di'ak. Tan Manfatin nia nodi Na'i Maromak beran sori nola ema hotu-hotu nosi sala. Ema Yahudi sia rona uluk Manfatin nia, foin ema klubun seluk sia.^b 17 Manfatin nia natudu Na'i Maromak dalan atu naloos ema. Lia nia bele dadi kalo ema fiar baa Nia. Hakerek Moon na'ak,

18 Na'i Maromak katak ti'an nune'e: kalo ema se'i kotuk baa Nia, no ema nalo aat oi-oik, Nia la simu hahalok nunia. Ema oin nunia natene ti'an saa mak loos, mais sia sei nalo aat luku dei. Sia moos seten ema seluk to'o la natene tenik lia loos. Etuk, Na'i Maromak atu natuun kastikar baa sia nosi lale'an. 19-20 Sia la noo lia krarain ida kois nodi naloos aan, tan Na'i Maromak lisan malorek ti'an. Nia natudu baa ema hotu-hotu. Masik ita la bele haree Nia, hori Nia nase'i lale'an no raiklaran, ita ema raiklaran bele haree saa mak Nia nase'i hodi hatene Niakaan maka'as no Niakaan beran. Tan lia nia, la noo ema ida kois mak bele naloos aan na'ak, “Ha'u la katene lia Maromak.”

21 Tebes. Ema nia sia natene Maromak lisan, mais sia la no'uk simu Nia. Sia la no'uk lo'u-sudur baa Nia. Sia moos la no'uk sera dodan baa Nia. Tan lia nia, siakaan kakutak nahutan aan, to'o la natene tenik lia loos. Sia dadi benar no nase'i lia aat oi-oik baa Na'i Maromak. Siakaan neon nakukun.^d

22 Sia foti aan na'ak, “Ha'u ne'e, matenek kaliuk!” Mais tuir loos, sia beik nu'u karau tuu inun. 23 Sia se'i kotuk baa Na'i Maromak mak boot kaliuk, tan sia naneo na'ak, “Ami la ho'uk Maromak oin nunia!” Hotu, sia lo'u-sudur baa ai'oi lulik ilas ema raiklaran. Sia moos lo'u-sudur baa ai'oi lulik ilas manu, samea, no buat seluk sia. Hodi nunia, sia dudu nasai Maromak mak la bele mate, nodi lo'u-sudur baa buat mak bele mate!^e

24 Tan baa nia, Na'i Maromak se'i kotuk no nabusik sia moris tuir siakaan hakara dei. Nia moos nabusik nela nebee sia nalo tuir a'aat oi-oik mak nahabut baa siakaan neon, to'o sia la natene moe. Nodi hahalok aat nia sia, sia nadoor isin lolon du'uk no nadoor ema seluk isin lolon. 25 Iha neon laran, sia natene hanorin loos nosi Na'i Maromak ti'an, mais la no'uk simu. Sia seluk hanorin loos nodi hanorin kadoor. Hodi nunia, sia lo'u-sudur baa buat mak Maromak nase'i, mais la no'uk lo'u-sudur baa Maromak mak nase'i buat nia sia!

Tuir loos, Na'i Maromak mesan dei mak ema raiklaran musti tonu-nahaas nodi nakneter nima-nimak! Tebes!

26 Tan siakaan hahalok aat nia, Na'i Maromak nabusik nela sia nalo tuir siakaan hakara dei. Sia nalo lia kfo'er oi-oik, nodi la moe. Feen la no'uk toba namutuk no la'en, mais nakara mak la makonak, tan feto toba no feto. 27 Mane sia moos nunia. Sia la no'uk toba namutuk no feen, mais toba no mane. Sia la moe kois! Mais nosi ikus, sia atu kona kastikar manesak no siakaan a'aat nia, tan sia sees dook ti'an nosi dalan loos.

28 Sia naneo na'ak, “Lalika talin malu ho Na'i Maromak.” Etuk, Na'i Maromak se'i kotuk no nabusik nela sia nalo tuir siakaan hakara dei! Sia naneo loos lia aat nodi nalo lia mak la tuir dalan!

29 Siakaan moris nakonu no lia aat oi-oik. Sia nalo aat dei, la natene nalo di'ak. Sia rotus teen. Sia hirus ema. Sia tinuk teen. Sia maho'o ema. Sia makaat aat. Sia bosok teen. Sia tolek teen. Sia dale nahaat ema naran. 30 Sia ema oin-kotuk. Sia hirus Na'i Maromak. Sia notar lalek. Sia titu naraik ema. Sia naksa'ek aan. Sia buka dalan aat oi-oik. Sia sakar ema matas sia. 31 Sia la nakara lia loos. Sia nakur mamenon du'uk, to'o ema la fiar tenik. Sia la dodan ema. Sia dadomin lalek.

32 Sia natene Na'i Maromak ukun na'ak, ema mak nalo aat oin nunia, fatan kona kastikar mate. Masik nunia moos, sia sei nalo aat bei-beik. Lahoos nunia dei, tan sia moos sasuku ema seluk, nebee tuir nalo aat bele-bele. Hahalok oin nunia, liu resik!