Paulus naloos aan iha Na'i Agripa oin
26
Hotu Na'i Agripa naruka Paulus na'ak, “Oras ne'e, o bele dale maloos aan. Ami hotu-hotu hadi'a aan ti'an atu rona o.”Paulus moos foti liman, hotu dale na'ak,
2 “Ama Na'i Agripa mak ha'u kakneter. Ha'u ksotir di'ak tan ita boot foo leet baa ha'u atu dale baa ama sia nosi lia hotu-hotu mak ema Yahudi sia tula baa ha'u. 3 Ha'u moos sotir di'ak tan ama natene tebe-tebes itakaan adat Yahudi no itakaan lia mate-moris. Ha'u kusu nebee ita boot rona di'a-di'ak.
4 Ha'u ksei lawarik, ema nanorin ha'u atu tuir itakaan adat Yahudi. Uluk fohon, sia nanorin ha'u iha ha'ukaan leo. Hotu ha'u kmai sakola tenik iha Yerusalem. Ema Yahudi iha Yerusalem natene tebe-tebes ha'u no ha'ukaan moris dalan. 5 Kalo na'ilulik ulun sia ema moon, sia bele dale na'ak, sia natene ha'u ti'an hori uluk. Ha'u ne'e moos tama partee Farisi. Ema hotu-hotu natene ami ema Farisi ne'e, mak maka'as kaliuk tuir ukun-badu Yahudi hotu-hotu.a 6-8 Ha'u ko ema Isra'el klubun sanulu resin rua hotu-hotu, hein bei-beik nebee Na'i Maromak nala'ok Niakaan mamenon mak Nia nameno baa itakaan bei uluk sia. Mamenon nia isin na'ak, Nia atu nalo ema mak mate moris nikar.
Ama Na'i Agripa mak ha'u kakneter. Tan ha'u kfiar Na'i Maromak bele nalo ema mak mate moris nikar, ema nalo lia no ha'u. Mais ha'u kakara kusu, tan saa ema la no'uk fiar na'ak Na'i Maromak bele nalo ema mak mate moris nikar? Nia bele nanis!
9 Uluk, ha'u kase'i lia oi-oik kodi sakar ema mak tuir Yesus ema Nasaret nia. 10-11 Baa oras nia, na'ilulik ulun sia latan beran baa ha'u, nebee tonan kasusar Yesus eman sia iha uma hamulak no iha fatin hotu-hotu, nebee sia keta fiar Yesus ona. Kalo ha'u krona noo ema mak fiar Yesus iha nabee, kodi laran manas kabu'a tuir, masik to'o tasi balu. Ha'u kohi sia, dada tama baa bui iha Yerusalem. Sia balu moos kona ukun mate. ”b
Paulus nalore tenik niakaan moris dalan
12 Hotu Paulus dale natutan na'ak, “Ama Na'i Agripa! Loron ida na'ilulik ulun sia foo hakerek latan beran baa ha'u, nebee ha'u kbaa kabu'a Yesus eman sia iha kota Damsik. Ha'u moos baa. 13 Takseer loron natetu, ami sei iha dalan. Teki-tekis kroman maksinak ida tuun nosi lale'an, kona besik baa ha'u ko mamaluk sia. 14 Ami hotu-hotu hakloti baa rai tan kroman maksinak nia. Hotu ha'u krona lia maliak ida dale baa ha'u nodi lia Aramc na'ak, ‘Saulus! Saulus! Tan saa, o masusar Ha'u nune'e? Tan saa o te-tei sama Ha'u bei-beik?’ 15 Ha'u krona lia maliak nia, mais la karee ema. Hotu ha'u kusu ka'ak, ‘Ita boot mak dale ne'e, see ida?’
Lia maliak nia nataa na'ak, ‘Ha'u ne'e Yesus mak o masusar bei-beik nia. 16 Madeer! Ha'u katadu aan baa o ne'e, niakaan lia isin nune'e: Ha'u kboi kola o dadi baa Ha'ukaan ema. O musti baa katak baa ema hotu-hotu saa mak o foin maree ti'an mosi Ha'u, no lia saa mak atu katudu baa o. 17 Ha'u atu ksolok o baa ema lahoos Yahudi, mais keta mata'uk. Tan Ha'u atu klituk o kosi ema Yahudi siakaan a'aat no ema seluk siakaan a'aat. 18 Ha'u ksolok o baa loke ema lahoos Yahudi matan, nebee sia la'o nela kukun, mai moris iha kroman laran. O musti masai sia nosi diabu ulun beran, nebee sia moris no Na'i Maromak beran. Hodi nunia, Nia kasu mohu siakaan salan. Sia moos bele dadi baa Niakaan ema, manesak no ema seluk sia mak Nia boi ti'an, tan fiar Ha'u. Lia nia dei mak kakara kalore baa o, Saulus.’”
Paulus nalore niakaan serwisu
19 Hotu Paulus dale natutan na'ak, “Ama Na'i mak ha'u kakneter. Serwisu mak ha'u ksimu kosi lale'an nia, ha'u kala'ok to'o oras ne'e, la kakiduk kois. 20 Ha'u kahuu serwisu nia kodi kalore Yesus dalan moris baa ema Yahudi sia iha Damsik. Hotu ha'u kmai kalore tenik baa ema Yahudi sia iha Yerusalem no rai Yudea tomak. Hotu ti'an, ha'u kla'o kasiri ema lahoos Yahudi rain, kodi kanorin ema nebee sia soe lakon siakaan salan, hotu sera aan baa Na'i Maromak. Ha'u kalore ka'ak sia musti nalo lia di'ak bodik ema seluk, nebee dadi tadak na'ak sia dadi Na'i Maromak eman ti'an.d 21 Tan serwisu nunia, ema Yahudi sia kohi ha'u iha Uma Hamulak Huun iha Yerusalem, atu no'o ha'u. 22 Mais Na'i Maromak tulun ha'u, to'o oras ne'e ha'u ksei moris. Tan lia nia, ha'u kbele kariik iha ne'e, kodi kdale lia Yesus dalan moris baa ema ki'ik-boot hotu-hotu. Lia mak ha'u kdale ne'e, tuir saa mak Bei Musa no Maromak mako'an uluk sia nanorin ti'an. 23 Sia nanorin nosi lia Kristus, ema mak Na'i Maromak nameno ti'an atu solok mai. Nanorin na'ak, Ema nia musti natiu susar to'o mate. Mais Nia dadi baa ema dala uluk, mak Na'i Maromak nalo ema moris nikar. Nia mak atu foo kroman baa ema Yahudi no ema klubun seluk sia iha raiklaran.”e
24 Paulus sei nalore niakaan serwisu nunia, Gubernur Festus dale tesi kedan nodi lia maka'as na'ak, “Hoi! Paulus! Arumak o bula ti'an. O matene wa'in basuk, to'o okaan kakutak nalai sala.”
25 Mais Paulus nataa na'ak, “Ama Gubernur mak ha'u kakneter. Ha'u la bula. Hotu-hotu mak ha'u kalore ne'e, tebes. Ha'u la kalo-kalo aan. 26 Na'i Agripa moos natene saa mak ha'u kalore ne'e tebes, tan lia ne'e lahoos lia subar. Tan baa nia, ha'u kaberan aan dale malorek ka'ak Yesus mak mate nia, moris nikar ti'an. Ema hotu-hotu moos natene. 27 Hori uluk, Maromak mako'an sia nalore kedan lia ne'e ti'an. Ha'u katene Ama Na'i moos fiar mako'an siakaan dalen nia!”
28 Hotu Na'i Agripa dale tesi kedan na'ak, “Hoi! Paulus! O maneo o bele dada lai-lais ha'u dadi maktuir Kristus ka?”
29 Paulus nataa na'ak, “Nune'e, ama. Ha'u kamulak baa Na'i Maromak, nebee kleur ka, lais ka, lahoos ita boot mesan dei, mais ema hotu-hotu mak rona ha'u iha ne'e, bele dadi maktuir Yesus hanesan ha'u. Surak ema la neti sia nu'u ha'u.”
30 Paulus dale hotu nunia ti'an, Na'i Agripa no alin Bernike no Gubernur Festus, no ema boot sia nariik, hotu la'o.