Gubernur Porkius Festus leno Paulus
25
Oras gubernur foun Festus lori baa Kaisarea atu nahuu nala'ok ukun, nia nein iha nia loron tolu dei, hotu nia baa Yerusalem. 2 To'o Yerusalem, na'ilulik ulun sia no fukun Yahudi sia mai nasoru gubernur. Oras sia dale malu no nia, sia moos foti lia nosi Paulus. 3 Sia nusu nebee nia naruka ema nodi nikar Paulus mai Yerusalem. Mais sia du'uk ko'a kabuar lia ti'an atu no'o Paulus iha dalan klaran.4 Mais gubernur nataa na'ak, “Ama sia. Nune'e. Habusik sia natoos nia iha Kaisarea lai. Tan ha'u moos atu fila kikar lai-lais baa nebaa. 5 Kalo emi hoo ema mak natene lia ne'e, sia bele tuir ha'u. Kalo ema nia nalo sala tebes, emi bele tula sala baa nia iha Kaisarea dei.”
6-7 Dale notu nunia, Gubernur Festus nein kre'is loron sanulu iha Yerusalem, foin fila nikar baa Kaisarea. Ema Yahudi na'in hira moos tuir nia. Baa awan, gubernur loke moon-metan. Nia naruka sondadu nodi Paulus mai moon-metan.
Paulus to'o ti'an, ema Yahudi nia sia kabuun nola nia nodi tula lia oi-oik baa nia. Mais sia la bele natudu lia kakaer.
8 Hotu Paulus naloos aan na'ak, “Ama Gubernur. Ha'u la isin ida dauk kalo aat. Ha'u la ksakar amikaan ukun-badu Yahudi. Ha'u moos la kadoor Uma Hamulak Huun iha Yerusalem. Ha'u moos la sakar ukunrai Roma.”
9 Mais gubernur nakara nola ema Yahudi neon, nia nusu baa Paulus na'ak, “O manoin nunabee? Kalo ha'u ktetu okaan lia ne'e iha Yerusalem, o makara ka lale?”
10 Rona gubernur nusu nunia, Paulus nataa na'ak, “Ama gubernur, ha'u ne'e, renu Roma. Oras ne'e, kariik iha ita boot oin. Ita boot noo beran atu tetu ha'ukaan lia ne'e tuir ukun Roma. Ita boot moos hatene ti'an, ha'u la kalo sala saa ida sakar ema Yahudi ne'e sia. 11 Kalo tebe-tebes ha'u kalo sala mak fatan no ukun mate, ha'u ksimu. Mais kalo siakaan dalen nia la loos, ha'u la ksimu. Ema moos la bele latan ha'u baa sia. Oras ne'e, ha'u kusu nebee ha'ukaan lia ne'e hasa'e tenik baa ukunrai ulun boot iha kota Roma. Nebee nia du'uk mak nakotu lia ne'e!”
12 Rona Paulus nusu nunia, gubernur dale no niakaan maluk matenek ukun sia. Sia tetu bele-bele, hotu gubernur katak baa Paulus na'ak, “Tan o musu nunia, o musti baa Roma.” Dale notu, gubernur taka moon-metan.
Gubernur Festus nasara lia Paulus baa Na'i Agripa
13 Baa oras nia, na'i Yahudi naran Agripa. Alin feto, naran Bernike. Sia rua mai Kaisarea atu foo kneter baa gubernur foun.a 14 Sia nein loron hira no gubernur. Hotu loron ida, gubernur nasara lia nosi Paulus baa sia rua na'ak, “Iha Kaisarea ne'e, ami heti ema ida naran Paulus. Uluk gubernur tuan la noo leet nakotu niakaan lia. 15 Foin da-dauk ne'e ha'u iha Yerusalem, na'ilulik ulun sia no fukun Yahudi sia mai katak Paulus salan baa ha'u. Sia nusu nebee ha'u ktaa ukun baa nia. 16 Mais kataa ka'ak, ‘Tuir ukun Roma, ha'u kmusti leno uluk lia nia lai, foin taa ukun. Ema mahalo lia sia musti nasoru malu. Ha'u kmusti rona nosi sia hotu. Kmusti krona sia tula sala saa baa nia. Ha'u moos musti foo leet baa nia atu naloos aan.’ 17 Baa oras ha'u kmai kikar Kaisarea ne'e, ema Yahudi na'in hira moos tuir. Baa awan, ha'u kloke kedan lia nia. Ha'u karuka ema nodi Paulus tama mai, nebee kbele katene lia nia huun-dikin. 18 Hotu ema Yahudi sia nariik, nalore Paulus salan sia. Mais la todan manesak no saa mak ha'u kaneo. 19 Sia sakar malu, tan siakaan hanorin du'uk. Sia sakar Paulus tan lia nosi ema ida naran Yesus. Tuir ema Yahudi nia sia, Yesus mate ti'an. Mais tuir Paulus, Yesus moris nikar ti'an. 20 Sia toe malu nunia, mais ha'u la katene kakotu lia nia nunabee, tan ha'u ema foun. Hotu kusu Paulus ka'ak, ‘Nu'unabee kalo sia leno okaan lia ne'e iha Yerusalem dei?’ 21 Mais nia la no'uk. Nia nusu hasa'e tenik baa ukunrai ulun boot iha Roma. Tan nunia, ha'u katoos nia to'o noo leet, foin solok nia baa Roma.”
22 Rona Gubernur Festus dale nunia, Na'i Agripa nusu na'ak, “Kalo bele, ha'u kakara rona du'uk nosi ema nia.”
Gubernur nataa na'ak, “Bele! Ha'u atu kahulin nebee awan ama bele rona du'uk nosi nia.”
Na'i Agripa mai rona Paulus dale
23 Baa awan, Gubernur Festus nahulin nebee Na'i Agripa bele rona du'uk Paulus dale. Nia moos nahulin nebee ema seluk tuir rona. Sia nia, sondadu ulun boot no ema boot seluk sia nosi kota Kaisarea. Baa oras nia, Na'i Agripa no Bernike tau na'in isi belun, hotu tama mai. Ema hotu-hotu foo kneter baa sia. Hotu gubernur naruka ema natama Paulus.
24 Paulus tama ti'an, gubernur nahuu dale na'ak, “Na'i Agripa, no ama sia, no bainaka sia hotu-hotu mak ha'u kakneter. Ema ne'e, naran Paulus. Ema nalo lia no nia. Sia mai nasara baa ha'u iha Yerusalem no iha kota ne'e na'ak, ema ne'e la fatan moris. 25 Hotu ha'u kleno nia, mais la ketan sala mak fatan kona ukun mate. Mais, tan nia du'uk nusu hasa'e tenik baa huun, ha'u kmusti solok nia baa Roma. 26-27 Kalo ha'u ksolok nia, musti solok no hakerek bodik ulun boot ukunrai Roma. Mais la katene atu kakerek saa. Tan baa nia, ha'u klibur ama sia hotu-hotu atu rona nia. Rona hotu, ha'u kaloon Ama Na'i Agripa foo tate'an baa ha'u, nebee ha'u kbele kakerek lia malorek baa ulun boot ukunrai Roma. Koran la di'ak, kalo ha'u ksolok lia ne'e baa huun, mais la kalore ema ne'e salan.
Ha'ukaan dalen nunia dei.”