3 La'o hela Kaisarea ti'an, baa awan ami to'o kota Sidon. Sondadu ulun Yulius laran di'ak baa Paulus nodi foo baa nia baa naree niakaan mamaluk sia iha rai maran, nebee sia naliku nia no bele foo sa-saa baa nia.

4 Hotu ami sa'e hikar baa roo nia atu la'o liu. Mais anin sakar maka'as resik, to'o roo la nakfofer aan. Hotu ema roo sia bedok roo nia tuir rai Siprus no rai maran Siria leet, atu neli aan nosi anin. 5 Hotu ami la'o teri tasi iha rai Kilikia no rai Pamfilia oin, baa liu to'o kota Mira iha rai Likia. To'o baa, ami hotu-hotu tuun hosi roo. 6 Iha kota Mira nia, sondadu ulun Yulius buka roo seluk mak ami atu sa'e baa Italia. Netan ti'an roo ida nosi kota Aleksandria, nia naruka ami hotu-hotu sa'e.

7 Ami la'o loron hira ti'an, mais roo la fofer aan baa oin tan anin sakar maka'as. Ami la'o susar basuk tebes, to'o hare'is aan baa rai Knidus. Mais anin sei boot bei-beik, dadi ami la'o tesi baa rai Kreta, nebee hali aan baa anin. Hodi nunia, ami la'o liu rai inur ida, naran Salmone. 8 Ami la'o susar basuk liu rai hasan nia, halolon rai Kreta tasi tehen, foin to'o namon ida mak kre'is baa kota Lasea, naran Namon Kabaas.

9 Iha nia ema roo sia nanawa kole, tan ami la'o kleur basuk ti'an, mais sei la to'o Italia dauk. Baa oras nia, ema Yahudi loron boot halirin aan siku ti'an.^a Ne'e na'ak, oras anin maka'as no laloran boot nahuu moris. Tan lia nia, ema roo sia dale baa malu atu la'o liu ka lale. Rona nola nunia, Paulus dale na'ak, 10 “Mamaluk sia. Ha'u kusu dale oan ida. Ha'u kaneo kalo ita la'o liu, ita hetan maufinu. Bele-bele roo ne'e mout, hotu naha sia lakon, to'o ita moos mate mohu.” 11 Mais sondadu ulun Yulius la no'uk rona Paulus. Nia fiar baa roo ulun no roo na'in, tan sia nakotu ti'an atu la'o luku. 12 Sia natene Namon Kabaas nia la nakmatek, kalo noo roo naknamon iha nia oras laloran. Tan nunia, sia nakara la'o liu baa kota Feniks. Sia nakara ami hein iha nia baa oras laloran mosu. Kota Feniks nia, namon mak kabaas kaliuk iha rai Kreta, tan nalik aan nosi anin lorotoba balu-baluk, no la kona laloran boot.

13 Hotu, anin tasi lorokbelan nahuu nakiis. Ema roo sia naneo na'ak sia bele tuir anin nia baa kota Feniks. Sia dale na'ak, “Anin ne'e di'ak. Ita baa ona!” Hotu sia foti sao, dada sa'e tais roo, hotu la'o nalolon tasi tehen. 14-15 Ami la'o la kleur, anin boot moos mai. (Anin nia mak ‘anin tasi lorosa'e’.) Anin nia nuu naklele roo baa tasi klaran. Ema roo sia la bele feur nola, dadi sia nabusik roo naklele dei tuir anin.

16 Ami haklele tuir anin nunia, to'o kre'is rai ki'ik ida naran Kauda. Oras nia, bero ida sei kesi iha roo kotuk. Ami kole tebes dada hasa'e bero nia baa roo laran. 17 Hasa'e ti'an, ema roo sia kesi nalik roo nia, tan sia natauk keta-keta niakaan ai kabelak nakloke, hotu mout. Sia moos nata'uk keta-keta anin nuu nala'o roo to'o naktuka baa raihenek tasi tehen ida naran Sirtis iha Afrika nebaa. Tan baa nia, sia natuun tais roo, nebee roo bele nakraik.

18 Anin dadurus nia fake amikaan roo nia karuk-kwana to'o awan. Baa oras nia, ema roo sia nahuu foti naha, soe baa tasi atu namaan roo. 19 Baa awan tenik, anin dadurus sei maka'as. Sia hetak nata'uk, to'o soe tenik naha. Sia moos soe baho'ak roo sia. 20 Loron-kalan anin dadurus nia la nanawa to'o loron hira sia. Ababun ma'ar to'o ami la bele haree loro no fitun. Ami hotu-hotu horan ami la moris tenik ona.

21 Loron hira nia, ami la haa-hemu. Hotu Paulus katak baa ema hotu-hotu iha roo nia na'ak, “Mamaluk sia! Kalo emi tuir ha'u hodi la la'o hela Namon Kabaas, ita la hetan susar boot ne'e, no ita la halakon sa-saa. 22 Mais oras ne'e, ha'u kusu emi hotu-hotu neon boot baa dei. Itakaan roo ne'e atu dodok welon, mais lalika hata'uk, tan la noo ida mak mate. 23 Nebee emi hotu-hotu hatene, ha'u ne'e Na'i Maromak ain-liman. Hori fonin Nia naruka makbukar lale'an ida mai nariik iha ha'u sorin nodi katak na'ak, 24 ‘Paulus! Lalika mata'uk! Na'i Maromak nakotu kedan na'ak o musti masoru ulun boot ukunrai iha Roma, nebee nia tetu okaan lia. Na'i Maromak laran di'ak baa o. Nia atu sori o mo ema hotu-hotu iha roo ne'e.’ 25 Tan lia nia, mamaluk sia lalika neon lakon. Ha'u kfiar tebe-tebes Na'i Maromak atu nala'ok saa mak Nia katak baa ha'u hori fonin aan. 26 Mais roo ne'e atu naktaman iha rai ida.”

27 Laloran no anin fake nakdiuk to'o ami haklele loron sanulu resin haat iha Tasi Adria. Nare'is kalan boot, ema roo sia noran hanesan ami hare'is aan baa rai maran ti'an. 28 Sia natuun fatuk sasukat atu nodi natene wee niakaan le'an. Sia sukat nola ro'a tomak rua nulu. Roo soruk tenik baa, sia sukat tenik netan ro'a tomak sanulu resin lima.^b 29 Sia hotu-hotu nata'uk, keta to'o roo naktaman baa fatuk moris. Tan lia nia, sia natuun sao fuan haat iha roo kotuk. Ami hotu-hotu haloon nebee loro sa'e lai-lais. 30 Mais baa oras nia, ema roo sia kabuar lia atu sai no-nook la'o nela roo nia. Sia natuun bero, nodi asufanu natuun sao baa roo oin.

31 Mais Paulus natene siakaan kakutak aat. Nia katak baa sondadu ulun no sondadu seluk sia na'ak, “Kalo ema roo sia la nein iha roo ne'e, emi atu mate mohu.”

32 Rona Paulus dale nunia, sondadu sia baa taa kotu bero talin, nabusik bero nia naklele. Hodi nunia, ema roo sia la bele la'o nela roo nia.

33 Oras rai atu nakroma, Paulus namaus ema atu naa. Nia dale na'ak, “Domiku rua ne'e laran, ita hanoin susar dei, la haa-hemu saa ida. 34 Di'ak liu ita haa-hemu lai, nebee ita biit hikar, tan la noo ida mak atu mate. Ita hotu-hotu nanis moris.”

35 Dale notu nunia, Paulus foti tubi nodi namulak sera dodan baa Na'i Maromak iha siakaan oin. Hotu nia nola tubi rohan ida, nodi naa. 36-37 Naree nunia, ema hotu-hotu moos neon biit nikar. Ami haa bele-bele. Ami hotu-hotu mak iha roo laran nia, ema na'in atus rua hitu nulu resin neen. 38 Haa bosu ti'an, ema roo sia nahuu foti soe kakaluk hare gandum sia baa tasi laran nebee namaan tenik roo.

39 Rai naroma ti'an, ema roo sia titu-naree rai maran. Mais sia la natene rai maran saa. Sia moos naree rai hasan mahoo raihenek iha tasi tehen. Sia naloon, kalo bele sia nodi roo liu fatuk moris sia, baa tasi tehen nia. 40 Tan nunia, sia taa kotu sao sia iha tasi laran. Sia moos natuun roo fafofer nodi nala'o roo nia. Hotu sia nasa'e tais roo ki'ik baa oin, nebee anin nuu nodi roo baa tasi tehen. 41 Mais roo nia nalai tula aan baa foho raihenek iha tasi laran. Roo naktaman iha nia, la naklele tenik. Hotu laloran boot fake nadodok roo kotuk.

42 Naree nunia, sondadu sia naneo atu no'o ema bui sia hotu-hotu. Sia nata'uk keta to'o ema bui sia nani baa rai maran, hotu nalai lakon. 43 Mais sondadu ulun Yulius saseni sia, tan nakara sori Paulus. Nia naruka ema hotu-hotu mak bele nani, naksoit baa tasi laran, nani baa rai maran. 44 Nia moos naruka ema mak la bele nani, kaer ai rohan, lale saa dei, hotu naklele tuir laloran baa rai maran. Hodi nunia, ami hotu-hotu to'o di'a-di'ak baa rai maran.