Paulus katak lia nosi niakaan moris uluk
22
Paulus moos dale na'ak, “Ama sia no mamaluk sia hotu-hotu! Ha'u kusu emi rona baa ha'u, tan ha'u kakara kaloos aan.”2 Baa oras ema lear nia rona Paulus dale nodi siakaan lian du'uk, sia no-nook kedan. Hotu Paulus dale natutan na'ak, 3 “Surak emi hatene ha'u ne'e, ema Yahudi. Ha'ukaan ina nahoris ha'u iha kota Tarsus iha rai Kilikia. Mais ha'u kboot iha kota Yerusalem ne'e. Ema manorik mak nanorin ha'u, itakaan manorik boot iha ne'e, naran Gamaliel. Nia nanorin ha'u Ukun-badu Bei Musa hotu-hotu. Ha'u moos madinas tuir Na'i Maromak, hanesan emi.a 4 Uluk ha'u kasusar ema mak tuir Yesus dalan moris. Ha'u kdada kola feto no mane, katama sia baa bui. Ha'u kasusar sia nunia, to'o balu moos mate. 5 Itakaan na'ilulik ulun boot no ulun rumak sia hotu-hotu natene ha'u kdale ne'e, tebes. Tan sia du'uk mak foo hakerek latan beran baa ha'u, kodi baa kohi ema mak tuir Yesus kosi kota baa kota, to'o kota Damsik. Oras nia, ha'u kakara kohi ema iha kota Damsik, dada kodi mai Yerusalem, nebee sia moos kona kastikar.”b
Paulus katak lia nosi nia nasoru Na'i Yesus
6 Hotu Paulus dale natutan na'ak, “Baa loron ida ha'u kla'o baa kota Damsik atu buka ema mak tuir Yesus iha nebaa. Takseer loron natetu, ami kre'is baa kota ona. Teki-tekis kroman maksinak ida tuun nosi lale'an, kona besik baa ha'u. 7 Ha'u moos kakloti baa rai. Hotu ha'u krona kola lia maliak ida bolu ha'u na'ak, ‘Saulus! Saulus! Tan saa o masusar Ha'u nune'e?’ 8 Ha'u krona tebes lia maliak nia, mais la karee ema. Hotu ha'u kusu ka'ak, ‘Ita Boot mak dale nia, see ida?’
Hotu lia maliak nia nataa na'ak, ‘Ha'u ne'e Yesus, ema Nasaret mak o masusar nia!’ 9 Ha'u mesan rona lia maliak nia, mais ha'ukaan mamaluk sia la rona. Sia naree loos kroman maksinak nia dei.
10 Hotu ha'u kataa ka'ak, ‘Kalo nunia, oras ne'e ha'u kmusti kalo saa?’
Lia maliak nia katak tenik na'ak, ‘Madeer, tama baa kota ona. Iha nia, foin Ha'u katak saa mak o musti malo.’
11 Krona nunia, ha'u moos kadeer kariik. Mais ha'u la kbele karee sa-saa tenik, tan kroman nia meik liu resik. Ha'ukaan mamaluk sia kaer ha'u, nadaek tama ha'u baa kota Damsik.
12 Iha kota nia noo ema ida naran Ananias. Nia kaer metin Ukun-badu Bei Musa. Ema Yahudi hotu-hotu iha kota nia, beer no nakneter nia. 13 Nia mai buka ha'u, hotu nia dale baa ha'u na'ak, ‘Mau Saul! Loke matan, titu-maree ona! Tan mau matan di'ak ti'an.’ Nia dale hotu nunia, ha'u kfoti oin, karee kedas. 14 Hotu nia nalore na'ak, ‘Hori uluk itakaan bei uluk sia namulak baa Na'i Maromak. Oras ne'e, Na'i Maromak boi mau ti'an atu serwisu bodik Nia. Mau musti natene di'a-di'ak Niakaan hakaran. Mau moos musti natene Yesus, mak Niakaan “Ema Moon”. Oras ne'e Nia loke dalan ti'an, nebee mau rona du'uk nosi Yesus. 15 Nia boi mau ti'an atu baa katak Niakaan Manfatin baa ema hotu-hotu. Mau musti katak sain hotu-hotu mak mau naree no rona nosi Nia. 16 Sei mein saa tenik? Baa ona, musu simu sarani ona. Sarani nia dadi tadak na'ak, mau naloon ti'an baa Yesus, nebee Nia kasu mohu mau salan.’”
Paulus katak lia nosi Na'i Maromak solok nia baa ema lahoos Yahudi
17 Hotu Paulus dale natutan tenik na'ak, “Nunia hotu, ha'u kfila baa Yerusalem. Baa loron ida, ha'u kbaa kamulak iha Uma Hamulak Huun. Oras kamulak, Na'i Maromak nalore baa ha'u, hanesan me'i. 18 Ha'u karee Yesus, hotu Nia naruka ha'u na'ak, ‘Oras ne'e, o musti la'o mela kota Yerusalem ne'e! Tan ema iha ne'e la simu o manorin lia nosi Ha'u.’
19 Mais ha'u la ksimu. Hotu ha'u kdale ka'ak, ‘Lale, Ama Boot! Ha'u mak fatan kanorin sia iha ne'e, tan ema hotu-hotu natene hori hirak nia, ha'u mak tama-sai uma hamulak sia atu kohi no ta'e ema mak fiar baa Ama Boot. 20 Na'ilulik ulun sia moos natene baa oras sia no'o Ama Boot klosan Stefanus, ha'u moos iha nia. Ha'u moos kakara. Baa oras sia libur fatuk hotu nitak no'o nia, ha'u mak daka siakaan faru.’c
21 Masik ha'u ksakar nunia moos, Yesus naruka tenik na'ak, ‘Keta seni oi-oik! La'o mela Yerusalem oras ne'e ona! Tan Ha'u kakara karuka o baa fatin dook atu manorin ema lahoos Yahudi sia.’”
22 Oras ema lear nia rona Paulus dale na'ak, nia nanorin ema lahoos Yahudi, sia la no'uk rona tenik baa nia ona. Sia hotu-hotu krakat nodi nahii bele-bele na'ak, “Keta rona ema ne'e! Nia la fatan moris! Ho'o nia dei!
Sondadu sia natama Paulus baa siakaan fatin
23 Ema lear nia krakat liu resik, to'o ra'ut nola ahukresan soe sa'e baa leten. Sia moos kolu lu'as siakaan faru. 24 Naree nunia, sondadu ulun boot naruka ain-liman sia natama Paulus baa sondadu fatin. Hotu, nia naruka sia fota no'at Paulus, nebee nia katak nia nalo sala saa, to'o ema Yahudi atu no'o nia. 25 Mais baa oras sia kesi atu fota no'at nia, Paulus nusu fila baa sondadu ida na'ak, “Tuir rai Roma ukun, lia nabee mak loos? Kalo ema Roma du'uk kona lia, emi halo oin nunabee baa nia? Emi ta'e uluk nia ka, leno uluk nia?”
26 Rona nola nunia, sondadu nia lai-lais baa buka sondadu ulun boot. Nia nasara na'ak, “Ama! Ema ne'e, ema Roma! Dadi, ita boot atu halo saa baa nia?”
27 Rona nola nunia, sondadu ulun boot nia baa nusu du'uk Paulus na'ak, “Ha'u krona o ne'e, ema Roma! Tebes ka?”
Paulus nataa na'ak, “Tebes! Ha'u ne'e moos ema Roma.”
28 Hotu sondadu ulun boot nia nataa na'ak, “Ha'u moos ema Roma. Ha'u kselu todan tebe-tebes, foin bele dadi ema Roma.”
Mais Paulus nataa na'ak, “Kalo ha'u, lale. Tan nahuu nosi ha'u kfoin moris, ha'u ema Roma ti'an.”
29 Oras rona na'ak Paulus nia moos ema Roma, sondadu sia nakiduk nela nia. Sondadu ulun boot moos noran nata'uk, tan baa oras nia naruka kesi Paulus, ne'e na'ak, nia nakur ukun Roma ti'an.
Paulus naloos aan iha moon-metan Yahudi
30 Baa awan, sondadu ulun boot nia sei buka atu natene malorek lia nia huun-dikin. Nia naruka ain-liman sia baa bolu nola na'ilulik ulun sia no ema boot Yahudi seluk sia, nebee tuur moon-metan. Nia moos naruka baa nabusik Paulus, nebee nia mai nataa iha moon-metan.