Saulus fiar baa Yesus
9
Baa oras nia, Saulus nasusar bei-beik Yesus eman sia. Nia moos buka dalan atu no'o sia. Nia baa nasoru na'ilulik ulun boot 2 atu nusu hakerek latan beran. Nia beer nodi hakerek nia foo baa uma hamulak ulun sia iha kota Damsik. Hodi nunia, kalo nia nasoru ema mak tuir Yesus dalan moris iha Damsik, nia bele kohi sia, hotu kesi nodi baa Yerusalem, nebee sia netan kastikar iha nia. Feto ka, mane ka, nia kohi luku.3 Simu nola hakerek latan beran nia, Saulus no niakaan mamaluk sia baa Damsik. To'o kota luan, teki-tekis kroman maksinak ida tuun nosi lale'an, kona besik baa Saulus. 4 Nia nakloti baa rai. Hotu nia rona lia maliak ida bolu na'ak, “Saulus! Saulus! Tan saa o masusar Ha'u nune'e?”
5 Rona nola nunia, Saulus nusu na'ak, “Ita Boot mak dale ne'e, see?”
Lia maliak nia moos nataa na'ak, “Ha'u ne'e, Yesus mak o masusar! 6 Madeer, tama baa kota ona! Iha nia foin Ha'u atu katak saa mak o musti malo.”
7 Baa oras nia Saulus niakaan mamaluk sia moos rona lia maliak nia. Mais sia la naree saa ida. Sia neon lakon, to'o la bele dale sa-saa.
8 Hotu Saulus nadeer nariik. Nia loke kokon matan, mais la bele naree ti'an. Niakaan mamaluk sia kaer nola liman, nadaek tama baa kota Damsik. 9 Loron tolu laran, nia la bele naree sa-saa. Nia moos la naa-nemu sa-saa.
10 Iha kota nia, noo Yesus eman ida naran Ananias. Na'i Maromak natadu aan baa nia tuir me'i, nodi bolu nia na'ak, “Ananias!”
Ananias nataa na'ak, “He'e, Na'i Maromak!”
11 Na'i Maromak katak na'ak, “Mai lai! Baa buka mola Ha'ukaan ema ida. Nia nein no ema ida naran Yudas. Yudas uman nia iha dalan ida naran Dalan Loos. Iha uma nia, noo ema Tarsus ida naran Saulus. Oras ne'e, nia no'i namulak. 12 Ha'u katudu baa nia ti'an ka'ak, mane ida naran Ananias atu mai baa nia. O musti baa rai liman baa nia, nebee nia bele naree nikar.”
13 Mais Ananias nataa na'ak, “Keta nunia, Ama Boot! Ami rona ema dale karuk-kwana nosi ema nia. Nia ema aat basuk mak nasusar tebe-tebes Yesus eman sia iha Yerusalem. 14 Oras ne'e, nia mai iha Damsik ne'e ti'an. Ami rona ha'ak na'ilulik ulun sia foo hakerek latan beran baa nia, atu nodi kohi mohu ema mak tuir Yesus dalan moris iha ne'e.”
15 Mais Na'i Maromak nataa na'ak, “Keta sakar Ha'u! Baa ona! Tan Ha'u kboi nia ti'an atu loke dalan bodik Ha'u. Nia atu keke Ha'ukaan Manfatin baa ema Isra'el sia no ema nosi klubun seluk sia. Nia moos atu katak no baa na'i sia. 16 Ha'u du'uk atu kalore baa nia nosi susar oi-oik mak nia atu netan, tan tuir Ha'u.”
17 Rona Na'i Maromak dale nunia, Ananias baa kedan uma nia. Nia rai liman baa Saulus nodi na'ak, “Mau Saul. Na'i Yesus mak o maree iha dalan klaran oras mai iha Damsik ne'e, Nia mak naruka ha'u kmai atu kamulak kodi rai liman baa o, nebee o bele maree mikar. Nia moos nakara o simu Niakaan Kmalar Lulik.”
18 Ananias dale notu nunia, Saulus noran buat ida hanesan na'an tasi klalanus naklu'as sai nosi matan. Sai ti'an, matan moon kedas. Nia nadeer, hotu nia simu sarani. 19a Simu sarani ti'an, nia naa-nemu to'o isin moos biit nikar.
Saulus katak Lia Di'ak nosi Yesus iha kota Damsik
19b Nunia hotu, Saulus sei nein loron hira tenik no Yesus eman sia iha kota Damsik. 20 Nia moos tama baa uma hamulak Yahudi nodi katak na'ak, “Rona! Yesus nia, tebe-tebes Na'i Maromak Oan!”
21 Mais ema mak rona Saulus dale nunia, sia blaar no benar. Sia dale baa malu na'ak, “Nia ne'e, ema aat nia mak nasusar Yesus eman sia iha Yerusalem! Nia mai ne'e atu kohi sia nodi baa na'ilulik ulun sia. Tan saa oras ne'e, nia nanorin lia nosi Yesus! Aaa! Nunabee ti'an?”
22 Mais Saulus beran hetak kleur, hetak maka'as. Sura loron nia foo lia kakaer na'ak, Yesus nia, tebe-tebes Kristus mak Na'i Maromak nameno kedan hori uluk. Nia nanorin kabaas nunia, to'o ema Yahudi sia la bele nataa sa-saa.
23 La kleur, ema Yahudi sia ko'a lia atu no'o nia. 24 Loron-kalan ema daka iha kota nanokar atu no'o nia. Mais Saulus natene nola siakaan kakutak dois nia. 25 Hotu, baa kalan ida, niakaan mamaluk na'in hira natama nia baa ko'e boot ida, natuun nia tuir kota kadidin. Hodi nunia, nia sai nela kota Damsik.a
Saulus baa Yerusalem
26 Saulus niakaan mamaluk sia nasai nia nosi Damsik ti'an, nia baa Yerusalem. To'o nebaa, nia nakara namutuk no Yesus eman sia. Mais sia nata'uk, keta-keta nia asu fanu tuir Yesus, nebee nia bele kohi tenik sia. 27 Mais iha nia, noo ema ida naran Barnabas. Nia namalu Saulus, hotu nodi nia baa nasoru Kristus klosan sia. Barnabas katak baa klosan sia na'ak, Saulus nasoru Yesus ti'an iha dalan baa Damsik. Yesus moos dale du'uk no Saulus. Hotu Saulus la nata'uk katak lia nosi Yesus baa ema iha Damsik.
28 Rona nola nunia, sia moos simu Saulus. Hotu Saulus nein namutuk no sia iha Yerusalem. Nia la nata'uk katak lia Yesus baa se-see dei. 29 Nia moos toe no ema Yahudi na'in hira mak dale lia Yunani. Mais sia la no'uk simu niakaan dalen, to'o sia buka dalan atu no'o nia. 30 Yesus eman seluk sia rona ema buka dalan aat nunia baa Saulus, sia nodi Saulus baa kota Kaisarea. Hotu, sia solok nikar nia baa niakaan kota Tarsus.
31 Nunia hotu, Yesus eman sia iha rai Galilea no rai Samaria moris mamatek. Sia moos hetak wa'in. Sia moris tuir Na'i Maromak hakaran. Kmalar Lulik moos nakbiit siakaan neon.
Petrus nadi'ak nola mane ida iha leo Lida
32 Baa oras nia, Petrus la'o nasirin fatin hotu-hotu atu naree Yesus eman sia. Dala ida nia baa leo ida naran Lida. 33 To'o baa, nia nasoru mane ai kma'as ida naran Eneas. Ema nia la nadeer nosi toba fatin tinan walu ti'an.
34 Naree nunia, Petrus katak baa ema nia na'ak, “Eneas! Oras ne'e, Yesus Kristus nadi'ak nola o ti'an. Madeer ona! Mahulin toba fatik.”
Rona nola nunia, Eneas moos nadeer, hotu nahulin toba fatin. 35 Oras ema leo Lida no leo Saron naree nia di'ak ti'an, sia hotu-hotu moos fiar baa Yesus.
Petrus nalo Ina Tabita moris nikar
36 Iha kota Yope tasi tehen, noo feto ida naran Tabita. (Tuir lia Yunani, naran Tabita na'ak, Dorkas.)b Feto nia moos fiar baa Yesus. Loron-loron nia nalo di'ak baa ema no tulun ema susar sia. 37 Baa loron ida, Tabita moras, hotu mate. Ema nariis nia, hotu falun niakaan maten, natoba iha ke'an tetu leten. 38 Oras nia moos, sia rona Petrus iha leo Lida. Leo nia dook nosi kota Yope, la'o rai kre'is loron baluk ida. Sia solok ema na'in rua baa bolu nola Petrus. Nasoru ti'an, sia katak na'ak, “Ama! Ami hakara ama mai lai-lais baa kota Yope lai.”
39 Rona nola nunia, Petrus baa kedan no sia. To'o nebaa, nia tama liu baa ina Tabita ke'an. Ke'an nia nakonu no feto faluk mak no'i tanis Tabita maten. Sia moos natudu baa Petrus faru no tais mak Tabita lita bodik sia.
40 Hotu Petrus naruka sia sai. Nia moos nakni'a namulak. Hotu nia mana baa maten nia nodi dale na'ak, “Tabita! Madeer ona!” Teki-tekis feto nia loke matan. Titu-naree Petrus, nia moos nadeer tuur. 41 Hotu Petrus kaer liman, nodi foti nariik nia. Nia moos bolu nola feto faluk no ema seluk sia, hotu latan nikar baa sia Tabita mak moris nikar ti'an nia.