Paulus nakara fila baa Yerusalem
21
Ami tami malu ho fukun sarani kota Efesus sia ti'an, ami sa'e roo tasi hodi neon todan. Hotu ami la'o liu baa rai Kos. Baa awan, ami to'o rai Rodos. Hosi nia, ami la'o liu tenik baa namon ida naran Patara. 2 To'o Patara, ami tuun, hotu sa'e roo seluk baa rai Fenisia, kre'is rai Siria. Sa'e ti'an, ema foti sa'e sao kedan. 3 La kleur, ami haree rai Siprus iha sorin karuk, mais ami liu to'o soe sao iha kota Tirus iha rai Siria, tan ema roo sia atu natuun naha iha nia. 4 Tan sia natuun naha sei kleu-leur, ami moos tuun baa buka Yesus eman sia iha nia. Hasoru ti'an, ami hein ho sia domiku ida laran. Sia netan tadak nosi Maromak Kmalar Lulik ti'an, nebee nakahik Paulus baa Yerusalem. Mais nia la no'uk rona. 5 Domiku ida hotu ti'an, ami fila hikar baa roo. Yesus eman sia hotu-hotu no nela ami to'o tasi tehen. Sia feto-mane, ki'ik-boot, matas-lawarik baa hotu. To'o tasi tehen ti'an, ami hotu-hotu hakni'a hodi hamulak bele-bele. 6 Hamulak hotu, ami moos tami, sa'e baa roo. Sia moos fila.
7 Hosi Tirus, ami tuli kota Ptolemais. Iha nia ami tuun, baa buka Yesus eman sia. Hasoru ti'an, ami hein ho sia loron ida. 8 Baa awan, ami la'o hosi nia, baa kota Kaisarea. Iha nia, ami hein iha Filipus uman. Filipus nia, ema mak dala uluk nodi Lia Di'ak nosi Yesus baa fatin nia. Nia moos ema ida nosi ema na'in hitu, mak klosan sia boi nola atu fa'e haan bodik feto faluk sia iha Yerusalem.a 9 Filipus oan feto, na'in haat. Maromak nalo sia baa mako'an, nebee katak Niakaan hakara.
10 Ami hein iha nia loron hira ti'an, Maromak mako'an ida naran Agabus mai nosi rai Yudea.b 11 Oras nia nasoru ami, nia nola Paulus bolas, hotu kesi ain-liman du'uk nodi katak na'ak, “Na'i Maromak Kmalar Lulik na'ak, ‘Bolas ne'e na'in, atu netan susar. Ema Yahudi sia atu kesi bobar nia nune'e iha Yerusalem. Hotu sia atu latan nia baa ema lahoos Yahudi liman.’”
12 Rona Agabus dale nunia, ami hotu-hotu hakahik bei-beik Paulus nebee keta baa tenik Yerusalem ona. Ami mak Paulus niakaan mamaluk serwisu, ho Yesus eman sia nosi fatin nia, bele-bele hakahik nia nunia. 13 Mais Paulus nataa na'ak, “Lale! Ha'u kmusti baa. Tan saa emi tanis? Emi hatodan ha'u dei. Masik ema kesi ha'u no no'o ha'u moos, ha'u ksimu. Surak ha'u ktuir ha'ukaan Na'in mak Yesus.”
14 Rona Paulus dale nunia, ami hatene nia la no'uk rona ami. Tan baa nia, ami hamamar nia hodi ha'ak, “So'in baa! Nebee tuir Na'i Maromak hakaran dei.”
Paulus to'o Yerusalem
15 Ami hein loron hira tenik, ami moos hadi'a naha baa Yerusalem. 16 Yesus eman na'in hira nosi Kaisarea moos tuir ami baa Yerusalem. Sia nodi ami baa uma ida iha Yerusalem, nebee ami hein iha nia. Uma nia na'in, naran Manason. Nia nosi rai Siprus. Nia fiar Yesus kleur ti'an. 17 To'o nebaa, mamaluk makfiar sia hotu-hotu simu ami nodi neon di'ak.
Paulus baa naree Yakobus
18 Baa awan, ami baa hasoru Yakobus. Fukun sarani seluk hotu-hotu moos namutuk iha nia. 19 Tabe malu hotu, Paulus katak na'ak, “Na'i Maromak babilan ha'ukaan serwisu ti'an, to'o ema lahoos Yahudi moos fiar baa Yesus.” 20 Rona Paulus dale nunia, sia hotu-hotu tonu-naboot Na'i Maromak.
Sia moos katak baa Paulus na'ak, “Mau! Surak ita hatene, ema Yahudi rihun-rihun moos fiar ti'an baa Yesus. Sia sei kaer metin Ukun-badu mak Bei Musa natuun baa ita ema Yahudi. 21 Mais noo ema mai nasa'e uluk lia baa sia na'ak, mau nanorin la loos. Sia tula sala na'ak, mau nanorin ema Yahudi nebee lalika tuir Ukun-badu Bei Musa ona. Sia moos nasalak na'ak, mau hakahik sia nebee keta nalo adat hamane aan baa siakaan oan mane. No lalika tuir itakaan adat Yahudi seluk sia. 22 Ema Yahudi iha Yerusalem ne'e rona lia anin nia ti'an. Sia krakat basuk baa mau. Oras ne'e, sia moos rona na'ak mau mai ti'an. Ita buka dalan nunabee?
23 Tuir ami nune'e: Noo amikaan mamaluk na'in haat. Uluk sia namate menon no Na'i Maromak atu nalo buat ida. Oras ne'e, sia atu koi molik ulun, nalo baa tadak na'ak sia nala'ok hotu siakaan mamenon ti'an. 24 Kalo bele, mau namutuk no sia baa Uma Hamulak Huun. Mau musti tuir sia modi malo adat hamoos aan. Mau moos musti selu bodik ema mak nala'ok adat nia. Kalo mau nalo nunia, ema natene mau sei kaer metin itakaan Ukun-badu nosi Bei Musa. Hodi nunia sia filak lia anin hotu-hotu nia, lia tolek!c
25 Mais bodik ema lahoos Yahudi mak fiar ti'an baa Yesus, ami solok ti'an hakerek ida bodik sia. Ami katak amikaan kakotun hori hirak nia ha'ak, sia lalika tuir mohu itakaan adat Yahudi. Mais sia musti nala'ok lia ida-rua ne'e: Keta halo lia kfo'er, keta haa na'an sera baa kukun, keta haa na'an raan, no keta haa na'an mak ema nisak no'o. Lia nia dei mak ami katak baa itakaan mamaluk lahoos Yahudi sia. Oras ne'e, kalo mau nala'ok amikaan dale ne'e, ita ema sarani mak Yahudi no lahoos Yahudi, bele moris di'a-di'ak ho malu.”d
26 Rona nola nunia, Paulus moos simu. Baa awan, nia namutuk no ema na'in haat nia nalo lahan namoos isin lolon tuir ukun-badu Yahudi. Hotu nia baa Uma Hamulak Huun nodi katak na'ak, sei loron hira tenik, foin sia ida-idak mai natama sera baa Na'i Maromak, tan sia nala'ok mohu mamenon ti'an.
Ema kohi Paulus iha Uma Hamulak Huun
27-29 Oras loron hitu atu siku ona, ema Yahudi na'in hira nosi rai Asia naree Paulus la'o iha kota Yerusalem namutuk no ema ida naran Trofimus. Trofimus nia, lahoos ema Yahudi. Nia nosi kota Efesus. Loron nia moos, ema Yahudi nia sia naree Paulus tama baa Uma Hamulak Huun. Sia na'ak falik Trofimus moos tama bele-bele no Paulus. Tan lia nia, sia krakat basuk, tan ema lahoos Yahudi la bele tama Uma Hamulak Huun. Hotu sia foti lia nia dadi baa kakaer atu nalo lia. Sia sasu'at ema atu kohi Paulus nodi nahii na'ak, “Hei! Ema Isra'el sia! Mai lai! Ema ne'e nanorin iha fatin hotu-hotu nebee ita habusik itakaan ukun. Oras ne'e nia nodi ema seluk tama baa nadois Uma Hamulak Huun!”e
30 Rona nola nunia, ema kota Yerusalem tomak laran manas. Sia nalai baa lituk nola Uma Hamulak Huun. Sia kohi nola Paulus, dada sarat nia sai nosi Uma Hamulak Huun. Hotu sia taka kedan odamatan nanokar.f
31 Sia atu no'o Paulus, mais noo ema solok lia baa sondadu ulun boot Roma na'ak ema kota Yerusalem tomak tokar lauk ti'an. 32 Rona nola nunia, sondadu ulun boot nia baa kedas ema lear nia, bele-bele no niakaan sondadu no ain-liman sia. Naree nunia, ema lear nia nanawa ta'e Paulus. 33 Hotu sondadu ulun boot naruka kohi Paulus, hotu kesi nia nodi besi talik matan rua. Hotu nia nusu baa ema lear nia na'ak, “Ema ne'e see? Nia nalo saa?”
34 Mais sia nataa la kona baa malu. Balu na'ak, “Nalo nune'e”. Balu tenik na'ak, “Nalo nunia.” Ema lear nia nahii bele-bele, to'o sondadu ulun boot benar, tan la natene lia nia huun-dikin. Hotu nia naruka sondadu sia nodi Paulus baa sondadu fatin. 35-36 Sondadu sia dada nodi Paulus baa, ema lear moos tuir. Sia hetak krakat. Baa oras sondadu sia sa'e asodan atu tama baa sondadu fatin, ema lear nalai soruk baa oin, to'o sondadu sia musti fi'it sa'e Paulus, nebee ema lear nia keta raun nadodok nia. Sia moos nahii maka'as na'ak, “Ho'o nia! Ho'o nia ona!”
Paulus nusu atu naloos aan iha ema lear oin
37 Baa oras sondadu sia atu natama Paulus baa siakaan fatin, Paulus nusu leet baa sondadu ulun boot. Nia dale nodi lia Yunani na'ak, “Ama, ha'u kbele dale ka?”
Rona Paulus dale nodi lia Yunani, sondadu ulun boot nia sarebak. Nia nataa na'ak, “O matene lia Yunani ka? Oin nunabee o bele dale lia Yunani? 38 Keta arumak ha'u kanoin sala ti'an. Ha'u ka'ak falik, o ne'e ema Mesir nia mak sasu'at ema atu sakar ukunrai. Hori hirak nia, nia libur nola ema makaer kilat na'in rihun haat iha fatin fuik. O mak ema nia ka lahoos?”
39 Paulus nataa na'ak, “Lale, ama! Ha'u ne'e, ema Yahudi. Ha'u kmoris iha kota Tarsus iha rai Kilikia. Ha'u kusu ama foo leet, nebee ha'u kbele dale ko ema lear ne'e.”
40 Rona nunia, sondadu ulun boot nia moos no'uk. Hotu Paulus nariik baa asodan leten, foti liman nodi nakahik ema lear nia nebee no-nook. Hotu nia nahuu dale nodi siakaan lia Aram du'uk. (Iha Yerusalem nia, ema Yahudi sia dale nodi lia Aram.)g